يا حميد ... نفتقدك الليلة آ ضُراع

يا حمّيد....إت بى صُحك؟
(نشِيج الترابلّه)

أول تَبادِي … الننشِدك
حِمّيد أخوي بي صُحك إتّا؟
ولا مقلب من مقالبك يا ظريف؟
………………….
النِخِيلات … الفسايّل
الشديراتَ …. الجَداوّل
والسواقي الفي الجرِيّف
بتفُوتا كيف؟
والبنيات .. القماري
والملمّات في العصاري
والوليدات ناس بُخاري
بتفُوتا كيف؟
…….
القعدة .. غيرك تبقي ناقصة
طعمها ماسخ … كيف وكيف
……………………
آ مُحُمّد شُفتا كيف؟
………………
شفتا كيف النيل محُومر بالدِموع
والجِروف آضراعي جَّتْ صبحت تعيسِي؟
والعَبرة زي مهراً تناتِق في الضلوع
والدنيي ضلما وطلّطمِيسِي؟
آ مُحمّد شفتا كيف؟
شفتا كيف الموت يعزل في نخيّلاتنا البيلدِن
ومدمّي صايِّل... يعقِر الخيل البسبقِن
ويحجِر القمّرا الطلوع
وبي مُبرّد الشوم و الوجيعة
يسِن مناجل الهَم و سكينةَالفجيعَّة
وييهرد في كُباد أمّات...
حشا الترباله ... و الطمّبارا
والقُمرِي البنوح فوق الفروع موجوع
... ويقوقِي عليكا بالحيّ وُوب
مكندك بي رماد (نُوري الجِريّف)
آ مُحُمّد شفتا كيف؟

شفتا كيف ....
الـموت يقصِّف
هامة النخل البحرس القيّف
وشفتو كيفن
يتاتِي خُطاكا فوق درب المحن؟
يتلهّمك بالهَم ... يدُودر فيكا......
ويا المحبوب .... إيّا موديكا
للسِكيّ القصيىِ ....
لا عتقك تناغِم لي رفاقتك .. ضُمّة
ولا إتزودتا للسفر البعيد بي ضَمّة
ولا خلاكا بس تكتب وصِيي
وتودع القاسمين معاك حمل القضيّي
ولا فطّمنا كيف يبقى الرجوع
آمُحُمّد شفتا كيف؟

شفتا كيف ...
في ثانية زيّ لـمح البصر
(عم عبد الرحِيم في السكّة إتلافّا القطر)*
وفي الدنيّي (اِتشايّع خبر)*
والحكمة بي نفسّ الأمُر
وإتّا فوق درب السفر
تلفاكا عربية (الكجّر)*
وتكتُم الغنوة فلهاتك
وينرشَا دمك
فوق حصى (الشِّريان) نزيّف
وتِنْفَر رويحتك غيمّة فوق (نادُوس) تضلِل
وإتّا إصلك زيّ دعاش في كتمّة
نفحة همبرّيب أو نسمّة مرت
في لهِّيب سهّراج و حرّ
وإتّا ... جُغمّة مويي باردي
لي غلابَا و متعبين و الدِنييِّ صيف
وإتْ تكِنّك ود نديهّه
ولّا جيت غاشينا ضيّف
آ مُحُمْد شفتا كيف؟

ناشدك .. مُحُمّد .. يا رفيق الهم ..
عقيّد الشُعرا ...مُشهاد الحيّارى
قبّال تفوتنا
ولي ضرا الغيّمات تعرِّج
وفوق خيول الريّح تسرّج
تمشي بي روحك
تآجِر (نُورا) في فـقدّك
تصبّر (شُفع العربَ الفتارى)
وبي (محايّة) الغنا والقصايّد
ترقِي (أحزان الصحّارى)
شان يطِيب وجع الفقارى
وبي كفك اللخدر تقشقِش
دمعّة الشعب العفِيف
آ مُحُمّد شفتا كيف؟
ؤعليك البينّا ...
أفتح ضلفة الروح الشفيف
وبي الراحه تاوِّق من صريف قلبك
... و عايّن
البِنبلع فيهو عِبرّة؟
ولا عَبرّة؟
ولا جمرّة؟
ولا سيّف؟
آ مُحُمْد شفتا كيف؟

بي وراك يا دغري يا زول ياشريف
مسخت علينا الدِّنيى ....
إصلو الدِنيىّ مالييها العفن والزيّف
وكنا راجين آ عشانا
تحضر جديدنا آ ود حشانا
بي إيّد تبشر للبرقصِن
وبي كف تتمر خَد غُـنانا
وتضوي بي حرفك سمانا ..
وبالنشِيد تسنِد قفانا
وتطيِّب الوجع المـخيّف
آ مُحُمّد شفتا كيف؟

