بسأل عن تلاتة

معاوية الزبير
جمال ود القوز الشهير عندي ب ود عكر
ود البوش

وفى زول اسمو مبارك الكنزى (بطرى) بسال منك انت كمان

تحياتى يامواطن
ثم انا طالبك وجبة سمك كااااربة

السمك (مصدرى )معاوية الزبير

مرحبا معاوية
وحبابك
كيف ياخ مبارك احمد ابراهيم الكنزي .. او مبارك بطري
من اصدقاء الطفولة والابتدائي واخوانو اصحاب يحي قباني
مبارك صديق عزيز وكنا لا نفترق .. وهو شخص مبدع وفنان
سلامي ليهو
السمك راقد بس انت تعال
تشكر والله وسلم لي عليهو

Quote: معاوية الزبير

عبد الحفيض،
إزيّك.

أها، مآك ساعل من معاوية المدير ؟...

ود اب سن يا رائع .. سلام مربع ليك ولمعاوية عبيد ومعاوية المدير والتلاتة الذين بايعتهم

دخلت أسلم وعندي كلام خاص لود المدير (معاوية المدير)

يا معاوية المدير ياخي إسمك بخوف تعرف ليه

عندي صحبي زمان كدا كنا شغالين مع بعض

بعدين يوم جاني الصباح قال لي يا عاصم أنا شغال في الشركة دي لي سنين مافي يوم المدير دا قال عاوزني

الليلة حيت من الصباح قالوا لي المدير عاوزك يا ربي يكون عاوزني ليه (هو صاحبنا دا من الناس الكانوا لفي الجيش السوداني زمان أيام الضبط والربط والسينيرتي وما بحب المدرا كلو كلو )

أها لمن شفتوا متلخبط وبيجرف قلت اديه زيادة شحنات نفسية( طبعاً هو عسكري جيش قديم وأنا عارف الشحنة دي بتديه نتيجة عكسية وتخليه ما يخاف)

أها قلت ليه: المدير دا طالما أول مرة يناديك يان عاوز يرقيك يان عاوز يرفدك

طوالي عدل وقفته إنتباه كامل وقال لي حريقة لفيهو هسة بدخل ليهو

أها لمن دخل لقى المدير عاوو يتونس معاه ويدردش معاه لأنه مبسوط منه

جاني قال لي المدنيين ديل ناس فارغين ساي

____________

آسف للحجوة الطويلة يا مدير

كيف ياخ مبارك احمد ابراهيم الكنزي .. او مبارك بطري
------------------------------
اجمل واروع ناس
بالجد الواحد مشتاق شوق مطر لي مبارك وعبدالعزيز
ايام السعودية لم يصادفني احن منهم ابدا
بالله يامعاوية تلفوناتهم في الخاص

شكرا يا ودابوسن

هلا ود المدير
بلاك خربانة
وكيف يسأل عمن هو حاضرا في الذاكرة
ياخ ليك ولأخرين مكانة في القلب والعقل
اها طبعا اتا و وود الزبير لبعض الناس بتعملو لخبته .. لكن افادني ان ود الزبير من كوستي

Quote: اها طبعا اتا و وود الزبير لبعض الناس بتعملو لخبته .. لكن افادني ان ود الزبير من كوستي

الزول رباطابي من مُقرآت، وانا في لحمة رباطاب،
يعني سِراً لي...

أما معاوية الزبير مهيييص في الخرطوم
ودي آخر صورة ليهو يوم 02/12

إنت يا ود اب سن .. الناس في المنبر دا ما بيقروا ردود بعض ليه؟

الفوق دا مش كلامك كعنوان لبوست ؟

سلامات ود ابوسن
والضيوف الكرام

Quote: إنت يا ود اب سن .. الناس في المنبر دا ما بيقروا ردود بعض ليه؟ الفوق دا مش كلامك كعنوان لبوست ؟

يا عاصم،
يشهد الله قريت ردّك. ليس كل المداخلآت يُرد عليها بسرعة،
يعني في واحدات لآزم الرد عليهن يكون بقدر ما يحملن من
مودة حتي نبادلكم إن إستطعنا.
أضف لذلك النزلة ماكناني مكنة العدو، فمعذرة يا صديق،
وبجيك للرد إن شاء الله.
مودتي...

