Post: #1 Title: ناس قريعتي راحت : أخيراً بدأ اليوم استخراج الرقم الوطني والجواز الالكتروني بقنصلية السودان بجدة Author: عبد الوهاب المليك Date: 02-10-2015, 07:46 AM
بحمد الله تعالى باشر الوفد الفني صباح اليوم استخراج الرقم الوطني والجواز الالكتروني بقنصلية السودان بجدة . يا مسهل يارب
Post: #2 Title: Re: ناس قريعتي راحت : أخيراً بدأ اليوم استخراج الرقم الوطني والجواز الالكتروني ب Author: أحمد الصابر Date: 02-10-2015, 08:43 AM Parent: #1
شكرا استاذ عبدالوهاب على ايراد الخبر حمد لله على السلامة بس الله يستر وتمشي الامور على خير .. كمل جميلك وزودنا بشوية تفاصيل ما دام ليس هناك مصادر رسمية تفيدنا باي شئ .. يعني مثلا هل الشخص يمشي باسرته مباشرة ام اول تذهب وتاخذ رقم ؟ نوع المستندلت المطلوبة لعمل الرقم الوطني ؟ والجواز ؟ وما شابه ذلك من استفسارات نورنا نور الله قلبك ووجهك بالايمان والتقوى في الدنيا والاخرة وانا اسف لو اثقلت عليك الحمل . دمت بود
Post: #3 Title: Re: ناس قريعتي راحت : أخيراً بدأ اليوم استخراج الرقم الوطني والجواز الالكتروني ب Author: محمد عبد الله الامين Date: 02-10-2015, 09:55 AM Parent: #2
كيف النظام والمطلوب شنو من مستندات وخلافة .. وتحياتي يا مليك ...
Post: #4 Title: Re: ناس قريعتي راحت : أخيراً بدأ اليوم استخراج الرقم الوطني والجواز الالكتروني ب Author: علي عبدالوهاب عثمان Date: 02-10-2015, 10:21 AM Parent: #3
حبيبنا المليك نصير ناس قريعتي راحت .. بالله نورنا بالنقاط الواردة في مداخلة أخونا أحمد صابر ..
Quote: شكرا استاذ عبدالوهاب على ايراد الخبر حمد لله على السلامة بس الله يستر وتمشي الامور على خير .. كمل جميلك وزودنا بشوية تفاصيل ما دام ليس هناك مصادر رسمية تفيدنا باي شئ .. يعني مثلا هل الشخص يمشي باسرته مباشرة ام اول تذهب وتاخذ رقم ؟ نوع المستندلت المطلوبة لعمل الرقم الوطني ؟ والجواز ؟ وما شابه ذلك من استفسارات نورنا نور الله قلبك ووجهك بالايمان والتقوى في الدنيا والاخرة وانا اسف لو اثقلت عليك الحمل . دمت بود
لو في فرصة من الكفيل والمدارس .. كنت أخذت طلة للسفارة ولكن الدنيا أرزاق نعمل إيه .. ما هي صورة هناك ..
تحياتي يا جميل ..
Post: #5 Title: Re: ناس قريعتي راحت : أخيراً بدأ اليوم استخراج الرقم الوطني والجواز الالكتروني ب Author: خالد حامد الجزولي Date: 02-10-2015, 11:04 AM Parent: #4
http://www.0zz0.com
http://www.0zz0.com
أها ..,, قصرّت معاكم
Post: #6 Title: Re: ناس قريعتي راحت : أخيراً بدأ اليوم استخراج الرقم الوطني والجواز الالكتروني ب Author: عبد الوهاب المليك Date: 02-10-2015, 11:26 AM Parent: #5
شكراً جزيلاً أخي خالد الجزولي
وأزيدكم من الشعر بيت : أنسوا الرسوم والحسبة القديمة : وأقصد بالذات أخونا عاصم فقيري الرسوم الحالية اليوم : (شاهد عيان) الرجل : 515 ريـال الزوجة : 415 ريـال الطالب : 305 ريـال الطفل : 210 ريـال
ميات تنطح ميات
ويا مثبت العقل والدين
Post: #7 Title: Re: ناس قريعتي راحت : أخيراً بدأ اليوم استخراج الرقم الوطني والجواز الالكتروني ب Author: محمد العوض Date: 02-10-2015, 11:50 AM Parent: #6
الله يعين المغتربين اخوي عبدالوهاب المليك ( البقره الحلوب دايما ) انا اسف لهذا الوصف
يعني قيمة الجواز 515 مضلاوبه في 2300 يعني مبلغ 1184500 سودلني في حين ان اصدار
الجواز في السودان 400 جنية فقط لا غير
لكن هناك قيمة ضيافة الوفد وقيمة التذاكر وقيمة السكن وقيمة الانتداب وقيمة الكهرباء المصروفة
كل هذه الاشياء لها قيمة
يعني المغتربين عايزين يخدموهم مجاني (( مستحيل 0000 مستحيل )) دا حلم حلم غالي جدا
يا مثب العقل والدين
Post: #8 Title: Re: ناس قريعتي راحت : أخيراً بدأ اليوم استخراج الرقم الوطني والجواز الالكتروني ب Author: عبد الوهاب المليك Date: 02-10-2015, 12:19 PM Parent: #7
Quote: لكن هناك قيمة ضيافة الوفد وقيمة التذاكر وقيمة السكن وقيمة الانتداب وقيمة الكهرباء المصروفة كل هذه الاشياء لها قيمة
أخونا محمد العوض ليك مدة ما بنت ..... نحن فعلاً البقرة الحلوب وبالتحديد ناس المنطقة الغربية وما جاورها لأنه هذه الأسعار لم تكن في منطقة الرياض .. ونحن غير عشان جده غير .. يا محمد الضيافة دي كان خلوها علينا حرّم كان قعدوا سنة نشيلهم فوق راسنا (كلهم أربعة) نوديهم ونجيبهم من وإلى القنصلية بدل ما يزودوا الرسوم بهذا الشكل .. ويضعونا أمام الأمر الواقع .. يا تدفع يا تتدينا غبشة كراعك .. ويا مثبت العقل والدين ..
Post: #9 Title: Re: ناس قريعتي راحت : أخيراً بدأ اليوم استخراج الرقم الوطني والجواز الالكتروني ب Author: النعمان خوجلى Date: 02-10-2015, 12:22 PM Parent: #7
الاخ المليك والاخوه المتداخلين السلام عليكم
مبررررررررررررررررررررروك اخيرا فرجت
بس الرسوم مرتفعه جدا
انا استخرجته من السودان قبل يومين ب 395 جنيه سودانى
Post: #10 Title: Re: ناس قريعتي راحت : أخيراً بدأ اليوم استخراج الرقم الوطني والجواز الالكتروني ب Author: عبد الوهاب المليك Date: 02-10-2015, 12:38 PM Parent: #9
Quote: انا استخرجته من السودان قبل يومين ب 395 جنيه سودانى
النعمان ود خوجلي علييييك الله في داعي للمغسة دي ؟؟؟؟ 395 جنيه سوداني بي حسبة محمد العوض = 156 ريـال ( فقط مائة ستة وخمسون ريالاً سعودياً لاغير) .. والله العظيم أنا الآن دفعت 515 ريـال .. ريـال ينطح ريـال وبي حسبة محمد العوض 515 × 2300 = 1.184.500 جنيه (مليون ومائه وأربعة وثمانون ألف وخمسمائة جنيه بالقدييييييييييييييييييييم) .. والله يكون في عون ناس قريعتي راحت وعوائلهم ..
ويا مثبت العقل والدين ..
Post: #11 Title: Re: ناس قريعتي راحت : أخيراً بدأ اليوم استخراج الرقم الوطني والجواز الالكتروني ب Author: النعمان خوجلى Date: 02-10-2015, 12:55 PM Parent: #10
Quote: النعمان ود خوجلي علييييك الله في داعي للمغسة دي ؟؟؟؟
الحبيب المليك
بس المغسة منتظرانى
ام العيال والصغار حا ستخرج لهم الجواز مع مجموعة المغضوب عليهم من جماعة المؤ!!!!!!!!!!!!!!
Post: #12 Title: Re: ناس قريعتي راحت : أخيراً بدأ اليوم استخراج الرقم الوطني والجواز الالكتروني ب Author: عبد الوهاب المليك Date: 02-10-2015, 01:17 PM Parent: #11
Quote: مجموعة المغضوب عليهم من جماعة المؤ!!!!!!!!!!!!!!
النعمان ود خوجلي الله يعينك على جوازات أم العيال والصغار الحلوين وجماعة المؤمن مصاب ... ناس قريعتي راحت ..
ويا مثبت العقل والدين
Post: #13 Title: Re: ناس قريعتي راحت : أخيراً بدأ اليوم استخراج الرقم الوطني والجواز الالكتروني ب Author: عمر عثمان عبد الوهاب Date: 02-10-2015, 01:43 PM Parent: #12
عشان بوستيك السجم ده الجماعة في الجهاز رفعو سعر الالكتروني للذين يرغبون لي مليون وميتين للمغتربين والحاملين اقامات خارج الوطن ده غير حق الصور والفطور والبارد والشاي والزحزحه في الكراسي طول اليوم يعني خشت ليها في المليون ونص
اها ارجع احسبه لينا باليورو تطلع كم؟؟
Post: #14 Title: Re: ناس قريعتي راحت : أخيراً بدأ اليوم استخراج الرقم الوطني والجواز الالكتروني ب Author: عبد الوهاب المليك Date: 02-10-2015, 02:24 PM Parent: #13
عشان بوستيك السجم ده الجماعة في الجهاز رفعو سعر الالكتروني للذين يرغبون لي مليون وميتين للمغتربين والحاملين اقامات خارج الوطن ده غير حق الصور والفطور والبارد والشاي والزحزحه في الكراسي طول اليوم يعني خشت ليها في المليون ونص
اها ارجع احسبه لينا باليورو تطلع كم؟؟
أخوي علي عثمان عبد الوهاب
على رسلك يا رجل.. ودا الخايفين منه ذااااااتو .. (الهضربة) وارتفاع الضغط والسكر .. والله فعلاً ناس قريعتي راحت تطير عيشتهم يلقوها من وين ولا من ين .. الكل طمعان فيهم .. وللمعلومية لا الجهاز ولا القنصلية ليها دخل بالرسوم .. وزارة المالية هي الجهة التي فرضت الرسوم .. ويا رييييت ناس الجهاز لو بسمعوا كلامي كان قلت ليهم شكر الله سعيكم وقفلوا مكاتبكم وخلونا برانا بنظم شؤونا ..
Post: #15 Title: Re: ناس قريعتي راحت : أخيراً بدأ اليوم استخراج الرقم الوطني والجواز الالكتروني ب Author: أحمد الصابر Date: 02-10-2015, 03:52 PM Parent: #14
سنتوكل ندفع ونرفع امرنا الى الله سبحانه وتعالى الذي يقول في محكم كتابه الكريم : (وَنَضَعُ الْمَوَازِينَ الْقِسْطَ لِيَوْمِ الْقِيَامَةِ فَلَا تُظْلَمُ نَفْسٌ شَيْئًا وَإِنْ كَانَ مِثْقَالَ حَبَّةٍ مِنْ خَرْدَلٍ أَتَيْنَا بِهَا وَكَفَى بِنَا حَاسِبِينَ ) 47 الانبياء
جزاكم الله خيرا على التنوير والمعلومات .
لكن اخوي المليك طريقة توزيع الاستمارات عشوائية ام منظمة وعادلة .. لانه في ناس حتحضر من خارج جدة .
Post: #16 Title: Re: ناس قريعتي راحت : أخيراً بدأ اليوم استخراج الرقم الوطني والجواز الالكتروني ب Author: عبد الوهاب المليك Date: 02-10-2015, 05:53 PM Parent: #15
Quote: طريقة توزيع الاستمارات عشوائية ام منظمة وعادلة .. لانه في ناس حتحضر من خارج جدة .
الأخ أحمد الصابر بما أنه اليوم الأول لبدء العمل في استخراج الرقم الوطني والجواز الالكتروني ، فإن الوضع في غاية السلاسة .. الاستمارات موجودة لدى اثنين من ضباط الجوازات في الكاونتر واحد مخصص للرقم الوطني والآخر للجواز الالكتروني معظم الأخوان الذين رأيتهم اليوم لا يعرفون متطلبات الخدمة التي يرغبونها مع أنها معلقة في لوحة الاعلانات .. يتم تعبئة الاستمارة مع المتطلبات ويتم تصديقها من الضابط المعني في وقت وجيز يتم دفع الرسوم بعد التصديق مباشرة يدخل الشخص بعد دفع الرسوم لمكتبين مجهزين بأربعة أجهزة وأربعة كاميرات وموظفين للرقم الوطني وموظفين للجواز الالكتروني . لا يستغرق الزمن أكثر من 5 دقائق للفرد ... هذا الوضع المتناغم قد لا يستمر كثيراً مع توافد الراغبين ..
