القول الفصل في شأن العاملة المنزلية السودانية .. شرطاً ان يكون الكفيل سوداني

وليه قصر الأمر على السودانيين

مفروض يفتحوا ليهم فرص العمل كاملة مع سودانين وغير سودانيين

الاخ ابونعوف .. وضيوفك الكرام ...

السلام عليكم ,,

طالما الخادمه السودانية ( اذا صح التعبير ) تستطيع ان تعمل داخل السودان
مع اسرة سودانيه ...
يحق لها ايضا ان تعمل خارج السودان ومع اسرة سودانية ... لما فيه مصلحة للطرفين ..
وانا ما شايف الموضوع غريب ..
كما يمكن وضوع شرط بعدم نقلة كفالتها لاي اجنبي ( سعودي مثلا )..

تحياتي ,,,

الكفيل السئ هو سئ سواءا كان سعوديا أو سودانيا بل ربما بعض من الكفلاء في الخليج أفضل حالا خلقا وأخلاقا من بعض السودانيين .

ومسألة اشتراط السوداني ككفيل للخادمة يمكن أن يحصل فيها المخادعة والالتفاف يستقدمها السوداني ويستخدمها السعودي مقابل اتفاق مالي أو مصلحة معينة .

شرط هزيل .

كما يقول الخليجيين حكومة ما عندها سالفة

الاخ الهادي
تحياتي

Quote: وطالما الحكومة ارتضت وجود خادمات سودانيات في السعودية ودول الخليج بالظروف المعلومة في تلك الدول والانتهاكات الواسعة التي تتعرض لها العمالة المنزلية، فهي لن تتوقف في حتة أن يكون الكفيل سوداني ولا الجن الأحمر زاتو

برضو كلامك ممكن يكون صحيح، لكن حتى في هذه على الكفيل الحصول موافقة السفارة ومكتب العمل، يعني القصة ما مطلوقة ساي، ودي فيها تقدم
نوعا ما في الحفاظ على حقوق السودانية ، معظم السفارات لا تعقد المسائل هكذا.

طبعا الامر خلافي، ومافي اتنين في المنبر اتفقوا على رأي واحد. انا بس جبت معلومة ومؤكدة.

شكرا لمداخلتك يا الحليلة

الامور تغيرت كثيرا في السعودية فيما يخص معاملة العاملات المنزلية.

وكامل الاحترام لما تراه مناسب للمرأة السودانية. وهي لها خيارها ايضا

الاخ خالد عبدالوهاب

Quote: محمد احمد الغلبان (حايبيع) للسعودي خادمة سودانية بمقابل يدفع كل سنتين مع تجديد الاقامة :(

محمد احمد لو غلبان والله ما يقدر يمشي بشارع مكتب العمل السعودي خليك يدخل ويقول داير تأشيرة لخادمة، ياخي بروفسيرات ومدراء
شركات يهزوا ويلزوا الا يعافروها معافرة. قصدي اطمئن من الناحية دي

الاخ الصادق اسماعيل

Quote: وليه قصر الأمر على السودانيين مفروض يفتحوا ليهم فرص العمل كاملة مع سودانين وغير سودانيين

ههههههههه

ياخي براك ما شابف العجاجة القايمة دي، موش البركة الجات على كده
بكامل الاحترام لرأيك

مجيدو يا حبيب

Quote: طالما الخادمه السودانية ( اذا صح التعبير ) تستطيع ان تعمل داخل السودان مع اسرة سودانيه ... يحق لها ايضا ان تعمل خارج السودان ومع اسرة سودانية ... لما فيه مصلحة للطرفين .. وانا ما شايف الموضوع غريب .. كما يمكن وضوع شرط بعدم نقلة كفالتها لاي اجنبي ( سعودي مثلا )..

لايك جدا

اذا اسرة سودانية محتاجة لعاملة منزلية، افتكر بل انصح ان تكون سودانية، اول بدل ما تنفع ليك اسرة فلبينية وللا سرلانكية
حقو تنفع اسرة سودانية.
غير كده، عاداتنا، لغتنا، طبايعنا، اكلنا، راحة البال لمن تخلي اطفالك مع واحدة سودانية

برضو يا مجيد في فرص وظيفية كتيرة (متواضعة نوعا ما) مقصورة فقط على الهنديات والفلبينيات، ولا بأس لو البنات السودانيات لقن فيها
فرصة، المستشفيات زي الكاتيرينغ، النظافة، اهو ، ديل سكنهم معروف كيف، وانضباطهم برضو.

