منـــكــــــــــــــــم وإليـــكـــــــــــــم والســـــــــــلام عليـكــــــــــــم ,,,

الأعزاء أعضاء وزار المنبر

السلام عليكم ورحمة الله وبركاته ,,,

وسط هذا الكم الهائل من المواضيع المميزة بالمنبر, أحياناً تقرأ بوستات أو مداخلات تكون فى غاية الجمال أو عكسه ... هذا البوست سيكون مخصص للذين يودون إشراك غيرهم فى سطر او جملة وردت فى بوست آخر مع تعليق أو رد بنوع من السخرية والدعابة للسطر المعني المنقول من بوست آخر مع ضرورة الإشارة للتالي:

1) إسم البوست والكاتب
2) إسم كاتب السطر المراد التعليق عليه (فربما تريد ان تعلق لمتداخل فى بوست وكاتبه غير صاحب البوست)

سبق وان فتحت بوست بذات الفكرة فى العام 2009, وطالته يد الأرشفة ولم اتمكن من نقله للربع التالي وكنت قد أشرت فيه بان الفكرة مقتبسة من منتدى شيخ المنتديات النوبية عبري تبج للكاتب كلامينكوف

أرجو المشاركة من الجميع دون زعل ... أكرر دون زعل

مع مراعاة التالي:

1. الكتابة فى هذا البوست على مسؤولية كاتبه أو ناقله على غرار "العفش داخل الباص على مسؤولية صاحبه"
2. البوست ملك لجميع أعضاء وزوار المنبر وانا لست سوى واحد منكم

سأورد أولى مشاركاتي لأتمكن من ايصال فكرة البوست

فى بوست بعنوان "المعلب المالي برشا خطير محتاج مجهود" للكاتب khaleel

يقول khaleel هم سلف مقتبساً لمداخلة الصادق

Quote: طبعا ديل ناس مالي اهل ديارا وكاونتيه اكيد الكورة عندهم متطورة ولكن الدبابين موجودين

وانا أقول لخليل " يعني الجماعة رحلوا عندنا بي دبابينهم ؟

Quote: سبق وان فتحت بوست بذات الفكرة فى العام 2009, وطالته يد الأرشفة ولم اتمكن من نقله للربع التالي وكنت قد أشرت فيه بان الفكرة مقتبسة من منتدى شيخ المنتديات النوبية عبري تبج للكاتب كلامينكوف

الاخ الفاتح شلبي ...

دخلت بس اسلم عليك ..
وان شاء الله نساهم معاك في هذا البوست المميز ..
اذا كان المزاج رائق ...

تحياتي ,,

محمد عبد المجيد ...

مراحب يا مجيدو

الله يسلمك وسعيد جداً ان تكون اول متداخل واحد فخم مثلكم

تصدق وانت ما طالب مني حليفة, أنا كنت عامل قائمة ببعض اعضاء المنبر اللى مداخلاتهم أصلاً دمها خفيف لكن سحبت القائمة خوفاً من ان انسي واحد ... إسمك كان رقم واحد وأبو سن رقم اثنين وهي قائمة طويلة بجيبهم هنا واحد واحد

فى بوست بعنوان

" جهاز المغتربين. لو كانت (شركة مساهمة.) كنا من أصحاب الملايين "

للكانب welyab

يقول ولياب

Quote: جهاز المغتربين لو كانت شركة مساهمة لا تقفو كثيرا عند التذكير والتانيث ..

لو كانت

وانا أقول لولياب

وريهم أن الغة النوبية تشبه اللغات القديمة فى كثير من التصريفات منها اللغة الإنجليزية التي تخاطب الذكر والانثي بـ you وباللغة الهندية بـ tom والشرح يطول بس حالياً وبصورة عاجلة ضروري جداً يرفعوا عننا الحرج فى التذكير والتأنيث

ساتر واحطياطي
-----------------------------------------
يجي واحد يقتبس كلامي الفوق دهـ ويقول
" دي مكنتكم " ما بعفي ليه

ولدنا الفاتح سلامات،،
حليل زمن كوريقان بارك والحاجات السمحة ديك :)

ما بخش المنبر بكثرة زي زمان لكن مرات بصادف تعليقات فايف إستارز.

في بوست "طبيبة سودانية مسلمة تتزوج من مسيحي وأسرتها تقاضيها" النقاش كان مسخن الف حول حكم الردة بين التيار الديني المعتدل والمتشدد.
وكتب احد المعتدلين بأن حكم الردة لا وجود له في الإسلام وقال من شاء فاليؤمن ومن شاء فليكفر وكدا، وبعديه خش ليك متداخل كتب:

Quote: واللة كلنا دايرين نشتت من الاسلام دا لكن خايفين من قطع الرقبة تجي تقول لي" من شاء يؤمن ومن شاء يكفر"...للو فتحوها ماتلاقي زول حايم

للضمان كدا بضحك يومين ونص:)

مرحب يا Ahmed Alim

حليل زمن بونا الحنونة وكوريقان بارك والذي منه

البوست دهـ بالضبط اتفتح للمداخلات الفايف استارز دي

لكن زولك بتاع من شاء اتلوم لوم شديد مع الخالق ومع الجمهور ههههههههههههه

فى بوست بعنوان " بوستات اخونا زهير السياسية افسدت العاطفية وكانت النتيجة بلمونية ..." للكاتب ود الباوقة

يقول أحمد ابن عوف, رداً للأخت منى عمسيب

Quote: الأخت منى، وان افترضنا انو ما بستحي دين ما عندو!

وأنا بقول لـ أحمد, كلك نظر يا أستاذ ودونك العنوان وتوقيت البوست

فى بوست بعنوان " باحث سوداني بجامعة الإمام بالرياض يحصد أكبر جائزة أميركية في مجال أمن الشبكات " للكاتب الامين موسى البشارى

وورد فيه الاقتباس التالي :

Quote: وأوضح أن فكرة إقامة منتدى ثقافي أسبوعي تحت رعاية السفارة يأتي انطلاقا من إيمانها بأهمية إيجاد منبر يسلط الضوء على قضايا الفكر والثقافة ويستوعب إنتاج المبدعين السودانيين في شتى ضروب المعرفة.