Post: #17 Title: Re: ناس قريعتي راحت : أخيراً بدأ اليوم استخراج الرقم الوطني والجواز الالكتروني ب Author: عبد الوهاب المليك Date: 02-10-2015, 06:02 PM Parent: #16
فات علىّ أن أشير إلى أن الاستلام بعد اسبوعين من تاريخ إدخال البيانات في الحاسب الآلي ..
Post: #18 Title: Re: ناس قريعتي راحت : أخيراً بدأ اليوم استخراج الرقم الوطني والجواز الالكتروني ب Author: عبد الوهاب المليك Date: 02-10-2015, 06:15 PM Parent: #17
ستعلن القنصلية عن تحرك فريق استخراج الرقم الوطني والجواز الالكتروني إلى خارج جدة بعد ترتيب الأمر مع السلطات السعودية وعلى الذين يمكنهم الانتظار أن ينتظروا حتى يصل لهم الوفد في أماكنهم بدلاً من تكبد المشاق والحضور إلى جدة ..
المصدر : مدير عام الجاليات بجهاز تنظيم شؤون السودانيين العاملين بالخارج
Post: #19 Title: Re: ناس قريعتي راحت : أخيراً بدأ اليوم استخراج الرقم الوطني والجواز الالكتروني ب Author: ابوحراز Date: 02-10-2015, 07:33 PM Parent: #18
احضار ما يثبت المهنة اعتقد انه شرط غريب لمن يحمل الرقم الوطني لمن جينا نطلع الرقم الوطني طلبوا تقديم المستندات التي تتناسب مع المهنة ومن بعد تقديم المستندات وأخذ صور منها يطلع الرقم الوطني بالمهنة المطلوبة مادام المهنة مدرجة بالرقم الوطني فلماذا يتم طلب المستندات مرة اخرى
واذا كانت المهنة مثلا بالرقم الوطني مهندس ويود الانسان في حال استخراج الجواز التغيير لمهنة اخرى فهل هذا ممكن ؟؟؟ [
سؤال اخير هل القنصلية ستعمل يوم السبت نسبة لهذه الظروف الطارئة خاصة وان العاملين بالدوائر الجكومية لاوقت لهم نهائيا في منتصف الأسبوع /B]
Post: #20 Title: Re: ناس قريعتي راحت : أخيراً بدأ اليوم استخراج الرقم الوطني والجواز الالكتروني ب Author: عبد الوهاب المليك Date: 02-10-2015, 09:43 PM Parent: #19
Quote: واذا كانت المهنة مثلا بالرقم الوطني مهندس ويود الانسان في حال استخراج الجواز التغيير لمهنة اخرى فهل هذا ممكن ؟؟؟ [
سؤال اخير هل القنصلية ستعمل يوم السبت نسبة لهذه الظروف الطارئة خاصة وان العاملين بالدوائر الجكومية لاوقت لهم نهائيا في منتصف الأسبوع
أخي أبو حراز بمشيئة الله سنحمل هذه الأسئلة لسعادة مدير الجوازات للاجابة عليها .. ولعلها عالقة بأذهان الكثيرين ..
Post: #21 Title: Re: ناس قريعتي راحت : أخيراً بدأ اليوم استخراج الرقم الوطني والجواز الالكتروني ب Author: عبد الوهاب المليك Date: 02-11-2015, 08:01 AM Parent: #20
Quote: واذا كانت المهنة مثلا بالرقم الوطني مهندس ويود الانسان في حال استخراج الجواز التغيير لمهنة اخرى فهل هذا ممكن ؟؟؟
الاجابة : البيانات المسجلة بالسجل المدني (الرقم الوطني) هي التي سوف تنزل بحذافيرها في الجواز الالكتروني ولا يمكن تعديلها .. ويتم تعديل المهنة في السجل المدني من الخرطوم .
Quote: سؤال اخير هل القنصلية ستعمل يوم السبت نسبة لهذه الظروف الطارئة خاصة وان العاملين بالدوائر الجكومية لاوقت لهم نهائيا في منتصف الأسبوع
الإجابة : القنصلية تعمل حسب نظام العمل للهيئات الدبلوماسية في البلد المضيف .. وحيث أن الجمعة والسبت إجازة فلا يمكن العمل خلالهما إلا بترتيب خاص مع وزارة الخارجية بالبلد المضيف .. وفي حالة الاضطرار للعمل أيام السبت ، ستعمل القنصلية للتنسيق مع وزارة الخارجية في البلد المضيف للسماح لها بفتح أبوابها في عطلة السبت ..
ويا مثبت العقل والدين ..
Post: #22 Title: Re: ناس قريعتي راحت : أخيراً بدأ اليوم استخراج الرقم الوطني والجواز الالكتروني ب Author: عبد الوهاب المليك Date: 02-11-2015, 08:10 AM Parent: #21
الاقبال على الرقم الوطني في اليوم الثاني لبدء العمل أكثر من الاقبال على الجواز الالكتروني .. ولا زال العمل يسير بطريقة سلسة ..
Post: #23 Title: Re: ناس قريعتي راحت : أخيراً بدأ اليوم استخراج الرقم الوطني والجواز الالكتروني ب Author: محمد الشيخ أرباب Date: 02-11-2015, 09:10 AM Parent: #22
الاخ عبدالوهاب
كم فترة الجواز سنتين ام خمسة سنوات
Post: #25 Title: Re: ناس قريعتي راحت : أخيراً بدأ اليوم استخراج الرقم الوطني والجواز الالكتروني ب Author: محمد العوض Date: 02-11-2015, 09:27 AM Parent: #23
حقيقة كان الله في عون اهل القنصلية العامة بي جدة وكان الله في عون اخونا خالد الترس
حيث ان المسئولية عليهم ثقيلة في ظل الوضع الراهن استخراج الجوازات والرقم الوطني وقرب الاجازه
امتحانات الاساس بعد عشرين يوميا وامتحانات الثانوي بعدها باسبوع
يعني سوف يزور القنصلية خلال هذه الفترة اكثر من نصف مليون ممكن في ظل هذا المبني المغلق والذي
ورثة اهل القنصلية من سلفهم القديم كان الله في عونكم
وعزانا في ذلك انكم قدها وقدر المسئولية الملقاه علي عاتقكم رغم قله الامكانيات
Post: #26 Title: Re: ناس قريعتي راحت : أخيراً بدأ اليوم استخراج الرقم الوطني والجواز الالكتروني ب Author: عبد الوهاب المليك Date: 02-11-2015, 10:02 AM Parent: #23
Quote: كم فترة الجواز سنتين ام خمسة سنوات
حباب الأرباب خمسمائة ريال وخمسة عشر ريالاً تعادل مليوناً ومائة وأربعة وثمانون ألف وخمسمائة جنيه (بالقديم) لزوم نبيّن المليون .. ونرضى بي سنتين ؟ هي فيها سنين الزمن العلينا دا ؟ السنة بقت زي الشهر .. اطمئن خمسة سنوات نحمد ربنا .. ويا مثبت العقل والدين ..
Post: #24 Title: Re: ناس قريعتي راحت : أخيراً بدأ اليوم استخراج الرقم الوطني والجواز الالكتروني ب Author: ابوحراز Date: 02-11-2015, 09:27 AM Parent: #21
شكرا اخي على جهودك بهذا الرد 00 وهي اسئلة قد تدور في اذهان الكثيرين واتمنى ان يوفقهم الله في عمل اضافي يوم السبت
اذن شرط احضار مستند بالنسبة للشخص الذي يحمل الرقم الوطني لاداعي له
Post: #27 Title: Re: ناس قريعتي راحت : أخيراً بدأ اليوم استخراج الرقم الوطني والجواز الالكتروني ب Author: علي عبدالوهاب عثمان Date: 02-11-2015, 10:08 AM Parent: #24
عشان بوستيك السجم ده الجماعة في الجهاز رفعو سعر الالكتروني للذين يرغبون لي مليون وميتين للمغتربين والحاملين اقامات خارج الوطن ده غير حق الصور والفطور والبارد والشاي والزحزحه في الكراسي طول اليوم يعني خشت ليها في المليون ونص
اها ارجع احسبه لينا باليورو تطلع كم؟؟
أخوي علي عثمان عبد الوهاب
على رسلك يا رجل.. ودا الخايفين منه ذااااااتو .. (الهضربة) وارتفاع الضغط والسكر .. والله فعلاً ناس قريعتي راحت تطير عيشتهم يلقوها من وين ولا من ين .. الكل طمعان فيهم .. وللمعلومية لا الجهاز ولا القنصلية ليها دخل بالرسوم .. وزارة المالية هي الجهة التي فرضت الرسوم .. ويا رييييت ناس الجهاز لو بسمعوا كلامي كان قلت ليهم شكر الله سعيكم وقفلوا مكاتبكم وخلونا برانا بنظم شؤونا ..
أخوي المليك المفوض العام لناس قريعتي راحت .. ده ما انا .. ده اخونا عمر عثمان عبدالوهاب .. بعدين يا أخي أنا زول جاي من ضواحي الدنيا .. وين مع العامية منمقة دي .. مع التحية والقلوب عند بعضها ..
Post: #28 Title: Re: ناس قريعتي راحت : أخيراً بدأ اليوم استخراج الرقم الوطني والجواز الالكتروني ب Author: عبد الوهاب المليك Date: 02-11-2015, 10:35 AM Parent: #27
Quote: أخوي المليك المفوض العام لناس قريعتي راحت .. ده ما انا .. ده اخونا عمر عثمان عبدالوهاب .. بعدين يا أخي أنا زول جاي من ضواحي الدنيا .. وين مع العامية منمقة دي .. مع التحية والقلوب عند بعضها ..
أخي علي عبد الوهاب عثمان لك العتبى حتى ترضى .. يا سمح يا زين .. كنت ساعتها آتياً من القنصلية مع زحمة المدراس واختلطت علىّ الاسم خاصة وأنه متشابه لحد ما .. وتكفي طلتك في البوست .. ويا مثبت العقل والدين ..
Post: #29 Title: Re: ناس قريعتي راحت : أخيراً بدأ اليوم استخراج الرقم الوطني والجواز الالكتروني ب Author: خلف الله حسين Date: 02-11-2015, 02:15 PM Parent: #1
... الشكية لي الله ... المليك ربنا يسهل الأمور
وربك يجيب الخير ... مافي استثناءات ...
ولا كلها ... لاءات ...
الجواز والرقم الوطني .. بعده
ضيافة وكرم بكتبوها في الإيصال ولا خدمات أخرى
.. يا لطيف ...
Post: #30 Title: Re: ناس قريعتي راحت : أخيراً بدأ اليوم استخراج الرقم الوطني والجواز الالكتروني ب Author: عبد الوهاب المليك Date: 02-11-2015, 08:58 PM Parent: #29
حباب خلف الله نورت البوست وحاتك الوصل أنا ما شفت مكتوب فيه شنو يعميني ويقدد نظري أصلو حارقاني الخمسمية ريـال حرقة الخمسطاشر مبلوعة .. والشكية لي أب ايداً قوية الحمد لله حتى اليوم الأمور ماشه هادئة ويا مثبت العقل والدين ..
Post: #31 Title: Re: ناس قريعتي راحت : أخيراً بدأ اليوم استخراج الرقم الوطني والجواز الالكتروني ب Author: عبد الوهاب المليك Date: 02-12-2015, 11:02 AM Parent: #30
نصيحة للعنده رقم وطني استمارات الجواز الالكتروني متوفرة ومستعدين لاستيعاب أكبر عدد ممكن ومافي زحمه عليه .. الزحمة على الرقم الوطني .. أمشوا قبل الناس القدموا للرقم الوطني يستلموا أرقامهم ويجوا لي صف الجواز الالكتروني .. (الاستلام بعد 3 أيام ) .. فرصة وما بتتعوض للعنده رقم وطني .. ويا مثبت العقل والدين ..