التمريض برضو فاقدين فيهو سودانيات

الاخ عز الدين

Quote: الكفيل السئ هو سئ سواءا كان سعوديا أو سودانيا بل ربما بعض من الكفلاء في الخليج أفضل حالا خلقا وأخلاقا من بعض السودانيين . ومسألة اشتراط السوداني ككفيل للخادمة يمكن أن يحصل فيها المخادعة والالتفاف يستقدمها السوداني ويستخدمها السعودي مقابل اتفاق مالي أو مصلحة معينة . شرط هزيل .

طبعا ممكن يكون في كفيل سوداني سيء لاننا ما ملائكة، لكن دي حاجة نادرة، لان البيوت السودانية في السودان تعاملت مع العاملة المنزلية السودانية
من سنة دو، ولم نرى رب منزل او ربة منزل في السودان عذبوا خادمتهم او اهانوها او جوعوها، ما ياهم السودانيين نفسهم. القصد ليس من المعروف
عننا كسودانيين نعامل من يخدكون في منازلنا (في السودان) بطريقة مهينة عشان لمن تجي السعودية بنبقى شياطين.

اما السيناريو بتاع سوداني يبيع الخادمة السودانية لسعودي فدا انا وبكل ثقة في كلامي، مستحيييييييل

نعيد مرة تانية، ما اي سوداني بدوهو تأشيرة لخادمة، الزول الوضيع البفكر كده اساسا ولا يحلم مكتب العمل السعودي يديهو تأشيرة، حتى لو نجح في هذه لن ينجو
من مقصلة السفارة السودانية.

Quote: الامور تغيرت كثيرا في السعودية فيما يخص معاملة العاملات المنزلية.

الأخ أبنعوف
للأسف الأخبار التي أتتني من مصدر موثوق تقول بغير ذلك!!
يومكم سعيد
__
الحليلة

والله يا ابو حميد انا قعدت افكر في الموضوع ده ما لقيت فيه غير الاستبهال وقلة الحيلة والمبررات الواهية
كيف يعني شرط يكون الكفيل سوداني ؟؟؟
في اجنبي ممكن يجيب على كفالته خادمة ؟؟
اللهم الا لو اجنبي مستثمر حسب علمي مسموح ليهم بعدد محدود من العمالة الاجنبية
قبل كم يوم
عندنا صاحبنا عاوز يجيب زوجته عمل كم محاولة لاقامة فشلت الكفيل قال ليه اسأل المكتب
لو ممكن تجي على فيزة شغالة نجيبه ليك وبعدين اعمل ليها نقل كفالة
الراجل مشى المكتب وقال ليه ممكن جداً
والرسوم المستحقة 2000 ريال رسوم تاشيرة
و 2000 ريال استحقاقات مكتب
ولم يتحدث صاحب المكتب عن اي اجراءات او شروط مخالفة لاصدار تاشيرات العاملات المنزليات
خاصة بالسودانيات
وناس الانقاذ التافهين ديل ما ليهم غير التلاعب بالالفاظ
بعدين هسي عليك الله من السوداني البقبل يجيب ليه سودانية في السعودية هنا عشان يشغله خدامة ؟؟؟

دا اسمو تحايل على القانون ليس الا
المراة السودانية عملت طبيبة وعلى كفالة الدولة ولم ترحمها السن وايدي المعتدين
فما بالكم ان كانت داخل منزل كفيلها سوداني كان او اجنبي
على الذين لا يجدون حرجاً في الامر طالما انها يمكن ان تعمل خادمة بمنزل سوداني بالسودان واهمون
هنا في السودان الوضع مختلف تماماً
ليس بيد الكفيل جوازها وليس في بلد تعرفه
بل يمكن ان تغادر المنزل الى اهلها او ياتون لاخذها في اقل من ساعه وعزتها وكرامتها محفوظة
اما في الاغتراب فالوضع مختلف خوف الاغتراب لمسكينة لا تغادر الاربع حوائط ولا تملك مالاً او جوازا او تعرف طريقاً لاهلها