وأنا أتسائل

ليه الإنسان السوداني دهـ بيكون مبدع خارج الوطن ؟



وفى ذات البوست كتب MOHAMMED ELSHEIKH

Quote: شكرا بشاري للاخبار الحلوة وطبعا ناس السفارة مدخلين روحهم في كل شيء الا مآسي السودانين ويفلحوا ليك في الظهور وجنائزهم ترقد في تلاجات الموتى بالأزمان

وانا بقول

ما تبالغ أنت كمان يا ود الشيخ "موش قالوا الحي أفضل من الميت" ؟ تيب

فى بوست بعنوان " رائد في الجيش يعتدي على مواطن والله الجيش انتهى " للكاتب محجوب نمر

كتب ابوحراز

Quote: لا زلت أكرر وأردد دائماً أن الظروف لو خدمتني لأكون وزيرا للتعليم العالي واتمنى بالطبع أن لايحدث ذلك ولكن ان تحقق فإن أول قرار سأصدره وليكن مايكون بأن نسبة الدخول للكليات العسكرية والأمنية ستكون اعلى من الطب والهندسة الكهربائية يعني من 94% فما فوق وغير مسموح بالدخول عن طريق الواسطات يعني كل لواء يكون لديه مقعدين او ثلاثة هذا لن يحدث

وانا أقول

"إذا عُرف السبب بطل العجب، وإذا عُرف الداء سهل الدواء"

فى بوست بعنوان " السودانى فى الرياض لا يشبه بقية السودانيين " للكاتب يازول yazoal يازول

كتب

Quote: السودانى فى الرياض ، يوعد ولا يفى ، السودانى فى الرياض لا يصادق إلا الريال السعودى ، السودانى فى الرياض مصاب بخلل فى تفكيره وتصرفاته نتيجة الوضع الجغرافى الصحراوى والهوس الدينى الوهابى ، السودانى فى الرياض لا يربى أطفاله على عادات وتقاليد السودان المعروفة بل يربيهم على الذهاب لتحفيظ القرآن بشكل إملائى متكرر وغير تربوى ، فطفل الرياض السودانى متخلف فى كل شىء ولا يعرف إلا منهج المدارس السعودية بل ويحفظون السلام الملكى عن ظهر قلب ، ولكنهم لا يعرفون القمربوبا ولا ملاح الروبولا عاداتنا وتقالينا ، ولا يهتم الأب ولا الأم إلى ذلك بل يهتمون بالذهاب الى سوق الذهب ، السودانى فى الرياض يبتسم لك إذا رآك ويطعنك من الخلف إذا ذهبت عنه ، السودانى فى الرياض لا يعرف الملبس الجيد ولا المأكل الطيب وقد تناسى تقاليد وأعراف البلد الحبيب المدعو السودان

ووسط زخم رافض لتعميم مثل هذهـ الصفات القميئة


ود الباوقة اقتبس التالي (وما لاقي مصدر) بس مداخلة فعلاً أوسكار


Mimo Pipo · Alal el fassi
بالجد كلامك صاح 100% ، (( تحركنا من مدينة الطائف وعددنا 8 أشخاص لزبارة عائلة (( عزيزة علينا )) جداً المهم جابوا لينا الغداء مكون من (( حبة دجاج شواية مع نفرين رز بخاري وبس ))) مع العلم بأن الزوجة تعمل طبيبة والزوج يعمل مترجم ،،، غايتو أبخل وأنشف وأجلد من ناس الرياض في حياتي دي ما شفت ، والسبب في إعتقادي (( ما زالوا حديثي نعمة ))

فى بوست بعنوان " أحد شهداء سوريا تخرج منه رائحة المسك (فيديو) " للكاتب محمد جلال عبد الله

كتب MOHAMMED ELSHEIKH

"في البداية قريتها رائحة "السمك"

فى بوست بعنوان " النوبيون كاتلين الجدادة و الجعلين شايلين النايحة " للكاتب abubakr salih

كتب فيه

Quote: وجدت ان اهلنا النوبيون كاتلين الجدادة و خامين بيضها و الجعليين شايلين النايحة ساكت. يا جماعة بكرى حسن صالح و عبد الرحيم ديل من النوبيين و قبلهم جعفر نميري و يقال ان البديرية اهل عمر البشير زاتهم ربما يكونوا فى الاصل لهم صلات بالنوبيين. طبعاً اذا اخذنا فى الاعتبار اسرة الامام المهدى باصولها الدنقلاوية تبقى الحكاية قفلت تب.

وانا بقول

يا بكور ما بالغت شوية كدة ؟

النوبيين هم الجهة الوحيدة فى أطراف السودان لا رفعوا سلاح لا تمردوا (رغم الواقع المرير) وهؤلاء يمثلون أجسام غير نوبية وانت أدرى, فما علاقة النوبيين بالدجاجة؟

فى بوست بعنوان " مصطفى عثمان اسماعيل ومبادرة لرأب الخلاف الخليجي " للكاتب مهدي صلاح

كتب مهدي صلاح هم سلف

Quote: على العموم الكويت حافظت على شعرة معاوية مع قطر وفُرغت للقيام بالتفاوض بين اطراف الموضوع

وأنا أقول

يا ليت لو السودان كان حافظ على شعرة معاوية مع الكويت ... إذن مصطفى وإخوانه خارج الحلبة تماماً

فى بوست بعنوان " المعلب المالي برشا خطير محتاج مجهود " للكاتب khaleel

كتب الحاج حمد الحاج, معلقاً على الخطأ بالعنوان إسم الفريق المالي " الملعب المالي "

Quote: الملعب عملتها المعلب ..في هضربة اكتر من كده يا هندسة!! تمنياتي للهلال بتجاوز الملعب المالي فهو ممثل السودان بعد خروج المريخ و اهلي شندي.. مريخابي ما متعصب.