Post: #32 Title: Re: ناس قريعتي راحت : أخيراً بدأ اليوم استخراج الرقم الوطني والجواز الالكتروني ب Author: عبد الوهاب المليك Date: 02-14-2015, 08:43 AM Parent: #31
مشهد حقيقي : استأذن من العمل يوم الخميس الماضي بحجة أن أم العيال عندها موعد مع الطبيب .. ذهب البيت وأخذ ام العيال والصغار ووصل القنصلية الحادية عشر والنصف صباحاً .. تفاجأ بأن استمارات الرقم الوطني تم توزيعها منذ الصباح الباكر وعليه الحضور يوم الأحد باكراً إن شاء الله .. حسبن وحوقل وعاد بخفي حنين .. حلم : رأى فيما يرى النائم .. موظف يضع أمامه دفتر كبيييير وترتسم على شفتيه ابتسامه تشرح القلب ، طلب منه النظر في التقويم الموجود بجانبه وعليه أن يختار اليوم الذي يناسبه لأخذ إذن أو إجازة طارئة أو مرضية أو أي شيء من هذا القبيل ويسجل أسمه ويحضر وهو ضامن أنه سيجد استمارته ويكمل اجراءاته ويا دار ما دخلك شر ..
ويا مثبت العقل والدين ..
Post: #33 Title: Re: ناس قريعتي راحت : أخيراً بدأ اليوم استخراج الرقم الوطني والجواز الالكتروني ب Author: عبد الوهاب المليك Date: 02-15-2015, 07:37 AM Parent: #32
سؤال : هل هناك امكانية لعمل حجز مسبق وتحديد يوم وتاريخ وزمن معين خاصة في ظل صعوبة الخروج أثناء الدوام وقضاء ساعات طوال في الانتظار ؟؟ الإجابة : نسعى بكل طاقتنا لراحتكم ولدينا خطة يتم الترتيب والاعداد لها وسترى النور قريباً جداً وفيها راحة للجميع ..
Post: #34 Title: Re: ناس قريعتي راحت : أخيراً بدأ اليوم استخراج الرقم الوطني والجواز الالكتروني ب Author: عبد الوهاب المليك Date: 02-15-2015, 08:02 AM Parent: #33
الأحد 15 فبراير 2015م يُعتبر بداية الزحمة الحقيقية في قسم استخراج الجواز الالكتروني والتي نجمت عن استلام البعض للرقم الوطني في الأيام القليلة الماضية .. ننتظر تقييم الوضع واختبار الاستعداد لاستيعاب أي عدد كما ذكر المسؤولون .. ويا مثبت العقل والدين
Post: #35 Title: Re: ناس قريعتي راحت : أخيراً بدأ اليوم استخراج الرقم الوطني والجواز الالكتروني ب Author: عادل عبدالعزيز عبد الرحيم Date: 02-15-2015, 09:12 AM Parent: #34
شكرا يامليك على المجهود الجبار
Post: #36 Title: Re: ناس قريعتي راحت : أخيراً بدأ اليوم استخراج الرقم الوطني والجواز الالكتروني ب Author: علي عبدالوهاب عثمان Date: 02-15-2015, 09:36 AM Parent: #35
المليك الجميل .. نصير ناس قريعتي راحت .. استطلاع الاراء في عطلة نهاية الاسبوع في الجمعيات والقهاوي بالهنداوية ( وخاصة قهوة كسلا ومرتادي مطاعم الفول ) هناك إستهجان كبير جداً من الرسوم العالية ( يا أخي ناس هنا رزق اليوم باليوم ) والله ظلم والحساب عسير عند الله .. أخي مليك يعني عائلة من خمسة أفراد ( رقم وطني وجواز سفر ) للجميع كم القيمة .. لأن الكثير ما مستوعبين الموضوع .. وجماعتنا في الجمعيات لازم نعمل ليهم تنوير وملصقات .. لك التحية .. ذهبت الى العزاء للاخ حاتم متأخر مع الدقائق الاخيرة .. طالعت الموجودين ولم أجدك .. ربما تكون غادرت مبكراً .. تحياتي ..ومحبتي ..
Post: #38 Title: Re: ناس قريعتي راحت : أخيراً بدأ اليوم استخراج الرقم الوطني والجواز الالكتروني ب Author: عبد الوهاب المليك Date: 02-15-2015, 10:14 AM Parent: #36
فردتنا علي عبد الوهاب عثمان رحم الله ابن أخت الأخ حاتم حضرت صلاة الجنازة والدفن وكنت خارج جدة رجعت أمس ناس قريعتي راحت لا زالوا يتوسمون خيراً في من سمع أو قرأ النداءات التي أطلقناها وأطلقها العديد من الأخوة عبر مواقع التواصل الاجتماعي التي تضم العديد من المسؤولين .. وحتى الآن ما فات شيء كثير .. وهم زي ما غيروا في الرسوم السابقة يمكنهم أن يغيروا في الرسوم الحالية وزي ما قلت أخي علي عائلة مكونة من 5 أفراد في السعودية الزوج 515 ريـال + الزوجة 415 ريـال + 3 أبناء × 305 (915) ريـال المجموع 1845 ريـال × 2350 = 2.278.575 جنيه في السودان الزوج 395 جنيه + الزوجه 235 جنيه + 3 أبناء × 215 جنيه (645) جنيه المجموع = 1.275.000 جنيه ÷ 2350 = 543 ريـال
تخيل الفرق 1845 ريـال في السعودية ما يعادل 543 ريـال في السودان وبرضو المغترب ما البقرة الحلوب ؟؟؟ تطير عيشتنا نحن ناس قريعتي راحت .. يا مثبت العقل والدين ..
Post: #37 Title: Re: ناس قريعتي راحت : أخيراً بدأ اليوم استخراج الرقم الوطني والجواز الالكتروني ب Author: عبد الوهاب المليك Date: 02-15-2015, 09:48 AM Parent: #35
Quote: شكرا يامليك على المجهود الجبار
حبيبنا عادل ليتنا نستطيع اختزال الوقت .. وقت مهدر كثير .. ويا ريت نقدر نساعد .. أخونا أشرف الرحال بجوازات المغتربين بالخرطوم استغرق 3 ساعات لتصديق 6 نماذج لأفراد أسرته .. هذا جهد المقل ويا مثبت العقل والدين ..
Post: #39 Title: Re: ناس قريعتي راحت : أخيراً بدأ اليوم استخراج الرقم الوطني والجواز الالكتروني ب Author: علي عبدالوهاب عثمان Date: 02-15-2015, 10:32 AM Parent: #37
أخونا المليك .. الحبشي شغال معنا في المكتب يقول الجواز الالكتروني عندهم : 188ريال والابن 90 ريال كانوا عايزين يكسرو السفارة الاثيوبيه
تحياتي .. ومحبتي ..
Post: #41 Title: Re: ناس قريعتي راحت : أخيراً بدأ اليوم استخراج الرقم الوطني والجواز الالكتروني ب Author: عبد الوهاب المليك Date: 02-15-2015, 11:12 AM Parent: #39
Quote: أخونا المليك .. الحبشي شغال معنا في المكتب يقول الجواز الالكتروني عندهم : 188ريال والابن 90 ريال كانوا عايزين يكسرو السفارة الاثيوبيه
أخوي علي نحن ناس قريعتي راحت المتواجدين هنا ، بس عايزينهم يساوونا بالمواطن السوداني الموجود خارج أرض الحرمين الشريفين حفظها الله جوازنا في السعودية 515 ريـال في السودان ما يعادل 168 ريـال في مصر ما يعادل 220 ريـال ويا ليت أخوانا بورداب باقي دول الخليج يسعفونا بالأسعار عندهم ما حسادة مننا بس عشان نقارن .. ونحن ناس قريعتي راحت لا عازين نكسر ولا عايزين نزعل زول مننا الفينا مكفينا وهم الجواز الالكتروني الزاد همومنا هموم .. بس عايزين زول يلتفت ناحيتنا ويقسم الورقة أم خمسمية ريال دي نصين ياخدوا نص ويخلوا لينا نص رضيانين .. ويا مثبت العقل والدين ..
Post: #40 Title: Re: ناس قريعتي راحت : أخيراً بدأ اليوم استخراج الرقم الوطني والجواز الالكتروني ب Author: عبد الوهاب المليك Date: 02-15-2015, 10:36 AM Parent: #37
رسالة من أحد بورداب جدة متواجد الآن في جهاز تنظيم شؤون السودانيين المنسيين بالخارج السلام عليكم ورحمة الله نزودكم ببعض المعلومات بخصوص اجراءات الجواز الالكتروني في السودان أنا في مبنى المغتربين الإجراءات سهلة وبسيطة وما محتاجه زمن وممكن في أقل من ساعة تخلص وتجي تستلم بعد 3 أيام لكن نحن شعب حبانا الله بالتعقيد والتنظير وتصعيب السهل مثلاً أنا عندي 6 جوازات دخلتهم مع بعض ولم أستلمهم مع بعض فقط انتظار التصديق ضيعت زمن من الساعة 8:30ص حتى هذه اللحظة 11:23 وبعد دا في خطأ في الأسماء وفصيلة الدم يعني ما عندي استمارة بيانات طلعت صاح لكل الجوازات وانتبهوا للحتة دي شديد يعني حتى فصيلة الدم بـ 10 جنيه وهي+ B مطلعنها لي فصيله أخرى +O تاني حاجه بنتك مضافة في جواز أمها يقول ليك هات صورة من اقامتك وزوجتك يقول ليك هات القسيمة طبعاً تنظير وحنك ميت ممكن يمشى على الناس لكن أنا رفضت الإجراء دا وبالمنطق قلت ليهو البنت مضافة مع أمها والجواز يوضح كدا وفيه مليون خروج وعودة ومكتوب في خانة المهنة زوجة ومكتوب زوجة فلان داير شنو تاني ؟ لو ما اقتنعت بالجواز دا تبقى مصيبة ويلا على مدير جوازات المغتربين .. المهم الاجراءات مشت وبعد شوية بطلعوا جواز جواز فيه ملاحظه شيء فحص وشيء ماعارف شنو وفي النهاية يطلع البرنت مصدق والله مافي جواز ولا برنت ما فيه غلط وترجع تعدل وتدخل من أول جديد وتنتظر ويمكن يجي طالع تاني غلط أهو منتظرين الساعة الآن 12:23 ظهر وعلى العموم الإجراءات ساهلة بس البيروقراطية وأزمتنا الإدارية هي المصعبة الحكاية بالإضافة لهدر زمن الموظف في الواتساب
الرسوم كالآتي الكبار 395 جنيه من مواليد 2002 بعتبروا طلاب 295 من مواليد 2003 لبعتبروا أطفال 235
Post: #42 Title: Re: ناس قريعتي راحت : أخيراً بدأ اليوم استخراج الرقم الوطني والجواز الالكتروني ب Author: عبد الوهاب المليك Date: 02-16-2015, 07:55 AM Parent: #40
UP في انتظار الترتيبات الخاصة التي تريّح الجميع ويا مثبت العقل والدين ..
Post: #43 Title: Re: ناس قريعتي راحت : أخيراً بدأ اليوم استخراج الرقم الوطني والجواز الالكتروني ب Author: عبد الوهاب المليك Date: 02-16-2015, 05:32 PM Parent: #42
رسالة من أحد بورداب جدة من جهاز المغتربين بالخرطوم الرسالة الأولى : أنا في المغتربين والاجراءات سهلة وبسيطة بس نحن السودانيين دائماً بتاعين جرجرة ونصعب السهل ونعقد المبسط وفوق دا رسومه رخيصة مقارنة بالسعودية وأخلاق موظفينا صفر كبير بالجد ونحن شعب نفتقد لثقافة معاملة الجمهور ونعتقد أن المراجعين للدوائر الحكومية يجب أن يتذللوا ويطلبوا حقوقهم بترجي وانكسار ... الرسالة الثانية : تصدقوا يا جماعة 6 جوازات دخلت للتأشيرة الخروج طلعت 4 فيها تأشيرة و 2 ما فيها (الساعة 5 مساء) والله دي تلتلة ما بعده تلتلة ______________________________
لا عليك يا أخي .. المغترب متلتل محل ما يمشي .. وحالتوا دا المكان القالوا عليه جهاز تنظيم شؤون السودانيين العالقين عفواً .. المنسيين آسف .. العاملين بالخارج ..
ويا مثبت العقل والدين
Post: #44 Title: Re: ناس قريعتي راحت : أخيراً بدأ اليوم استخراج الرقم الوطني والجواز الالكتروني ب Author: عبد الوهاب المليك Date: 02-17-2015, 09:19 AM Parent: #43
من بوست مجاور :
كما سمعت من مصدر مطلع ...
فقد كان القرار بالنسبة للرسوم ان يكون الجواز للكبار 500 درهم وللطلاب 355 درهم
ولكن تدخل السيد وزير الخارجية (على كرتي) بالاتفاق مع القنصل لتخفيض الرسوم لتصبح: 400 درهم للكبار و 305 درهم للطلاب والصغار ..
