كـلمــة

09:54 AM Feb, 10 2015
سودانيز أون لاين
singawi - Saudia-Jeddah
مكتبتي في سودانيزاونلاين




كلمة منـك
كنت راجي سنين سماعـا
فاجأتـنـي
زلزلتـنـي
سرجت خيل المشاعـر
هيجت سيل المحاجـر
ياحلات روعـة حروفا وياحلاتك
كلمة في القاموس قديمـة
قبلك الناس رددوهـا
ياما في الأشعار قريتـا
وياما في الأسمار رويتـا
إلا منك يا أميـرة
الحروف حلوة ومثيـرة
كلما أردد صداها
تحتويني القشعريـرة
من عشقتـك
السنين المـرة مرت وكنت بحلم تنطقيها
إلا في دنيا الحقيقـة
للحروف غير المعانـي
ليها منك وقع تانـي
فيها من قلبك محنـة
فيها تحقيق الأماني
فيها من روحك موسيقى
فيها نيراني وجناني
إلا شوفي الكان مقدر
يوم لقيتك كنت قبلو خلاص بكيتك
وبيني بينك ألف غابة
غابة سيقانا الكآبـة
ماني خايف من عبورا
وبي سرور أعبر بحورا
إلا بس خايـف عليكي
أصلو درب العودة قاسـي
والغصون النورت حولك زهورا
غضة كيف أقطع جذورا
كيف أعكر لي صفاهـا
وكيف أكدر سلسبيلا
والطريـق السرت فيهو
ما بوصل لي عيونك
عشت فيهو سنين محنة
ما بعرضـا للمظنـة
والخـلاصـة
كلمة منك كنت عارفـا مستحيلة
أسعدتنـي
عـذبتنـي
حظي أنعم بالموسيقى
وغيري يتمتع حقيقـة
وبرضي راضي
أصلو يا غنية حياتي
حتى لو كان في منامي
أي كلمة حبيبة منك
أي همسة جميلة منك
والعجيب كلمة بحبك
ياحلات روعة حروفا وياحلاتك

سنجاوي

عساك بخير

قصيدة بسيطة وجميلة....رجعتني لي اغنية عثمان حسين والحويج ...كلمة منك حلوة

تحياتي

عبد الله جعفر

رائع بلا منازع ،
عباراتك مليئة بالشجن ،
و المرارة و قسوة الأيام ،
أنظر ماذا قلت أنت ؟
وبيني بينك ألف غابة
غابة سيقانا الكآبـة
ماني خايف من عبورا
،،،،،

...










عزالدين عباس الفحل
ابوظبي
...

الحبيب عبد الله جعفر

سلام الله عليك ورحمته وبركاته
ثم أما بعد

الشوق والريد حبيبنا
عانقت حروفك في بوست صديقنا المطر يا خازن الأحزان
فعادت بي لأيام صفانا .. حرمتنا كتير من إبداعاتك يا عبد الله
شاكر مرورك وحروفك
تحياتي وأطيب أمنياتي

حبيبنا الفحل
لك العتبى حتى ترضى
كنت طاشي شبكة كم يوم
شاكر مرورك وحروفك الطاعمة
تحياتي وأطيب أمنياتي