وسلام ليك عاصم فقيري
وكثير ود
ههههه عصرت علي المدير ومن تسمي بي ولده ..
الناس ديل من بايعتهم وومن دخل مبايعا بعدي لهم الاحترام
واتا زاتك مختفي يا اخوي
اها النرجا ود المدير ما يسويها لينا دحشة ووالدة

وسلام ليك عاصم فقيري
وكثير ود
ههههه عصرت علي المدير ومن تسمي بي ولده ..
الناس ديل من بايعتهم وومن دخل مبايعا بعدي لهم الاحترام
واتا زاتك مختفي يا اخوي
اها النرجا ود المدير ما يسويها لينا دحشة ووالدة

ود أب سن لا عليك .. قالوا ما لامك إلا البريدك

أها لو ما متوسم فيك خير وعشمان في محبتكفأنا متعجرف شوية فيني باقي عجرفة مثقفاتية (حمر) أجاهج النفس أن أتخلصلا منها، يعني لو ما بريدك ولا كنت دخلت البوست ذاتو

لكن نسوي شنو في الريدة الما زي رديت أغنية وردي ديك (رحمه الله) : يا قلبي ما قلت ليك ما تحب وخلي للحب الدرب .. لكن كمان ما تكون عنيد وتحب ليك زول ما بحب

تسلم يا غالي

بس شايف ود المدير عمل زغبير !

مرحبا عوض
وحبابك
تشكر ياخ
معاوية وصل وزمنو ضيق .. قال الزيارة دي لي امو بس .. يحبسها ويقرا
السمك اباهو والمولد اباهو
معاوية رجل وفي لصداقاته وتاريخه وذكرياته

تعرف يا عاصم الشاعر العبادي في زمن نميري . مهرجان الثقافة قابل وردي في الحفلة . وناداهو وقال ليهو
قالوا انت مفتري ومتكبر . وانا برديك انا زاتي زيك متعجرف ومتكبر

الثلاثة عرفتهم اسفيريا
معاوية و ودالقوز من كوستي
ود البوش من البطانة
اتاحت لي الفرصة ان اقابل معاوية ولنكتشف اننا قرأنا في مدرسة واحدة ودفعة .. ولكننا لا نتعارف ..
ود القوز تعارفنا في منتدي كوستي سيتي .. وهو زول كتاب لو خت صلبو في الواطة .. سلس ومتماسك وصحيح اللغة وله ذاكرة متقدة
ود البوش عرفته هنا وتوثقت معرفتنا بالمشاغلات والونسة . وكان لنا تواصلا بالتلفون
المهم
اين هؤلاء الشخوص

Quote: تعرف يا عاصم الشاعر العبادي في زمن نميري . مهرجان الثقافة قابل وردي في الحفلة . وناداهو وقال ليهو قالوا انت مفتري ومتكبر . وانا برديك انا زاتي زيك متعجرف ومتكبر

ههههههههههههههههههه،

يا ود اب سن داير تعدل لود فقيري عجرفو ودخولو في زمرة المسغفاتية،
يا راجل المسغفاتية ديل أكبر ضلآلية ومجرمين يضلوك وإنت قاعد فوق
تقروقتك وإبريقك قدآمك.
هوي يا عاصم بطّل السكيكة والناس المتقرضمين ديل أختاهم، تراني
نصحتك وبعد دا إنت مخيّر.

الجماعة الناشد منهم ود اب سن واقعين تقاة منو ؟...

