Post: #1
Title: يا خازن الأحزان
Author: أبوذر بابكر
Date: 02-09-2015, 01:02 PM
Parent: #0
12:02 PM Feb, 09 2015
سودانيز أون لاين
أبوذر بابكر -
مكتبتي في سودانيزاونلاين
حرفك مرق
من باقى حبرك يشتكى
والهم شرب باقى الدوايه
قاعد قصاد
معنى النويح المتكى
وشوفك متاوقة البيوت
على جيهة البحر
ريقك نشاف الأمنيات
همك مرق
من محاحاة البدايه
من دم نميمك انسرق
من جوه من جمر السفر
ولامن مواعيد الحكايه
تطير بعيد
وترك على طرف القمر
بشهد عليك تلت التلاتة الإنقسم
بلدا كبير
مسنود على مرق المودة الإنكسر
بلدا يدافر ما فتر
روح الكحل
ريحة الحليب
معطونة فى باقى الأتر
والطين معاهن انصهر
خت الحلم فوق للهجير
سواهو ضل
لفحة سمومك همبريب
لون الكحل
روح الحليب
ولامن نشيدك ينصلب
يزعل يفوت يختا الدرب
يحرد يفارق ليل صفاك
تبقى البشاتن غنيتك
والنضمة تمسك فى السكوت
ترقص تصفق بى قفاك
والمعنى شهقات الوتر
فرح الوجيع البشتكى
وجع التراب المتكى
وجلد الشدر
مدبوغ رقد
نضمى البشر
ملدوغ شرد
هوى يا بشر
خلو النضم
نادو الفكى
قصو الأتر
الداهية وين ؟
دخلت جحر حيطة الكلام
ولا اللسان اصبح حجر ؟
وفرحك مدمدم ومتكى
دحين اخيرلك يا الفكى
فج الزحام
دفق محايتك فى الضلام
ما اللمه ترياق الفراق
والنمه مقلاع الوجع
الغنية مخلاية الوئام
الضحكة بلسم للفزع
وشك مبحلق فى الشمس
حاضن نهارات السؤال
حسا مصنقع من أمس
ينده تساويف المحال
حلما هناك لابس الضيا
بهرج حقيقتك
وإنكسف حد الخيال
ويا طالع الأكوان
جيب لى معاك وصال
يربط يكفينا
يا خازن الأحزان
خلى الوجع ينشال
زح همنا الفينا
أملا المخالى أمان
اسقينا وادينا
حبة بشاره وفال
عرج على الحبان
خلى المحبة تجى
ترقص على الموال
تدى الوطن شبال
يا خازن الأحزان
|
Post: #2
Title: Re: يا خازن الأحزان
Author: جورج بنيوتي
Date: 02-10-2015, 09:11 AM
Parent: #1
وانتِ ياالسُرَه:
توبك مقدقد
نهدك شردْ منو اللبنْ
بتِكْ حطام، ولَدِكْ سِجِنْ
توبك معطن بالوهنْ ....
... منك بررررررررررررراااااااااااك !!
أباذر الصديق:
سعيدة الحروف بيك يا ترزي الحروف ..
أكتب نشوف..
