يا ليلى ليلك صنّ

إستلهاما لمنظومة الشيخ المكاوى الشهيرة

يا ليلى ليلك جنّ

فى مدح السادة الطيبية الأخيار

وقطبهم الشيخ أحمد الطيب البشير
ضوء ام مرحى وسناء جبلها المنير

يا ليلى ليلك صنّ --- معشوقك قام يتمنى

مرقنا عليهو سألنا --- ومن موية نبعو نهلنا
لى ذكرك ما اتجاهلنا --- شلنا زوادتنا نزلنا

معشوقك رمى تيرابو --- بى يمينو مد كتابو
حيران الليل اصحابو --- ومن حوضك عبّ شرابو

فتح الدرويش مذروبو --- بالشوك مليانه دروبو
كل زول بعرف محبوبو --- والغافل توبو ذنوبو

يا ليلى بعيده بلودك --- ضوك سايق مريودك
سرك ساكن موعودك --- وجهرك مكنون فى عودك

معشوقك رافع رايتك --- من كوثر خمرو محايتك
غزل المحبوب نور آيتك --- بُردة اشواقو غطايتك

يا ليلى ناسك هامو --- فى عز الهجعة وقامو
فجرك طابت انسامو --- ونهارك صايبه سهامو

مريودك موقد نارو --- فى اللوح مكتوبه اخبارو
جرفك عمران بخدارو --- وخريفك مطرو عمارو

فى حلقة ذكرك صالو --- والليل معروفه احوالو
الشوق مسنونه نصالو --- قليل الوصلو وطالو

فى نص الليل مامورك --- ساق الحبان جا يزورك
فتح الحيضان سقى بورك --- دور مكنة بابورك

عقدك بالريد منضوم --- فى سوق الليل مسيوم
عطرك نادر معدوم --- فى نفس القوم مشموم

خمرك دافق من كاسو --- مليانه مشارب ناسو
لالوب ذكرك ونّاسو --- تهليلك سورو وساسو

صل يا الهى وسلم --- على الأمى المتعلم
ود دُقس الجاك متظلم --- ترفع لى قدرو تتمم

فى احوال الليل وشؤونه
وعن أمر الجذب وشجونه

صديقي يا مطر
يبدو لي أن المكاوي أول من عمل لايك لهذه القصيدة
أعجبتني بالحيل
و (طابت) بها روحي
الله لا يحرمنا من بركاتهم
و يا ليلى ليلك صن
.

عمل وجداني جميل استاذي ابو ذر




مودة
تلبو

ازيك يا دهب

يا زول يا نضير

تسلم ياخ

والله يا الطيب

أنا بالحيل مشدوه ب ليل ليلى الجنّ وجننا

ولى زمن بهاتى بى قصيدة شيخنا المكاوى التريانه ومليانه دى

قلت يا زول مالو
كدى النجرب اجن

خاتى بالى فى جدى حياتى ود حاج حمد العربى

وشلت شيلتى فى الليل البجنن
تحت ضو الطيبيه ابان معدنا إكسير

ومدد الصلاح اجمعين

سمحة بالله ؟

امش فى درب الجرد ده ولا امرو شايك ؟

امانه لالوبة القوم ما تقيله