بناء منزل في السودان ... الحلول و البدائل - نرجو من المهتمين اثراء الموضوع

عايزين بصراحة نفتح بصيرتنا على حلول و بدائل لطرق و مواد البناء في السودان من خلال التجارب المعرفية و المشاهده للبعض
يعني طريقة البناء الاوروبي او الامريكي للبيت مثلا تقريبا من خلال مشاهدتي للبناء هو ليس بالصعب و اقل تعقيدا من المباني في السودان
مواد البناء المستحدثة ، هل هناك مواد يمكن ان تحل محل الطوب او الاسمنت او الخرصانة او حديد التسليح او حتى مونه الطين

ما هي الطرق المثلى لبناء الاساسات في منطقة زي الجزيرة طينية منتفخة متشققة
اشاهد في السودان هذه الايام بعض المباني لايتم حفر ساس لها بل يتم البناء مباشرة من فوق سطح الارض فماهي جدوى هذا النوع و هل هو افضل
اسعار المواد
طريقة البناء
خريطة المنزل


...

في انتظار اثراء الموضوع من المهتمين

http://http://www.nazirkhalifa.comwww.nazirkhalifa.com


سلام ..

الموقع أعلاه متخصص في تقنية بناء بديلة انتشرت مؤخرا على نطاق واسع في السودان . وهي تقنية البناء بالالواح المعزولة
والتي تعرف بألواح ال 3d panel

أرجو اين يكون مفيدا لك ولقراءك الأكارم ..

شكرا الاخ ناذر محمد

على المرور و اثراء الموضوع

موقع مفيد جدا و هذه التقنية تعتبر احدى البدائل المناسبة التي ستجد رواج في الفترة المقبلة لجدواها و بساطتها

يا خالد المبارك اول حاجة انت رابط بلك مع الله والا لا؟

حين يتحرر الناس من نمط التفكير القديم فالمستقبل لأخونا ناذر ده ، ربنا يوفقه ..
بس يا ناذر تحتاج تبرز صورة لإنجازك لبعض المنازل بعد تجربة أصحابها وآرائهم العيش فيها بعد مدة طويلة نسبياً .. عشان الناس تتجاوز مرحلة الملاوزة من تجربتك الجديدة بتاعة ال3D بنل دي .. ويا ريت كمان يتم الترويج ليها في الصحافة والتلفزيون ..

يا منير نحن كنا متابعين مع نذر موضوع ال3Dبانل دا من زماااااااااان

بعدين سيد الحوش هيمسيلف بكري أبوبكر باني بيته بالتقنية دي ونزلها هنا في المنبر

لو كان ما راضي ومبسوط كان ودا ناذر دا غوانتانامو

أيوة صاح يا فرانكلي ذكرتني إفتتاح بيت بكري ابوبكر ولمة البورداب هناك ..
أعتقد أن ناذر مفروض ينشط في الترويج للتقنية بتاعته دي وإمكانياته في وسائل الإعلام وأواسط المغتربين ويتلحلح شوية ، لأنه ويب سايت براهو ما كفاية .. المغتربين ديل قاعدين فوق نار .. المغترب بيكون عاوز ليهو بيت فوق المتوسط الشعبي المألوف وفي نفس الوكت ما بيقدر علي عمارة تقليدية من ثلاثة طوابق تحتاج للمليارات وعدة سنوات في البناء والتشطيب ..
النموذج بتاع ناذر ده ممكن يمثل نقلة في البناء في السودان لو الناس تخلت عن ذهنية البوكس موديل 87 ..

أتمني إنو الفضائيات السودانية تقدم برامج تستضيف ناذر ليستعرض هذا النموذج البديل السريع ذو الميزات المتعددة .. لكين بس أنا خايف عليهو من مافيات الكيزان يقوموا يشوفوا القصة واررة ويزحلقوه .. يازول أقول ليك أخير ليهو يشتغل في الضرا بدون شوشرة وضوضاء ..

يا ناذر أنسي كلامي ده ما يقوم عليك تمساح يبلعك ..

مرحب مرحب بالزوار
شرفتونا و زرتو الدار

التحايا للمرور العطر
منير
فرانكلي

Quote: يا خالد المبارك اول حاجة انت رابط بلك مع الله والا لا؟

ايمن محمود ما تقحمنا في السياسة ياااخ

بعدين نحن منتظرنك تستلم البوست ده و ما تخليهو يدق الواطة

سلام منير ..

