Post: #1
Title: *****ست الشاي*****
Author: اسماعيل عبد الله محمد
Date: 12-24-2014, 06:54 PM
Parent: #0
الدنيا صيف
والحاجة كلتوم
ام شلوخ
حيرانة في طرف الظلط
قدامها حبة قنقليز ...
وعيونا تمسح في الطريق
ياالله كيف
وعيونا للزول البشوف
مليانة خوف
وعيونا للضاق الوجع
شبعانة من ظلم الظروف
وقعدت جنبها في الارض
احتارت !
يايمة كيف
وشك مكتح بالتراب
مهمومة ليه
قالت وليدي الحال كعب
والكشة حميانة النبيع
طول النهار
نجري ونقيف
نندس عشان نقدر نعيش
وعاينت في الطبق البسيط
اكياس تسالي وفول
ودقة قنقليز
حبة جنيهات ما بتزيد
ماالحاجة مابتحلم كتير
لادايرة لحمة ولا جداد
لا عارفة امواج
لا لذيذ
غالباها بس عيشة العيال
والكشة جاية من البعيد
ناسن شباب
ناسن تخان
لهفانة كيف
اللوري مليان بالهتش
حق المساكين الغبش
الطلعوا بيش
والكشة جات
تابعاها دورية بوليس
والحاجة قامت فوق تعب
تمسك عشان تقدر تقيف
تندس عشان تقدر تعيش
ماالكشة مابترحم ضعيف
الكشة مابتعرف عيالن
في البيوت راجين رغيف
الكشة مابتعرف رضيع
مستني امو مع المغيب
ترجع تجب ليهو الحليب
الكشة مابتعرف صغيرن
لا كبير
الكشة عدمانة الضمير
وفضلت قاعد في الطريق
عربات تمش عربات تقيف
لا زول بفكر في الحصل
لا زول بعاين في الرصيف
والدنيا زيف
الدنيا زيف
ناسن بتاكل في بعض
ناسن بتقعد فوق بعض
ناسن اسود
ناسن خراف مالاقية
غير تجري وتموت
والحاجة كلتوم
ام شلوخ
لو لسه جد في الدنيا خير
ماكان بتمرق في الهجير
ماكان تساكك في الرزق
زي الطيور
القاعدة تاكل من خشم
تمساح كبير
ماكان تهم
لامن وليداتا الصغار
يحتاجو لي كسرة رغيف
او مرة لي حتة قميص
ماكان وليداتا الصغار
خلو القراية مع الظروف
او حسو خوف
او عرفو كيف معنى الفرق
لامن رفاقن في العمر
ساكنين نضيف
ماكلين نضيف
لابسين نضيف
راكبين نضيف
قارين نضيف
والدنيا زيف
الدنيا زيف
زولن بكشك شان يعيش
وزولن بكشك شان بدور
لامن يسير
يلقى الطريق فاضي ونضيف
والحاجة كلتوم
ام شلوخ
حيرانة في طرف الزلط
تجري وتقيف
تندس عشان تقدر تعيش
والدنيا زي وهج السراب
في عيونا زيف
والحاجة كلتوم
ام شلوخ
ماراجية غير ستر الاله
والكشة تختاها وتطيش
والدنيا زيف
القصيدة منقولة من صفحة الاخ مصطفى الحاج Mustafa Alhajمن الفيس بوك
|
Post: #2
Title: Re: *****ست الشاي*****
Author: عبدالحفيظ ابوسن
Date: 12-24-2014, 07:14 PM
Parent: #1
مرحبا اسماعيل
ستات الشاي ديل حكايات من الجمال والانسانية
|
Post: #3
Title: Re: *****ست الشاي*****
Author: اسماعيل عبد الله محمد
Date: 12-24-2014, 07:41 PM
Parent: #2
Quote: مرحبا اسماعيل
ستات الشاي ديل حكايات من الجمال والانسانية |
شكرا على المرور الجميل وتشريفنا يا ود اب سن
مفردات قوية و مؤثرة اعجبتني ... وددت ان اشرككم روعتها...
|
Post: #4
Title: Re: *****ست الشاي*****
Author: سليمان القرشي
Date: 12-24-2014, 08:43 PM
Parent: #3
حبابك اسماعيل
كلمات جميلة ومعبرة وبها تصوير حقيقي
لواقع شريحة كبيرة وضعيفة وبعد دا
مامخلينها تعيش ولو بالبسيط والله
لو شفت ناس الكشة والنفخة الكذابة
البجو بيها تقول ماشين يحررو فلسطين
غايتو ربنا يصلح الحال
تسلم
|
Post: #5
Title: Re: *****ست الشاي*****
Author: اخلاص عبدالرحمن المشرف
Date: 12-24-2014, 08:46 PM
|
|