وقعت من غربال زمانى

وقعت من غربال زمانى
وما فضل
غير حُترُب العمر الدراش
رقدت على جنبة شقايا
وما حصل
غير عفوة الحلم النسانى
عاينت ليك والشوف طشاش
وما وصل
جيهات مقيل القمرا
فى ضل الأمانى
وناديتك جفل حس الدعاش
صهيل الغنيه فى خشمى
مكتف بى حبال صوتى
وقفت بعيد
اتاوق لى زحيح موتى
و جوه العتمة
ولعت الصبر فانوس
تايه فى بطن حوتى
قعدت اكوس
لقيت اسمك بضوى بعيد
لقيت اسمى
فى لوح الودار منقوش
لقيت خوفى اللبد جواى
حداى مفروش
يا اجمل فكرة فى خاطر الإله
منو الختاكى فى بالى ؟
سألتك بالذى اهداكى لون
مليان المكان احزان
وجيب الفرح خالى
اقيفى
خلينى النشِد صهوة غنايا واجيك
نهوّن قاسية الأيام
نشد حيلا الفتر
نناغم النجمات يجن
نقعد حداك أنا والقمر
نشوف اللون البقسم طعمه
بينك والشدر
الطرب البوزع نغمه
بينك و الوتر
الشوق المدفق دمعه
بينك والأتر
والولد الكتم ريدو الشديد
شايفك صباح حد البصر
والليل المسك ايد السهاد
فرزع نجيماتو السفر
العاشق الفضحو البعاد
صلاكى جهرا ما انستر
دساكى في دمو المباح

ختاكى فى خاطر النشيد الانكسر

المطر ...صديقي..صديق الحرف الوريف..

و ما الذي تبقي من هذا العمر ..أنهكته سنوات الترحال أجهدت خيله ..والقلب الأخرق يتمسك بتلافيف الذكري شامخا يشع كما الفكرة العصية ..حتي المتبقي لا يفي و الزمان لن يتسع بغرباله..

لكن الأمل هو الدافع ..لنمطي صهوة البروق الراعفات ..نشد وتر النشيد ..بيننا والنهر فراسخ وبعدها نتوضوء ..نقيم صلاة العشق جهرا..

حرفك طاعم ...يلمس عصب الذاكرة وبيني وبينك ميعاد الشوق لن نخلف له وعدآ

وتبقي المودة خطاي



آدم العشا

العزيز آدم

العمر ماعون الحياة
والأيام سبحة العمر ولحظاتها حبات بين اصابع القدر

إن شاء الله دائما ايامك خدرا ومفرهدة ومبتقة
وكل مواسمك قرح وعافية وسعادة