وانا أقول

يا حاج حمد يا صغوة, خليل قاصد انه الملعب المالي حيتم تعليبه وكدة وبالتالي سيصبح معلب جاهز للتسفير خارج البطولة

فى بوست بعنوان " سيد البلد في اشرس نزال للعبور لــ 16 في منافسة الابطال " للكاتب أشرف الرحال

كتب haroon diyab

Quote: شيل شيلتك الليلة مع ناس عمر الفاروق ومحمد البشري اما امثالي فقاعدين يسننوا في السكاكين هههههههههههههه

وأنا أقول

يا هارون يا صفوة حاول اتناول عشاك قبل بداية الكورة

فى بوست بعنوان " النوبيون كاتلين الجدادة و الجعلين شايلين النايحة " للكاتب abubakr salih

كتب عزام حسن فرح

Quote: (2) الديمُقراطِية: ده نِظام بائِس جِدًا، طبعًا هو المُتاح والمُمكِن، بس بائِس، لأن الديمُقراطِية عاملا زي "الحدود" لا يجوز تطبيقُها إلا بِشروط مِنها تَوفُر العدل

وانا أقول

يا عزام أنت إنسان بارع فى التاريخ لكن ظالم الحاضر والمستقبل برؤيتك للديمقراطية

فى بوست بعنوان "أعيدوا إلينا السودان. .... " للكاتب Hani Arabi Mohamed


كتب

Quote: من أجلِ خدمةِ مشروعهم .... استلموا السودان ولم يرحموا فيه عزيزاً ولا ضعيفاً .... جعلوا أعزّة أهلهِ أذلّة. دمروا مؤسساته امتصوا دماء اقتصاده شرّدوا أبناءه أوصلوا سمعته للحضيض جعلوا اسمه يُذْكر في كل قائمة سوءٍ ودائرة شبهة لا أظن أبداً أنهم ينتمون إلى هذا الوطن ، أو أنهم يهمّهم أمر هذا الشعب

وانا بقول

دو يو بليف يا هاني كل ما ذكرته بالمقتبس يعلم به كل الشعب ما عدا الوصوليين ؟ فتأمل

فى بوست بعنوان " متعشى بوش مع ود البوش " للكاتب يازولyazoalيازول

كتبت منى عمسيب

Quote: الفارس الاصيل الاسمـــو ود البوش معروف من عقب مرقآ بسند الحوش مقنع للبنات داخل قلوبن تووووووش يارب يا كريم قسمتنا ليهو تحوووش يكرم في العدم كان باعدس او بووش هو ما سمح الكلام تقولو ماكنتوووش . بت عمسيب .. اسمعوا جاي ده ما غزل دي الحقيقة وحاة الرسول . تحياتي للجميع ابناء وطني ودمي .

فعقب Asim Fageary

Quote: غايتو يا ود البوش باضت ليك في قفص _________________ على فكرة .. بت عمسيب قالت دا ما غزل بتقصد يعني دا ما (غزل بنات) يعني ما حلاوة قطن !

فى بوست بعنوان " هل ناس الرياض فعلا ما بيكرموا الضيف؟؟؟؟ بوست غير رياضي " للكاتب د. ياسر عبد القادر

ووضح كاتب البوست:

Quote: ناس الرياض: السودانيين المقيمين بالرياض القصد: من الناحية الاجتماعية

وكتب فتح العليم محمد أبوالقاسم

Quote: ياريت يادكتور تغيير عنوان البوست الى : كيف يتعامل ا لاطباء السودانيين المقيمين في الرياض مع مرضاهم السودانيين

وكتب الزبير بشير

Quote: في يوم و برضو في المستسفي دخلت استراحه الانتظار رجال و انا داخل الاستراحه سلمت و حلست بالقرب من سوداني قال لي انت ما من الرياض حقيقه استغربت وسالته ليه قال لي ناس الرياض ما بسلموا علي بعض

فى بوست بعنوان " ما مدي صحة صفقة(توطين 120الف) من البدون الكويتين ب(شرق السودان) مقابل(5 مليار دولار)؟! " للكاتبة Tragie Mustafa

كتب cantona_1, كباشي الصافي

Quote: لدي مقترح وأتمنى أن يكون هو رأي الحيكومة ألا وهو أن يتم توطين هؤلاء البدون في مثلث حلايب شلاتين أبو رمادة ونشبك مصر والكويت المحمية بدول الخليج ومصر ما بتفوت كلامهم ونكون حلينا مشكلة حلايب حل جذري.. ولّا رايك شنو؟

وانا أقول

لو كانت الحكومة السودانية تفكر بهكذا طريقة لما توصلنا اليوم لهذا المنعطف الخطير من التردي فى كافة الأصعدة

فى بوست بعنوان (حبيب نورة وعصام جبرالله في الدوحة بس مباراتكم للادروبى درير بتوديكم في ستين داهية) للكاتب بدر الدين الأمير

يقول الأمير بدر الدين هم سلف

Quote: اخى امس رجعتونى لايام العزبية والحرية التى افتقدتها فضلت خيركم وكتر خيركم

وانا بقول

نسخة مع التحية لوزارة الداخلية

فى بوست بعنوان

( عن الشريط لكل من يعرفني حتى يطمئن قلبكم ) للكاتبة د.نجاة محمود


كتبت الدكتورة نجاة

Quote: ولن اعتذر عن وجهات نظري المؤسسة على الحقائق والمتابعة اللصيقة لهذه القضية منذ البداية الى النهاية.

