أبي الذي لم أعرفه ... وعام آخر يمر

03:06 AM Feb, 26 2015
سودانيز أون لاين
Khalid Osman Jaafar -
مكتبتي في سودانيزاونلاين




26 فبراير من عام حزين:

لسّة متذكّر اليوم ده

كنت بتفرّج علي المسلسل العربي "حسن أرابيسك" وباب البيت بدأ يدق

ضيوف؟ ما وقته! دخلت الصالون وشغلّت التلفزيون التاني عشان أكمّل المسلسل ...

شويّة كده وجاني عمّي داخل وأخدني من يدّي وطلّعني برّة

بدأ يتكلم معي ويقول المقدمة المعروفة .. إنت مؤمن والمؤمن مصاب و ...

وقتها إنتبهت لصوت البكاء من الحوش التاني

وقبل ما يقولها عرفت الحصل ..

أبوي مات ...

إنّا لله وإنّا إليه راجعون، ولا حول ولا قوّة إلا بالله العليّ العظيم

....

الأيام التالية مرّت كأنها خيال

نعم كنت ثابت والحمد لله بطريقة إستغربتها أنا نفسي؛ لكن كنت كأنّي ما مستوعب الموضوع بصورة كاملة

وشغلت نفسي بالإطمئنان علي والدتي وأختي الوحيدة

لكن ما بكيت فعلاً والموضوع بقي أمر واقع بالنسبة لي إلا وقت رفع الفراش، لمّا واحد من كبار الأسرة بدأ يتكلّم عن والدي ويقول حاجات أنا نفسي ما كنت عارفها ..

...

بدأ مرض أبوي - رحمة الله عليه - من شهور قبل وفاته

ما كان في شئ بيستقر في معدته ..

مشينا لأكتر من طبيب، والكلام البيتقال لي إنّها قرحة في المعدة

ما عارف هل كان خطأ في التشخيص، ولا ما كان في زول عايز يقول لي الحقيقة

وقتها كنّا قاعدين مؤقتاً عند حبوبتي - الله يرحمها - عشان بيتنا كان فيه إصلاحات

ولمّا المرض زاد عليه، إنتقل عند عمّتي عشان الجو كان برد وبيت عمّتي مقفّل. وإنتقلت معه والدتي وأختي، وفضلت أنا عند حبوبتي

الأسباب الظاهرة كانت المذاكرة وإنّنا ما نتقّل علي عمّتي

لكن في الحقيقة ما كنت قادر أستحمل إنّي أشوفه كده ..

ولو إنّي لسّه بلوم نفسي علي إنّي ما قضيت كل الوقت معاه ... لكن الحمد لله علي كل حال ..

...

الوقت كان رمضان

وكنت مرات بفطر معاهم، ومرات بمشي ليهم بعد الإفطار

لغاية ما جاء يوم السفر ...

برضو متذكّر اليوم ده

مشيتنا المطار، وإنتظارنا في صالة خاصة لغاية ما واحد من مضيفي الخطوط السعودية جاء ومعاه كرسي متحرّك

حزّ في نفسي إنّو أبوي الكان مالي علينا الدنيا يقعد علي كرسي متحرّك ..

وقلت ليه معليش بس عشان راحتك وعشان ما تتعبك الإجراءات في المطار ..

وبكرة إن شاء الله ترجع لينا بالسلامة ..

وسافر أبوي للسعوديّة طلباً للعلاج ..

وإبتدت تجينا أخبار مبشّرة إنو إبتدأ يتحسّن شويّة ويستجيب للعلاج ..

وبعدها

جاء خبر الوفاة ..

...

حاجات كتيرة كانت بتمر علي من غير ما أقيف عندها، بإعتبارها عاديّة، لكن بعد الوفاة إنتبهت ليها ..

من أوّل كيف كان أبوي الله يرحمه بيقضي يومه لغاية تأثيره في حياتي ..

يومه كان بيبتدئ بصلاة الصبح وتلاوة الصباح ...

وبعد ما يرجع من الشغل ويتغدّي وينوم شويّة، بيمشي قبل المغرب لبيت حبوبتي الله يرحمها ويقضي المساء عندها، ويجي راجع بعد المسلسل العربي

حتّي يوم الجمعة، بيقضي نصه معانا ونصه عند حبوبتي

كان - رحمة الله عليه - حمامة مسجد بمعني الكلمة .. وإتعلمت إنّ أصلّي البقدر عليه من الفروض في الجامع منّه

حتّي حبّي للقراءة والإطلاع كان بيغذيه من الصغر بإنه يجيب لي مجلة ماجد كل أربعاء

بدون أدني شك، كل الوصلت ليه في حياتي، والحأوصل ليه إن شاء الله، الفضل فيه بعد ربنا سبحانه وتعالي لوالدي ووالدتي الله يخليها لينا

...

لمحات لمحات لمحات ..

لمحات ومواقف بتمر عليّ ..