كيفك ومشتاقين ..

Quote: بس يا ناذر تحتاج تبرز صورة لإنجازك لبعض المنازل بعد تجربة أصحابها وآرائهم العيش فيها بعد مدة طويلة نسبياً .. عشان الناس تتجاوز مرحلة الملاوزة من تجربتك الجديدة بتاعة ال3D بنل دي .. ويا ريت كمان يتم الترويج ليها في الصحافة والتلفزيون ..

الحقيقة هنالك بعض من بنيت لهم اعضاء في هذا المنبر وكتبو عنه في وقتها سأحاول جلب بوستاتهم من الأرشيف ووضع روابطها ..

كما ان قناة أمدرمان متمثلة في الزميل وائل فحل عقدوا معي لقاء بخصوص هذه التقنية وتم بثه وسأحضر الفيديو وساضعه في الموقع
قريبا بإذن الله

تسلم فرانكلي ...

Quote: يا منير نحن كنا متابعين مع نذر موضوع ال3Dبانل دا من زماااااااااان بعدين سيد الحوش هيمسيلف بكري أبوبكر باني بيته بالتقنية دي ونزلها هنا في المنبر لو كان ما راضي ومبسوط كان ودا ناذر دا غوانتانامو

وطبعا موقعي الالكتروني ما كان له ان يصير بهذه الطريقة لولا ابداعات أخونا فرانكلي
ومساهمته في تصميم بعض البانرات ونصائحه المستمرة ..

فرانكلي عندك عندي غرفة وحمام لمن ترجع ببنيها ليك جزاء لوقفاتك المستمرة معي ..

سلام تاني يا منير ..

Quote: كفاية .. المغتربين ديل قاعدين فوق نار .. المغترب بيكون عاوز ليهو بيت فوق المتوسط الشعبي المألوف وفي نفس الوكت ما بيقدر علي عمارة تقليدية من ثلاثة طوابق تحتاج للمليارات وعدة سنوات في البناء والتشطيب ..

أكثرية زوار الموقع من السعوديهة تليها السودان ثم الامارات ..

وانشاء الله عندي جولة لتقديم برزنتيشنات للمغتربين في اماكنهم ..

يا أبو النيذ, شكلك اللغة الصينية بتاعتك ملكلكة كملتها وصف
حقيقة الناس محتاجة تفكر خارج المألوف و لكن أنت يا ناذر ما رأيك في التجربة و مستوى نجاحها و لماذا لم تنتشر بشكل واسع؟
في إنتظار الفيديو و الذي أرجو أن يجاوب على هذه الأسئلة أو إضاءتك ستكون مشكورا عليها

سلامات يا ناذر .. مشتاقين بالأكتر وفقدنا بوستاتك الممتعة ياخي .. الظاهر عليك مشغول ربنا يوفقك ..

بالجد أنا أعجب بالزوول المجازف الذي يملك الشجاعة لإبتكار نشاط مفيد للبلد ليس مثل النشاطات الطفيلية التي تخرب .. زي مثلاً برضو أعجبت بمجموعة ناس محمدعبدالله مختار بتاعين طيارة الدرون - رغم أنهم مخدوعين بالصعود للقمر لو تابعت البوست المشهور في الربع الفات :) - إذ أنهم برضو جازفوا علومهم في مجال طموح مهما كان ضعف الإمكانات ..
وإنت تكنولوجيتك دي نقلة نوعية يستفيد منها كل مغترب - أقصد المغتربين بالذات بسبب ذهنية العودة .. مهاجري الغرب أقنع منهم لأني أعتقد أنهم يودون بيع بيوتهم في السودان زاتو ليمكنوا أنفسهم في الغرب - لكين غايتو حسب وجهة نظري الغريب عن وطنه مهما طال غيابه ترلم ترلم ؟؟ -- هسه أنا ملاحظ أن الفلل الصغيرة في معظم دول شرق آسيا تشبه البيوت والفلل بتاعتك دي - نتشة كده وخفيفة و اسبورتي - كذلك تجد معظم البيوت في اسكاندنافيا تعتبر في غاية البساطة ولا تساوي جزء من حيشاننا الممددة بلا فائدة .. إنت علي الأقل حيطانك وصباتك أسمنتية .. هناك تدي الحيطة بونية إيدك تمرق بهناك ..