Post: #45 Title: Re: ناس قريعتي راحت : أخيراً بدأ اليوم استخراج الرقم الوطني والجواز الالكتروني ب Author: عبد الوهاب المليك Date: 02-17-2015, 09:25 AM Parent: #44
Quote: في انتظار الترتيبات الخاصة التي تريّح الجميع
يا ربي يا سيدي الترتيبات دي فيها العمل يوم السبت والدوام للساعة 8 زي ناس الامارات ؟؟ ناس الامارات عندهم 4 فنيين شباب ونحن كمان عندنا 4 فنيين شباب ربنا يحفظ شبابهم ما مستعجلين بس خايفين ويدنا فوق قلبنا من قادم الأيام .. ويا مثبت العقل والدين ..
Post: #46 Title: Re: ناس قريعتي راحت : أخيراً بدأ اليوم استخراج الرقم الوطني والجواز الالكتروني ب Author: يوسف الطيب احمد إدريس Date: 02-17-2015, 11:54 AM Parent: #45
الأخ عبد الوهاب المليك عندي استفسار هل يمشو المنطقة الجنوبية للمملكة (نجران، أبها ، خميس مشيط .. الخ) ولك الشكر
Post: #47 Title: Re: ناس قريعتي راحت : أخيراً بدأ اليوم استخراج الرقم الوطني والجواز الالكتروني ب Author: عبد الوهاب المليك Date: 02-17-2015, 09:07 PM Parent: #46
Quote: هل يمشو المنطقة الجنوبية للمملكة (نجران، أبها ، خميس مشيط .. الخ)
الأخ يوسف الطيب السيد الأمين العام لما كان في جدة ذكر أن الوفد سوف يحضر ومعه أجهزة متحركة (موبايل) عشان يمشي للأخوة خارج جدة في أماكنهم .. وسؤالك تم تحويله للمسؤولين بالقنصلية وفي انتظار الرد بعد حضور الوفد ويا مثبت العقل والدين
Post: #48 Title: Re: ناس قريعتي راحت : أخيراً بدأ اليوم استخراج الرقم الوطني والجواز الالكتروني ب Author: عبد الوهاب المليك Date: 02-17-2015, 10:20 PM Parent: #47
أخونا البوردابي الفي الخرطوم قال اليوم زادوا الرسوم جنيه في جهاز المغتربين بالنسبة لجواز الرجل أمس كان 395 جنيه اليوم لقاه 396 جنيه حتى جواز الطلبة والأطفال زادوه جنيه .. ببساااااطه تتم الزيادة يا تدفع يا تديهم عرض أكتفاك وتسأل سبب الزيادة شنو ؟؟ يجيبك الجواب أنا مافي معلوم .. يا مثبت العقل والدين
Post: #49 Title: Re: ناس قريعتي راحت : أخيراً بدأ اليوم استخراج الرقم الوطني والجواز الالكتروني ب Author: محمد عبد الله الامين Date: 02-18-2015, 07:43 AM Parent: #48
الاخ المليك نشكرك جزيل الشكر على متابعه هذا الموضوع المهم ... وتقبل تحياتي ...
Post: #50 Title: Re: ناس قريعتي راحت : أخيراً بدأ اليوم استخراج الرقم الوطني والجواز الالكتروني ب Author: عبد الوهاب المليك Date: 02-18-2015, 05:45 PM Parent: #49
Quote: الاخ المليك نشكرك جزيل الشكر على متابعه هذا الموضوع المهم ...
ابننا محمد عبد الله الأمين الشكر لله ثم لصاحب المنبر الذي أتاح لنا نافذه نطل منها نحمل هموم ناس قريعتي راحت ويا مثبت العقل والدين
Post: #51 Title: Re: ناس قريعتي راحت : أخيراً بدأ اليوم استخراج الرقم الوطني والجواز الالكتروني ب Author: عبد الوهاب المليك Date: 02-18-2015, 05:53 PM Parent: #47
Quote: الأخ يوسف الطيب السيد الأمين العام لما كان في جدة ذكر أن الوفد سوف يحضر ومعه أجهزة متحركة (موبايل) عشان يمشي للأخوة خارج جدة في أماكنهم .. وسؤالك تم تحويله للمسؤولين بالقنصلية وفي انتظار الرد بعد حضور الوفد
أخونا يوسف الطيب جاءت الإجابة كما يلي : الشباب الذين يعملون في استخراج الرقم الوطني والجواز الالكتروني جاءوا بتأشيرة زيارة سيتم تمديدها إلى أن تنتهي مهمتهم وستعمل القنصلية مع وزارة الخارجية على إمكانية السماح لهم بالتحرك للمناطق التابعة للقنصلية السودانية تسهيلاً للأخوة في تلك المناطق .. الآن يجري العمل بكل همة لخدمة أكبر عدد من المواطنين ..
ويا مثبت العقل والدين ..
Post: #52 Title: Re: ناس قريعتي راحت : أخيراً بدأ اليوم استخراج الرقم الوطني والجواز الالكتروني ب Author: يوسف الطيب احمد إدريس Date: 02-21-2015, 04:45 PM Parent: #51
الأخ عبد الوهاب المليك شكراً للإفادة ونسأل الله أن يجعلك من من حبب إليهم الخير وحبب الخير إليهم تسلم معليش نتعبك معانا شوية لم يبقو ماشين المنطقة الجنوبية أدينا خبر بالبوست دا
Post: #53 Title: Re: ناس قريعتي راحت : أخيراً بدأ اليوم استخراج الرقم الوطني والجواز الالكتروني ب Author: محمد الشيخ أرباب Date: 02-22-2015, 06:56 AM Parent: #52
سافرت الى جدة يوم الاربعاء وخلصت موضوع الجواز... الاجراءات سريعة ولكن دخول موضوع الزكاة في الحلقة سوف يسبب تاخير مستقبلآ
الجواز مكلف دفعت 1560 ريال للجوازات و 400 ريال للزكاة ( لو ما ختمت الفورم من الزكاة لا تستطيع سداد رسوم الجواز...موظف الزكاة واحد غبي ما يفهم فقمت بسداد دفعة حتى اخلص الاجراءات )
يعني مصاريف سفر وسكن وجوازات وزكاة قرابة ال 3000 ريال سعودي....
مرحبا بكم في ادارة الجباية العامة لجمهورية الكيزان
Post: #54 Title: Re: ناس قريعتي راحت : أخيراً بدأ اليوم استخراج الرقم الوطني والجواز الالكتروني ب Author: عبد الوهاب المليك Date: 02-22-2015, 07:21 AM Parent: #53
Quote: سافرت الى جدة يوم الاربعاء وخلصت موضوع الجواز... الاجراءات سريعة ولكن دخول موضوع الزكاة في الحلقة سوف يسبب تاخير مستقبلآ
أخونا الأرباب محمد الشيخ حمداً لله على السلامة وكرامة البليلة المرقتك .. حضرت إلى جدة ولم تحضر لنا ولم تتصل.. ولكن بإذن الواحد الأحد إن حضرنا إلى طيبة الطيبة سنلتقي بكم ونسلم عليكم في الله .. أخوي محمد البقرة الحلوب دي لازم (يجغموها لآخر قطرة) هسه عليكم الله دا وقت دفع زكاة راتب ؟؟ هو الراتب مكفي ؟ لما تكون عليه زكاة من أصلو ؟؟
قول معاي يا مثبت العقل والدين ..
Post: #55 Title: Re: ناس قريعتي راحت : أخيراً بدأ اليوم استخراج الرقم الوطني والجواز الالكتروني ب Author: عبد الوهاب المليك Date: 02-22-2015, 07:35 AM Parent: #52
Quote: معليش نتعبك معانا شوية لم يبقو ماشين المنطقة الجنوبية أدينا خبر بالبوست دا
أخونا يوسف الطيب أحمد ادريس أبشر بالخير إن كان في العمر بقية يشهد الله لو الود ودي أجيبوا ليكم في محلكم لكن العين بصيرة والايد قصيرة واليوم وزعوا 100 استمارة فقط للرقم الوطني (شكلوا كدا السيستم داوون) .. بدينا إن شاء الله ما ملينا ..
ويا مثبت العقل والدين ..
Post: #56 Title: Re: ناس قريعتي راحت : أخيراً بدأ اليوم استخراج الرقم الوطني والجواز الالكتروني ب Author: يوسف الطيب احمد إدريس Date: 02-22-2015, 07:41 AM Parent: #55
الأخ عبد الوهاب المليك أولاً : اعتذر بشدة في أول مداخلة لي معاك ما انتبهت اني سلمت عليك خشيت على طول بدون فاعتذر والله ما انتبهت إلا قبل شوية. ثانياً : ما قصرت، أنا معاكم في جدة والحمد لله مطلع جوازي الإلكتروني من السودان بسأل علشان عندي اختي في نجران دايرين نطلع ليها هي وأولادها الجوازات. الله يستر من حكاية الداون سيستم دي، بعد شوية نبقى في الواسطات وغيره الله يهون على عباده شايف في ناس جابو رسوم الجواز والأخ الشيخ الأرباب قال كلفو 1300 ريال يا ريت توضحو لينا الحاصل شنو؟ لك الشكر الجزيل
Post: #57 Title: Re: ناس قريعتي راحت : أخيراً بدأ اليوم استخراج الرقم الوطني والجواز الالكتروني ب Author: عبد الوهاب المليك Date: 02-22-2015, 08:22 AM Parent: #56
أخونا يوسف الطيب في جدة الواااسعة دي وما نشوفك ؟؟ وبيني وبينك الله يستر من الداوون سيستم دي .. الرسوم يا ها الرسوم لكن .. شكلوا ناس الزكاة شموا خبر ولقوها فرصة وختوا ليهم موظف يحلب ليهم من جيب المغترب وهو جايي يطلع الجواز الجديد ودي فرصة ما بتتعوض .. نتحرى عن الموضوع ونرجع بالخبر اليقين ..
Post: #58 Title: Re: ناس قريعتي راحت : أخيراً بدأ اليوم استخراج الرقم الوطني والجواز الالكتروني ب Author: عبد الوهاب المليك Date: 02-22-2015, 08:49 AM Parent: #57
Quote: نقول لمن احسن احسنت
ولم اقابل هذا الرجل الا مرة واحدة فقط فى وداع الاخ عوض الماحى
قبل عدة شهور فى استراحة البدر ليلا
هذه المقدمة
للاخ العزيز الصهيلى محمد عبد الماجد سعد
مدير عام الجوازات للترتيب والتنظيم والانجاز وارتياح الناس
فلك اخى العزيز القومة والانحناءة والتحية وانت تؤدى هذه
بصدق النبلاء والاوفياء
الف مبروك
ونسال الله لنا ولكم التوفيق والسداد
مسروق .. أقصد منقول من بوست أخونا السماني عمارة بالفعل أخي السماني أخونا السهيلي مكتبه في الكاونتر منذ وصول وفد الجواز الالكتروني من الصباح حتى المساء يوقع ويوجه ويراقب .. فله التحية والتقدير ..
ويا مثبت العقل والدين ..
Post: #59 Title: Re: ناس قريعتي راحت : أخيراً بدأ اليوم استخراج الرقم الوطني والجواز الالكتروني ب Author: عبد الوهاب المليك Date: 02-22-2015, 10:02 AM Parent: #58
Quote: الزكاة نتحرى عن الموضوع ونرجع بالخبر اليقين ..
الإجابة: مصلحة الزكاة لديها موظفين دائمين في كاونتر القنصلية مهمتهم تحصيل الزكاة ممن تجب عليهم .. وهذا ليس إجراءً جديد تم استحداثه الآن .. وفي العادة وعند تجديد أو استخراج الجواز يتطلب الأمر المرور على موظفي الزكاة حتى قبل الجواز الالكتروني .. انتهى ....
ونحن القابضين على الجمر : نأمل ونلتمس ونرجو ونستعطف من موظفي الزكاة الصبر إلى حين ميسرة ... يعني لو واحد ما كان عامل حسابه وشايل معاه مبلغ زيادة يمشوه ويأجلوها ليه حتى لا تتعطل إجراءاته ولو هي فعلاً واجبه عليه سيقوم بدفعها لاحقاً وإلا (حيدخل النار) . ويا مثبت العقل والدين ..