يا ود المدير يا اخوي الثقافة دي حارة خلاس
مرة قاعد مع مسقفين حيثو انو اخوك معتبر نفسو موسخف ويتحدث في الامور الما بعرفوها البشر ! ولا بتهمهم لو عرفوها
كلامنا كلو نصو عربي ونصو نيشنات .. اها جابو الشاي .. نص معلق .. معلقة الا نص .. معلقة ما تملاها .. وكوني داير اثبت سقافتي اكتر منهم .. قلت ليهم بدون معلقة وقربت اقول ليهم وكبو فيهو ملح
وحاتك ابلع في الشاي زي حبوب الكنين . والظاهر الحبوب ظهرت في وشي .. واحد قال لي مر نديك سكر ؟
واصابتني حمية المثقفين الاولي وقلت ليهو
لا كدة تمام
ولم تنفعني سفة سكر بعد ذلك

أبوسن، كيفك والجمعة الجامعة
شكرا على السؤال ياخ وتسأل منك العافية
وإن شاء الله بقية المسؤول عنهم يكونوا كويسين ولا يمنعهم من الكتابة سوى عدم الخ الخ
أبداً يا حبيب مافي شئ، مؤخرا كنت في السودان-الخرطوم ولما أكون هناك ما بفتح إنترنت

قصدت السودان (الخرطوم) لسببين
الأول مشاركة أسرة صديقي الراحل راشد عوض فرحتهم بتخرج الابنة الحبيبة أمل
والحقيقة فرح المناسبة امتزج بالحزن على غياب الأب
كل ما نتعايش مع فقدان أحبائنا تجئ الأفراح تذكرنا بفداحة عدم حضورهم

ثانيا رأيت أن استغل الفرصة لتحقيق رغبة بسيطة رويانة كما كتبت لك بالماسنجر:
(أشتهي أن أقضي معظم أسبوعي في الخرطوم بجوار الوالدة حبصة، أقرأ في كتاب وأهش الذباب، ثم أتوكل وأغادر إلى المطار)
ولذلك علاقة بهذا البوست
راس الدولاب.. يا له من مكانراس الدولاب.. يا له من مكان

وقد تحققت رغبتاي أعلاه بزيادة أن ناس كريمين من خريجي جامعة الزقازيق أكرموني بضحوية ذكريات ممزوجة بطعم سمك الخرطوم

ثم التقيت بحبيبنا أسامة الخواض وشقيقه نزار بترتيب مشكور من "عم" سيف سمعريت في مركز الخرطوم للاطلاع والمشاهدة
الذي أنشأه ويديره بحب ومشقة وإصرار عنيد على الاستمرار رغم تفاهات الأمن وغياب أعضاء فاعلين بسبب الموت أو الهجرة

لقاء أسامة الخواض أوردته هنا بقصد الولوج إلى سبب آخر للفتور الذي أصابني تجاه المنبر

و.. راجع حين ميسرة يا مسكّف

اووووو يا صاحب
عودا جميلا
ومبروك للبنية وعقبال عيالك
الواحد ما يضرب لي اهلو الا كل شهر ومستعجل .. الاتصالات غالية
موقفك توقفت عنده كثيرا .. فهو موقف يشرح الكثير
سأعود

اووووو يا صاحب
عودا جميلا
ومبروك للبنية وعقبال عيالك
الواحد ما يضرب لي اهلو الا كل شهر ومستعجل .. الاتصالات غالية
موقفك توقفت عنده كثيرا .. فهو موقف يشرح الكثير
سأعود

Quote: مرحبا معاوية وحبابك كيف ياخ مبارك احمد ابراهيم الكنزي .. او مبارك بطري من اصدقاء الطفولة والابتدائي واخوانو اصحاب يحي قباني مبارك صديق عزيز وكنا لا نفترق .. وهو شخص مبدع وفنان سلامي ليهو السمك راقد بس انت تعال تشكر والله وسلم لي عليهو

الله يديك العافية و انت بتفقد الناس ...

خصلة نادرة في الزمن الملامحو معكرة يا صاحب

بعدين ياخ ما وضحت لمعاوية انو اخوان مبارك ( الصغار ) هم اصحابي ...

عشان يا عمنا نحفظ المقامات بس ...