فتقنيتك هذه فليكسبل ممكن تعمل بيت صغير وممكن بيت كبير حسب الإمكانات وهذه ميزة - أعتقد - وطبعاً أهم حاجة سرعة التنفيذ .. ياخي الناس تعبت من إنو الواحد يخت الساس ويقعد يكدح تلاتة سنة لغاية ما يرمي الأعمدة والهيكل - للعمارة - وتاني يكدح 4 سنة عشان يقفل ، ثم 5 سنة تشطيب .. الشئ شنو؟؟ هو ماهيتي كلها كمها ؟ والعمر زاتو كمّهو؟؟

سأعود للرد يا منير ويا عمر ..


بس في حاجة مهمة لازم أوضحا ...

أنو في ناس سبقوني في الشغل دا في السودان وعندهم مقدرة مالية وعملو مصانع وماكينات وعلاقات .. لكن أنا احسب نفسي بأني
أول من نشر التجربة اعلاميا وساهم في التوضيح بها وسهولة الشرح للعميل البسيط عبر وسائل الميديا المختلفة .. إذ انني استفدت من
وسائط الانترنيت في التوثيق لكل مراحل البناء وحتى التدريب للمهندسين والفنيين وعملت على نشر هذه التقنية بالفهم البسيط دون تعقيدات
واحمد الله أنه حتى جامعات الهندسة في السودان يأتيني طلبتها لعمل بحوث التخرج من عندي في عناوينها التي غالبا ما تكون عن البدائل والمنازل
قليلة التكلفة ..


جاييكم للمزيد .. حيث أنني اعتقد ان هذا البوست خدمي وتثقيقي وليس دعائي واعلان تجاري وجاهز للرد علي جميع الاستفسارات ..

سلام الاخ خالد المبارك صاحب البوست وناذر الخليفة وبقية الأخوة الأعزاء
سؤال للأخ ناذر منزل مكون من دورين ومبني علي أساس 5 ادوار هل
ممكن بناء دور ثالث علي طريقتك الجديدة في مساحة 300متر تكلفة المتر كامل
مع التشطيب

Quote: سأعود للرد يا منير ويا عمر .. بس في حاجة مهمة لازم أوضحا ... أنو في ناس سبقوني في الشغل دا في السودان وعندهم مقدرة مالية وعملو مصانع وماكينات وعلاقات .. لكن أنا احسب نفسي بأني

الأخ ناذر
تجربة رائدة ولكن حسب ما طالعت الصور وطريقة تركيب حوائط البوليثلين لو ما خانتني الذاكرة أو المادة المستخدمة دي والتسليح واللياسة الخارجية والداخلية وصب السقف، تساوي تقريبا تكلفة البناء بالطوب أو البلوك .
وده اعتقد يرجع لاسعار سيخ التسليح والاسمنت ..

ما عارف لو تدينا تقريبا فرق التكلفة لبناء نفس المساحة بالطوب أو البلوك، إمكن توضح الصورة.

ما عارف كم ممكن يكون العمر الافتراضي لمبنى بالشكل ده، مع اعتبارات المناخ في السودان.

غايتو دي اسألة بتاعت زول ممكن يفيدك في التسويق داخل السودان وفي المملكة، بس توريني في الخاص اللي والعلي في الخاص.

الاخ خالد المبارك وضيوفه الكرام

Quote: جاييكم للمزيد .. حيث أنني اعتقد ان هذا البوست خدمي وتثقيقي وليس دعائي واعلان تجاري وجاهز للرد علي جميع الاستفسارات ..

طبعا يا ناذر أنا حفيت عشان واحد مختص يجاوبني او يعرفني أكثر بالتقنية دي
قبل أشهر كنت ببحث عن الحلول البديلة لمواد و طرق تنفيذ المباني وبالتحديد المباني "قليلة التكلفة"
طبعا اكثر حاجة استهوتني هو مباني الــ 3D بانيل وموقعك يمكن يكون الموقع الوحيد البيقدم حاجات منفذة
و مراحل البناء من الالف إلى الياء فشكرا جزيلا لك على هذا المجهود المقدر .
وبرضو اطلعت على بعض المواقع و المصانع والمواصفات العالمية لهذه المواد .
أنا بالنسبة لي أهم حاجة في موضوع البناء دا :
الامان , قلة التكلفة , الديمومة .
واول سؤال يا ناذر وكل المختصين على اي مواصفات تتم اعمال الــ 3D بانيل هل هي مواصفات وتوصيات الجهة المصنعة
ام هو التجربة الواقعية فقط.
وياريت لو تنزل لينا هنا صور توضيحية
وثاني سؤال
التكلفة حسب ما سمعت انو حاليا في السودان تكلفة الــ 3D بانيل مساوية او اعلى من المباني العادية خاصة في الحوائط
شكرا مقدما

سلام عمر عبد الله .

