مبروك ابني محمد ( حمودي ) الأول تستاهل قزازة بستي كولا :-

10:23 AM Feb, 21 2015
سودانيز أون لاين
عمر محمد ابراهيم -
مكتبتي في سودانيزاونلاين



------------------
وشريط ذكريات تعيده انت اليوم بتفوقك واحرازك المرتبة الأولي حيث كان (محمد ) والدي ...جدك الذي سميت عليه في تلك القرية الأمن اهلها من اهلها ومن غيرهم والوادعة جدا وكانت طفولتنا التي لا تخلو من بعض مرح وشقاء وكان الدنيا صيف والدراسة صيف وانتهاء الأمتحانات واذيع اسمي الأول في طابور النتيجة في المرحلة الابتدائية فحملت النتيجة واتجهت بها راكضا نحو المنزل والعشم يدفع ارجلي عشم الفوز بي ( لقيمات ...نبق ...حلاوة دربس او حلاوة حربة ) وهذا اكبر عشم يطاله خيالي حينها ولكن محمد الأب عليه الف رحمة ونور ادهشني هو حين كرمني بتحية ( براوة عليك يا الفاروق ) واخرج جزلانا من قماش التيل ونادي علي اخي وامره بشراء قزازة بستي كولا كاااملة من دكان حسن ود الصديق وامرني بالجلوس قربه والشرط ( تشربها كوولها براك ) وانا اشرب مستمتعا ومزهوا بهذا التكريم ولكني عانيت ما عانيت في اكمال هذه القزازة السوداء اللون حينها فقد كان ( ببسي زمان مش اي كلام )
والآن اعيدها اليك هذه الزجاجة عندك قزازة ببسي كاااملة تشربها براك وما تدي اي زول معاك سامع ؟؟؟
الف مبروك وبالتوفيق دوما يارب

يا جماعة والله زمان قزازة الببسي الاسود ديك عشان تكملها وانت شافع تعمل فيك عمايل
عينيك يحمرو وتزنقك حاجة كدي بين العطسة وبين الخنقة وبين ال ( تدشي )
المهم تحس بي روحك مشحتفة جدا
لكن ابوي وعشان جيت الأول جابوها لي حااارة من الدكان بي غبارها وقال لازم اشربها براي
تذكرتها اليوم وابني محمد يحرز المرتبة الاولي في اول اساس
و قلنا نجازيه خيرا زي ما جازاني محمد الأب خيرا عليه الرحمة والمغفرة