***** و غـابت ذكـرى الإسـتـقـلال عن المنبر !!!!!!!!!!!!!!!! *****

.
في أكبر المنابر السودانية
و وسط زحمة أعضاء يصعب حصرهم
منبر يضم تقريباً كل تيارات و جماعات أهل السودان
أصبحت ذكرى الإستقلال نسياً منسيا...

هل نسينا مجهود رجال حملوا هم تحرير بلدهم و قدموه على كل عزيز و نفيس
هل نسينا دماء الرجال و النساء الذين تدافعوا لكي ننعم نحن بالإستقلال

ذكرى الإستقلال وفاء لرجال و نساء قدمو أرواحهم رخيصة من أجلنا


لا خير فينا

.
لا خير فينا ان نسينا فضل الرجال و النساء الذين منحونا الاستقلال

تعيش وتفتكر يا ابو حسين

لو بعلم الرعيل الاول من الاكارم أنها ستؤول الى هؤلاء الاوغـاد كان فكروا مليا لترك الخواجات كان على اسواء الفروض كان قدرنا ناكل مما نزرع ونلبس مما نصنع ،،،اعياد الاستقلال هنا لا طعم لها ولا رائحة ولا لون ،، باهتة ،،
------------------------
الاحتفال بذكرى الاستقلال احساس وشعور جميل وتلقائي ولكن كل هذه المعاني الجميلة اندثرن واصبحت فيها التكلف والصنعة
و على قدر ما نحمل من ذكريات سابقة بهذه المناسبة الجميلة عندما كنا صغار في لحظة خطاب رئيس المؤتمر اللاوطني ليقول خطاب الى الامة تتراى لنا عمايل هذا النظام في الوطن والمواطن ،، ونشعر بخيبتنا ان ارتضينا مثل هذا الشخص ونظامه الكريه 25 عاما من الخيبات والتدني في كل شيء ،،
---------------------------
الاستقلال لا يعني تداعي صور قديمة ابيض بي اسود ورفع علم واناشيد وترديد خطابات الرعيل الاول ،،
هناك انتكاسة والوطن مخطوف لحين عودته من هؤلاء سنفرح بالاستقلال
------------------
تحياتي ابو حسين

.
أخونا علي دفع الله تحية طيبة
الإحتفال بذكرى الإستقلال من باب حفظ الجميل لرجال و نساء وهبونا إستقلال كامل لسيادة بلدنا
و تخليد لي ذكراهم و ما فعلوا من أجلنا
الناس محتاجة لأن تعيش جو أيام الإستقلال و فرحة الإستقلال لحظة رفع علم السودان
و دا ممكن يكون نقطة إنطلاق لكي يتحركوا بقوة لرفع الظلم الذي وقع عليهم
لا أحد ينكر أن الوضع الحالي سيئ و سيئ جداً و الكل مظلوم و أننا لا نستحق كل هذا
و لكن نسيان الجميل الذي قدمه لنا رجال و نساء الرعيل الأول من الإستقلال يخدم السلطة الظالمة
فالإحتفال بهذه الذكرى يوقظ فينا حب الوطن و تراب هذا البلد و يدفعنا للتحرك للوقوف في وجه كل ظالم

سرقة البلد من عصابة لا تخاف الله يجب أن لا تنسينا حفظ الجميل لرجال و نساء أوفياء كان كل همهم أن نعيش أحرار



تحياتي و إحترامي

.
اعلان الاستقلال من داخل البرلمان
و الرجل الذي قدم الاقتراح و الرجال الذين ثنوا الاقتراح
الجلسة التاريخية التي اعلن فيها الاستقلال
المرأة التي قامت بتصميم علم السودان الذي قام برفعه الازهري و المحجوب
حوا الطقطاقة التي ارتدت علم السودان و خرجت للشارع محتفلة بالاستقلال
الرجال و النساء و الاطفال الذين خرجوا للشارع يوم الاستقلال

كل هؤلاء نسينا الاحتفال بهم

لا خير فينا ..

جميلهم على العين والراس
لكن للأسف مآل الحال تسبب في وفاة روح الوطنيه لدى الغالبية
إليك هذا البوست الذي إزدحمت به ردهات التويتر عشان تعرف نحنا بقينا كيف
........................
الواجب:
تطلع من السودان
المفضل:
ماترجع تاني
الامتياز:
تاخد جنسيه تانيه
الاعجاز:
تتزوج من هناك
الزيت :
ماتوري اولادك انك سوداني زاتو
..............................................