Post: #60 Title: Re: ناس قريعتي راحت : أخيراً بدأ اليوم استخراج الرقم الوطني والجواز الالكتروني ب Author: أنس عباس حسن Date: 02-23-2015, 06:54 AM Parent: #59
اليوم الساعة 8 صباحا كنت امام بوابة القنصلية وصالة الخدمات مستفة رجال ونسوان سألت موظف الاستقبال عن اورنيك الجواز الالكتروني قال لي عند الضابط شباك الضابط اللمة القدامو مابتشوفو وبنده بالمكرفون على اسماء مسجله سالت عن الاستماره قالو لي لازم تسجل مع البندهوهم ديل وديل سجلو ومرابطين بالبوابة من 3 صباحا
لقيت واحد جاي من المدينه لافي مالقى اي اجابة هل ينتظر ولا يمشي
اتخارجت
Post: #61 Title: Re: ناس قريعتي راحت : أخيراً بدأ اليوم استخراج الرقم الوطني والجواز الالكتروني ب Author: عبد الوهاب المليك Date: 02-23-2015, 07:26 AM Parent: #60
Quote: اليوم الساعة 8 صباحا كنت امام بوابة القنصلية وصالة الخدمات مستفة رجال ونسوان سألت موظف الاستقبال عن اورنيك الجواز الالكتروني قال لي عند الضابط شباك الضابط اللمة القدامو مابتشوفو وبنده بالمكرفون على اسماء مسجله سالت عن الاستماره قالو لي لازم تسجل مع البندهوهم ديل وديل سجلو ومرابطين بالبوابة من 3 صباحا
شكراً أنس عباس حسن لهذا الوصف الصباحي الحي .. الناس كل شيء بتستحمله عدا كلمة وااااحدة السيستم داوون .. والسيستم داوون دي ، المساكين الهنا ما عندهم دخل بيها لكن تلقانا نفش غبينتنا فيهم .. الله يدي الناس الصبر ونفتك من أمشي وتعال دي لي خمسة سنوات قادمة إن كان في العمر بقية وأخونا زول المدينة دا الله يكون في عونه ما عنده طريقة إلا يجي الصباح بدري .. ولحدي الآن العمل ماشي بدون واسطات وبدون واتساب ..
ويا مثبت العقل والدين ..
Post: #62 Title: Re: ناس قريعتي راحت : أخيراً بدأ اليوم استخراج الرقم الوطني والجواز الالكتروني ب Author: أنس عباس حسن Date: 02-23-2015, 10:59 AM Parent: #61
والسفاره البنغالية بقدموا رعاياها للجواز وبستلموهو نفس اليوم والاجراءات مابتاخد ساعة
Post: #63 Title: Re: ناس قريعتي راحت : أخيراً بدأ اليوم استخراج الرقم الوطني والجواز الالكتروني ب Author: أنس عباس حسن Date: 02-23-2015, 11:24 AM Parent: #62
اخونا عبد الوهاب
افرض اني بيّت قدام السفاره والسستم ابا يدوّر الصباح
موقفي ح يكون شنو قدام الامم المتحده ؟ والورقه المكتوبة دي بتشفع لي لو راجعت بعد يومين ؟ وتلقى الورقه وين اساساً عشان تثبت انك كنت بايت ؟ بعدين يااخ دا جواز شنو البقومو ليهو قبل بتاعين اللبن ؟ تمشي السودان ترقع ليك أي عسكري تمشّي امورك ولا المهانة دي
Post: #64 Title: Re: ناس قريعتي راحت : أخيراً بدأ اليوم استخراج الرقم الوطني والجواز الالكتروني ب Author: عبد الوهاب المليك Date: 02-23-2015, 11:43 AM Parent: #63
الأخ أنس عباس لك التحية والتقدير الانتظار والصفوف والاحباط هي واحدة من معاناتنا الأزلية حتى أننا تعودنا عليها وكادت أن تصبح جزء من حياتنا .. قيل لنا أن هناك ترتيبات جديدة يمكن أن تريح الناس وها نحن معكم منتظرين .. والمشكلة لو عايز تمشي السودان وتعمل الجواز من هناك الخوف اجازتك تنتهي وانت ما عملت حاجة بسبب السيستم الداوون ..
أما موقفك قدام الأمم المتحدة ، أكيد حيشمّت فيك أبله ظاظا ..
ويا مثبت العقل والدين ..
Post: #65 Title: Re: ناس قريعتي راحت : أخيراً بدأ اليوم استخراج الرقم الوطني والجواز الالكتروني ب Author: محمد الشيخ أرباب Date: 02-23-2015, 01:09 PM Parent: #64
انا مشيت يوم الاربعاء 18 فبراير 2015 .. كنت قدام السفارة 6:30 ..في ورقة في كشك العسكري سجلت رقم 101... الساعة سبعة وشوية بدو يندهو في الاسماء
لاستلام الارانيك ...الشهادة لله جماعة الجواز الالكتروني ممتازين وسريعين ومتعاونين ... ولكن المعوقات دائما من جماعة القنصلية لسماحهم بربط الزكاة مع سداد
رسوم الجواز..وعدم وجود مكان لكي تتمكن من تعبئة الاورنيك..ومع دلك الساعة 9:45 كنت مخلص وخارج القنصلية.
Post: #66 Title: Re: ناس قريعتي راحت : أخيراً بدأ اليوم استخراج الرقم الوطني والجواز الالكتروني ب Author: أنس عباس حسن Date: 02-23-2015, 01:41 PM Parent: #65
اخونا محمد ارباب
الساعة 8 ص اليوم الصالة كانت فل والناس رايحه ومافي مسئول عشان يرد على استفساراتك موظف الاستقبال يقول ليك الارانيك عند الضابط وشباك الضابط محروس بي اتنين باكات لافاهمين عشان يدلوك ولا بدوك فرصه تستفسر والقاعدين يقولو ليك سجلنا الساعه 3
بتاع السندوتشات الوحيد البتطلع منو غرضك مقضي
Post: #67 Title: Re: ناس قريعتي راحت : أخيراً بدأ اليوم استخراج الرقم الوطني والجواز الالكتروني ب Author: عبد الوهاب المليك Date: 02-23-2015, 02:38 PM Parent: #65
Quote: ولكن المعوقات دائما من جماعة القنصلية لسماحهم بربط الزكاة مع سداد
أخونا الأرباب مرة تانية حمداً لله على السلامة موظف الزكاة تابع لديوان الزكاة كمحصل وراتبه يأخذه من ديوان الزكاة وليس للقنصلية عليه سلطة إلا إدارياً فقط.. وهو موجود في الكاونتر من قبل أن يبدأ استخراج الجواز الالكتروني أي منذ أيام حبيبنا الجواز الأخضر الليموني هذا ما وردنا وأشرنا إليه أعلاه .. وبمناسبة تحصيل الزكاة قبل سنوات كان عندي مشروع فاشل في السودان وفاشل دي لأني لم أباشره بنفسي ... مشيت إجازة وكنت مبسوط وفرحان بيه أنا داخل صادفت ناس الزكاة وهم خارجين وشايلين 2 أجهزة كمبيوتر بملحقاتهم ومعاهم عسكري ذكروني ناس الهيئة .. قالوا يا تدفع يا نيشيل العدة .. وفعلاً شالوها .. الزكاة بقت زي الجزية .. تعسف في تحصيلها وناس قريعتي راحت من المزارعين يشتكون مر الشكوى من طريقة تحصيلها .. غايتو أنا شخصياً ما بتذكر إذا كان الراتب واحد من الحاجات البتجب فيها الزكاة ولا لا ..
ويا مثبت العقل والدين ..
Post: #68 Title: Re: ناس قريعتي راحت : أخيراً بدأ اليوم استخراج الرقم الوطني والجواز الالكتروني ب Author: يوسف الطيب احمد إدريس Date: 02-24-2015, 01:27 PM Parent: #67
Quote: أخونا يوسف الطيب في جدة الواااسعة دي وما نشوفك ؟؟
الأخ عبد الوهاب المليك والله في جدة المجنونة دي ، ظروف العمل ضاغطة شوية أنا شغلي بين جدة ورابغ عشان كده ما ظاهرين وإن شاء الله إذا ربنا هون ورفع القدم بنتلاقى بإذن الله
Post: #69 Title: Re: ناس قريعتي راحت : أخيراً بدأ اليوم استخراج الرقم الوطني والجواز الالكتروني ب Author: أنس عباس حسن Date: 02-26-2015, 10:01 AM Parent: #68
كحب استطلاع مشيت القنصلية صباح اليوم على تسعات كدا شباك ضابط الجوازات مكشوف طلبت اورنيك جواز الكتروني اداني واحد من رزمة قدامو هبطرش عبيت الفورم وجيتو صدق لي مشيت الزكاه شاف الجواز وختم الفورم الحسابات دفعت الكلام دا ما أخد تلت ساعه دخلت لحدي التصوير وجيت مارق قلت استحمّ واجيهم عشان الصوره تطلع حلوه وتانين ماحلوه تخلص بدون مكابسه وفي نفس اليوم يااااخ
Post: #70 Title: Re: ناس قريعتي راحت : أخيراً بدأ اليوم استخراج الرقم الوطني والجواز الالكتروني ب Author: عبد الوهاب المليك Date: 02-26-2015, 11:45 AM Parent: #69
Quote: كحب استطلاع مشيت القنصلية صباح اليوم على تسعات كدا شباك ضابط الجوازات مكشوف طلبت اورنيك جواز الكتروني اداني واحد من رزمة قدامو هبطرش
أخونا أنس أيضاً كنت في جولة استطلاعية بعدك من 11 - 12 ونص شباك استمارة الجواز الجديد فاضيـييييه شباك استلام الجوازات الجديدة نفر ونفرين .. (لاستلام الجواز الجديد لابد من إحضار الجواز القديم الأخضر الليموني عشان يكنصلوه) والواحد يعاين ليه بحسرة زي الزوجة القديمة لما يهجروها عشان العروسة الجديدة .. هدوء في الصالة للاستماع للمايكرفون وهو ينبه العليه الدور في الرقم الوطني .. الرقم الوطني 100 استمارة يومياً ويمكنك أن تسجل لليوم التالي ..
عارف يا أنس استمارات الجواز رزمه قدامو حبطرش ليه ؟؟ لأنها والله غالية وعايزة ميزانية تتوضع ليها ... والزول إلا ياخد سلفيه ولاّ يدخل ليه صندوق بس منو البديه الصرفه الأولى .. كل الناس عايزنها عشان يطلعوا جوازاتهم .. عشان كدا بايره وما عليها طلب ..
ويا مثبت العقل والدين
Post: #71 Title: Re: ناس قريعتي راحت : أخيراً بدأ اليوم استخراج الرقم الوطني والجواز الالكتروني ب Author: محمد الشيخ أرباب Date: 02-28-2015, 07:27 AM Parent: #70
Quote: عارف يا أنس استمارات الجواز رزمه قدامو حبطرش ليه ؟؟ لأنها والله غالية وعايزة ميزانية تتوضع ليها ... والزول إلا ياخد سلفيه ولاّ يدخل ليه صندوق بس منو البديه الصرفه الأولى .. كل الناس عايزنها عشان يطلعوا جوازاتهم .. عشان كدا بايره وما عليها طلب ..
Post: #72 Title: Re: ناس قريعتي راحت : أخيراً بدأ اليوم استخراج الرقم الوطني والجواز الالكتروني ب Author: عبد الوهاب المليك Date: 02-28-2015, 05:43 PM Parent: #71
الأرباب محمد ناس طيبة الطيبة اهلنا قالوا السلف تلف نسأل الله السلامة والصندوق أو الجمعية كل واحد عايز الأولى وابتداءً من بكره الأحد سوف تبدأ امتحانات مرحلة شهادة الأساس بالقنصلية السودانية بجدة وبعدها امتحانات الشهادة السودانية إن شاء الله والشهادتان فيهما رسوم 350 ريـال للأساس وحوالي 500 أو 550 ريـال للشهادة السودانية ناس قريعتي راحت يتسلفوا ويعملوا صندوق أو جمعية لي شنو ولا شنو ؟؟؟ وياااا مثبت العقل والدين
Post: #73 Title: Re: ناس قريعتي راحت : أخيراً بدأ اليوم استخراج الرقم الوطني والجواز الالكتروني ب Author: عبد الوهاب المليك Date: 03-01-2015, 07:40 AM Parent: #72
نسأل الله التوفيق والسداد لأبنائنا الممتحنين ولبناتنا الممتحنات لشهادة الأساس بالقنصلية السودانية بجدة .. وعقبال الرقم الوطني والجواز الالكتروني أبواتكم خلصوا من هم وباقي عليهم همين .. وباقي عليكم إدخال فرحة النجاح في قلوبهم ورسم ابتسامه على وجوه شاخت من كثرة الهموم .. ويا مثبت العقل والدين ..