غيمتك نهار ألقا ولوف
سلامي لك، للأحبة(وأن تعرفهم )
ولأموووونة : إيش أخبارها؟؟؟
|
Post: #3
Title: Re: يا خازن الأحزان
Author: Abdalla Gaafar
Date: 02-10-2015, 10:30 AM
Parent: #2
الصديق ابوذر
دايرة ليها قعدة وقهوة ورجعة ليك من تاني
بس اسي عجبتني دخلت جورج (زول من زمن : الكتابة الماخدة منك ومننا تعب الرحبل من صوتنا للاحلام)
جورج منووور
ليك ولي كتاباتك وحشة
تحياتي
عبد الله جعفر
|
Post: #6
Title: Re: يا خازن الأحزان
Author: أبوذر بابكر
Date: 02-11-2015, 05:20 AM
Parent: #3
القهوة
زينة مجلس النفوس
ومرسال هميم بين بداية اللحظة ونهاية النشوة
تشيل مكاتيب القلب وتوصلا لعموم جهات الفرح
جورج ده يا عبد الله
بقينا الا نبرك ليهو الفقرا حتين يجى ويقلع
ياها عمايل ناس السماء البعيدة ديك، حيث سدرة منتهى السماحة
يشاغلو فى الملائكة
ويكتلونا نحن بالشوق والإنتظار
انت ذاتك ما تطول مننا بالله
|
Post: #16
Title: وميض الأفراح
Author: أبوذر بابكر
Date: 02-13-2015, 11:23 AM
Parent: #6
|
Post: #4
Title: Re: يا خازن الأحزان
Author: ibrahim fadlalla
Date: 02-10-2015, 10:53 AM
Parent: #2
Quote: وفرحك مدمدم ومتكى
دحين اخيرلك يا الفكى
فج الزحام
دفق محايتك فى الضلام
ما اللمه ترياق الفراق
والنمه مقلاع الوجع
الغنية مخلاية الوئام
الضحكة بلسم للفزع
وشك مبحلق فى الشمس
حاضن نهارات السؤال
حسا مصنقع من أمس
ينده تساويف المحال
حلما هناك لابس الضيا
بهرج حقيقتك
وإنكسف حد الخيال |
يا سلام يا ود بابكر ...دي حروف معتق حد الطرب ...
شكرا على عباراتك العالية وخيالك النابض وصورك الشعرية الكثيفة المبهرة الجياشة ...
واللغة الحميمة ...الأليفة ...المعبرة .
قصيدة رائعة وتقوم النفس من قولة تيت لي توريت .
---------------------------------------------
الصديق الصموت ...بنيوتي
سعدت برؤيتك في حديقة ود بابكر هذي ، بعد طول غياب ...
عساك طيب ...
وليتك تعود على صهوة حرفك الوضيء ...تشعل أزهار ألق في مساء الكلام .
العفو منك يا ود بابكر ...حبيت أناغم بنيوتينا .. في حضرة جمال حروفك ...
|
Post: #8
Title: Re: يا خازن الأحزان
Author: أبوذر بابكر
Date: 02-11-2015, 08:17 AM
Parent: #4
ازيك يا ابراهيم
الزهور بسمت لينا
لغاية ما ظهرت نواجذ لونها
وفاضت رحيق فى جنبات اللحظة
اللحظة الفرحانه بيك
تعرف
جورج اب كفة غيمة ده
مجرد جيته بتفتح احتمالات الخريف كلها
يخضر المكان وينشرح صدر الزمان
|
Post: #5
Title: Re: يا خازن الأحزان
Author: أبوذر بابكر
Date: 02-10-2015, 03:37 PM
Parent: #2
جورج
يا صفينا الذى فى عمق الروح
فى بعادك اضنانا اليباس
وطعم النضمى قرهب ونشف
البركة الشفناك شديد
يمين بالله جيتك يا جورج
زى كأنه الزول اتوهط ليهو ضل سيسباانه نديانه وتريانه
واقفة قريب من خشم مويه البحر
تناضمو ويناضما
اما عن الشوق
قدر الكون ده كله
|
Post: #7
Title: Re: يا خازن الأحزان
Author: singawi
Date: 02-11-2015, 06:25 AM
Parent: #5
الحبيب أب آمنة ، أبو ذر ، المطر
إنت لسة في جمالك داااا
ما بين مناداة الفكي ومناجاة طالع الأكوان
رحلة أمل مشوار طويييييل
القومة ليك يا حامل المسك
|
Post: #10
Title: Re: يا خازن الأحزان
Author: أبوذر بابكر
Date: 02-11-2015, 03:20 PM
Parent: #7
سنجاوى
يا زول يا ضو
كيفنك ياخى
وان شاء الله حالك زى ما تدور و تتمنى
وبزيارتك الفجة تملص توب الحزن
واللحظة تبقى فرح فياض
|
Post: #9
Title: Re: يا خازن الأحزان
Author: جورج بنيوتي
Date: 02-11-2015, 02:24 PM
Parent: #1
كَسْرَه:-
عبدالله جعفر ،، إبراهيم:
وريدْ الشوق ملان بالدمْ
تحياتي وتمنياتي بأن أعودلأنتشي بصحبة الكلمه الكتاب والسيف.