أسوأ حاجة ممكن تحصل لي بلد إنو روح الإنتماء ليها تموت لدى مواطنيها

نحن نتحدث عن رجال و نساء كان همهم السودان و شعب السودان
لا يمكن إهمال إنجازهم بحجة ما آل إليه حال السودان
الوطنية و حب الوطن و حب أهل الوطن لبعضهم يجب أن يبقى الشعور السائد لكي يعود السلام و الوئام لكل أرجاء السودان
أين ذكرى الإستقلال ..؟؟؟
أين ذكرى أكتوبر ...؟؟؟؟
أين ذكرى أبريل ...؟؟؟؟؟
هذه هي الأحداث التي سادتها روح الإنتماء للوطن و العطاء من أجله
متى ما نسيناها ماتت في روحنا روح العطاء و العمل للعيش النبيل
و لا تغيير بدون هذه الروح

نسيان هذه الأحداث فيه راحة لمن سطوا على الديمقراطية التي كلفتنا الكثير من الأرواح و الدماء



و لا خير فينا

أصبح الكثيرين يرددون أناشيد الإستقلال و شعاراتها و لكن لا يحسون بها ...
يستمعون لها و لا تحرك شعورهم بمعانيها
إبتعد هذا الجيل عن إحساسهم بمعاني الإستقلال و جوه لأنهم نسوا تماماً الإحساس به
و نحن السبب لأننا نسينا تذكيرهم به


لا خير فينا

يا ابو حسين هل انت مستعد للتضحية بحياتك من أجل السودان؟

Quote: يا ابو حسين هل انت مستعد للتضحية بحياتك من أجل السودان؟

حالتك بقت صعبة شديد يا ابو مهاب
المناسبة شنو لي سؤالك دا ... ؟؟؟
عموما الاجابة
نعم

Quote: المناسبة شنو لي سؤالك دا

Quote: غـابت ذكـرى الإسـتـقـلال عن المنبر

وطبعا ذكرى الاستقلال هي ذكرى تضحيات بالارواح وكده ...
كيف تقول لي المناسبة شنو ؟!!

سلام يا شباب
أبو حسين كتب

Quote: ذكرى الإستقلال وفاء لرجال و نساء قدمو أرواحهم رخيصة من أجلنا

أما أيمن فكتب

Quote: وطبعا ذكرى الاستقلال هي ذكرى تضحيات بالارواح وكده

كدي يا اخوان صحّحوا لي معلوماتي الضعيفة عن تاريخنا
أين و كيف ومن هم من ضحّوا بأرواحهم لأجل نيلنا إستقلالنا عام56
ورجاء ما تقولوا لي ثورة 24 لأنه الجمعية ما كان من أهدافها الإستقلال

يا ود البشرى معارك كثيرة خاضها السودانيون ضد المستعمر واستشهد فيها الألاف ...

Quote: معارك كثيرة

i.e.
1.
2.
3.

Quote: يا ود البشرى معارك كثيرة خاضها السودانيون ضد المستعمر واستشهد فيها الألاف .

ولا واحد استشهد يا ايمن
و الامبراطورية البريطانية خرجت من الحرب العالمية و هى محتاجة من يخفف عنها اعباءها
بل و دعمهم الامريكان بمشروع مارشال حتى يقيفوا على رجليهم
الكلام ده من 1925 و حتى الاستقلال فى 1956و جواهو الحرب العالمة التانية
استقلال بارد و قادة فرطوا فى تبعات الاستقلال و ضاع بلد

تحية طيبة

استقلال السودان في العام 1956 هو امتداد لنضالات الشعب السوداني ووقوفه ضد المستعمر المصري التركي

منذ دخول محمد علي باشا وحتى رفع العلم على يد الازهري .

لو راجعنا طيلة فترة الاستعمار (المسماة دلعا الحكم الثنائي ) سنجد الثورات التي قامت ضدهم هنا وهناك وإن كان دورها محدود في حينه
لكنها ادت الى النتيجة المطلوبة وهي خروج المستعمر .

ثورات النوير والزاندي جنوباً

ثورة وحبوبة في الوسط

تبدل مواقف علي دينار من مناصرة المستعمر الى الوقوف ضده لتتم الفتنة بواسطة المستعمر في دارفور ويتم اغتيال علي دينار.

جمعية اللواء الابيض وإن كانت من دعاة الوحدة لكن هذا لا ينسف مقاومتها للاستعمار

فالزعيم الازهري كان من المنادين بالوحدة مع مصر وكذلك قيادات الاتحاديين وبعد طواف الازهري في ربوع السودان
واجرائه لاستفتاء شعبي (سماعي) تم التوصل الى ما يطالب به الانصار السودان للسودانيين.

