مقالدة في وضح الشارع

اقالدك
كرف السنين المرة
والسفر العذاب
خليني اتنشق عبيرك
اسكر اعب منك حباب
زمن الكلام
اصبح مراسيل
لي حكايات التالف
في ثنيات الغياب
انا
والشوق
والحنين
توام سيامي
وبينا حبل السري واحد
وكتمت جواي احتباسك
احرف من النيل منبعها
نديانه ما بتعرف عتاب
بيناتنا كان
سبرا من النخل السوامق
شعلة برق
وريشة من قمريةناحت
عند المغيرب
لما حست انه
قد عز المآب
هذا زمان البوح بالكلمه المباهج
ولى زمان النوح بالشعر البكائي
الذي
ملانا حزنا واكتئاب
مليت مباراة الحروف
الباكية من عام المجاعة
من كرري من
من لحظة جنون
الموت بقارعة الطريق
من غير حساب
انا فيك
بشيل كل السمات الحلوة
شان اسقى الكلام
شهد المعاني
وانا ليك بخت
كل الدخرته
من احاسيس الهوى النادر
عشان لون عيونك
وروعة النورة البتلمع في خدودك
ما اصلي ردتك دونما
اي ارتياب
كان اليقين جواي قبال التقيك
لحظة تلاقي النظرة
بالنظرة الخجولة
ورفة الكلمة العجولة
واشتعال قداحة
العصف انفعال
اتمد في الجوف السؤال
كان بسمتك ابلغ جواب
خليك قريبة
امال مسافر للرجوع
مل من ناعم المدن
ومن نداوة الارصفة
من الوجو ه الباردة
ما بتعرف لذة الكد والعذاب
لي لقمة العيش والنصب
رهق العيون
من التحاديق للسما
شان رحمة المولي
وعشان ليها يتكرم سحاب
مليت وحاتك يا الحنية
حسكنيت الاغتراب
سوقيني فيك
وديني شارع الدومة
والسوق الجديد
حيث انتماء الروح هناك
لون الصبا الزاهي
وحلاوة الناس الصحاب
انا بسالك
يا سدرة منتهى اللهفة
ويا
كل البهاء
لمتين يحكمونا العساكر
ويمنعو الضو
من مصابيح الحقيقة
ورؤية الناس الصواب
داسيك جواي يا هواي
من الاعاصير والسموم
من صيف بيجلد لي ضهور
كل الغلابة
في نهار والع شمس
داسيك عشان
زمن التواريب الخصيبة
زمن الحقيقه
الما سراب
وبس