كل هذ الجاز يا قباني

قباني
وقبل ما نخش في التفاصيل
نبدأ بكبيرهم الذي علمهم الجاز

عثمان ألمو

نواصل مع المو

كان الجاز السوداني صنوا للحقيبة السودانية,

لكن الثانية إعتمرت الأفئدة من باب التصالح الخجول
مع المجتمع المحافظ آنها, لهذا كان حبهم عذريا وكان
شدوهم يتموسق مع إيقاع الحقائق الإجتماعية على الأرض,
أما الجاز ... فقط حوكم باكرا بالدخالة, أو قل التقليد الغربي
... لهذا كان حظه من المنافسة والترقي متواضعا. لكن الناس
يعلمون أكثر من قيضيات المحاكمة التاريخية سالفة الذكر,
ويسترعيهم شجن خاص حينما يحضر إيقاع الجاز السوداني,
لهذا فهو موجود وسيعيش ما ظلت هناك أذن تصغيه وأنفس
تطرب لإيقاعه وأرجل ترقص من شدة عذوبته.

شكرا لأخي الصادق, وللصديق ... قباني,

أتابع الحوار ... وأتمناه طيبا ... مفيدا

Quote: قباني وقبل ما نخش في التفاصيل نبدأ بكبيرهم الذي علمهم الجاز عثمان ألمو

الصادق يا جميل ...

كل يوم الوم نفسي الما جيتكم قبال ود المكي ما يغادر للسودان ...

صحي القدم ليهو رافع ...
________________________________________
اما الجاز في السودان ... فلنا معه ذكريات و تاريخ طويل عريض ...

خصوصاً اننا كنا شبه ملازمين لفرقة البلوستارز و ربطتنا معهم صداقات طويلة ...

رغم فقدنا لعمر قيلي و ابرزقه رحمهم الله ... و تقطعت سبل الاتصال مع عازف الدرمز محمد سيد ...

و لكن تاتيني اخبار الصديق الجميل عاصم زين ... وهو نسيب صديقي البديع محمد المرتضي حامد ...

هذا الباب يا الصادق سيجلب لنا رياحاً و ووحشة و هترشة لا نهائية ...

و لكن نحن لها ...

ولك الوعد باني سآتيك بدرر عجيبة ...

حيدر قاسم

سلام يا حبيب

حان الوقت لرد الاعتبار لشباب الجاز في السودان
خليك قريب
وقباني حيجيب الدرر
واوتقع ناس كتار يجوا هنا

قباني
كيفك يا زول

البوست دا معمول مخصوص عشانك

أنا بتذكر الجاز وفرقه وأنا صغير
لكن كان بيعجبني الجاز وايقاعاته
ومن الفنانين كان النور الجيلاني بس

لكن كنت بتذكر شباب الجاز ديل تماماً
وشفتهم في كازينو حماد العائم
وفي كازينو النيل الأزرق

