دقينا ما خلينا باب

يا عشم الواطا البتّق
تعال قريب واقعد معانا
نادى الغيم البدا يتفرق
يغطى الضل القاعده بره
حاضن جمرو
و جوفو محرّق
وقول لى الضحكة
مستنين هطولك
غصبا على دمع الوجع
كيتاً على كل الظروف
قول للمطره عليكى النيل
الفرتق ضفاير موجو
فى عرس الجروف
قول ليها كيف
لى هسه منتظرين وصولك
يا تجينا يا تورينا كيف
نقدر نطولك
قول ليها
عليكى الشدر الشال الحفّه
مد مساير حزنك ليل
واداكى من افراح سنينو
عليكى الشوق الهد الحيل
عليكى الموج الحرد الضفّه
عزى خسامة الوجع المدفّق
وطيبى
خاطر البحر القبيل
شال نار الشقا الفينا
وادانا من طينو

يا فرح الواطا البتّق
عليك الوجع المالى الليل
قول لى الرذاذ الأبا يغشانا
خلاس كفاك
قول للقمر الشد شراع العتمة
وعدل الدفه
خلى البت الساكنه دمانا
تفج السكه وتمرق
تلفح توب الإلفة
تجينا معاك
وينشرح صدر المسافه
بى مروقك
البت السمحه ومليانه
وطالعه من رونق جنانا
قول ليها الغناوى الطاعمه
منتظرات شروقك
راجياكى بى شوقا الطويل
تعالى وطرزى الواطا
كحلى الشوف بالنهار
ولونى الليل بالهديل
والشمس تصبح هدية
مشتولة فى ضل المقيل

يا غيمنا البدا يتفرّق
الأمانى الخايفه
من غيبة فصولك
ماسكه فى الحلم البخيل
ومعاها ماسكين فى صبرنا
حداها قاعدين نندهك
يا ريحة الفرح المافى
معاها قاعدين فوق جمرنا
يا ضو السعد الجافى
كوسنا ليك بلد بلد
دقينا ما خلينا باب
وينا جيتك ووينو وعدك
لى هسه واقفين نسألك
والحزن ساكن عمرنا
مكتوب مع شوق الصحاب

والعطش ساكن لهاتنا
خاتى رايو مع الرهاب

العطش ساكن لهاتنا
خاتى رايو مع الرهاب