هههههه
يا قباني كلامك صاح .. بدلالة انو مبارك حتالة البيت
تشكر يا صاحب وكتر خيرك

أها قلت ليه: المدير دا طالما أول مرة يناديك يان عاوز يرقيك يان عاوز يرفدك

طوالي عدل وقفته إنتباه كامل وقال لي حريقة لفيهو هسة بدخل ليهو

أها لمن دخل لقى المدير عاوو يتونس معاه ويدردش معاه لأنه مبسوط منه

جاني قال لي المدنيين ديل ناس فارغين ساي

<<<<<<<<<<<>>>>>>>>><<<<<<<<<

والله يا عاصم فقيري الحكوة ما طويلة وهي ظريفة جدا جدا

بس كمان عاوزة اقول شئ في حكاية قولك او قول وردي:" وكما ما تكون عنيد وتحب ليك زول ما بحب..
اها معظم شباب السودان العاوزين يحبوا من الناس العنيدين ديل و ما بيحيوا إلا الزولة الما بتحب.. يعني دائما عندهم جلد الذات
وتلقاه جاري ورا فتاة لا تحبه ولا تستلطفه ويقول فيها القصائد وفي نفس الوقت بتجاهل واحدة تانية بتحاول
تتقرب منه وبتستلطفه,,, وشوف معظم الأغاني السودانية بتقول شنو...
والله يديك الصحة والعافية

مرة تانية سلام لسيد البوست المثقفاتي العامل فيها ما مثقفاتي

ياخي إنت من شدة ما مثقفاتي عاوزين نغير النظارة عشان نقرا بوستاتك دي يمكن ننال من الطيب نصيب


أخونا ود المدير تعرف أصلاً زايغ منهم ونصيحتك دي وقعت لي في جرح

أميرة السيد الأميرة

والله تعرفي قصة الحب دي طبعاً فيها مغارز كتيرة

إتنين تلاقيهم جنب بعض وبيطلعوا وينزلوا مع بعش وبيتزاورا في البيوت لكن واحد فيهم عاوز يصرح للتاني مافي

أها كمان واحد فيهم يعمل فيها ما عارف ويصدق نفسه إنه ما عارف وتصل بيهو الجرأة من العناد إنه يطرح للتاني موضوع إنه بيحب زول تاني وعاوز رأي سيد اللحم والراس الأصلاً هم الإتنين بيحبوا بعض

أها داك كمان نعرة العناد عنده تصل مليون ويقول ليهو والله خبر جميل مفرح زين ما إخترت أها وهنا يكونوا قتلوا حبهم قبل ما يعلنوه

وبعد داك نبقى في الحب العذري وعذابات الليالي والهيام في دنيا الخيال والأغاني والأشعار

يا اميرة الجزء الأخير دا من المداخلة شكله حرف البوست لكن أعتقد هو مرتبط بمداتخلتك وبكون إمتداد لتفسيرك لقصة العناد في الحب (ويا قلبي ما قلت ليك ما تحب وخلي للحب الدرب لكن كمان ما تكون عنيد وتحب ليك زول ما بحب)

وبرجع ليكم وبوست المثقفاتية دا بنفتلوا ليكم نبقيه بوست ونسة ضحوية

العزيز / ود أبو سن إزيك

Quote: السمك راقد بس انت تعال تشكر والله وسلم لي عليهو

بالله صاحبي معاوية دا لو جاك في كوستي أعمل حساب السمك يكون بياض أو عجل من غير شوك للإحتياط وكدة يعني

شنو يا اميرة ياخ
الغنية حقت صلاح بن البادية ما وردي
لو دايرة وردي قولي مثلا
زي ما نساني قلبك امكن قلبي ينسي
الحنين يا فؤادي ليه يعاديك ما بتعادي

Quote: شنو يا اميرة ياخ الغنية حقت صلاح بن البادية ما وردي لو دايرة وردي قولي مثلا زي ما نساني قلبك امكن قلبي ينسي الحنين يا فؤادي ليه يعاديك ما بتعادي

والله يا ود أب سن لو تنبيهك دا خلاني ادندن باللحن ولقيتها فعلاً حقت صلاح بن البادية كنت لحد بكرة أكون قايلها حقت وردي