Quote: حقيقة الناس محتاجة تفكر خارج المألوف و لكن أنت يا ناذر ما رأيك في التجربة و مستوى نجاحها و لماذا لم تنتشر بشكل واسع؟

سؤال في الصميم كثيرا ما يقابلني من الطلبة الذين يأتون عندي لعمل بحوثهم حول المباني قليلة التكلفة واجابتي الاساسية هي :

المعوق الأساسي لعدم انتشار التجربة هو عقلية المهندسين والمقاولين التقليدية والتي تأبى الجديد وتحجب عن العملاء بدائل البناء والتقنيات الجديدة
وذلك لان همهم بعضهم الأساسي هو الربح .. مثلا يعطون صاحب المنزل تكلفة معينة للبناء وأجل زمني للأنتهاء وعندما يشرع صاحب المنزل في البناء بعد تجهيز المبلغ المحدد
يتفاجأ ان التكلفة تجاوزت الميزانية بأكثر من 50% وان أمد البناء تطاول شهورا اضافية ان لم تكن سنوات . اما في حالة تقنية البناء بالثري دي بانيل
فنسبة لسرعة التركيب وضمان عدم انفلات الأسعار فان التكلفة لا تزيد ابدا بدعاوي ارتفاع اسعار المواد وارتفاع الدولار ..

ولذلك انا اقوم بدور تثقيفي وتوعوي تحديدا في اوساط المهندسين والمقاولين وأكون سعيدا تمام حينما يكون احد عملائي مهندس أو مقاول وقد شيدت عدد من المنازل والشقق
اصحابها مهندسين ولكنهم لم يشاهدوا هذه التقنية قبلا وحرصت على ان يكونو حضورا في كل مراحل البناء وبعضهم خبر التجربة وصا يعرضها على عمرائه وزبائنه ويبني لهم ويأتي الي

لاكون له مستشارا وانا سعيد بذلك اذ لست ممن يحجبون المعلومة ابتغاء لربح مادي بل اسعي لتنتشر ليستفيد الجميع ..

سلام منير ..

Quote: هسه أنا ملاحظ أن الفلل الصغيرة في معظم دول شرق آسيا تشبه البيوت والفلل بتاعتك دي - نتشة كده وخفيفة و اسبورتي

الان في السودان هنالك مخططات كاملة تم تنفيذها بالثري دي بانل مثل مخطط نبتة وأيضا تعويضات المناصير وهنالك مدارس ومراكو صحية ومواقف مواصلات
ومحال تجارية تم تركيبها بهذه الألواح وأيضا السوق المركزي الجديد بالخرطوم والذي سيتم افتتاحه في اعياد الاستقلال تم بنائه بالكامل بهذه الألواح رغم
ما شابهه من خلل وقصور وتنفيذ ضعيف في الكثير من جوانبه ..

سلام المسلمي ..

Quote: سؤال للأخ ناذر منزل مكون من دورين ومبني علي أساس 5 ادوار هل ممكن بناء دور ثالث علي طريقتك الجديدة في مساحة 300متر تكلفة المتر كامل مع التشطيب

نعم يمكن بناء دور ثالث ورابع أيضا .. اذا رجعت للموقع رابط شقق أركويت ستجد اننا اقمنا طابقين فوق طابق موجود أصلا ..

أما التكلفة فتلك تفاصيل تحتاج منك لاحضار خارطة وتفاصيل فنية اخرى تتعلق بالتشطيب ولكن ما أحب أن أؤكد علي أن التكلفة تقل عن التكلفة بالبناء التقليدي بنسبة
ما بين 20 الى 30 في المائة بحسب الخرطة ..

سلام الهادي ..