وانا أقول

أفااااااااا وانتى متابعة الحيثيات أكثر من القاضي الحكم بالبراءة؟

يا دكتورة إعتذري بلاش نشفان دماغ

فى بوست بعنوان

( المؤتمر الوطني حزب المهمشين والمحرومين والضعفاء) للكاتب Frankly


أنا أقول بعد قراءت للعنوان فقط تماماً مثلما فعل اخونا Mohammed Sedeq


إنتو معاني كلمات (المهمشين والمحرومين والضعفاء) غيروها ؟

فى بوست بعنوان
(دفن نفايات نووية في الشرق مقابل اربعة مليار ونصف دولار!) للكاتب jini

كتب أسامة البلال

Quote: مرحبا بالبدون في وطنهم الجديد ولو ناس الشرق ما عاوزنهم اليجونا في دار جعل

فكتب Abureesh

Quote: كدا أحكى لينا تجربة الفلسطينيين فى دار جعل.. بعدين البدون ديل، خدوهم وخدوا الخمس مليار.. إن شاء الله تنفعكم قبل ما الحلم دا يتحول لكابوس.

ثم جاء الرد من elhilayla

Quote: ‎في اليوم التالي مباشرة هتفوا- وما زلت أتذكر-: إسرائيل ولا المعاقيل

فى بوست بعنوان

(من هو عمر دفع الله ؟ .. اللي ذابحنا كل يوم بكاريكاتيرات في أعلى المنبر ؟) للكاتب Ali Abdalla Hassan

وأنا أقول دون الخوض فى التفاصيل

من أنت يا Ali Abdalla Hassan حتى تتسائل عن الكاريكاريست عمر دفع الله ؟

فى بوست بعنوان ( قضاء منحط) للكاتب wadalzain

كتب ود الزين هم سلف

Quote: استفزنى جدا الحكم الذى اصدرته محكمة المنيا فى مصر على اكثر من 500 بالاعدام فى جلستين فقط

وانا أقول

فى الحاجات دي أنا مريح راسي راحة مستمتع بيها لسبب واحد ... لأني اتطلع عليها فقط من باب المعرفة أما أن يستفزني حدث خارج حدود السودان ولأناس غير بني وطني اتمنى ألا تحدث ذلك لي الى يوم الدين

وعلى قول اهلنا الفينا مكفينا

فى بوست دسم بعنوان " خبر ....وتعليق ....وحكاية 3 مليار دولار ...! " للكاتب الكيك

كتب الكيك معدداً مصادر موارد عديدة فى السودان

إ

Quote: ذن ما حاجتنا إلى البترول والذهب والنحاس والقصدير والطماطم والبطيخ؟!!

وأنا أقول

أخوي الكيك ياخي دهـ اوجه سؤال مر علي فى العام 2014, نحن بالفعل لا تنقصنا موارد مالية, تنقصنا فقط حكومة تعي مصلحة الوطن والمواطن

بوست بعنوان " خالص التمنيات بهزيمة مدوية لفريق الهلال السوداني في مباراة اليوم " للكاتب أساسي

ومن العنوان كدة بس

أقول يا أساسي يا صفوة أحلم بما تتمناهـ ! بس من هسسسه بقول ليك ... أوعك تجي تبارك لينا بعدين ... تهنئتكم مرفوضة

فى بوست بعنوان " شوفو امير قطر قبل امير الكويت وين ... ( صورة )" للكاتب صلاح جادات

كتب جادات

Quote: البوس عند ناس الخليج خشم بيوت بس دي عجيبة

دي البوسة الأصلية يا كيشة إنت ما سمعت بي حب الخشوم

فى بوست بعنوان " محجوب شريف شاعر الحزب الشيوعى ( وليس الشعب السودانى ) " للكاتب بدر الدين اسحاق احمد

كتب بدر الدين

Quote: انا واحد من افراد الشعب السودانى ولم اشارك فى انتخابات لاختيار شاعر للشعب فلا داعى لانتحال شخصية الشعب السودانى واصباغ الالقاب على من تحبون

وانا أقول

يا راجل إختشي آخر إنتخابات فى السودان كانت فى العام 1985م ... أسكت لا يسمعك البشير ويتحسس من نوع كلامك دهـ (خلوها مستورة)

فى بوست بعنوان " البشير يحاول الوثوب مرة تانية في قاعة الصداقة في 6 أبريل " للكاتب سيف اليزل سعد عمر

كتب سيف اليزل

Quote: لمشهد المتوقع في المنصة الرئيسية الترابي علي يمين البشير الصادق المهدي والميرغي علي يسار البشير الصادق المهدي الاقرب لليد اليسري

وأنا أقول
دي فرصة العمر يا سيف, خلوهم مقنطرين كدة لامن تقوم ثورة وتجرفهم جميعاً الى مزبلة التاريخ, موش أحسن من واحد فيهم يكون عامل فيها ما مشارك ويجينا ناطي بعد الثورة (انظر للجانب المليان من الكوب)

فى بوست بعنوان " هل يستحق الكوز التداخل معه ؟ " للكاتب Khalid Basheer سرد فيه الفرق ما بين الفطرة السليمة للبشر وما بين من يتخذون دين الله غاية لتحقيق مآربهم الدنيوية (خاصةً الدنيئة منها)

كتب بشير أحمد

Quote: من يعتقد أن الكيزان يكتبون هنا للتداخل معهم ؛فهو واهم.

فكتب معاوية الزبير

Quote: إنهم يكتبون لتحليل رواتبهم

فكتب بشير أحمد

Quote: بل يكتبون لتفنيد دعاوي مًــــــدعي الحرية والديمقراطية .

فكتب معاوية الزبير

Quote: لكنهم سرعان ما يتراجعون لأن لصبرهم على استفزازات الكيزان له حدود

فكتب بشير أحمد

Quote: بدليل إنكـــــ ماصبرت أكتر من نص ساعة.

وانا أقول

يعني يا بشير أحمد, أنت معترف بانك إضافة لما هو مسرود فى بوست Khalid Basheer كمان مستفز ؟

وعليكم السلام مرحبا الفاتح شلبي

فى بوست بعنوان " رسالة إلى ملحد " للكاتب الطيب مصطفى

وهو جميل شيق جداً وهادف بس ظلم مضمون البوست اعتقاداً بأن الطيب مصطفى هو الخال الرئاسي

فكتب بله محمد الفاضل , معلناً إنقاذ البوست

Quote: الطيب مصطفى ود الدكيم سادتي ليس هو الطيب مصطفى خال البشير هذا ما لزم التنويه إليه

فرد عليه الطيب مصطفى الما خال الريس

Quote: يا بلة إسم الزول عامل لي مشاكل كتيرة خلاص...