على فكرة أنا اللي نسبتها لوردي وأميرة السيد لمن جات علقت ما إنتبهت لخطأي و واصلت معاي عادي بإعتبارها أغنية وردي

ودا دليل على أنه أميرة ما زولة غالاطة يعني ما بتاعت غلاط

تسلم إنك نبهتنا

______________________

خلي بالك تكون عنصرية مني كدا ساكت بقيتها حقت وردي

مرحبا سفيان
وحبابك
كدي خلي يجي .. نأكلو عجل افضل الانواع .. انا بحب الدبسة ... صاح شوكها زي الابر وكتير لكن طاعمة
اما معاوية لومك عليك اجيب ليهو سمك ما فيهو شوكة واحدة
قالوا
خير اللحم ما جاور العظم
واقول
خير السمك ما كثر شوكه

عسي !!!
ولعل ؟؟؟؟

قال المتنبئ
وكثير من السؤال اشتياق وكثير من رده تعليل

يا أخوانا والله البوست دا ما يحتل كلو كلو .. دا فاتحه ود اب سن وفيه معاوية المدير وأميرة السيد .. دا بوست حيكون فيه حكي لذيذ وكمان يحيى قباني ما بقصر لو ما بيبخل علينا في المداخلات دا

فحقو الناس تجي تسمع لينا مشاعرها هنا

ويا أميرة إنتي خليك في التحليل بتاع العناد دا وصليهو لينا الحد (كان العناد ولا العجرفة)

ياريت والله
تشكر عاصم

04:33 م Feb 6,2015
سودانيز أون لاين
جمال ود القوز - بين الخاطر والفكرة
مكتبتي في سودانيزاونلاين

Quote: الثلاثة عرفتهم اسفيريا معاوية و ودالقوز من كوستي ود البوش من البطانة اتاحت لي الفرصة ان اقابل معاوية ولنكتشف اننا قرأنا في مدرسة واحدة ودفعة .. ولكننا لا نتعارف .. ود القوز تعارفنا في منتدي كوستي سيتي .. وهو زول كتاب لو خت صلبو في الواطة .. سلس ومتماسك وصحيح اللغة وله ذاكرة متقدة ود البوش عرفته هنا وتوثقت معرفتنا بالمشاغلات والونسة . وكان لنا تواصلا بالتلفون المهم اين هؤلاء الشخوص

ود أبو سن ..

تسأل منكـ العافية يأخ ..
قاعد إلا مشاغل وظروف بس ..
منعتني من التواجد ..
وتصفح النت ..
وربنا يسهل القواسي ..
ممتن كتير لحسن ظنكـ بي ..

ولكل من مر من هنا ودي وتقديري ..

04:48 م Feb 6,2015
سودانيز أون لاين
جمال ود القوز - بين الخاطر والفكرة
مكتبتي في سودانيزاونلاين

Quote: انا بحب الدبسة ... صاح شوكها زي الابر وكتير لكن طاعمة

غايتو بالغت شديد في الدبسة دي ..
رغم إنه السمكـ بدورو ..
وصولاُ للتركين والفسيخ منه ..
لكن الدبسة دي ..
مابدورا وبتجيني معلقة في السنارة طوالي زي ود أبرق لمن تشركـ للقمري ...
يأخ دي فيها شوكـ عجيب ..

في ناس بيعملوها كفتة ويفرموها ..
لكن غير كده حيصدق فيكـ قول الشاعر ..
( إن حظي كرماد فوق شوكـ نثروه .. ثم قالوا لشقاة يوم ريح أجمعوه .. ) ..
الدبسه صعبة عبارة عن حقل من الشوكـ ..
صاحبنا .. أخوه وأبوه ..
لامين ليكـ في دبس محمر وواقعين فيه أكل ..
قال ليهم شنو ثعالب إتو ..
مالقيتوا غير الدبس ده تاكلوه ..
قالوا ليهو مالو .. رخيص وكتير وطاعم ..

كما قلت هو طاعم شديد ..
الا شوكو ده ممسخو ..