والعبء السياسي في ظني كان الاكبر وهو جهد مقدر يماثل دور الذين استشهدوا في الثورات المحلية المقاومة للمستعمر

يعني ما بننظر للاستقلال ده من داخل البرلمان بس لازم نرجع وراء من يوم دخول كتشنر وقبله محمدعلي باشا وحتى تاريخ رفع العلم .

خارج النص

واحد زهجان من قصة الاستقلال وحال البلد الوصل ليه

قال لي الانجليز ديل دخلو السودان 150 عسكري وطلعوا 160 العشرة ديل كانوا تائهين من زمن المهدية .


تحياتي

Quote: ذكرى الإستقلال وفاء لرجال و نساء قدمو أرواحهم رخيصة من أجلنا

ود الشرى الاقتابس الذي تفضلت بايراده لم اذكر فيه تضحيات او خرابيط من خرابيطك دي ارجو تحري الدقة في المرات القادمة و عدم تزوير الحقائق
هذا الرد خاص بالاقتباس الذي اوردته اما اذا اوردت اقتباسا اخر فلكل اقتباس مقال
**********
الاخوين جلالدونا و حمد
شاكر مروركم
تحياتي و احترامي

راجع الثورة المهدية يا ود البشرى !

أبوحسين والله ما عندك موضوع بتعريفة
قلت لي قدّموا أرواحهم رخيصة من أجلنا لا علاقة لها بالتضحية!! يا التبي نوح


يا أيمن الثورة المهدية قامت ضد الإستعمار التركي و انتصرت رسميا بتحرير الخرطوم والتي تأتي ذكرى انتصارها خلال أيّام وقامت الدولة المهدية التي اسقطها الاستعمار الثنائي الذي نلنا استقلالنا منه سنة 56 بقرار برلماني ! وهو الإستقلال موضوع البوست الذي تفضّلت بأن ذكراه هي ذكرى لضحايا سقطوا في سبيل نيله وهذا ما نتظر منك أمثلة, أسماء أو أحداث محددة

Quote: أبوحسين والله ما عندك موضوع بتعريفة قلت لي قدّموا أرواحهم رخيصة من أجلنا لا علاقة لها بالتضحية!! يا التبي نوح

يا رمادي يا فقر وين أنا قلت ما ليها علاقة بالتضحية أهو دا كلامي :-

Quote: ود الشرى الاقتابس الذي تفضلت بايراده لم اذكر فيه تضحيات او خرابيط من خرابيطك دي ارجو تحري الدقة في المرات القادمة و عدم تزوير الحقائق هذا الرد خاص بالاقتباس الذي اوردته اما اذا اوردت اقتباسا اخر فلكل اقتباس مقال

للمرة التانية يا رمادي يا فقر تحرى الدقة فيما تقول و لا تقولني مالم أقل ...

"ذكرى الإستقلال وفاء لرجال و نساء قدمو أرواحهم رخيصة من أجلنا "

زول واحد ما إستشهـد.. وكما قال غازى سليمان رحمه الله: البلد دى كلها كضب في كضب في كضب..
هسى قالوا يوم 1/1 الإستقلال.. ويقولوا ليك شهداء المهدية.. إستقلال السودان بواسطة المهدية يحتفلوا بيه يوم 1 يناير؟ واللا تلبط في شهـداء المهدية؟

فاقد الشيء لا يعطيه .. .


لو اقام الناس احتفالاً بيوم "الحزن الوطني" لرأيت تفاعلاً يفوق الوصف ...

لكن لن تجد اهتماماً بالاستقلال ... لأن الناس ما زالوا تحت الاستعمار .... وإن أتى بثوبٍ مختلف ...

=

Quote: لا خير فينا ان نسينا فضل الرجال و النساء الذين منحونا الاستقلال

في أول يناير 2014 وبمناسبة ذكرى الاستقلال افترعت بوست مناشداً أجهزة إعلامنا المختلفة
الالتفات لسيرة رجل لم يكن شاهداً فقط، بل كان رئيساً للبرلمان الذي من تحت قبته تم إعلان الإستقلال.

الرجل ما يزال يأكل الطعام ويمشي في الأسواق ، ويعيش في مدينة أوروبية تصل إليها كل أجهزة الإعلام السودانية من صحافة وفضائيات وغير ذلك.. لكن لا أحد من صحفيينا الذين لم تنقطع أرجلهم - رغم بيع خط هيثرو- عن التنزه (حتى لا أقول التسكع) في الهايدبارك ..