وانا أقول

Moral أي الحكمة , البشر عموماً لا يقبلون حتى الوصايا والثنايا إلا ممن هم أهل له

--------------------------------

لزم عليكم با الطيب أن تغير إسمكم فى هذا المنبر الى الطيب ود الدكيم وربنا يعوضك على ما يصيبك من هذا التشابه

Quote: وعليكم السلام مرحبا الفاتح شلبي

وعليكم السلام والرحمة, مرحبتين باسط المكي

فى بوست بعنوان " والله الواحد مشتاق ليكم زي شوق الهلال للكاسات الخارجية " للكاتب فايزودالقاضي

كتب د. ياسر عبد القادر

سلامات شكلك كدا كنت في كمبالا.......سيتي سيتي....كمبالا كل تمهيدي و إنت بخير

وانا أقول يا ود القاضي

ما برفع ليك بوستيك الشين داك وأرحب بيك هنا دهـ وأقول ليك ... السنة دي أوعك تجازف بي شنبك مع الهلال

فى بوست بعنوان " مِحَن الواتساب سي سي لذوي الاختصاص " للكاتب البشير دفع الله

ذكر فيه

Quote: هنا أعود لحديثي أعلاه وتنتابني تساؤلات عديدة حول مسئوليتنا الأخلاقية لو سرق جهاز الجوال ( الذكي )

أخوي البشير

قبل مدة تعرض احد زملاء العمل لسرقة هاتفه وكان هاتفاً عادياً (وليس ذكياً كما بقصتك) ... لم يتردد الشخص فى تقديم بلاغ رسمي وبمحضر وزودهم ببعض التفاصيل عن الجهاز (ربما الرقم التسلسلي للجهاز) وليست الشريحة ... ما حدث أن الجهات الرسمية لديها ما يساعدهم فى تحديد موقع الجهاز بل وقيل لي بأنهم ذهبوا للسارق وطلبوا منه أن يخرج الجهاز من جيبه اليمين

تعرف يا البشير أخوي نحن مشكلتنا لا تنحصر فى تبعات الحداثة ولا سلبياتها فقط ... لاااااا نحن شعب لسه ما بدينا

ى بوست بعنوان " ود البوش وابو حسين والقلوب الصافية لا تصدأ ابدا " للكاتب د.محمد حسن

بشر من خلاله رواد المنبر عن صلح تم ما بين العضوين

وفى التفاصيل يقول ود البوش

Quote: وحقيقة قد ندمت اشد الندم بعدما زال الغضب الشديد الذي سيطر على نفسي

وانا أقول

بوست الصلح المذكور هو من أقيم البوستات على الإطلاق فى هذا المنبر , وتحية كبيرة لود البوش وأبو حسين

كما أنني أهمس فى أذن ود البوش وأقول ... أرجوا أن تعود كما كنت بعد زوال الغضب المسيطر عليك حالياً والذي جعلك تقرر ترك المنبر

فى بوست بعنوان " اعتذار للأخ محمد ( تروس ) .... " للكاتب ود الباوقة

فكتب ود الباوقة

Quote: نامل ان يستجيب الاخ محمد تروس لصوت العقل ويقبل اعتذاري

كما كتب أيضاً

Quote: بالمناسبة الاعتذار دا عندو فترة صلاحية محددة

وانا أقول

الإعتذار جميل نعم, ولكن حتى لا تضع نفسك فى وضع كهذا الوضع الذي لا تحسد عليه, من الأول حكم صوت العقل وقشة ما تعتر ليك

وشكراً على إبقائنا متابعين لإبداعات الأستاذ محمد تروس

فى بوست بعنوان " مصطفى الأغا ... تغريدتك على تويتر لا تكفي !!! " للكاتب الفاتح الجنيد

كتب سيف اليزل سعد عمر

Quote: هو ذاتو مصطفي الأغا ده منو؟ والله مش كان غرد كان جا بيض لي هنا زاتو ما سائل فيهو

فى بوست بعنوان " ماذا قصد إمام مسجد بُري أن يقول؟! محمد وقيع الله " للكاتب محمد وقيع الله

كتب

Quote: وقد كان الأولى بالمحرر الذي صاغ الخبر وبالمسؤول الصحفي الإداري الذي أجاز نشره أن يتحريا التدقيق اللُازم في المضمون الذي قامت الصحيفة بنشره.

وأنا أقول

هل أنت تلمح عن أسس ومعايير ودقة وتحري فى صحفنا ؟

كدي فى الأول خلينا نلقى الأسس والمعايير دي فى العلاج والأكل والشراب والتعليم فى الاول ... بتاعة الصحافة دي رفاهية

فى بوست بعنوان " وإن فاز... الهلال تعباااان " للكاتب محمد البشرى الخضر

وكتب محمد البشرى

Quote: دخلنا في الزمن بدل الضائع أربعة دقايق ربّك يستر هيا نابي الهنا غن بقينا نرجف قدّام الخرطوم تلاتة أخير عايز تسو بينا شنو في المجموعات*

Quote: أححححححححححح إنتهت بسلام, الحمد ليك يا الله و الله يجازيك يا النابي, ويستر عليك وعلينا في المجموعات (التي قال عنها الكاف .. إلخ إلخ )

وكتب د. ياسر عبد القادر

Quote: إبتسامة: الكاف فرز الرجال من الوليدات.......أما ناس فلانة...فديل خدج لسه....والمشكلة عاملين إزعاج شديد جدا وهم في الحضانة ......ماعارف حيعملوا شنو بعد ما يفرج عنهم في الشهر التاسع

فى بوست بعنوان " القطار دور حديدو: أجمل فيديو كليب إثيوسودانى سو فار " (للكاتب : سيف اليزل سعد عمر)

كتب خالد المبارك

Quote: دائما ما يحس الاثيوبيون بأن هناك شئ ما ينقص الاغنية السودانية شئ صغير فقط هو ما ينقص فيبادرون بتقديم اغنياتنا في قالب قد يصل حد الكمال ترى ماهو السر الذي يخفيه هؤلاء الاثيوبيون عنا ؟؟ ، ما هو نوع السحرالذي يضيفونه للاغنية فيجعلك كلما انتهت الاغنية تعيد سماعها مرات و مرات؟

فكتب سيف اليزل مؤكداً على ما جاء به خالد المبارك

Quote: ما يفعله الغناء السودانى في أهلنا الأحباش لم تفعله السياسة.