نحن جيل الديسكو يمكن اكتر
ناس ناصر اللبودي وفاسيلي والسكة حديد وغيرهم

البوست دا دايرنو يكون توثيق للكتير من الجاز
ورواده وحكاياتهم

أنا حأنزل حلقة تلفزيونية كبداية للموضوع دا

حلقة عن
الجاز في السودان

سلام يا الصادق
أمسك عندك أول شي المذيع دا سمج ووقح لا عذر له في كون زمن البرنامج محدد!
نمرة اتنين عثمان ألمو مؤسس فعلاً ولكن أضيف أن له مغامرة جامدة لاقتحام عالم
الغناء الحديث بُغية كسر العزلة التي عملها شرامة الغناء الشعبي والحقيبي أمثال ود
الرضي على غناء الجاز الذي نظروا له بعنصرية وبمحاولة إفناء في مقابل سرقاتهم
من شعر الأعراب الأشد كفراً ونفاقاً بحسب وصف نبيهم (ص).
هل تصدق أن إبن البادية وكان يافعاً وإبن بادية فعلاً شارك في هذه المغامرة التي وكرته
في قلوب بنات أم درمان حين أدى الأغنية الجازية التي لحنها عثمان ألمو (أنت يا غرامي)
وظللن يسمعنها (ونحن أطفال تحت رعايتهن) حتى تظلمنا من تدني رعايتنا بسبب هذا
الود اللي اسمه ص بن البادية. وحقيقة كانت أغنية هائلة ونجحت نجاحاً عجيباً وجعلت
حساد عثمان ألمو والداعين لعزلة الجاز يتقلبون على جمر حقيقة الجاز كنوع غناء نجح
في السودان وأنجب العمالقة، شرحبيل، عمر قيلي، عامر ساكس، عاصم ووليم أندريا
وأخاه عازف الباص، والصيدلي شاشاتي وجيتاريست فرقة السودانيين الهسع دا وغيرهم
من رواد الفن الجديد والذي كاد يدهب بعقل الحقيبة والمحتقبين.
بالمناسبة أنا لا أكره كل أغاني الحقيبة، هناك أغاني حلوة ولكن سرور كان شرامي ومعروف
أنه (نفى) فنان وقال ليهو ما أسمعك تغني إلاّ في مدني! وقد كان. الراجل خاف على حياته.
وكذلك لا أحب ود الرضي لأنه أول من فصل جنوب السودان في قصيدته: من الأسكلة وحلا.
أمشي أسمعها وشوف لما يقفز من كوستي والجبلين فوق الاقليم الجنوبي كله ليصل الرجّاف
حيث كانت محبوبته مع والدها الجلاّبي في المدينة التي غذّى منها جمالها حتى صاح الرجل عاد
لا حولا لا قوة حبيبي الليلة في الكوة! أول من فصل الجنوب هو ود الرضي.
لذلك فإن فن الجاز في السودان هو تعبير عن بسالة الأفريقي في فرض تعبيره الفني وعثمان
ألمو نموذج ساطع في هذا الشأن.

يا مصطفى
أحسب أنك تعسفت في الحكم على ود الرضي بوصفه بالعنصرية
وبأنه قفز من كوستي والجبلين فوق الإقليم الجنوبي كله إلى الرجاف حيث محبوبته
القصيدة طويلة ولم تغن بكاملها، وفيها وصف لكل الموانئ التي تمر بها الباخرة (الوابور)
خد عندك مثلا هذه الطبعة
صباح الخير على أم نفلين أحيي البيها محتفلين
بدر الحسن رب اللين شرف كوستي والجبلين
هنيئا حان وقت زهاك ( الرنك) احتفل ببهاك
وين الليلة يالنشهاك ياريت كنت في جلهاك
يا ( كاكا ) الحبيب طلاك وبعدو الزاد نفوسنا هلاك
يا ( ملوط ) حليل نزلاك ويا زمن الفراق نسلاك
بقدومك (كدوك) أصبح سوقو من الكساد أربح
أنا من نواحي صرت أبح كأني في مبرك المذبح
زاد من بعدك الانكال قلبي البي الهموم انكال
قطري العاصمة يا ( ملكال ) توفيني أنا صبري نكال
من دا الهم ما بنجا حبيبي الليلة في ( تونجا )
ياخالق الخلوق تنجا (تركاكا) حلتا العنجا
صب يا دمعي لا تكون جاف وياقلبي ليه البقيت رجاف
البدر الخفى الانجاف اليوم شرف الرجاف

هذه النسخة منقولة من (الراكوبة) وربما هناك نسخ أخرى أكمل

تحياتي

ههههههههه...وتاني عيييييييييك..يا ول ابا..!
عطفا على كلامات الأصدقاء حيدر قاسم..واستاذنا مصطفى مدثر..
نعم العنصرية حصلت تجاه مزيكا الجاز في السودان يا حيدر..والغريبة..وكت الجاز ظهر في امسودان..كان جزء من منظومة عريضة عمت افريقيا..لأنو الأفارقة كان عندهم اعتقاد جازم بانو الجاز والبلوز دي حاجات نابعة من افريقيا..لكن منو البيقنع الديك السوداني؟..
واحدة من مظاهر العنصرية يا حيدر..الناس بتضيف مادة في اليوتوب..وبيكون المغني فيها الليجند كمال كيلا..وبرضك بكل عسف بتقول ليك انو ده عبد العزيز محمد داوؤد..!!!!