Post: #74 Title: Re: ناس قريعتي راحت : أخيراً بدأ اليوم استخراج الرقم الوطني والجواز الالكتروني ب Author: أنس عباس حسن Date: 03-01-2015, 10:50 AM Parent: #73
معلومة : لوعايز تعدل المهنة بالرقم الوطني ممكن شرط ارفاق صورة شهادة تفيد التخصص واحضار الاصل وتاخد تلاته ايام وتستلم انا عملت اليوم طلب تعديل مهنة بالرقم الوطني ووعد التسليم يوم الثلاثاء
تحية خاصة لـــ ستّموني فتى القنصلية الهُمام
Post: #75 Title: Re: ناس قريعتي راحت : أخيراً بدأ اليوم استخراج الرقم الوطني والجواز الالكتروني ب Author: عبد الوهاب المليك Date: 03-02-2015, 07:12 PM Parent: #74
Quote: لوعايز تعدل المهنة بالرقم الوطني ممكن شرط ارفاق صورة شهادة تفيد التخصص واحضار الاصل وتاخد تلاته ايام وتستلم انا عملت اليوم طلب تعديل مهنة بالرقم الوطني ووعد التسليم يوم الثلاثاء
شكراً أخونا أنس على مساهماتك القيمة في البوست ومنها هذه المعلومة المهمة ويا مثبت العقل والدين
Post: #76 Title: Re: ناس قريعتي راحت : أخيراً بدأ اليوم استخراج الرقم الوطني والجواز الالكتروني ب Author: عبد الوهاب المليك Date: 03-02-2015, 07:28 PM Parent: #75
Quote: Omertaj يعمل لدى جامعة الملك خالد King Khalid University جزيت من الله خيرا استاذنا عبد الوهاب على متابعة الموضوع المهم ونشر احداث الوفد الزائر والذي يبدو من حديثك أنه بلا خطةن ولو كان كذلك لعرفنا متى وكيف ولماذا لا يعرف الالاف من السودانين في جنوب المملكة ولا حتى ممثلي السفارة في ابها وخميس شيئا عن استخراج الجوازات السودانية بالمنطقة .. نرجو من الاخوة تنويرنا -على الأقل- عن ماذا بعد اسبوع الشرقية؟
معذرة لتأخير رفع مساهمتك .. الكثير من الأخوة ناس قريعتي راحت في جدة بكل أسف لا يعلمون عن وصول الوفد ولكن أجزم بأن حوالي 600 من أبناء ولاية نهر النيل قد وصلتهم رسالة بهذا الخصوص ولو كل واحد كلم واحد حتى لو من خارج الولاية ضمنا حوالي 1200 شخص يعلمون بذلك .. وهذا جهد المقل ..
أما بالنسبة لخطة التجول هنالك نية بهذا الخصوص كما تم إفادتنا ولكن حتى الآن لم يُحدد لها موعد ..
ويا مثبت العقل والدين
Post: #77 Title: Re: ناس قريعتي راحت : أخيراً بدأ اليوم استخراج الرقم الوطني والجواز الالكتروني ب Author: عبد الوهاب المليك Date: 03-03-2015, 11:28 AM Parent: #76
بدأ استخراج الجواز الالكتروني بالقنصلية يوم 10 فبراير 2015م لم تصل سوى 113 جواز فقط حتى يوم أمس 2 مارس 2015م
بالتأكيد ليس الـ113 شخص هم فقط من قدموا لاستخراج الجواز بل يتم اكمال إجراءات العشرات يومياً ..
إذن هناك خلل .. الأيام بتفوت وتعدي و15 نوفمبر ليست بعيدة .. فهذا العدد لا يتواكب مع أعداد السودانيين الموجودين بمنطقة مكة المكرمة ومحافظاتها ..
نتمنى أن نتحصل على إجابة شافية .. ويا مثبت العقل والدين
Post: #78 Title: Re: ناس قريعتي راحت : أخيراً بدأ اليوم استخراج الرقم الوطني والجواز الالكتروني ب Author: عبد الوهاب المليك Date: 03-03-2015, 11:37 AM Parent: #77
ظاهرة الافتراش في الحديقة المقابلة للقنصلية وساحة مسجد الحي من قبل امهات وآباء الطلبة الممتحنين .. تتطلب معالجة عاجلة وعاجلة جداً من القنصلية ولجنة الامتحانات وإيجاد بدائل .. نقول عليها .. ولا بلاش .. ما عايزة ليها درس عصر ..
ويا مثبت العقل والدين ..
Post: #79 Title: Re: ناس قريعتي راحت : أخيراً بدأ اليوم استخراج الرقم الوطني والجواز الالكتروني ب Author: عبد الوهاب المليك Date: 03-03-2015, 04:16 PM Parent: #78
للذين لم يجدوا أسماءهم في قائمة الـ 113 وصلت اليوم أكثر من 450 جواز جديد
ويا مثبت العقل والدين
Post: #80 Title: Re: ناس قريعتي راحت : أخيراً بدأ اليوم استخراج الرقم الوطني والجواز الالكتروني ب Author: علي عبدالوهاب عثمان Date: 03-03-2015, 06:37 PM Parent: #79
Quote: للذين لم يجدوا أسماءهم في قائمة الـ 113 وصلت اليوم أكثر من 450 جواز جديد
ويا مثبت العقل والدين
أخونا الرائع المليك .. لا اريد أن أقصم ظهرك .. من لايشكر الناس لا يشكر الله .. عاجز عن التعبير .. لهذا التجرد ونكران الذات .. متعك الله بالصحة ..
محبتي بلا حدود ..
Post: #81 Title: Re: ناس قريعتي راحت : أخيراً بدأ اليوم استخراج الرقم الوطني والجواز الالكتروني ب Author: عبد الوهاب المليك Date: 03-04-2015, 08:26 AM Parent: #80
Quote: متعك الله بالصحة ..
أخي في الله علي عبد الوهاب أحلى دعوة تلقاها من الصباح وأسأل الله أن يمتعنا جميعاً بالصحة والعافية وأن يحسن خاتمتنا ..
ويا مثبت العقل والدين ..
Post: #82 Title: Re: ناس قريعتي راحت : أخيراً بدأ اليوم استخراج الرقم الوطني والجواز الالكتروني ب Author: عبد الوهاب المليك Date: 03-04-2015, 08:33 AM Parent: #81
أحبتي في الله شاهدت عشرات الملفات رجعت بدون اتخاذ أي إجراء لاختلاف البصمة المأخوذة للجواز عن البصمة المسجلة في الرقم الوطني ويتطلب الأمر إعادة أخذ بصمة الجواز .. ولعدم وجود رقم هاتف/ جوال أو مكتوب خطأ .. تأخرت المعاملات إلى حين مراجعة أصحابها لاستلام الجواز الذي لم يصدر أصلاً .. لذا أود التنبيه على ضرورة التأكد من رقم الهاتف/ الجوال المكتوب في الاستثمارة ..
ويا مثبت العقل والدين ..
Post: #83 Title: Re: ناس قريعتي راحت : أخيراً بدأ اليوم استخراج الرقم الوطني والجواز الالكتروني ب Author: عبد الوهاب المليك Date: 03-04-2015, 08:46 AM Parent: #82
بشرى نص سارة : أكثر من تيم جديد من فنيي الرقم الوطني والجواز الالكتروني في الطريق إلى جدة لتعزيز التيم الموجود ولامكانية الوصول لأكبر شريحة من المواطنين خارج مدينة جدة .. وهي لن تكون كامل الدسم وكاملة السرور إلا إذا تم تخفيض الرسوم 50% .. مجرد حلم والحلم نافذة من نوافذ السعادة ..
ويا مثبت العقل والدين ..
Post: #84 Title: Re: ناس قريعتي راحت : أخيراً بدأ اليوم استخراج الرقم الوطني والجواز الالكتروني ب Author: محمد عمر الفكي Date: 03-04-2015, 08:47 AM Parent: #82
عم عبدالوهاب السلام عليكم ياخي مشكور وجهدك مقدر وربنا يجعله في ميزان حسناتك عندك فكرة في زحمة في الرقم الوطني ولا مافي لاني عايز اطلع الرقم الوطني لي ولاولادي ومسالة الجواز ما مستعجل عليها. تحياتي ومشكور مرة اخرى
Post: #85 Title: Re: ناس قريعتي راحت : أخيراً بدأ اليوم استخراج الرقم الوطني والجواز الالكتروني ب Author: عبد الوهاب المليك Date: 03-04-2015, 09:00 AM Parent: #84
حبيبنا محمد عمر الرقم الوطني يتطلب منك التسجيل من اليوم لغد أو الحضور مبكراً منذ الرابعة فجراً .. والزحمة موجودة في الرقم الوطني بس ما بالشكل المزعج إلا في حالة الشبكة الطاشه بالخلاء .. لأنهم كل يوم بوزعوا عدد معين من الاستمارات وبخلصوها في نفس اليوم لو الأمور مشت تمام .. أما الجواز الالكتروني فلا مشكلة فيه وفي أي وقت يمكنك استلام الاستمارة أو الاستمارات ودخل يدك في محفظتك وطلع الخمسميات ..
ويا مثبت العقل والدين ..
______________ صاحبك أساسي في صف الجواز الالكتروني ..
Post: #86 Title: Re: ناس قريعتي راحت : أخيراً بدأ اليوم استخراج الرقم الوطني والجواز الالكتروني ب Author: محمد عمر الفكي Date: 03-04-2015, 10:44 AM Parent: #85
مشكور عم عبدالوهاب وكتر خيرك
Quote: صاحبك أساسي في صف الجواز الالكتروني ..
يا رااااجل سفيان عنده علم بالموضوع دا؟ شفت الكوز ايوب خليل نجيض كيف؟ اسف لحرف البوست وارجو عودته الي مساره
Post: #87 Title: Re: ناس قريعتي راحت : أخيراً بدأ اليوم استخراج الرقم الوطني والجواز الالكتروني ب Author: نصر الدين عثمان Date: 03-04-2015, 11:18 AM Parent: #86
*[موتى تخاف من النشور قالوا سنهرب، ثم لاذوا بالقبور من القبور!]
[بسمة .. ونظــــــــرة بسمة تغير حالي نظرة تكيد عزالي لا عايز إنت تحن .. ولا ترحم حالي.. ليه ما تعطف علي.. يا غزالي.. حبيتك يا حبيبي.. عشان إنت حبيبي.. حبيبي إنت حياتي.. وهناي ونصيبي حبيبتك لجمالك.. في حبك تعذيبي حبيتك من بسمة حبيتك من نظرة يا الفيك آمالي.. يا عايش في خيالي.. لا عايز إنت تحن.. ولا ترحم حالي...]
------------------- * مقطع من قصيدة (المومس العمياء - السياب)
Post: #88 Title: Re: ناس قريعتي راحت : أخيراً بدأ اليوم استخراج الرقم الوطني والجواز الالكتروني ب Author: عبد الوهاب المليك Date: 03-04-2015, 11:21 AM Parent: #86
أحبتي في الله ملاحظة هامة .. الواحد فينا طفش من الموال الطويل للرقم الوطني .. ولماتين يستلم الرقم الوطني عشان يخلص من الجواز الالكتروني .. وعلى طول استلم بي جاي ركب صف الجواز الالكتروني بي جاي .. من غير ما يتأكد تماماً من البيانات .. الموجودة في برنت الرقم الوطني .. ولما طلع الجواز الالكتروني .. عمل مشكلة لأنه مكتوب الجنس (أنثى بدلا عن ذكر) .. وهو لم ينتبه للمكتوب في الرقم الوطني .. حصلت مع صديق عزيز .. ولي هسه الضحك شارطنا ...
ويا مثبت العقل والدين ..
Post: #90 Title: Re: ناس قريعتي راحت : أخيراً بدأ اليوم استخراج الرقم الوطني والجواز الالكتروني ب Author: عبد الوهاب المليك Date: 03-04-2015, 11:40 AM Parent: #88
حبيبنا نصر الدين .. مشكور جدا على هذه الاستراحة الرائعة .. وليت الابتسامة ترتسم مجدداً على الشفاه بدلا من العبوس الذي سببه كثرة الرسوم ..
ويا مثبت العقل والدين
Post: #89 Title: Re: ناس قريعتي راحت : أخيراً بدأ اليوم استخراج الرقم الوطني والجواز الالكتروني ب Author: محمد الشيخ أرباب Date: 03-04-2015, 11:22 AM Parent: #86
اخ عبدالوهاب
انا قدمت للجواز يوم 18 فبراير 2015 . وصديقي قدم يوم 15 فبراير2015 ..ودهب في مواعيد الاستلام وقالوا له لم يصل من السودان
وانا مواعيدي اليوم .. امشي ولا اطنش اسبوع كمان ..ههههه
Post: #91 Title: Re: ناس قريعتي راحت : أخيراً بدأ اليوم استخراج الرقم الوطني والجواز الالكتروني ب Author: عبد الوهاب المليك Date: 03-04-2015, 01:29 PM Parent: #89
الأرباب حبابك إذا كان اسمك محمد الشيخ محمد أرباب جوازك موجود في الحفظ والصون جيب معاك جوازك القديم الأخضر الليموني عشان يطلقوه ليك بالتلاتة وتأخذ العروسة الجديدة .. ويا مثبت العقل والدين ..