اصبح موضوع جلب الخادمات للسعودية موضوع اتفاقات بين الدول التي تصدر الخادمات للمملكة ، مثلا نجد اندونسيا من اكبر الدول المصدرة للخادمات ، توقفت عن ارسال الخادمات بزعم ان عمالها يتعرضون للظلم من الكفيل السعودي ، وارتأت لابد من اعادة صياغة الاتفاقات ، لزمن قريب المفاوضات جارية بشان حل هذه المشكلة ، ثانيا مكتب العمل السعودي توقف عن اصدار فيز الخادمات ، لان الخادمات يتم ارسالهن دفعة واحدة بعد تجميعهن من قبل مكتب في الدولة المصدرة ، وكل الخادمات التي تتحدثون عنهن حضرن بفيز مربية ، خياطة ، يقوم بشراءها بعض السودانين لكي يحضر بها زوجته او اخته واي قريبة ، ومن ثم تقوم بالعمل كخادمة ، ولكن ما اظن ان الحكومة السودانية موقعة مع الحكومة السعودية على اتفاقيات لجلب الخادمات ، اذا حدث ليس هناك سبب يجعل الحكومة السعودية من التكتم عل ذلك .

لا ارى اي مبرر يدفع سعودي " عشان يلف اللفة دي كوولها و يستقدم سودانية بواسطة سوداني " ، ما هي ميزة الخادمة السودانية حتى يقوم البعض بالالتفاف حول القانون و تعريض نفسه للمساءلة ، طالما ان الكفيل لابد ان يكون سودانيا ، اذن لا يحق للسودانية العمل لدى اسرة سعودية ! اكرر ما هي ميزة الخادمة السودانية؟
كما اعتقد ان السودانيين هم الافضل في التعامل مع العمالة المنزلية بين كل الجنسيات العربية ، والسعوديين وبقية العرب هم الأسوأ على الاطلاق ولا اوافق ابدا على عمل السودانية لدى اسرة عربية ، رغم ان عقلي يؤمن بالعكس ، واعني حرية المرأة في اتخاذ كل قراراتها بما فيها حق العمل على اطلاقه ..
سلام احمد

شكرا أخ أحمد,

هذا الأمر لن يكون بمقدور أي شخص التحكم في مخالفاته طالما أنها ستحدث تحت سلطان دولة أخرى. الأوفق أن يمنع تماماً تصدير العمالة المنزلية النسائية تماماً ومنعاً باتاً سواء كان الكفيل سوداني أو غير سوداني.
ظروف خدمة العمالة المنزلية في دول الخليج ظروف معروفة ولا تزال دول كثيرة تقدم رجلاً وتؤخر أخرى وتشترط الاشتراطات الصعبة لحماية العمالية النسائية المنزلية ومع ذلك فهي لا تفلح وكفى السودان ما فيه
من هموم أكثر من مطاردة قضايا النساء السودانيات في بيئات هن غير مهيئات للتعامل معها.

الخادمة مهنة غير مفهومة وظروف عملها غير معروفة لمعظم السودانيات اللاتي قد يرغبن في شغل هذه الوظيفة وإذا تصور أي سوداني أن بمقدور الحكومة السودانية أن تتابع رعاياها في
الخارج فلينظر لكيفية معاملة هذه الحكومة لبائعات الشاي مثلاً في شوارع الخرطوم.
نحن الآن ليس في معرض مناقشة السماح بالعمالية المنزلية النسائية من عدمه فقد تم السماح بذلك ولكننا في معرض تشكيل موقف ضاغط لوقف تصدير هذه العمالة والاستعاضة عن ذلك ببرامج
تدريب وتشغيل للنساء في هذا البلد المترامي الأطراف والملئ بالفرص لتشغيل النساء.
قاتل الله من دمر مشروع الجزيرة .. قاتل الله من دمر مشاريع الدولة المروية ومصانعها ومحالجها...

أحمد الشايقي

Quote: في اجنبي ممكن يجيب على كفالته خادمة ؟؟

أبو روضة يا صاحب

اللخو من وين في البلد دي ! هههههههه

يا أبو روضة يمكن للأجنبي أن يستقدم خادمة وتكون تحت كفالته زيها وزي أي من أفراد أسرته

وأزيدك في الشعر بيت، لو كنت شغال في شركة محترمة فالشركة بتدي الخادمة اللي تحت كفالتك تأمين طبي زيك وزيها واحد وزي أفراد أسرتك

شن قولك يا اللخو ؟

شروط التأمين الطبي للعائلة:

تمنح الشركة التأمين الطبي للموظف وجميع من يعولهم من المقيمين تحت كفالته .