جالية المنطقة الشرقية في السعودية والفشل في تنظيم بعثة السفارة

08:26 AM Feb, 22 2015
سودانيز أون لاين
نادر -
مكتبتي في سودانيزاونلاين



وتتواصل منظومة الفشل الشامل والتخبط واللاتخطيط الذي نعيشه.
سمعنا بقدوم بعثة السفارة السودانية الموقرة، قلنا نخلص العلينا.
رقم وطني، جوازات الكترونية، وبدأنا رحلة الإعداد لهذه المهمة، وتفادياً للمفاجآت سألنا عن المستندات المطلوبة وتحرينا الأمر بدقة متناهية ومن أكثر من مصدر خاصة أن حكومة السودان خارج منظومة عالم الخدمات الإلكترونية، جهزنا المطلوب
حرفياً ثم خرجنا على بركة المولى عز وجل، ونحن في الطريق كانت الهواجس تتلاعب بي، لابد من حدوث شيء ما يعكر هذا الترتيب والانسياب والتيسير، ما ممكن موضوع فيهو حكومة السجم دي يمشي بدون معوقات، إلا نبقى نحنا ما نحنا وهم ما هم.
وصلنا إلى الموقع، طبعاً وهو ما كنت متأكد منه، جموع وحشود لا حصر لها، ثم فوضى عارمة، رجال شيب وشباب، نساء وأطفال ورضّع في استراحة في آخر البلد، بها مجموعة من الكراسي المتناثرة هنا وهنا، وأصوات تنبعث من مكبر صوت "ياجماعة أقعدوا خلونا نشوف شغلنا"
"يا أخوانا مافي زول بيأخذ حاجة إلا يقعد".
قالوا ده صف الرقم الوطني، تقيف فيهو، وقفت وماسك أوراقي، ساعة ونصف في الصف، وبعد ما وصلت آخر الصف ده، انتهى الأمر إلى أحدهم قام بتسجيل اسمي وعدد جوازاتي ورقم هاتفي وقال لي "تعال بكره بعد المغرب عشان تأخذ استمارة رقم وطني"
بعد ساعة ونص كان فقط هذا الانجاز فيما يتعلق بالأمر، قلنا خير وبركة نمشي ونجي بكره بعد المغرب، الكلام ده يوم الجمعة.
يوم السبت اتصل بي صديق من موقع الاستراحة حيث بعثة السفارة وأخبرني أن ورقة التسجيل التي قمنا بتسجيل اسماءنا بها أمس وأخذنا رقم 372 مسكها الضابط بتاع الجوازات ومزقها وقال مافي تسجيل ولا شي!!!! أنا ما عارف قصتنا شنو مع الضباط نحنا في السودان!!!
هذا ما حدث معي وأسرتي باختصار، في نهاية الأمر لم ننجز شيء وخاب مسعانا، وتركنا الأمر برمته.
أولاً من حقنا كسودانيين بندفع ضرائب وخدمات تجينا البعثة دي بصورة دورية ( 4 - 5 مرات في السنة) طالما لا توجد قنصلية في الدمام، علماً بأن آخر مرة زارت البعثة الدمام كان قبل نحو 3 سنوات تقريباً (طبعاً ده كلام حالم ساي حتضحكو فيني لما تسمعوه).
بالله يا جالية (أنا ما عارف الجالية دي جات كيف وبقت جالية، ما سمعت قريب إنو في انتخابات جالية سودانية) هم ذاتهم منو أنا ما عارفهم، المهم إنتو عارفين إنو حضور البعثة دي حتصاحبها حشود وزحام بحاجة إلى تنظيم ووضع خطة تسهل على المراجعين عطفاً على غياب البعثة لفترة طويلة عن المنطقة،
ووجود تاريخ محدد لانتهاء العمل بالجواز القديم، ثم وجود إجراء جديد مستحدث هذه المرة وهو استخراج الرقم الوطني، ألم يكن من الممكن الإعداد لذلك بالصورة التي تسهل على المراجعين انهاء إجراءاتهم ولو بصعوبة بالغة (كان الواحد اتحمّل بس في النهاية خلص حاجاتو)
خلاصة الأمر وكأن يا بدر لا رحنا ولا جينا.
السؤال للأخوة في البحرين ومن لهم علاقة بالسفارة السودانية هناك، هل من الممكن استخراج الرقم الوطني والجواز الإلكتروني في البحرين للمقيمين في المنطقة الشرقية في السعودية؟
نجي نعمل إجراءاتنا ونخش سينما :)

الاخ نادر

الجماعة ديل شغالين لحد تاريخ يوم كم
و موقعهم بالظبط وين في الخبر ام الدمام
تقبل تحياتي
احمد

أهلا يا أحمد
شغالين لغاية 2015/2/28م
الموقع في استراحة اسمها الأندلس في الفيصلية في الدمام.