ليس مِن بين الصحفيين مَن هو مستعد لإجهاد نفسه لزيارة رئيس برلمان الاستقلال، لأخذ صورة تذكارية ناهيك أن يأخذ ويسجل شهادته.. والرجل شاهد في سنوات عمره التي تقارب حبات المسبحة أحداث قرن كامل في السودان وفي غير السودان .. بالإضافة إلى أنه لم يكن شاهداً فقط بل كان رئيساً لبرلمان استقلال السودان.

تحياتي أخي أبوحسين لكم ولضيوفكم..
وكل عام وأنتم واسرتم الصغيرة واسرتكم السودانية الكبيرة بألف خير.
...
..
.
البوست على الرابط التالي:
بـــابـكـــر عـــوض اللــهبـــابـكـــر عـــوض اللــه

نهايته يا حاج عشان انا الغلاط البلا ميزة دا بقى بهيّج علي الجيوب الأنفية
الناس القدّموا أرواحهم رخيصة لأجلنا دي أدّينا منهم إسمين تلاتة

Quote: زول واحد ما إستشهـد.. وكما قال غازى سليمان رحمه الله: البلد دى كلها كضب في كضب في كضب.. هسى قالوا يوم 1/1 الإستقلال.. ويقولوا ليك شهداء المهدية.. إستقلال السودان بواسطة المهدية يحتفلوا بيه يوم 1 يناير؟ واللا تلبط في شهـداء المهدية؟

يا Abureesh الإقتباس اللي إنت جبتو دا أنا ما ذكرت فيه إستشهاد و دا دليل على صحة كلامك في إنو البلد كلها كضابة ..
****************************************************

Quote: فاقد الشيء لا يعطيه .. . لو اقام الناس احتفالاً بيوم "الحزن الوطني" لرأيت تفاعلاً يفوق الوصف ... لكن لن تجد اهتماماً بالاستقلال ... لأن الناس ما زالوا تحت الاستعمار .... وإن أتى بثوبٍ مختلف ...

أخونا هاني
عدم الإحتفال بالإستقلال بحجة أن الحكومة الحالية تجمع كل الصفات السيئة و الذميمة دي حجة واهية فالذين صنعوا الإستقلال
لا يعلمون الغيب و لا ذنب لهم أن فرط السودانيين من بعدهم في بلد كالسودان ...
*********************************************

Quote: في أول يناير 2014 وبمناسبة ذكرى الاستقلال افترعت بوست مناشداً أجهزة إعلامنا المختلفة الالتفات لسيرة رجل لم يكن شاهداً فقط، بل كان رئيساً للبرلمان الذي من تحت قبته تم إعلان الإستقلال. الرجل ما يزال يأكل الطعام ويمشي في الأسواق ، ويعيش في مدينة أوروبية تصل إليها كل أجهزة الإعلام السودانية من صحافة وفضائيات وغير ذلك.. لكن لا أحد من صحفيينا الذين لم تنقطع أرجلهم - رغم بيع خط هيثرو- عن التنزه (حتى لا أقول التسكع) في الهايدبارك .. ليس مِن بين الصحفيين مَن هو مستعد لإجهاد نفسه لزيارة رئيس برلمان الاستقلال، لأخذ صورة تذكارية ناهيك أن يأخذ ويسجل شهادته.. والرجل شاهد في سنوات عمره التي تقارب حبات المسبحة أحداث قرن كامل في السودان وفي غير السودان .. بالإضافة إلى أنه لم يكن شاهداً فقط بل كان رئيساً لبرلمان استقلال السودان.

أخونا الصادق تحية طيبة
أهو شفت كلامك دا هو المقصود من هذا البوست الإحتفال بالإستقلال إحتفال برجال و نساء صنعوا الإستقلال ....

***********************************************

Quote: نهايته يا حاج عشان انا الغلاط البلا ميزة دا بقى بهيّج علي الجيوب الأنفية الناس القدّموا أرواحهم رخيصة لأجلنا دي أدّينا منهم إسمين تلاتة

نهايتو يا فقر عايز ليك ثغرة تدخل بيها لي أماكن وعرة و ما لقيتها
و بعدين إنت بتغالط في روحك
و الجيوب الأنفية شوف ليك طريقة شيلها بي عملية عشان ما تملانا فقر أكتر من كدا

