ياروحي البريدا أتشتت قلبي نميمة بين الصحاب بحضن السفاهة والفراغ#

دي ما هي هبة الشوق بس ولا تأكيد ريده ولا وثيقة عهد ليك لبقي العمر نكون معا عشاق وخلان لكين حالة جنون ما أظن العاقل بيكون صريح وبيقول تعالي أنا محتاجك تباريح العشق
يما ضيعت ناس وساقت عظام للهلاك سبحانو ربي انا مابين زول راقد بيحتضر خلاص روحو بتكركر وعاشق بحاول يطول السما البعيدة عشان يهديك نجوم ويثبت ليك قلبي أني مجنونك
من عذابات زمني الحالي بقيت ساكن صفحتك في الفيس بوك أتعزل في الصور أناديك في الصباحات الندية وساعات السحر وأمتع عيوني طول الليل كأنك معي أناجيك أعبر عن مشاعري
وكمان أطرح حلول وأحلام وأقول دي ممكن يكون
عارفه يا روحي البريدا نادتيك وأنت بعيدة في تخوم الغرب الامريكي البعيد وعبر الاثير رسلت عبرات شوق عظيم تحمل المعزة والانكسار والخوف من سحر الغرب الامريكي ووحوش الغابة المدنية
ذات العتبات العالية والمنبسطة دقتت كل الابواب من يجيب غير الصدي أه من أوجاع الريده لم لا يطل اليأس علي قلبي ويعلن ألنسيان أنك أمس مضي بكل أحزانو أمكن دا مرض توته تسكن الواحد
من لحظة الاحساس بالريده لحدي مرض الموت وأمكن كمان الموت ما يحلك منها في قبرك تهضرب وتنادي ومن تحت التراب تبقي عاشق سفلي
بالجد الحياة مضلمة حوليني لا أقدر أعيش حياتي بنيسان متواصل ولا منك عشم يوصلنا الي نهاية جنك عذابي حتي في الهدنه المعطاءة بين الشهر والشهرين بتقولي حياتنا الجميلة ومشاعرنا وأحلامنا
و تعال زورني وكلام رقيق ماقادر أنا غير أتخبط صحي جينا الحياة بدون دليل شنو يعني مشروع العمر قدام حياة زول وهب عمرو ليك ريده والتزام
كضبي علي أو مثلي أنك زي عشقانا جد محتاجك أنا ما عايز نهايات كتب العشق البغيضة ولا قسوة الاقدارلما تسوق الاحباء لعوالم بعيدة مع بعد مرات العلاج بالكضب بيكون مرحلة والتمثيل كمان
تسلية جد روحي مكركرة لا عايزة تموت بهدوء ولا أنت حاسة بيها سألتك نسوي شنو قلت( أنا ما حلوة شديد كدا عشان تموت بدربي ولا زوله عندي قروش عشان تعذب خليك واقعي بعد الولادة لي
شيء مستحيل وكمان حياة الزوجية والالتزام بالاسرة زي الخيال ياخي أن دخلت السستم أصبحت زوله تاني ما ديك اللي كانت ولا ح تكون بقيت أحس أني جزء من هنا وأنت من عالم تاني ما عايزة
أزيد عذابك بالله أبعد والله انا ببدلك نفس المشاعر لكين بقي طريق ما ح نلاقي فيهو أن خلاص أتجاوزت مرحلة الرومانسية بيقت زي الالة لما رومانسية بتصل بيك أمارس كل جنون الانوثة الرومانسي
معك بينا يا زول بحور غير المسافة وغير الاهتمامات وطريقة الحياة حاجة أسمها قلب حرق من مدة تاني كيف يحس ويتفاعل بالجد أنا مؤمنة بقصة المشاعر والحياة مع رفيق عمر لكين كيف لما الواحدة
تكون قطعت مشوار وسط صراعات وما حققت غير أنها مشردة من بلد لبلد يا خي أن برضو عايشة شيء أمكن ما ظاهر علي لكين بعاني أيوة حزينة علي العمر اللي فات وخايفة من العمر اللي جاي
حاولت ألقي تفسير فلسفي لحياتي فشلت وحاولت أرجع وأحتمي بالدين ما عندي الصبر علي العبادة الطويلة حاولت أغرق في الشغل والاجتماعيات برضو بتظهر حاجاتي المزعجة كان ذكريات ولا جروح
قديمة ولا صدمة ما أتعالجت لا بمشاعرك دي ولا حتي بالعيادة النفسية أقول ليك أخر أعتراف بالجد أن متعلق بيك أنت حته في الدنيا أنا فقدها بس كيف القي الشجاعة عشان أبدا من جديد تعال ننسي بعض
ونعاني لحدي ما نمرق من حالتنا دي )
أنت معي منتهي القسوة ما قادر أنا أتجاوز قصة أني بحبك كمان أحاول أنسي أمكن عندكم هناك في طبيب نفساني هنا الفكي بجلد بس يعني أنا أجن وأنجلد دي نهاية عشان في زمان الفيس البوك والتويتر بالله
أنت كنتي صريحة لكين دا مخرج من مازق لناس واعيين او معالجة أنسانية لقضية ممكن يكون حلها نكون بس واقعيين شوية
اهديك هذه الابيات
عساها تعبر عني
(لا يكون الانسان ناضجا
الا عندما يبدا بالانتباه
الي ان هنالك من هو
قادم لقطافه
النضج يليه الاهتراء
احيانا وعلي غير أدارة منك
تجد نفسك مدفوعا بذكري ما
للتجوال في براري الماضي
باهتة المسرات المستعادة
لكن ذكريات الاخفاقات
لا تزال تدمي كاشواك قاسية
رجلاي خائرتان
لدرجة أشعر معها
بأني لم أعد قادر
حتي علي مجرد التقدم في العمر )
نعم الجمر بكرة بكون رماد
وأنا حصان يبكي ويحمم ويسالك
أيهما أحب اليك حروفي أم قبري الذي سوف تزوين ؟!!
اتعرفين ياروحي البريدا أتشتت قلبي وبقي سهر حديث الصحاب بحضن السفاهة والفراغ

Quote: أنت معي منتهي القسوة ما قادر أنا أتجاوز قصة أني بحبك كمان أحاول أنسي: أمكن عندكم هناك في طبيب نفساني هنا الفكي بجلد بس يعني أنا أجن وأنجلد

ههه!
تحياتي يا زهير،
وجمعة مباركة بإذن الله!

يا صاحب
بطل الجرسة
اطرح نفسك كنصف آخر لها .. وشوفو حلول انكم تكونوا مع بعض كيف
نجحت واصلوا .. فشلت .. كل زول يركب شارعو واحظرها في الفيس وما تجيب اسمها
بطق ليك عرق

أخي وصديقي ود أبوسن
تحيتي لك في هذه الجمعه المباركة عساها تكون مجلبة خيرا وهدأة مؤمن وتباشير أنعتاق من النار
أخي لا أود التحاور والدخول في متاهة التأويل ولكن لا يقاسي الشوق الا من يعاركه
لك مني كل الود أيها الراقي حرفا ودواخل

أخي صلاح
تحياتي
وأشكرك كثير علي المرور والتعليق
أنشالله ما أنجلد ياخي
صادق تقديري