Post: #92 Title: Re: ناس قريعتي راحت : أخيراً بدأ اليوم استخراج الرقم الوطني والجواز الالكتروني ب Author: مريم بنت الحسين Date: 03-04-2015, 03:57 PM Parent: #91
التحية لصاحب البوست
حصلت على نموذج الرقم الوطني من أخ عزيز مشكوراً وربنا يوصّل ليه الخير زي ما وصّله لي وليكم... اطبعوه قلبه وعدله.. وعبّوه واكسبوا الزمن... ديل ناس ما عندهم موضوع! اجراءات عقيمة وتعطيل للناس...
Post: #93 Title: Re: ناس قريعتي راحت : أخيراً بدأ اليوم استخراج الرقم الوطني والجواز الالكتروني ب Author: Mohammed Abuzaid Date: 03-04-2015, 04:14 PM Parent: #92
تحياتي اخ المليك والبقية
هل بالإمكان تجديد الجواز الأخضر ( القديم ) لحدي 15 نوفمبر 2015 م ؟
كل الاحترام
Post: #95 Title: Re: ناس قريعتي راحت : أخيراً بدأ اليوم استخراج الرقم الوطني والجواز الالكتروني ب Author: عبد الوهاب المليك Date: 03-04-2015, 05:05 PM Parent: #93
Quote: هل بالإمكان تجديد الجواز الأخضر ( القديم ) لحدي 15 نوفمبر 2015 م ؟
أخي محمد أبوزيد نعم سيتم تجديده حتى 15 نوفمبر 2015م وبنفس الرسوم السابقة هذا في حال الحاجة الماسه له خلال الاشهر القليلة القادمة .. ونصيحة لو عندك رقم وطني اتوكل وطلع الجواز الالكتروني بدل ما تدفع مرتين . انت ما ناقص وما عندك قروش محرقاك .. ويا مثبت العقل والدين ..
Post: #97 Title: Re: ناس قريعتي راحت : أخيراً بدأ اليوم استخراج الرقم الوطني والجواز الالكتروني ب Author: Mohammed Abuzaid Date: 03-04-2015, 05:39 PM Parent: #95
Quote: أخي محمد أبوزيد نعم سيتم تجديده حتى 15 نوفمبر 2015م وبنفس الرسوم السابقة هذا في حال الحاجة الماسه له خلال الاشهر القليلة القادمة .. ونصيحة لو عندك رقم وطني اتوكل وطلع الجواز الالكتروني بدل ما تدفع مرتين . انت ما ناقص وما عندك قروش محرقاك .. ويا مثبت العقل والدين ..
تسلم يا غالي ظرف طارئ وقاهر قد يجبر المرء أحياناً .
مشكووور كتير
Post: #98 Title: Re: ناس قريعتي راحت : أخيراً بدأ اليوم استخراج الرقم الوطني والجواز الالكتروني ب Author: عبد الوهاب المليك Date: 03-04-2015, 06:13 PM Parent: #97
Quote: ظرف طارئ وقاهر قد يجبر المرء أحياناً .
ولعله دائماً يكون خير إن شاء الله ، أخي محمد وإذا كانت فترتك تمكنك من استخراجه من السودان يكون أفضل هذا إن كانت وجهتك السودان .. ترجع بالسلامة
Post: #94 Title: Re: ناس قريعتي راحت : أخيراً بدأ اليوم استخراج الرقم الوطني والجواز الالكتروني ب Author: عبد الوهاب المليك Date: 03-04-2015, 05:01 PM Parent: #92
Quote: حصلت على نموذج الرقم الوطني من أخ عزيز مشكوراً وربنا يوصّل ليه الخير زي ما وصّله لي وليكم... اطبعوه قلبه وعدله.. وعبّوه واكسبوا الزمن... ديل ناس ما عندهم موضوع! اجراءات عقيمة وتعطيل للناس...
اقترحنا هذا المقترح للأخوة بالقنصلية السودانية بجدة وكنا ردهم أنهم يوزعون استمارات أصلية مختومة ويتم تحديدعددها يومياً حسب طاقة العمل وبالتالي يستطيعون تفادي الازدحام .. ولن يلتفتوا لأي استمارة لا تحمل الختم الأصلي .. وفي حالة وصول الأتيام الللاحقة المتوقع وصولها في الأيام القليلة القادمة فلن يكون هناك مشكلة في استخراج الرقم الوطني أو الجواز ويا مثبت العقل والدين ..
Post: #96 Title: Re: ناس قريعتي راحت : أخيراً بدأ اليوم استخراج الرقم الوطني والجواز الالكتروني ب Author: مريم بنت الحسين Date: 03-04-2015, 05:21 PM Parent: #94
الاستمارات العندنا هنا كانت ما مختومة.. وناس دبي كمان لاني جبتها منهم، ما مختومة... فشكلوا كل مدينة عندها اجراءاتها براها! حتى المستندات المطلوبة عندكم في جدة مختلفة عن الموجودة عندنا في الدمام! ...
غايته!
Post: #99 Title: Re: ناس قريعتي راحت : أخيراً بدأ اليوم استخراج الرقم الوطني والجواز الالكتروني ب Author: عبد الوهاب المليك Date: 03-04-2015, 06:18 PM Parent: #96
أختنا بنت الحسين الغرض الذي نصبوا إليه جميعاً هو تسهيل الاجراءات على المواطن .. فظروف العمل لا تسمح بالبقاء خارج العمل فترة طويلة وليتنا استعدينا لاطلاق الجواز الالكتروني بالاستمارات الالكترونية وميكنا كل العمل ولكن حبنا للأوراق والأختام والتواقيع يبدوا أنه حال دون ذلك .. ويا مثبت العقل والدين ..
Post: #100 Title: Re: ناس قريعتي راحت : أخيراً بدأ اليوم استخراج Author: عبد الوهاب المليك Date: 03-16-2015, 04:46 PM Parent: #99
السؤال : شخص لديه جواز الكتروني صادر منذ فبراير 2010م وانتهى فبراير 2015م ومكتوب في الصفحة الالكترونية ضمن البيانات الرقم الوطني (لنفرض 1234567890) فهل يحتاج صاحب الجواز إصدار رقم وطني جديد ؟؟ أم يكتفي بالرقم الوطني المكتوب في الجواز المنتهي ؟؟ الإجابة : الجوازات الالكترونية الصادرة قبل تنشيط خدمة الرقم الوطني (إصدار 2009/2010) يحتاج أصحابها لاصدار رقم وطني جديد .. حيث أن الأرقام المدونة أمام خانة الرقم الوطني غير مفعلة ولا ترمز للشخص صاحب الجواز (يُعتبر رقم وهمي).. فالرقم الوطني يحتاج بصمة وصورة الكترونية والأرقام المسجلة في هذه الجوازات لا توجد لها بصمة وصورة . عليه لابد من اصدار رقم وطني حقيقي ويا مثبت العقل والدين ..
Post: #101 Title: Re: ناس قريعتي راحت : أخيراً بدأ اليوم استخراج Author: جمال خضر Date: 03-16-2015, 07:15 PM Parent: #100
Quote: حبيبنا نصر الدين .. مشكور جدا على هذه الاستراحة الرائعة .. وليت الابتسامة ترتسم مجدداً على الشفاه بدلا من العبوس الذي سببه كثرة الرسوم ..
ويا مثبت العقل والدين
أخونا المليك لك التحية وأنت تنحاز وتملك المعلومات لى ناس قريعتى راحت الذين عانوا الأمرين رسوم باهظة
وتعب وبهدلة وجهجهة ومرمطة وكمات جابت ليها ملطشة فيجب توجيههم بحمل ما خف حمله للدفاع عن أنفسهم
فى حالة تعرضهم لاى هجوم .
Post: #103 Title: Re: ناس قريعتي راحت : أخيراً بدأ اليوم استخراج Author: عبد الوهاب المليك Date: 03-17-2015, 07:51 AM Parent: #101
Quote: أخونا المليك لك التحية وأنت تنحاز وتملك المعلومات لى ناس قريعتى راحت الذين عانوا الأمرين رسوم باهظة
أخوي جمال خضر العبد الفقير إلى الله من ناس قريعتي راحت والجمرة بتحرق الواطيها .. وجماعتنا ناس قريعتي راحت لو الود ودي يعملوا ليهم شباك خاص بيهم لأنهم أبسط مما تتخيل فيهم الطيبة باقية للذكرى .. وطيبتهم يتحكوا بيها .. وبلاقوا عنت وتوبيخ وبهدله ليس لسبب إلا لبساطتهم .. تلك البساطة التي توصف بعدم الفهم والسذاجه وفي بعض الأحيان بالبلادة .. ليهم الله ومعيشة السوق ويا مثبت العقل والدين ..
Post: #102 Title: Re: ناس قريعتي راحت : أخيراً بدأ اليوم استخراج Author: بشير أحمد Date: 03-17-2015, 06:06 AM Parent: #100
تحياتي اخي عبد الوهاب؛؛؛
Quote: شخص لديه جواز الكتروني صادر منذ فبراير 2010م وانتهى فبراير 2015م ومكتوب في الصفحة الالكترونية ضمن البيانات الرقم الوطني (لنفرض 1234567890) فهل يحتاج صاحب الجواز إصدار رقم وطني جديد ؟؟ أم يكتفي بالرقم الوطني المكتوب في الجواز المنتهي ؟؟ الإجابة : الجوازات الالكترونية الصادرة قبل تنشيط خدمة الرقم الوطني (إصدار 2009/2010) يحتاج أصحابها لاصدار رقم وطني جديد .. حيث أن الأرقام المدونة أمام خانة الرقم الوطني غير مفعلة ولا ترمز للشخص صاحب الجواز (يُعتبر رقم وهمي).. فالرقم الوطني يحتاج بصمة وصورة الكترونية والأرقام المسجلة في هذه الجوازات لا توجد لها بصمة وصورة . عليه لابد من اصدار رقم وطني حقيقي
جوازي إصدار 2010..شهر 7.. مشيت عملت تفعيل للرقم الوطني المكتوب في الجواز... التفعيل ..نفس إجراءات الرقم الجديد..
Post: #104 Title: Re: ناس قريعتي راحت : أخيراً بدأ اليوم استخراج Author: عبد الوهاب المليك Date: 03-17-2015, 07:55 AM Parent: #102
Quote: جوازي إصدار 2010..شهر 7.. مشيت عملت تفعيل للرقم الوطني المكتوب في الجواز... التفعيل ..نفس إجراءات الرقم الجديد..
أخي د/ بشير شكراً للطلة كما أفاد مدير الجوازات أن الرقم الموجود على الجوازات اصدار 2009/2010م يحتاج لتفعيل .. والتفعيل يحتاج الاجراءات المعهودة في حالة اصدار رقم وطني جديد .. والله يعين الما عنده رقم وطني .. ويا مثبت العقل والدين ..
Post: #105 Title: Re: ناس قريعتي راحت : أخيراً بدأ اليوم استخراج Author: عبد الوهاب المليك Date: 03-18-2015, 10:32 AM Parent: #104
السؤال : الأسبوع القادم هناك إجازة قصيرة للمدارس وأود اغتنام هذه الفرصة واستخرج رقم وطني للأولاد وأمهم ماهي أول خطوة ؟؟
الاجابة : تأخذ جواز الأم وشهادات ميلاد الأولاد وتذهب للقنصلية لحجز تاريخ محدد وتأتي بهم في اليوم المحدد لك وإن شاء الله يخلص بدون متاعب ..
ويا مثبت العقل والدين ..