Quote: السؤال للأخوة في البحرين ومن لهم علاقة بالسفارة السودانية هناك، هل من الممكن استخراج الرقم الوطني والجواز الإلكتروني في البحرين للمقيمين في المنطقة الشرقية في السعودية؟ نجي نعمل إجراءاتنا ونخش سينما :)

ده طبعا على أمل انه الوضع في البحرين أقل مأساوية من المرينا بيه هنا

المشكلة شنو.. انه الوقفة بتاعت الساعة ونص دي وتسجيل الاسم والدور في النهاية السيناريو الحيحصل انه تاني يوم مفروض نمشي عشان يدونا الاستمارات بتاعت الرقم الوطني عشان نعبّيها.. اجراء بسيييييييييييييييييط وهو انه الاستمارات دي تتخت اونلاين.. ان شاء الله في google docs... وهي في النهاية مطبوعة في ورق عادي... نقوم في بيتنا نطبعها ونعبّيها ونجيكم جاهزين.. كده اختصرنا الصف والساعة ونص وكواريك الزول العاجبه المكرفون وكل وظيفته في الحياة يسألك عايز كم استمارة ويديك ليها!... ده حل عبقري موش؟!ولا عبقري ولا حاجه، والله ده اضعف اضعف اضعف الايمان! وباقي البشتنه بنستحملها!

بالله يا صديقي لو لقيت فرصة قي البحرين قول لينا معاك
بيني وبينهم شارع وأنا اسمع في روايات من جنس ما تحكي
واخشى أن تنتهي الفترة ونحن محتفظين بجوازاتنا الغالية
سلام سلام

تحياتي يا نادر .. وأعانكم الله ..
والله اصابني إحباط مما قرأت ..

ياخي نحن هنا في دبي .. فرق السماء من الأرض مما يحدث عندكم ..

ولو في امكانية انكم تجو الامارات هنا خلال الشهور القاتدمة احسن ليكم تجو هنا وتريحوا بالكم ..

سترى الفرق ..

أمنياتي لكم بالتوفيق .. والصبر هههههه

راشد يا حبيب
وين ايامك مشاقين والله
الليلة جيت في بالي اتصل عليك والله،
انت بالله لسه معانا في الاخدر ده! كنت قايلك بحكم الجيرة ظبط امورك،
كان موضوع البحرين ظبط بنديك خبر اقلو نشوفكم بعد غيبة، سلامي للوليدات
يا مريم والله تحلمي يفكروا ليك مجرد تفكير في تسهيل امور الخلق، ديل ادمنوا عذاب الخلق.
يا دكتور حملك علينا، الامارات دي مغلقة في وجه السودانيين المقيمين في دول الخليج منذ 24 اغسطس الماضي،
غير كده مافي شي بمنع وشكرا على تفاعلك مع قضيتنا العادلة :)

الأخ نادر

لك التحية

طبعا كنت شهود تلك المعمعة والمهزلة يوم الجمعة الماضية بقاعة الأندلس والتى وصلتها بشق الأنفس

عدد مهول من العربات واعداد بشرية من مختلف الأعمار وصفوف ما انزل الله بها من سلطان وكنت أتجول

ما بين القاعة الداخلية وحوش القاعة محاولا أن أفهم البيحصل شنو وبداية الإجراءات كيف و قضيت أكثر

من ساعة أسأل هنا وهناك حتى فهمت أن هناك صف للرقم الوطنى وآخر للجوازات فوقفت فى صف الرقم

الوطنى وقوفا ثم جلوسا على صف من الكراسى الى أن وصلت وسجلت إسمى فى قائمة طويلة وكان رقمى

605 أخدت الرقم و خرجت من تلك المعركة مزهوا بحصولى عليه كبداية مبشرة لإكمال إجراءات الرقم

الوطنى لإبنى الرضيع وبدأت فى الإستعداد ليوم السبت لمتابعة سير الإجراءات و كنت أتساءل بينى وبين

نفسى هل سأكمل إجراءات الرقم الوطنى السبت أو الأحد المهم كلفت أحد الأشخاص ويحمل رقم متقدم أن

يُفيدنى بآخر التطورات من أرض المعركة فاتصلت عليه السبت قبل المغرب وأنا أُمنى نفسى بان يثبشرنى

بأن الأُمور على ما يُرام وأن ناس القنصلية وما يُسمى بالجالية قد أفاقوا من صدمة اليوم الأول ووضعوا

من الخطط ما يُسهل الإجراءات ولكن كانت المفاجأة التى ألجمتنى أن الأوراق التى سجلنا فيها قد تم

تمزيقها وكانك يا زيد ما غزيت وتعبنا راح شمار فى مرقة يعنى الجمعة ضاعت والسبت ضاع واليوم

البرد والغبار حال دون الذهاب .