وانا أقول

الشعب الأثيوبي شعب ذواق وشعب حر ويستطيع أن يفرز بين ما هو سوداني أصيل وغيرهـ

وعليه يعلمون أن أغانينا نابعة من الشعب ومتى ما نبعت حكومة من صلب الشعب سترى عجائب السياسة

فى بوست بعنوان " فيما يختص بزواج كريمه وزير الدفاع .. الزواج الضجة ( النجيضة ) (للكاتب: عادل الباهي عبدالرازق)

وكتب ود الباهي

Quote: أقول ليكم شنو عاد الواحد فاتح البوست دا وخجلان زاتو آخر عمرنا وبالشنب الظاهر للعيان دا بقينا نكتب في الفارغة والمقدودة فلانة دفعو ليها مهر كذا وجابو ليها ذهب كدة لكن لا بأس مادام الموضوع بيبريء أبرياء من أشانة السمعة فنحن لها

وكتب سر الختم عباس

Quote: أعرف أهل العريس حق المعرفة فنحن من منطقة واحدة بيتهم وبيتنا وغالبية بيوت المنطقة من الجالوص هذا الكلام خيالي جداً هذا ولعنة الله علي الكيزان

وانا أقول لسر الختم

ياخي السطر الاخير دهـ أجمل ساتر أنا شوفته فى المنبر دهـ ههههههههههههه ينعل شيطانك يا سر الختم

فى بوست بعنوان " ندوة القانونيين بالدوحة : سد "هداسي جاديب" في مصلحة السودان (صور) " للكاتب Faisal Al Zubeir

كتب رؤوف جميل

Quote: I don't believe that is the true sudan accepted it for political agenda dr sulimam marketing for ethiopean project it is his work

SINCE WHEN SUDAN KNOWS POLITICAL AGENDA'S

على أي حال من بوؤك لبوؤ السماء

فى بوست بعنوان " تحلييييييييييييييييييييييييييييييل ،،، كاراكاتير " للكاتب والكاريكاتيرست مصدق مصطفي حسين

كتب

Quote: هل يعفي من المحاكمة ؟ يعني خلاس ... زي الماعملو شى؟؟؟؟؟

وانا أقول لمصدق

الأصل فى التحلل أو التحليل هو كيف أن تحل نفسك من رأس المال المحلول منه العبد ... وطالما أنه حل نفسه من رأس المال ... فلا بأس فى ان يعفى العبد من المحاكمة ... هو الموضوع موش فلوس ؟ أهو رجعها ... ميتة وخراب ديار ؟

الفاتح شلبي

أسلوب جميل والله

كلامك في الحتة دي صاح

Quote: دي فرصة العمر يا سيف, خلوهم مقنطرين كدة لامن تقوم ثورة وتجرفهم جميعاً الى مزبلة التاريخ, موش أحسن من واحد فيهم يكون عامل فيها ما مشارك ويجينا ناطي بعد الثورة (انظر للجانب المليان من الكوب)

بل مرورك على البوست هو الأجمل يا سيف اليزل

فى بوست بعنوان " اللامفكر فيه حول هويتنا السودانية..(صحيفة الخرطوم) " للكاتب صهيب حامد

كتب Bashasha

Quote: امعانا في الخبث، اللعب بعقولنا، خلطا للاوراق، تغبيش للرؤية، واعادة شك لاوراق اللعبة، الخواجات الملاعين ابتدعو فرية حضارة كرمة، كحاجة موازية لحضارة "كمت" اي مصر، باعتبار كمت حضارة بيضاء اي حقتم هم العنصريين النازيين هؤلاء، مع انو "كمت" لغة تعني بالضبط "السودان" عديل كده!

وانا أقول لصهيب و Bashasha

كلمة كمت أو كبت فى اللغة النوبية فعلاً تعني بالضبط , بدليل أننا عاصرنا تاجراً فى المنطقة هناك عندما تلجأ إلي دكانه لشراء شبط أو شبشب وبمجرد ما تدخل رجلك للتأكد من مقاسك كان يقول بسسسس كيميت وبلحن كدة فى إشارة الى أن الشبط هو بالضبط مقاسك وأتحدا واحد كان يقدر يغالطه بعد يقول كيميت ههههههههههههه

فى بوست بعنوان (( الله أكبر: نائب الرئيس يقول انتهي عهد اكل المال العام )) للكاتب : ناصر حسين محمد

كتب

Quote: اعلن حسبو محمد عبد الرحمن نائب رئيس الجمهورية عن انتاء عهد اكل المال العام وقال ان بعض المزارعين يستغلون تمويل البنوك الحكومية ولايستردونه

وانا أقول

هل إنتهي عهد أكل المال العام ام إنتهي المال العام ؟

فى بوست بعنوان (( جهاز الامن يستأذن مساعد الرئيس في أمر أـستدعاء والده )) للكاتب قريب المصري

وأنا أقول من العنوان بس

Quote: لمثل هذهـ الفعائل نمتدح الديمقراطية التي تفصل ما بين السلطات الثلاثة:- 1)السلطة التنفيذية 2) السلطة القضائية 3) السلطة التشريعية فالإستئذان يعني عمل ساتر بلغة العصر عما قد تترتب عليهم من الفعل المذكور لأن الأمور جايطة وهناك تداخلات ما بين الثلاثة سلطات كل حسب مقدرته

فى بوست بعنوان (( طيورنا الجميله (توجد صور واسماء ) )) للكاتب رحمه فضل المولى عجك

حيث كتب

Quote: بسم الله الرحمن الرحيم هذه دعوه لجمع اكبر عدد من الصور لهذه الطيور الجميله واسماءها , قبل ان تهاجر كما هاجرت كثير من حيواناتنا البريه الى دول الجوار .