نفس الفكرة يا مصطفى مدثر..عنصرية ود الرضي فيها قولان..وعنصرية العروب القالها ليهم نبيهم عليه السلام فيها مليون قول..ولكن..!!



اللحظة النادرة..هي لحظة التصالح..لمن كمال كيلا (جاز صرف) يقوم يغني الحقيبة (يا نعيم الدنيا)..!!
هنا يا صديقي..بتكون في حلقة مفقودة..ناس تاريخ الغنية والمزيكا في السودان مفروض يقيفوا عندها بشفافية وصدق..!!
اها يا الصادق..السؤال:ليه الجاز في السودان ، دايما في انتشارو، مربوط بفرق جاز البوليس؟..
اقول الكلام ده..وانا اذكر فرقة جاز كادقلي..ودي فرقة عمادها اعمامنا من الدرك والتــُمنة ذاتها (البوليس) في كادقلي..ومنهم اتعلمنا سماع حاجات عجيبة خلاص..اقلها فرقة البي جيز (اغنية ظهرت في فيلم حمى ليلة السبت..أي والله)..وصواميل..و فرقة آبا..وشنو كده ما عارف..!!
لي قدام لو ربنا هون ولقينا لينا فرقة..ح نشارك مع خلق الله هنا..!!
اها يا الصادق..سياسة تاني بالقطارة..كده كويس..؟..


كبر

اضافة صغيرة..نهديها لأستاذنا وصديقنا دكتور عبد الله علي ابراهيم..

ويا عبد الله لا تستغرب..فهي الحياة يا صديقي..عيال الريف..وتحت تحت عيال المراحيل والجنجويد..وشنو كده ما عارف.. كانت بتسمع بصورة انتقائية برضك...!!

واحدة من اصدق تجارب الجاز في امسودان عندي (طبعا بعد ما سمعنا الجاز في نورث امريكا)..هي تجربة الليجند الموهوب وليم اندريا..!!

بالنسبة لعيال وبنات امسودان الحزين اليومين ديل..فعندهم اقصى حدود المخيال الإجتماعي السياسي..تتوقف في غزوة خليل ابراهيم/العدل والمساواة في العاشر من مايو 2010..بالنسبة لينا نحن الوهم عيال الحرام الثقافي ذاتو..الغزوة دي صدى..او صورة بالكربون لأحداث حدثت في يوم الجمعة الثاني من يوليو/تموز 1976 وكانت بقيادة ضابط سوداني اسمو العميد محمد نور سعد..وكنت وقتها يافعا بمدينة الدويم في بحر ابيض...والشغل كان هو شغل الجبهة الوطنية بقيادة ناس كتيرة منهم الأمام الصادقالمهدي.. الإمام القاعد قدامكم ده..!!

المحزن...وكتها..خلق كتير اتكتلت بالشبهة..شبهة انهم غرابة وكده..ولكن الأغرب كان اغتيال الليجند الموهوب وليم اندريا..وكان مغني جاز ولاعب كرة سلة..اتكتل ساكت سمبلا على قول صديقاتي بنات ابا بنات الجور عليهن السلام (ياخي دي عالم لو الناس شافتها برواقة..كان تصنع سلام يعم كل كوكب الكرة الأرضية..!!!)..



واحدة من التسجيلات النادرة للجند الموهوب وليم اندريا..اغنية الجاز المشهورة (كفاية مزاح..بدور ارتاح)..وقام غناها استاذنا جيلاني الواثق فيما بعد..

هنا فيرشن بصوت وليم اندريا..للدنيا والزمان عشان الناس تشوف وليم اندريا..ثم فيرشن اخر بصوت اخوهو الأصغر جوزيف اندريا..وفيها بيكون صوت الجاز واضح للغاية..!!



شفت ككيف يا صديقنا يحي نحن من وين قاعدين نغالـــــط استاذنا الجيلاني الواثق (تصدق يا يحي عندي كاسيتات للجيلاني الواثق الواحد ده..اسوي بيها شنو..مندري على قول استاذنا حسن موسى)..
فيرشن جوزيف اندريا قالوا اتعمل 1971..لكني اشك في ذلك..!!