حسبنا الله ونعم الوكيل فى السفارة والجالية .

جمال كيف أحوالك وسلامات، والله سعيدين نعرف انك معانا بي جاي.
ذات الحلقة المفرغة ونفس طريق العذاب، وقفة لساعات في صف أطول من الهم والمحصلة صفر لأنو في ناس كل مؤهلاتهم لحى طويلة وإدعاء فضيلة زائفة
يقودوا المجتمع نحو هذا التداعي المهين.
والمعلومة الجديدة اليوم الاثنين إنو الحال ياهو نفس الحال، بل أسوأ، والمعلومة المن أمس قالوا إنو الرقم الوطني ما متوفر
لأنو ناس السودان لاحظ ناس السودان دي، أدوهم فقط عدد (1000) رقم وطني، هو الرقم الوطني ده شنو
عشان يدوهو بالله عليكم، الصعوبة شنو في منح بعثة السفارة في الدمام 50 ألف رقم وطني من الرقم كذا للرقم كذا،
ومكتب أبوظبي 50 ألف رقم وطني من الرقم كذا للرقم كذا !!!!

Quote: والمعلومة الجديدة اليوم الاثنين إنو الحال ياهو نفس الحال، بل أسوأ، والمعلومة المن أمس قالوا إنو الرقم الوطني ما متوفر لأنو ناس السودان لاحظ ناس السودان دي، أدوهم فقط عدد (1000) رقم وطني، هو الرقم الوطني ده شنو عشان يدوهو بالله عليكم، الصعوبة شنو في منح بعثة السفارة في الدمام 50 ألف رقم وطني من الرقم كذا للرقم كذا، ومكتب أبوظبي 50 ألف رقم وطني من الرقم كذا للرقم كذا !!!!

ابو محمود سلام يغشاك

وتحس بالمرمطة كيف لو عملو كده؟

يخيل لى الناس ديل لو وصلوا المرحلة دي بيكونو زى الاكتشفوا الذرة ويشبكونا ليك نحنا ، نحنا وصلنا للوصلنا ليهو ده رغم الحصار المفروض علينا من امريكا

الدخل امريكا شنو؟؟؟

عالم تجيب وجع البطن

يا هيثم سلامات
والله ده هين لو جينا للمفروض،
المفروض الشغل ده كوووولو يكون أونلاين، تدخل تملأ بياناتك وتعمل ارسال تمشي المعلومات للضابط يتحرى ويصادق تمشي لغرفة البصمة والصورة ، أنت تجي بي دربك عدييييل للغرفة دي تقيف فيها صف تدخل تعمل إجراءاتك وتنتهي،
هو خدمات الإنترنت في السودان ده عملوها عشان الواتساب والفيسبوك بس للونسات بس ولا شنو، ما ياها دي حوبتها، تسهيل أمور الناس وقضاء حوائجها بدل الكتابة باليد في قائمة من 20 ورقة و600 اسم.

Quote: جمال كيف أحوالك وسلامات، والله سعيدين نعرف انك معانا بي جاي. ذات الحلقة المفرغة ونفس طريق العذاب، وقفة لساعات في صف أطول من الهم والمحصلة صفر لأنو في ناس كل مؤهلاتهم لحى طويلة وإدعاء فضيلة ذائفة

الأخ نادر لك التحية والتجلة ومشكور على الترحيب وأنا الأسعد بوجود شخص مهموم بقضايا المضطربين فى الارض واتمنى

أن يلتئم شمل بورداب الشرقية بلقاءات دورية حتى ولو كل 3 أشهر مرة للتفاكر والتشاور وزيادة الأواصر الإجتماعية .