وانا أقول

يا راجل يا طيب إنت فى الطيور ول فى البشر المهاجر من البلد بأي ثمن ولو السودان واصل فى الانحدار بذات المنوال عادي تلقى مدن زي حلفا هاجرت لمصر والفاشر لتشاد وكسلا لأثيوبيا

فى بوست بعنوان (( يهودية إمريكية تختطف قلب بوردابي..صور )) للكاتب ابوبكر سعيد آدم

وكتب

Quote: دخل البوردابي انور دفع الله الملقب (بانور كنج) حياة زوجية جديدة للمرة الثانية وهذه المرة تزوج من يهودية امريكية مولدة بولاية تكساس الامريكية اليهودية والاصل امريكية محامية تعمل في مكتب الهجرة الدولية ومحامية ايضاً TED

وليته اكتفى بالمقتبس ولكنه كتب بالأسفل وفى ذات البوست

Quote: ما الهدف وراء زواج انور كنج من هذه المحامية التي تعمل في منظمة الهجرة الدولية و TEDx

وأنا أقول

تنكح المرأة لعدة أسباب وحتماً أنت تعلم ذلك ... المحيرني بتستفيد شنو أنت شخصياً لو علمت سبب زواج شخص آخر !

فى بوست بعنوان (( لا تأمن المرأة )) للكاتب محمد عبد الله الحسين

كتب فى خاتمة القصة

Quote: بعد تدوين أقوال الزوجة امرت بإخلاء سبيل الزوجة بالضمان. كما أمرت بحبس الزوج قيد التحفظ إلى حين عرضه على النيابة. الآن أصبح كل شيء واضح لدي. و لحسن حظ الزوج فقد عرفت بعد ذلك أن أخ الزوجة لم يمت فقد كانت الطعنة غير مميتة و هو الآن ملازم سرير المستشفى للعلاج و قد تعدى مرحلة الخطر حالته.

وانا أقول

غايتو فى القصة دي وحسب الحيثيات التي ذكرتها مطلوب منك تبديل العنوان بصورة عاجلة جداً, رجل شك فى زوجته وطعن أخيها ظناً منه أنه شخص غريب ! ما ذنب زوجته كي لا تؤتمن ؟

فى بوست بعنوان (( اعضاء سودانيز اون لاين يكتبون الى انفسهم )) للكاتب عبد العظيم مكي

وأنا أقول

لا يمكن أن تقول بأن أعضاء سودانيز اون لاين يكتبون الى انفسهم ... لعل التعبير قد خانك بالعنوان

لم اتفهم لمعايير تقييمك للمنبر لكني من المعتقدين بأنه من خيرة المنابر السودانية التي نعتز به ... كما انني لا أرى قصور إن كان أعضاء سودانيز اون لاين يكتبون الى انفسهم طالما أنه متاح للإطلاع من قبل الكل

فى بوست بعنوان ((( منزل للبيع ب 16 مليون دولار ... تورنتو ... هل من مشتري ؟ ( فيديو ) ))) للكاتب يحي قباني

وانا من العنوان بس بقول ليه

ليه يا قباني !!! أصلو بيت فى الخرطوم ؟

فى بوست بعنوان ((( بكل امانة وجاد جدا قررت الانضمام للمؤتمر الوطني ))) للكاتب د.محمد حسن

كتب :

Quote: ولكي يكون انضمامي مبنيا على اساس معرفي تام ارجو ممن عضوية المؤتمر الوطني في هذا المنبر توضيح الاتي 1- اهداف الحزب 2- برنامج الحزب على المدى القصير ( للانتخابات القادمة ) والمدى الطويل 3= رؤية الحزب لحل مشاكل النزاعات المسلحة 4- - الدستور

وأنا أقول إذا النقاط الأربعة دي موجودة فى المؤتمر الوطنى .. كانوا أنقذونا بالجد

فى بوست بعنوان (( استقالة (380) ضابط عقب الحكم بإعدام قاتل "عوضية عجبنا" ... !!)) للكاتب الطيب رحمة قريمان

وأنا أقول

بصرف النظر عن صحة الخبر من عدم صدقه

مالم يكن هناك فصل تام ما بين ( السلطة التنفيذية، والسلطة التشريعية،والسلطة القضائية ) فإن كافة الإحتمالات والمآلات مفتوحة على مصراعيها

فى بوست بعنوان (( يهللون للأزهري فيما لا يستحق التهليل! )) للكاتب Hussein Mallasi

وكتب حسين هِم سلف

Quote: زول!! كعادة البشر!! الأزهري - حينها - لم يكن زول .. بل كان رئيساً لمجلس السيادة .. وأن يعتاد رئيس مجلس السيادة على الإستدانة من أحد كبار التجار فذلك أمر غير مقبول في الدنيا كلها!