أباذر:
واصل إعداد المسرح لي هرجلةالليل ورقص التانقو فوق قمة جبل
مودتي لكم جميعا.
|
Post: #11
Title: Re: يا خازن الأحزان
Author: أبوذر بابكر
Date: 02-12-2015, 06:02 AM
Parent: #9
ولسه يا جورج الخلق واقفه تسأل
ليه سطوة الحزن اقوى واكبر فى الأرواح
ولسه الفرح مصر على ممارسة البخل
شايف
هسه جسارة الأحزان لمت ليك الحبان
عبد الله ده زى مذنب هالى بظهر كل ألف سنة مما يعدون
وأنا برضو لسه مصر
انه الأحزان لبد تجى لحظة وتنحاز لينا
ولحظتئذٍ
نبقيها افراح غصبا عنها
وغصبا عننا
|
Post: #12
Title: Re: يا خازن الأحزان
Author: singawi
Date: 02-12-2015, 08:26 AM
Parent: #11
أبا الفيض
كتبت ليك في 2004 : ( شوف كم سنه من عمرنا ضاع مننا .. كم سنه .. كم سنة .. حرااااام عليك وحيات عنيك خليك هنا )
وصاني ليك طير الخريف
الفارق أعشاشو وديارو عشان يجيك
متعطش أعياهو السفر
قال ليك بِـريدك ومُشتهيـك
وانت المطر
فوق الظنـون
قاموسك المافيهو جيم
حرف الجفاف حرف الجحود
حرف الجفاء
ما بشبهك
حرمان حبايبك طلتك
وانت المطر
كل البريدوك بندهوك
يا غيثنا يا ابو الفيض مَددْ
وانت السنـد
متحلقين جُبرانا يا أبو الفيض مَددْ
وانـت العَضَـدْ
متسورين محرابنا يا ابو الفيض مَددْ
وانـت العَـمَـدْ
متوسلين بي آمنة يا ابو الفيض مَددْ
وانت المَـددْ
وأبشرك .. القلوب التي أحببناك بها ما زالت في صدورنا
|
Post: #13
Title: Re: يا خازن الأحزان
Author: أبوذر بابكر
Date: 02-12-2015, 09:12 AM
Parent: #12
اخانا سنجاوى
ألا ليت ايام البهاء جديد
والجيم والحا جيران
ساعة الجيم تتقدم
وتطلع مارقه
من الجنه
ولما الحا تتهندم
وتظهر شارقه
من الحب
من بين آهاته الحارقه
من الفين واربعة بالله ؟
مافى طريقة الزول يوقف بيها الزمن ؟
ياخ ابراهيم عوض حسه بح من محاحاة الزمن
وهو مش عايزه يقيف وخلاص
لا شوف الطمع
داير كمان يهدى ليهو لحظات هنية
كدى هو اليقيف اول شى
برانا بنهدى لى روحنا لحظاتنا الهنية
|
Post: #14
Title: Re: يا خازن الأحزان
Author: بدر الدين محمد
Date: 02-12-2015, 10:14 AM
Parent: #1
| Quote: والهم شرب باقى الدوايه |
الله الله الله على هذا البوح الشفيف ........
|
Post: #15
Title: Re: يا خازن الأحزان
Author: أبوذر بابكر
Date: 02-12-2015, 10:18 AM
Parent: #14
ازيك يا بدر السماء
وادينا شويه من صفاك
تعرف
انا يا داب انتبهت للشعار الإنت عامله مكان الصورة
"رأى" دى مجموعة اخوا الجميل عثمان النو ؟
لأنه طالما اتلاقت الكلمة "رأى" مع واحد من مفاتيح النوتة
يبقى المزيكا حاضرة أكيد
كدى ورينى بالله
|
|