فهم من أجل ‘يصال ما يحاك ضد المضطربين من ‘حن ومحن من قبل جالية بنى كوز الفاقدة للأهلية والمصداقية

Quote: القنصلية المصرية تقدم خدماتها للجالية "بالانترنت" الدمام ـ ابراهيم رضوان في بادرة جديدة تهدف الى تسهيل خدماتها الى ابناء الجالية المصرية العاملة بالمملكة العربية السعودية.. اطلقت امس القنصلية العامة المصرية بالرياض موقعها على شبكة الانترنت الدولية.. صرح بذلك القنصل العام المصري محمود عوف الذي اضاف بان الموقع يضم كافة الخدمات القنصلية التي يحتاجها المواطن المصري ويرد على كافة الاستفسارات المتعلقة بكيفية اصداره جواز سفر جديد او تجديد جواز السفر القديم او الاضافة او تجديد تصاريح العمل او التصديقات وكذلك عمل التوكيلات الخاصة والعامة وايضا شروط منح التأشيرات لدخول مصر.. واضاف القنصل العام بأن الموقع يتيح ايضا للمستخدم الحصول على كافة الاستمارات اللازمة له وكتابة كافة البيانات بها واستكمال كل المستندات دون تكبد مشقة الوصول الى مقر القنصلية سواء كان في الرياض او في أي من المدن والمناطق التابعة لها.. وان هذا من شأنه ايضا توفير الوقت والجهد لكل المتعاملين والمترددين على القنصلية بالرياض واشار القنصل العام محمود عوف الى اهمية استخدام ابناء الجالية المصرية وكل من له حاجة من الاخوة السعوديين والعرب والاجانب باستخدام امكانات الموقع والاستفادة به قدر الامكان في سبيل راحتهم وتقديم خدمة اسرع لهم. وافاد بأن عنوان الموقع هو http://http://www.egconrh.orgwww.egconrh.org. كما اوضح عوف بان القنصلية تقدم خدماتها ايضا عبر البريد حيث يمكن لاي مواطن مصري ان يرفق الاوراق المطلوبة وارسال معاملته بالبريد السريع او الممتاز او الخدمة التي يريد ارسال الاوراق بها، وسوف تعيد القنصلية المعاملة بعد انهائها بنفس وسيلة البريد التي ارسل بها معاملته على ان تسدد الرسوم بشيك بنكي يرفق مع الاوراق للقنصلية.

ياشباب انا مقيم في الدمام وعندي 5 اطفال ناوي اعمل لهم رقم وطني
ومشيت براي قبل يوميين قاعة الاندلس وشفت الحاصل براي
لكن عايز اعرف هل في امكانية الناس دي تجيب ارقام وطنيه تاني
ولا الواحد يعمل نايم لحدي ما الناس الفي الرياض دي كلها تعمل رقم وطني وجواز
بعدين يمشي يكابس ... ولو قالوا مافي بعد سنة ونصف مامشكلة خلي الاقامة تنتهي
خلاص الواحد زهج ومافي خلق لاي شي

الأخ خضرتحياتي
مافي أرقام وطنية تاني، كل ما جادت به السفارة 1000 رقم وانتهت من أول ساعتين في أول يوم وحسب ما أورد الأخ حمد
950 من الأرقام اتوزعت واسطة من تحت تحت، والخمسين الباقيات اتكابسوا فيهم الجمهرة الإنته شفتها ديك.
حسب تصريح ضابط الجوازات المتواجد مع البعثة، الخدمات المتوفرة محصورة في إصدار وتجديد الجوازات الإلكترونية والجوازات القديمة فقط أما إصدار الرقم الوطني فأمامك حلين لا ثالث لهما، إما
تنتظر لغاية شهر مايو القادم، حيث ستحضر البعثة مرة أخرى حسب تصريح نفس ضابط الجوازات (وده في تقديري حل ما نجيض للمستعجل على الرقم الوطني والجوازات الإلكترونية لأنهم ممكن ببساطة ما يجوا تاني إلا بعد سنوات عديدة زي ما حصل في آخر مرة) أو الحل التاني تسوق عيالك وتمشي الرياض تخلص أمورك،
والله يعين الجميع، حكومة تبدع في تعذيب شعبها زي دي عمرنا ما شفناها،

اخي نادر كيف حالك ... وكل الشباب

من كلامك دا الواحد الا يفكر في مشية الرياض ، واذا البحرين فيها خير وبركة وسينما :)

شكراً ليك لاني كنت بخطط امشي اليوم .

مرحباً يا زين العابدين
البحرين برضو ما منها رجا
اتصلنا بالسفارة جانا واحد قال ما متوفر عندهم أرقام وطنية
وأصلاً جوهم نفس الناس العندنا ديل من الرياض لمدة شهرين خلصوا مغتربي البحرين.

.