مرّة أتذكّر وقفته في صف البنزين أيام الصفوف عشان يضمن لي بنزين أمشي بيه إحتفال عاملينه أنا وأصحابي ..

ومرّة أتذكّر يوم نتيجة إمتحان الشهادة المتوسّطة، ورجعته من الشغل بدري عشان يمشي معاي المدرسة نشوف النتيجة

يومها كان في نتيجتي خطأ نقصت بسببه 100 درجة كاملة وبقيت الأخير علي المدرسة!!

ولسّة متذكّر مشيتنا للكنترول تاني يوم من الصباح لغاية ما النتيجة إتصحّحت وفرحنا كلنا

ومرّة أتذكّر لمّا كنت بتعلّم السواقة جديد، وتحذيره المتكرر لي من السرعة - قبل ما يثق فيني أكتر ويسمح لي إنّي أسوق وهو راكب بجانبي

فرحته لمّا نجحت في الشهادة السودانيّة بنسبة كبيرة والحمد لله ..

وبرضو بتذكّر لمّا فكّرت أحوّل مجال دراستي الجامعيّة في أوّل سنة ..

عدم رضاه عن المجال البديل، وزعله من موضوع التحويل .. وكيف توتّرت علاقتنا بسبب الموضوع ده

كل ما أتذكّر الحكاية دي، أندم إنّي زعلته في يوم، وأحمد ربنا سبحانه وتعالي علي إنّي في الأخير إقتنعت وإستمرّيت في المجال الكان عايزني أستمرّ فيه ..

كيف كان بيحب يعمل أغلب الأعمال اليدويّة بنفسه، وكيف بدون ما أشعر إتعلمت الشئ ده منّه ..

ذكريات ومواقف أكتر من إنّها تتحصر ..

لغاية الآن، مرات لمّا ألاقي واحد من معارف أبوي وزول يقول ليه ده ود المرحوم عثمان جعفر، بيكون الرد: يا سلاااام ياخ .. أبوك ما كان راجل ساهل ..

...

18 سنة مرّت وأنا ما زرت قبره مرّة!

يعني ما بس ما كنت موجود لحظة وفاته، لكن حتّي قبره ما شفته حتي الآن

صعب تخيلها .. مش كده؟

لكن البيصبّرنا كلنا هو إننا نتذكّر المكان المدفون فيه أبوي ..

وفاته كانت في جدّة

ورغم إنّو السلطات السعوديّة كانت منعت نقل أي جثمان من مدينة لأخري، لكن أبوي إندفن في مكّة المكرّمة والحمد لله

بل إنّو سواق الإسعاف القام بنقله حكي لعمّي إنّه شاف في المنام من يأمره بنقل الجثمان لمكّة

لاحقاً عرفنا من عمّي إنّو أبوي كان ناوي يعمل عمرة لمّا صحّته تتحسّن!

...

أيام الوفاة كانت فترة عصيبة جدّاً علينا كلنا ..

بعد وفاة والدي بأسبوع توفّي واحد من أعمامي ..

وبعده بأقل من 10 يوم توفّي أحد أبناء عمومته

الحمد لله علي كل حال ..

لكنّي حتّي اليوم كتير بفتقد والدي وبشتاق ليه

وبتمنّي لو كنت قدرت أوفّي ولو جزء من حقّه - لكن قدّر الله وما شاء فعل، والحمد لله علي كل حال

..

اللهم أغفر لأبي وأسكنه فسيح جناتك

اللهم إن كان محسناً فزد في إحسانه، وإن كان مسيئاً فتجاوز عن سيئاته

اللهم أجعل الجنّة متقلّبه ومثواه واجعل قبره روضة من رياض الجنّة

اللهم أبدله داراً خيراً من داره، وأهلاً خيراً من أهله

اللهم لا تحرمنا أجره ولا تفتنّا بعده، وألهمنا الصبر علي مصيبتنا فيه

واغفر لنا وله ..

أسألكم أن تقرأوا سورة الفاتحة علي روحه ..

...

همسة أخيرة ..

دايماً بيقولوا إنّو الواحد ما بيعرف قيمة العنده إلا لمّا يفقده

وأنا عرفت معني الكلام ده متأخّر للأسف الشديد

لكن أي زول والده أو والدته لسّه عايشين أقول ليه ألحق إستمتع بكل لحظة معاهم قبل ما يفوت الأوان

ختّهم في عيونك وتأكّد إنّو ما في حاجة بتسوي رضاهم - لا زوجة ولا أولاد ولا مال ..

وما تنوم ليلة إلّا لمّا تتأكّد إنهم عافين عنك وراضيين عليك

وتأكّد إنّو أمورك كلها ممكن تتيسّر بدعوة واحدة منهم - والموضوع ده أنا شفته كتير بدعوات الوالدة الله يمد لينا في عمرها ويقدرنا علي برّها

ألا هل بلغت؟ اللهم فاشهد ...

نسأل الله الكريم أن يرحم والدك ووالدينا وأن يجعل مستقرهم الفردوس الأعلى
وإنا لله وإنا إليه راجعون...