شفتا كيف إتيبس الغُـنا .. في حلوقنا
وما فينا زولاً... قال ... نطق؟
بنده رفاقتك جملة يا تربّال
يا خِيّري يا عاطف....
وُيا أبو الحااااج..
وُيا القدّاااال.....
الكعُو بالصّبُر ألفُونا يا زُمّاااال
آود عثمّان و يا محجُووووب ...
يَدّا الآسرنا بي (إسر الوِلِف كتّال)*
وياشغِيّلة ... يا كلّاتة... يا عماااال…..
كيف عِرق القصِّيدة يطُـق؟
وُتحرِّن ضُمّة ... يا طبل الحقيقة تدُق؟
وا مِغِيستنا يا حُمّيد.....
ووا غبينّتنا........
(كُمسّيدَ الغبينّة بِشُّق)*
(كُمسّيدَ الغبينّة بِشُّق)
وُ(كُمسّيدَ الغبينّة) الليّلِى،
في جوف المهيريّات لهيبو يبُق
حُزُن كوفت مسايِّر القمرا بالفجعة
ونبح دِنقِر وجعنا يدُق
خلاص آضراع؟
خلاص آخيِّى؟
قفانا قِمِح؟...
عشمنَّا حِرق؟
وساس غُنواتنا فوق موج الدميّرة غِرق؟
سكت حسَّ الغُنا الهدّاي؟
وإنكتمت لهّاة البُوح؟
وإتشلّع ضرى الأحلام
تحت مطّر العوِيّل و النُوح؟
وإنجرّح حلق قُمريِّى
جاني حِسيسّا زي مبحُّوح
وعرق الشيمّة شال الشُعرا
وإنغرغّر غنانا الكنا بيك ساندِنو..
لحِق الصُّح؟
وطشت في بحور الهمْ سفينة نُوّح؟
خلاص يا الكنا (نِترجاكَّا)*
يا تَقنَت (عشّم باكِر)*
غُنانا يسيّل بلّا مِرتِقّ؟
وفوق بحراً هوايّلو كُتُر
نشيل صفحَّة شراعنا غَرِب
تشيلنا النوّه هابِي شرق؟
وا مغِيستنا واغبينتنا ياحُمّيد،
( كُمسيّد الغبِينّة بِشُق)
وُقالا قبيّل أخوك (قَدّال)
يطالع في كتاب الغيّب
( كُمسيّد الغبِينّة بِشُق)
( كُمسيّد الغبِينّة بِشُق)
و( كُمسيّد الغبِينّة بِشُق)


راشد سيد أحمد الشيخ
22 مارس – 18 أبريل 2012

*أصداء من قصائد للشعراء حميد، محجوب شريف، قدال وعاطف خيرى وأزهري محمد علي

https://soundcloud.com/abukhalid-1/oewbzvwemsg9

يا ناس التكنولوجيا ... غلبني أنزل الملف الصوتي المرفق ... هل من عون؟ الله يقطع الجهل ويقطع سنينو، قدر ما شرحو لي أكواد الجن دي أبت بي الله واحد.

يا سلاااااااااااااااام يا اخي راشد هيجت فينا حاجات من الصعب نسيانا مهما توالت ذكرى صعود حميد الى عليائه ،،،
--------------------------

أي شيء جميل راح بس كان أملنا انك يا حميد تبقى على الاقل بنشوف فيك بشارات الامل في شعرك في طلتك في انسانيتك في بساطتك في كل شيء فيك يا ااااااااااااااااااخي انا ماعارف مالك مستعجل للفراق والله لسع بدري عليك ،،، ما كتاااااااااااااار القاعدين اش معنى انت ،،،

Quote: يا حميد ... نفتقدك الليلة آ ضُراع

سنفتقدو الليلة وبكرة وبعدو والى ما لانهاية ،،،

شكرا راشد على الحروف الصادقة ،، والله ابكيتني

تمام يا أخي علي، الموت نقاد ويختار الجياد. وحميد ده يوم حوبتو
وعلى الرغم من يقينا الراسخ بأنو عازة ولادة ورباية، لكن لحميد بصمتو على كل من تقاطعت
معه الدروب، مشهاد وسيرة وشعر. هذا مثال ساطع للمثقف العضوي الذي عناه قرامشي
شكراً لمرورك وتعليقك أخوي علي.

https://soundcloud.com/abukhalid-1/oewbzvwemsg9

يا ناس التكنولوجيا ... غلبني أنزل الملف الصوتي المرفق ... هل من عون؟ الله يقطع الجهل ويقطع سنينو، قدر ما شرحو لي أكواد الجن دي أبت بي الله واحد.