يا بلادا حوت ماثرنا كالفراديس فيضها منن

ابو حسين اخوى
حال البلد وصل بالناس لدرجة من الاحباط تلقى جملة زى (يا ريتهم ما مرقوا -- او ياريتهم يرجعوا ) عادية جدا
لذلك اعتقد ان الناس لم ينسوا تضحيات او مساهمات من اتوا بالاستقلال لكن حالة الاحباط والقهر اكبر من اى شئ اخر حاليا
الناس لهم عذرهم مفروض اصلا يكفروا بحاجة اسمها وطن لانه لا يوجد شعب مر بما يمر به السودانيين اليوم

نسأل الله أن يحمى البلاد من شر المتربصين بها وأن يصلح حالها وينعم المواطن بالرفاهية.............من العلينا بقى الفرح بالأستقلال يخبو رويداً رويداً

Quote: نهايتو يا فقر عايز ليك ثغرة تدخل بيها لي أماكن وعرة و ما لقيتها و بعدين إنت بتغالط في روحك و الجيوب الأنفية شوف ليك طريقة شيلها بي عملية عشان ما تملانا فقر أكتر من كدا

ثغرة!! وأماكن وعرة!!!
أبو حسين .. أرجع للكبشرة الله يهديك, بتعرفليها و تجضّمها زي ما جات في الهاند بووك :)

وقبل كدا ما تنسى تدينا إسم واحد - عفيناك من التلاتة - لواحد او واحدة بذل روحه رخيصة لأجلنا - يا قولك

Quote: هل نسينا مجهود رجال حملوا هم تحرير بلدهم و قدموه على كل عزيز و نفيس هل نسينا دماء الرجال و النساء الذين تدافعوا لكي ننعم نحن بالإستقلال ذكرى الإستقلال وفاء لرجال و نساء قدمو أرواحهم رخيصة من أجلنا

ملاحظة جديرة بالتوقف عندها يا ابوحسين .. مع التحية
المشكلة أن عيد الاستقلال مع راس السنة ..
كل العالم في إتجاه ونحن في إتجاه ..

كمان أخوي أبوحسين .. ظروف الحياة .. والمعيشة والضيق جعل
أولويات الناس مختلفة تماماً .. ونحن الوطن المختصر عندنا في الحزب والحاكم
وهذا نتيجة التسلط من الحكام ولا أعفي بعض الأحزاب
لك التحية ..

أخونا وليد طه
شكراً ليك ياخ
***********************

Quote: ابو حسين اخوى حال البلد وصل بالناس لدرجة من الاحباط تلقى جملة زى (يا ريتهم ما مرقوا -- او ياريتهم يرجعوا ) عادية جدا لذلك اعتقد ان الناس لم ينسوا تضحيات او مساهمات من اتوا بالاستقلال لكن حالة الاحباط والقهر اكبر من اى شئ اخر حاليا الناس لهم عذرهم مفروض اصلا يكفروا بحاجة اسمها وطن لانه لا يوجد شعب مر بما يمر به السودانيين اليوم

اخونا هشام
حال البلد حاجة و الإستقلال حاجة تانية خالص
الإحتفال بالإستقلال وفاء لي ناس ما قصروا معانا و كانو صادقين في حبهم للوطن و لا يمكن أن نجازيهم بنسيانهم بي سبب ناس لا يخافون الله

********************************

Quote: نسأل الله أن يحمى البلاد من شر المتربصين بها وأن يصلح حالها وينعم المواطن بالرفاهية.............من العلينا بقى الفرح بالأستقلال يخبو رويداً رويداً

شكراً يا جلكين

*******************************

Quote: ثغرة!! وأماكن وعرة!!! أبو حسين .. أرجع للكبشرة الله يهديك, بتعرفليها و تجضّمها زي ما جات في الهاند بووك :) وقبل كدا ما تنسى تدينا إسم واحد - عفيناك من التلاتة - لواحد او واحدة بذل روحه رخيصة لأجلنا - يا قولك

يا رمادي أكتر من كدا بكرهك ياخ ....
******************************

Quote: ملاحظة جديرة بالتوقف عندها يا ابوحسين .. مع التحية المشكلة أن عيد الاستقلال مع راس السنة .. كل العالم في إتجاه ونحن في إتجاه .. كمان أخوي أبوحسين .. ظروف الحياة .. والمعيشة والضيق جعل أولويات الناس مختلفة تماماً .. ونحن الوطن المختصر عندنا في الحزب والحاكم وهذا نتيجة التسلط من الحكام ولا أعفي بعض الأحزاب لك التحية ..

أخونا علي عبدالوهاب
نسيان الإستقلال و ذكراه و رجاله و نسائه هو نسيان للوطنية و حب الوطن


********************************

تحياتي و إحترامي للجميع بدون فرز