ويا عيال الزمن السوداني العجيب..برضك الخرطوم كان فيها نايت كلب..وشنو كده ما عارف..!!
المثقف السوداني دكتور عبد الله علي ابراهيم..وثق حكاية اغتيال الليجند الموهوب وليم اندريا..!!

ده الفيرشن الثاني بصوت جوزيف نصار اندريا..واصلا كان عزف جيتار في فرقة وليم اندريا..وحسب ما هو مذكور في اليوتوب فان الأغنية اصلا اتسجلت بصوت وليم في 1971..




اها يا الصادق..مش كان اخير نغالــــط ليكم ول ابا ياسر عرمان؟..
غايتو زوق ساكت مننا..قلنا نسكت..عسى ولعل المفاوضات تجيب ليها نهاية حرب وكده..بس اقرعوا احسان عبد العزيز..لأنو دي لو باريناها..السودان عمرو ما يضوق سلام..او كما قال..!!

كتر خيركم يا عشاق الجاز..
كبر

المصطفى المدثر
نبوتك دي ما بنشك فيها أبداً

تصدق وتآمن يا زول

لمن نزلت الفديو دا كتبت تعليق عن
ثقالة المذيع (العُمَرجُزَليّة) دي
لكن قلت لنفسي دا ما ماقمها نستفيد ويستفيد الناس من معلومات حول الجاز
وأديتو (الكريدت) بتاع إنه عمل البرنامج من أساسه.

لكن يا حبيب خليك قريب
الموضوع دا دايرنو يطوِّل ونكتب فيه
عن الجاز وعن الخرطوم والسودان والأحلام الضاعت

اووووووووووووووو كبر

ياخي البوست دا شرك كبير ليكم كلكم

القصة ما قصة سياسة (جمهوريتكم دي) الله يكون في عونا

أهم ديل الناس الكانوا دايرنكم تعيشوا وتنسوا

هسع عايلة زي عائلة وليام اندريا دي تتخيل في زول
في يوم من الأيام شكك في سوادنيتم

سودانك دا كان عن بكرة ابيه بيحتفل بالكرسمس

تلفزيونك القومي
يوم الكرسمس بيسلموهو بالكامل للمسيحيين

ناس الجاز سبقوكم شديد


كمال كيلا مشى في بداية السبعينات
وغنى في القاهرة (حسب كلام ابوي الحضر الحفلة هناك)

قال لى الجمهور كان جوة وبرة المسرح وما لاقى مكان

سياستكم يا هوندي، الفن دا

سيدنا الحسن بن موسى رضي السودان عنه
عنده حزب الجمال

أهو ناسك ديل الأسسوا حزب الجمال

عاين للناس الكانوا بيغنوا الجاز وشوفهم كانوا

القصة ما قصة فرقة البوليس

القصة قصة التغيير والتمرد

شوف عضو الحزب الإسمو (محمود عبد العزيز) ودي جكة تانية
عمل شنو؟


إنت يا كبر بتغرق في شبر سياسة، لأنك نسيت حزبك الأصلي

لأنه حزبك دا (حزب الجمال) ما بينزل انتخابات

التصويت عليه يومي


يا خي هسع امشى ليك أي حفلة لبرينسة

حتسمع (حاجة كولن كولن)

وحتشوف الرقيص الماخمج

وأمشي جوبا وشوف الغناء الشغال
يا خي تشاد القريبة دي
وأي بار في اسمرا

شفت لمن تخلي حزبك
وتقعد تجابد في مع الباقيين اللسه في سنة اولى سياسة يا هو بيحصل ليك
الشلهتة والغيظ الإنت فيهو دا

يا خي إنت (الحزب الكبير) وإنت الحزب الأقدم.
وإنك لوارثٌ هذه الأرض وباقٍ فيها ومعمهرها مهما فعلوا