وأنا أقول

يعني كنت تفضل أن يستغل نفوذهـ ويكون تاجر وصاحب عقارات وعمارات ول شنو القصد ؟

رحم الله الزعيم إسماعيل الأزهري بقدر عطاءهـ ونقاءهـ والافضل يا حسين, أن تبتعد من مناولة تفاصيل قامات مثل الأزهري لأن فيه إساءة للوطن وللوطنية ... إنسان أرسى بند العطالة فى ستينات القرن الماضي يستحق مثل هذا العنوان ؟

فى بوست بعنوات ((( زيارة الأمين العام لجهاز السودانيين العاملين بالخارج لمنطقة القصيم بالسعودية (فيديو).))) للكاتب وائل حمزه الزبير

وكتب نقلاً عن سوداني نت

Quote: وقد استهل اللقاء الاستاذ/ بشير ابراهيم بشير رئيس الجالية ملخصاً هموم المغترب السوداني بالخارج

وانا أقول لا يوجد للمغترب هموم غير هؤلاء يا هداك الله

فى بوست بعنوان ((( شوفو سخف مامون حميدة : كارثة : ( صور ) ))) للكاتب صلاح جادات

كتبت اميرة السيد

Quote: يا جماعة الخير في استهبال اكثر من كده...وهسع هموم المواطن الصحية عاوزة ليها ادارة ..ويعني وزارة الصحة بتعمل في شنو ؟؟ ولا بس بعثرة الاموال العامة على الفاضي وخلق وظائف لا ضرورة لها ..ولكن الطرق والوسائل لسرقة اموال الشعب بالطرق المشروعة بقت كثيرة ومتنوعة..

معقولة يا اميرة ما فهمتيها ؟

التجارة شطارة .. موش بيقولوا الدول الكبرى بتولع الحروب عشان تبيع أسلحة ؟ نفس الشئ هنا وزارة الصحة تختلق الهموم وبتقول ليكم تعالوا خودوا العلاج من عندنا .. فى تجارة أربح من كدة ؟

فى بوست بعنوان (( الترابي : أريد الإطمئنان علي السودان قبل وفاتي)) للكاتبة نعمات عماد

من العنوان بس أنا بقول

الموت بيد الله الواحد الاحد ومع ذلك نضيف لردنا .. إر تا ديو باقي هيناني

فى بوست بعنوان (( تعالوا شوفوا بت الوزير الوزيرة في غيابو !)) للكاتب زهير عثمان حمد

وفى مداخلة أوسكارية لزهير كتب

Quote: يا شباب البت دي بتصرف راتب قدره الف ومائة جنيه والحافز الفين جنيه يعني الاجمالي 3الاف جنيه غير بند الضيافة الخاص بالوزير هي المسئول الاول عنو وبنود صرفو سافرت كذا مرة علي درجة رجال الاعمال لحضور فعاليات في القارة الافريقية وكمان شاركت في الاعداد للاستفادة من القروض التجارية التركية وهي متخصصه في الاعفاءات من الجمارك وتصدير أناث الضأن السواكني

وانا بقول لزهير .. إياك تقول لي هي عندها يد فى الخرفان اللى طهروهن ول عملوا ليهن شنو كدة فى سواكن قبل يصدروهن لجدة هههههههههههههه

فى بوست بعنوان

(( مقترح لحذف مادة التربية الاسلامية من المدارس)) للكاتب أبو بكر عباس

وإقترح صراحةَ بإلغاء تدريس مادة التربية الاسلامية بالمدارس واستبدالها بمادة تهتم بعلم الأديان المقارن

وانا أقول لأبوبكر

إقتراحك هذا يعني أنك ترى ان العلة فى الدين الإسلامي .. فيما ان الدين الإسلامي بريئ مما نراهـ .. تبقى العلة مافى الدين .. فانت شايف الجمل وتطعن فى ظله

فى بوست بعنوان (( اهي دعوة للحوار ام الاستوزار؟؟؟؟...ولماذا جن جنون المعارضه الانتهازيه...؟؟؟)) للكاتبة Tragie Mustafa

وافتتحت البوست بقولها .. شكرا مرة اخري للموءتمر الوطني.....الذي يقدمة الدعوات لابناء وبنات العامة الذين فرضوا انفسهم بعطائهم وتجردهم

وسط كم هائل من المداخلات وجدت رد عبر عني للكاتب ادريس خليفة علم الهدي حيث كتب

يبدو ان الحوار مع تراجي كما الحوار الوطني ...

فى بوست بعنوان (( ضغط من القطرين علي الاسرة الحاكمة وتهديد بمقاطعة نهائي كاس العالم بسبب العارية )) للكاتب صلاح جادات

كتب صاحب البوست

Quote: الفنانة الفرنسية كايلي مينوغ تعودت علي التعري ممكن يدفعوا ليها وتلبس محتشم بس لو قامت تعرت في المسرح ونزعت ملابسها قطعة قطعة صدقوني زول بخرج من المسرح مافي

بريمة محمد

Quote: راجل فحل يكسر العنقريب مافى ..؟ بريمة

شمس الدين ساتى

Quote: راجل فحل يكسر العنقريب مافى ..؟ بريمة عبيط

بريمة محمد

Quote: طيب، المرأة دى مقلعة هدومها لشنو .. لو لم تكن فكرة الجنس حاضرة في مقدمة ذهنها الخرب؟ أحسن فكرة أن ناس قطر يعلنوا استعدادهم للمضاجعة على الهواء مباشرة .. خربانة خربانة زيدوها كوز موية .. ولا مو هيك ؟ بريمة

وأنا أقول لبريمة

فى المرحلة الجامعة أهدى لي صديق كالندر (تقويم) حجمه كبير يغطي تقريباً ربع جدار الغرفة .. هذا التقويم كان به صورتين .. صورة دعاية لنوع بيرة وبالجوار صورة لفتاة ممثلة أو فنانة تقف بجوار زجاجة البيرة .. المهم فى الأمر أنني إنتبهت للتعليقات التي كان يطلقونها الزائرين وهم ينقسمون الى قسمين:-

القسم الأول: السودانيين والعرب والسلمين
القسم الثاني: الكينيين والأثيوبيين وغير المسلمين

ملخص تعليقات القسم الأول لم يتحدث عن البيرة لا من بعيد ولا من قريب وأشك فى أنهم رأوها
ملخص تعليقات القسم الثاني لم يتحدث عن الفتاة لا من قريب ولا من بعيد وأشك فى انهم رأوها

وعليه يا بريمة ليس كل يجول بخاطرك يجول بخاطر غيرك