Quote: تجربة رائدة ولكن حسب ما طالعت الصور وطريقة تركيب حوائط البوليثلين لو ما خانتني الذاكرة أو المادة المستخدمة دي والتسليح واللياسة الخارجية والداخلية وصب السقف، تساوي تقريبا تكلفة البناء بالطوب أو البلوك . وده اعتقد يرجع لاسعار سيخ التسليح والاسمنت .. ما عارف لو تدينا تقريبا فرق التكلفة لبناء نفس المساحة بالطوب أو البلوك، إمكن توضح الصورة. ما عارف كم ممكن يكون العمر الافتراضي لمبنى بالشكل ده، مع اعتبارات المناخ في السودان. غايتو دي اسألة بتاعت زول ممكن يفيدك في التسويق داخل السودان وفي المملكة، بس توريني في الخاص اللي والعلي في الخاص.

بالنسبة للتكلفة فأنا ذكرت للمسلمي اعلاه الفرق ولكن في بعض الاحيان يحدث انفلات مفاجئ في اسعار الاسمنت والسيخ

فالذي يحدث انني انصح من يريد البناء ويأتي الي بتأجيل البناء ريثما يحدث التخفيض في اسعار المواد ..

بالنسبة للعمر الأفتراضي فليس هنالك اجل محدد مثله مثل البناء التقليدي ولكني قرات في احدى البحوث ان في ايطاليا يعطون
العميل ضمان لمدة مائة عام أما المناخ فهذه المنازل تبنى في جميع المناخات على السواحل وفي الصحاري والتربة الزراعية والصقيع والجو الساخن وحتى
في المناطق التي بها صواعق ..

تسلم ...

سلام محمد ضرار ..

Quote: واول سؤال يا ناذر وكل المختصين على اي مواصفات تتم اعمال الــ 3D بانيل هل هي مواصفات وتوصيات الجهة المصنعة ام هو التجربة الواقعية فقط.

أكيد هذه الالواح تتركب بمواصفات محددة من الجهة المصنعة وهنالك جدول احمال يتم فيه تحديد سمك الواح الحوائط والسقوفات وكثافة
البولسترين في اللوح الواحد تبعا للمشروع المراد تركيبه .. كل شي محسوب بدقة ..

وهذا لا ينفي أن التجربة الواقعية لها حظها ايضا في التركيب في ايجاد حلول لبعض المعضلات ..

Quote: وانا سعيد بذلك اذ لست ممن يحجبون المعلومة ابتغاء لربح مادي بل اسعي لتنتشر ليستفيد الجميع ..

وعلى قدر نياتكم ترزقون .. بارك الله فيكم وزادكم الله من خيرة

أها يا هندسة.. عندنا شغل في عطبرة .. بتشتغلوهو لينا .. ولا بعيدة عليكم

يا سلام ياخ
بالله الموضوع مدور و انا افتش ليهو

لك التحية الاخ المهندس ناذر خليفة و حقيقة الناس محتاجة لحلول و انت في رأيي انسان فوق العادة لانو نادر ما تلاقي زول ببحث عن حلول و بدائل بس كلو بتاع تقليد نفس التوارد في الخواطر
عايز اعمل لي بيت كده خلعة مش بي تكلفتو لا بي اختلافو من البيوت الحايمة دي
للاسف السودانيين ما عندهم البدائل و لا يحبذون المخالفة
دايما افكر ليه مثلا السودانيين ديل كانو قبل بضع سنين بياكلو الكسرة و هسي خلوها نهائي بقو ناس قمح ساااي ، طيب مالو لو دخل بي جاي ارز و بي جاي ذرة و بي جاي قمح و بطاطا بدل الناس دي تتكبس في
حاجة واااحدة و يحصل الغلاء و المحقة .... التنوع و الابتكار مطلوب لحل مشاكلنا الاقتصادية

دحين با باشوات ماف زول يوريني حل للتربة المتشققة المنتفخة كيف يكون نظام الاساسات فيها ؟؟

Quote: جاييكم للمزيد .. حيث أنني اعتقد ان هذا البوست خدمي وتثقيقي وليس دعائي واعلان تجاري وجاهز للرد علي جميع الاستفسارات ..

والله هذا ظهر جليا من مداخلاتك و سخاك في بذل المعلومة. نتمنى لك التوفيق و مزيدا من التقدم