اسمع لعمر عبده وأدي ربك العجب

الصادق إسماعين معذرة ياخ ما سلمنا عليك، دخلنا توووش في حبيبنا يا مصطفى
والله الجاز ما عندنا فوقو أي كلام، بل يذكرنا بأيام صبانا، دون غيره من صنوف الغنا السوداني
لكن كمان عشان نشكّر حاجة ما لازم ننتقص من حق حاجة تانيه، ولّ شنو يا قريب

معاوية الزبير يا حبيب

كيفك
ما بالضرورة طبعاً إنك تنتقص من حاجة عشان تشكر الحاجات التانية

وعلى العموم فالعنصرية ضاربة بأطنابها في وطننا
والجاز كان من أدوات المحاربة بشكل أو بآخر
دمت يا حبيب

أنا بوست فيهو الحبايب قبانى و كبر و كمان معاه مزيكة ستاندر ما ممكن أصلو يمر كده من غير نشارك فيه ,
بس الحبيب كبر ده يركز معانا هنا فى الجمال و ما يشتت الفن ده بى حبتين من الهم . ده براه عليك الله و داك براه .
و سيد البوست , يا سلام عليك ........

سلام للكل و اهل الطرب و ( الجاز ) ...

الفيديو الأول للراحل وليم اندريه مع فرقته ال Up Tides مصور في استديوهات التلفزيون

بدور أرتاح ... كانت من اميز اغنياته ...

يظهر خلفه في الفيديو بوب أندريه شقيقه يعزف عي البيز جيتار

والسمؤل علي الطرمبه ...وشاشاتي علي الكيبورد ...وبنيوتي علي الدرامز
_______________________________________________
كانت رصاصة غادرة ...

قوة مدججة بالسلاح اتجهت الي منزلهم بالخرطوم غرب ... بحثا عن المرتزقة ...

وكان من فتح الباب هو وليم نفسه ... وطبعا نسبة للملامح المختلفه ...

كان الحديث حاد ... وكان المراد تفتيش المنزل

فأوصد وليم الباب في وجههم و هم بالذهاب لتجهيز اهل البيت

ولم يتردد " الملازم " من اطلاق الرصاص من خلف الباب فأرداه قتيلا ...

تُري لماذا نحن دائما هكذا ...نقتل مبدعينا ...ونترك من سلبونا ...

نال وسام الرياضة عام وتخرج من معهد الموسيقي عام واغتيل و ليم اندرية في يوليو ولم يتجاوز عمره ال عاما ...

وليم اندرية " الغزال الأسمر " كان لاعب كرة سلة من طراز عالمي ...و أتي للسودان بالبطولة

العربية في عام قبل عام من اغتياله ... كان معه الأعيسر ...عرزون ... وندر بوث ديو ... ومايكل بنجامين ...

اختير هو و الأعيسر و بنجامين لمنتخب افريقيا ...

سمعت من أيام ان شقيقهم الأصغر فايز أندرية مقبم بنيويورك ...

أملي ان يكون بحوزته اعمال فرقة ال االابتايد

اما الجيلاني الواثق ...

فربطتني علاقة حميمة جداً بملك الجيتار الفاتح كردي

و الفنان الشامل كمال حمدى و الجيلاني كان متزوج من شقيقته ...

وفاتح و كمال كانا عماد و ركيزة فرقته ...

وكم و كم كنت حضوراً لتمارينهم في الخرطوم تلاته في منزل الجيلاني وكذلك في صالة نادى الأسره ...

ياخي أيام لا تعوض ابداً ...

سلام فور أول
سلام تاني لمعاوية
أنا ما انتقصت من شاعرية ود الرضي وحقيقة الأبيات غير المغناة التي أتيت بها تدحض كلامي نوعاً ما.
نوعاً ما لأن السؤال قائم: لماذا لم تُغنى هذه الأبيات؟ ولكونها الأبيات التي تصف الجزء الخاص بالجنوب
من الرحلة فالأمر بالنسبة لي يكون أنه على الأقل تم حذفها لعدم وجود حساسية تجبر ود الرضي ومن غنوا
النص على تضمينها، وإلاً فإن ظني قائم في أن حذفها لم تمله ضرورة لحنية بل ربما أملاه التهوين من
أمر الجنوب والذي تأكد لاحقاً بفصله!
وبعدين ياخي هناك الكثير من الغناء السابق لفصل الجنوب والمعزز للتفكير الشاحذ على الفصل.
أمسك عندك قصيدة العطبراوي (الجميلة شعراً) أنا سوداني التي تتجاهل بشموخ غير مكتمل لأنه لا يصف
أهلنا، تتجاهل أهل أمهاتنا الأفريقيات حين يقول:

Quote: أيها الناس نحن من نفر عمروا الارض حيث ما قطنوا يذكر المجد كلما ذكروا وهو يعتز حين يقترن

ويعدد مآثر يتضح لاحقاً أنها منسوبة للعرب دون غيرهم حين يقول:

Quote: دوحة العرب اصلها كرم والى العرب تنسب الفطن

فهذه الروح المنحازة (أين هي الفطن التي تنسب للعُرب وحدهم في سوداننا؟ أين جرنج وجرنج وف دينق وموديستو وأتيم وأموم؟) هذه الروح
هي التي ولّدت الاستهجان الصامت للجاز ومحاولات عزله وزجره وما أدراك وغير قصيدة أنا سوداني هناك كثير....

اما فرقة جاز سكة حديد عطبره

او بوليس سكة حديد عطبرة ما متذكر ...

تاسست سنة 1964 ... ومثلت السودان في الكويت في مهرجان فني في العام 1967

اول من قادها كان العم محمد مرجان ...

و لحسن حظي ما زلت احتفظ بتسجيل قديم جدا و هي أغيتهم الليجيندري ..

" ما نسونا "

اتحدي ...

لو في أي سوداني قعد مع روحو براها كده و ما دندن ... هم نسونا و قالوا ما نسونا ...

ياخ داك مش الزمن الجميل ...

الزمن الخلانا نشوف ما دونه قبيح قبيح قبيح ...

قباني يا حبيب

من هذا البوست الذي كُتِب سنة 2006 سأحاول تجميع بعض المعلومات عن "وليم اندريا

كتب عضو المنبر دينق
فرقة جاز وليم اندريهفرقة جاز وليم اندريه

Quote: وليم أندرية فايز نصار هو ابن الاستاذ والمربي الجليل أندرية فايز نصار.لقد كان والده من كبار المدرسين بالاستوائية في جنوب السودان. جدهم الكبير هو الدكتور فايز نصار, طبيب لبناني هاجر لجنوب السودان وتزوج هناك من مواطنة سودانية في الجنوب. أشقاء المرحوم وليم أندرية, هم جوزيف أندرية الشهير ب بوب أندرية وشقيقهم الاصغر فايز أندرية الذي كان يعمل موظف كبير في السفارة الامريكية لفترة طويلة في الخرطوم. وهم الان يعيشون في الولايات المتحدة الامريكية. والدة المرحوم وليم هي الاستاذة مريم زودي. أطال الله عمرها ,هي سودانية من أصل أثيوبي. هي شقيقة ضابط الشرطة الشهير عوض زودي الذي توفى من حوالي ثلاثة أشهر تقريبا.ولقد كان من قدام ضباط الشرطة في السودان. كان وليم أندرية كابتن فريق السلة السوداني الذي أحرز البطولة العربية, ولقد أطلق عليه العرب في تلك الدورة لقب"الغزال الاسمر" وذلك لقفزه العالي وسرعته الفائقة.لعب وليم أندرية في فريق الاولمبي بالنادي الكاثوليكي في الخرطوم وأحرز عدة بطولات في السودان. كان المرحوم وليم يلبس الرقم 13 ولقد ولد يوم 13 وتوفى في يوم عيد ميلاده يوم 13 . دينق.

الاخ العزيز/ الصادق اسماعيل

سلامات

كم كثيرة هي محاولات ارتياد هذه اللونية من الغناء الجميل.
لكن هنالك ملك ورقم عملاق لا يمكن تجاوزه
فكلما ذكرت كلمة جاز كان اسم شرحبيل حضورا

فكم أثرى ساحة الغناء والموسيقى السودانية ونقلها لآفاق جديدة..
أمد الله في أيامه ومتعه بالصحة والعافية..

مودتي