Post: #106 Title: Re: ناس قريعتي راحت : أخيراً بدأ اليوم استخراج Author: محمد العوض Date: 03-18-2015, 11:50 AM Parent: #105
اخونا شيخ المليك
لك خالص التحية وانت تتقمص دور العلاقات العامة في القنصلية لللاجابة علي
استفسارات اخوة لك يحتاجون للمساعدة وهذا عهدنا بك اصيل ابن اصول تقف
دائما مع المحتاج ----- جزاك الله خيرا
Post: #107 Title: Re: ناس قريعتي راحت : أخيراً بدأ اليوم استخراج Author: عبد الوهاب المليك Date: 03-18-2015, 02:06 PM Parent: #106
Quote: لك خالص التحية وانت تتقمص دور العلاقات العامة في القنصلية لللاجابة علي استفسارات اخوة لك يحتاجون للمساعدة
حبيبنا محمد العوض من واجبنا أن نعتني بناس قريعتي راحت .. على الأقل في هذه المرحلة .. وهذه الشريحة بالذات هي المحتاجه للمعلومة والخدمة والمساعدة .. وكتر خير أخونا بكري أبوبكر أن أتاح لنا هذه الفرصة بالرغم من أن معظم ناس قريعتي راحت ما بدخلوا المنبر .. لكن قلنا الكحة ولا صمة الخشم . سيأتي اليوم الذي تصلهم فيه المعلومة لحد عندهم .. وهذا وعد إن أمد الله لنا في الأعمار .. لك التحية أخي محمد
ويا مثبت العقل والدين ..
Post: #108 Title: Re: ناس قريعتي راحت : أخيراً بدأ اليوم استخراج Author: عبد الوهاب المليك Date: 03-19-2015, 10:24 PM Parent: #107
شكراً للأخ المتصل من خارج المملكة والمتابع للبوست والذي طلب أن ينزل سؤاله في البوست رغم أنه تلقى الاجابة وذلك للفائدة ... السؤال : لدى جواز سفر أخضر وساري المفعول حتى 2016م وامتلأت صفحاته بالكامل وأنا خارج المملكة وعملي يتطلب سفري المتواصل .. جئت لاستخراج رقم وطني وجواز الكتروني وحددوا لي شهر يونيو .. وعملي يتطلب السفر .. هل من الممكن اصدار جواز سفر أخضر جديد اسافر به حتى يحين موعد الجواز الالكتروني ؟
الاجابة : نعم تُعتبر حالتك حالة استثنائية ويمكن اصدار جواز سفر أخضر حتى نوفمبر 2015م ومن ثم يمكنك اصدار الرقم الوطني والجواز الالكتروني ولا تتعطل مصالحك .. (بس انت الخسران حتدفع في الجوازين .. ربنا يعينك)
ويا مثبت العقل والدين ..
Post: #109 Title: Re: ناس قريعتي راحت : أخيراً بدأ اليوم استخراج Author: علاء الدين صلاح محمد Date: 03-20-2015, 07:54 AM Parent: #108
Thanks so much
Post: #110 Title: Re: ناس قريعتي راحت : أخيراً بدأ اليوم استخراج Author: عمر التاج Date: 03-21-2015, 06:07 PM Parent: #109
الاخوة عبد الوهاب المليك وضيوفه الكرام السلام عليكم جميعا ... أرجو أن نجد عندكم المعرفة عن جديد (الوافدين) بعد أسبوع الدمام .. اين طاب لهم المقام حتى نسي الناس اخبارهم ونسوا ظروف الناس، ثم ماذا عن قنصلية جدة .. هل إجراءات استخراج الرقم الوطني تسير بنفس المنوال ام أن هناك تطوير وتحسن في الخدمة .. وماذا يعني حجز موعد مع قنصلية جدة.. هل هو اجراء جديد لتسهيل حركة المواطن ام أمر مدبر متبع. وأخيرا هل يمكن ان يتم الحجز عن بعد؟ وماهي توقعاتكم لموقف القنصلية خلال أسبوع الاجازة القادم من حيث الازدحام والانجاز؟ شكرا اخي عبد الوهاب وكل من ملكنا المعلومة في خيطك هذا ... وعذرا لكثرة الأسئلة .. فلعل بعض اجاباتها تشفي صدور قوم متابعين أو تكون صدقة جارية..
Post: #111 Title: Re: ناس قريعتي راحت : أخيراً بدأ اليوم استخراج Author: عبد الوهاب المليك Date: 03-22-2015, 08:42 AM Parent: #110
Quote: الاخوة عبد الوهاب المليك وضيوفه الكرام السلام عليكم جميعا ... أرجو أن نجد عندكم المعرفة عن جديد (الوافدين) بعد أسبوع الدمام .. اين طاب لهم المقام حتى نسي الناس اخبارهم ونسوا ظروف الناس،
الأخ عمر التاج شكراً لمساهمتكم وكلما كثرت الاسئلة كانت الفائدة أعم أشمل .. الفقرة أعلاه عجزت عن فهم المقصود منها وتعذر علىّ الرد عليها فالمعذرة ..
Quote: ثم ماذا عن قنصلية جدة .. هل إجراءات استخراج الرقم الوطني تسير بنفس المنوال ام أن هناك تطوير وتحسن في الخدمة .. وماذا يعني حجز موعد مع قنصلية جدة.. هل هو اجراء جديد لتسهيل حركة المواطن ام أمر مدبر متبع.
إجراءات استخراج الرقم الوطني والجواز الالكتروني تسير من حسن لأحسن بحسب الامكانيات المتوفرة .. وحجز الموعد للقضاء على الزحام وللحفاظ على وقت المراجعين حتى لا يحضر الشخص ولا يتمكن من الحصول على استمارة ويعود مرة أخرى وهكذا أما الموعد فإنه يضمن له الحصول على الاستمارة وعمل الاجراءات في نفس اليوم .
Quote: وأخيرا هل يمكن ان يتم الحجز عن بعد؟ وماهي توقعاتكم لموقف القنصلية خلال أسبوع الاجازة القادم من حيث الازدحام والانجاز؟ شكرا اخي عبد الوهاب وكل من ملكنا المعلومة في خيطك هذا ...
الحجز عن بُعد حتى الآن غير معمول به .. فالحجز يتطلب احضار وثائق ثبوتية .. القنصلية لا تألوا جهداً في سبيل انجاز أكبر عدد من المعاملات .. وبعد انتهاء الاختبارات لديهم خطة للقضاء على الزحام .. وانجاز أكثر من 250 معاملة يومياً إذا ساعدهم استقرار الشبكة .. ويا مثبت العقل والدين ..
Post: #112 Title: Re: ناس قريعتي راحت : أخيراً بدأ اليوم استخراج Author: عبد الوهاب المليك Date: 03-22-2015, 06:11 PM Parent: #111
قبل أن نطرح السؤال لابد من الاشادة بأحد ضباط الجوازات وهو ينهي إجراءات أسرة كاملة عقب انتهاء وقت العمل عندما رأى أن معهم ابنة بحالة إعاقة بدنية شبه كاملة فالشكر والتقدير له ولمعاونيه ..
سؤال اليوم من أحد ناس قريعتي راحت (راعي غنم) : قبل مدة تصحيح الأوضاع كفيلي قدم بلاغ هروب للجوازات وسلم جوازي لإدارة الجوازات .. وقبل أن تنتهي مدة تصحيح الأوضاع استطعت نقل كفالتي بصورة الجواز .. والآن أود استخراج جواز الكتروني جديد .. والمشكلة أنني فقدت أوراقي في سيل اكتسح مضارب أغنامنا وجرف معه حقيبتي التي فيها أوراقي الثبوتية والتي من ضمنها صورة الجواز والرقم الوطني .. فكيف استطيع استخراج جواز الكتروني جديد ؟؟
الإجابة : لاستخراج جواز لابد من وجود صورة الرقم الوطني.. وفي هذه الحالة فإن القنصلية لا تستطيع استخراج بدل فاقد ولا تستطيع استخراج رقم وطني جديد .. وعليه الاتصال بأحد معارفه بالسودان للبحث في مكتب السجل المدني باسم الوالدة واستخراج بدل فاقد له وإرسال صورة منه .. أما بالنسبة للجواز فإن كان تم تسليمه للقنصلية ووجد بها (كفى الله المؤمنين القتال) وسيتم تسليمه له واستخراج جواز الكتروني بعد حصوله على بدل فاقد الرقم الوطني وإذا لم يتم الحصول عليه ضمن جوازات الهروب المسلمة للقنصلية فإن عليه تقديم بلاغ فقدان جواز للسلطات السعودية وإبراز صورة منه للقنصلية مع صورة الرقم الوطني وسيتم استخراج جواز الكتروني جديد ..
ويا مثبت العقل والدين ..
Post: #113 Title: Re: ناس قريعتي راحت : أخيراً بدأ اليوم استخراج Author: عبد الوهاب المليك Date: 03-22-2015, 11:34 PM Parent: #112
صحيفة الخرطوم : جدة : محمد الحسن العوض أوضح السيد العقيد السهيلي محمد عبد الماجد مدير الجوازات بقنصلية السودان العامة بجدة بأن حجم المعاملات المنجزة منذ وصول فريق العمل الخاص بالرقم الوطني والجواز الالكتروني في الأسبوع الثاني من شهر فبراير الماضي ، بلغ (12.435) معاملة منها 3.395 معاملة رقم وطني و2.600 جواز الكتروني . مشيراً إلى أن الرقم الوطني يسلم بعد مرور 48 ساعة على إجرائه في الحين الذي بلغ فيه عدد الجوازات المسلمة لأصاحبها 1287 جواز الكتروني . وأشار العقيد السهيلي لصحيفة الخرطوم أن الأسلوب المتبع في إجراء المعاملات هو تسجيل المواطنين الراغبين في الحصول على الرقم الوطني والجواز الالكتروني ، وذلك تسهيلاً لانسياب العمل وحفاظاً على وقت المواطنين بحيث يعرف المتعاملون اليوم المحدد لهم للقدوم لانجاز معاملاتهم . موضحاً أن التسجيل للرقم الوطني وصل حتى يوم 17 مايو القادم بينما وصل التسجيل للجواز الالكتروني يوم 23 مارس الجاري . وكشف أن جهود القنصلية وبمتابعة كريمة من السيد اللواء أحمد عطا المنان مدير الادارة العامة للجوازات والهجرة بعد زيارته للقنصلية ووقوفه على حجم العمل ، أثمرت عن موافقة السلطات المختصة بالسودان على إرسال فريق إضافي يعمل على استخراج الرقم الوطني والجواز الالكتروني للمواطنين السودانيين بالمملكة . وأنه يجري حالياً التنسيق مع السلطات بالسودان لاستعجال وصول الفريق . وأوضح العقيد السهيلي أن خطة القنصلية خلال الفترة القادمة تقوم على إرسال فريق عمل بشكل مكثف لجميع المحافظات بالمنطقة الغربية منوهاً في ذات الصدد لجميع المواطنين خارج مدينة جدة الذين ليس لديهم حاجه ماسة لاستخراج الجواز الالكتروني أن فرق العمل ستصلهم في مواقعهم .
Post: #114 Title: Re: ناس قريعتي راحت : أخيراً بدأ اليوم استخراج Author: محمد الهادى عبد الرحيم Date: 03-23-2015, 01:36 PM Parent: #113
كلام مدير جوازات القنصيله فيهو اجابه على الكثير من التساؤلات المطروحه من الاخوان.
التسجيل للموعد لايحتاج وجود صاحب المعامله ، يمكن لاى شخص تكليف شخص اخر بتسجيل اسمه ، حيث هنالك موظف (كاتب) من السفاره يقوم يوميا بهذه المهمة وهو موجود داخل الصاله فقط عليك اخطاره بالاسم وبعد التسجيل يفيدك بالمواعيد، وكلما سارعت بحجز الموعد يكون افضل نسبه للزحام الشديد للتسجيل.
شكرا عزيزنا وصديقنا وحبيبنا المليك
Post: #115 Title: Re: ناس قريعتي راحت : أخيراً بدأ اليوم استخراج Author: عبد الوهاب المليك Date: 03-23-2015, 07:15 PM Parent: #114
Quote: شكرا عزيزنا وصديقنا وحبيبنا المليك
شكراً ليك أخونا دكتور محمد الهادي والبوست بوستكم جميعاً وأي زول عنده معلومه إضافية لناس قريعتي راحت ، يشد كييبورده ويدخل وحبابه عشره بلا كشره بس مهم في التسجيل توضيح كم استماره تحتاجه وذلك بعدد أفراد الأسرة في حالة الأسر .. وبمشيئة الله الزحام حدوا قريب لما يصلوا بقية القنيين فسوف يتم استغلال المباني الداخلية للقنصلية وترك الصالة للمعاملات العادية غير الرقم الوطني والجواز الالكتروني ..
ويا مثبت العقل والدين ..
Post: #116 Title: Re: ناس قريعتي راحت : أخيراً بدأ اليوم استخراج Author: عبد الوهاب المليك Date: 04-02-2015, 11:27 PM Parent: #115
أخي في الله عمر التاج معذرة لم اطلع على رسالتك إلا الآن هاتفي 0504681989 وفي انتظار مكالمتك
