أشاهد التفزيون السوداني الآن مذيعات لابسات طواقي..وناس بتشاكلوا...سهرة الاحد!!!!

برنامج غريب فعلا ..اغرب ما فيه شخص جهورى الصوت أسمه الصلحي أو حاجه زي كده.

و الغريب فعلا انو فكرة البرنامج قائمة علي فكرة المحكمة و لكن كل ما فيه لا يتفق مع هذه الفكرة..لا ديكور ولا أضاءة..تصور ان هنالك أضواء ملونة

و المذيعات لابسين baseball hats فتصور !!! هرجلة ساكت أجاركم الله

و يظهر أنو في تصفية حسابات بين الموجودين لأنو في ناس متشنجين خالص.

سيف النصر
تستاهل انت البوديك تتفرج في
(هكذا) سهرات شنو؟
تحياتي لعرفة والاطفال .

صدقنى دى فضيحة ، الناس دييل تقول قاعدين فى مطعم ، لا فى زول داير يدى
فرصة للتانى ولا فى زول داير يسمع التانى وسعادة مقدم البرنامج ضعيف الشخصية
ده غير إنو ما حصل خلا زول كمل كلامه ، مجرد ما يبدا يقوم ناطى ليهو (المعلومة وصلت) حقيقة الحكاية دى عكست ليه الدراما متخلفة فى السودان وكمان ما قدرت
افرز هيئة المحكمة من المتهمين من ....الخ

الله يكون فى العون

مقدمة البرنامج المذيعة/ احسان عبد المتعال كانت مقيمة بأمريكا وهذا واضح من لبس الطواقي(الكاب) 0

صلاح الامين كيفك و كيف سامر و المدام

تخيلت لفترة أن حال هذا التفزيون سينصلح بعد التغيرات ألاخيرة اللي حصلت في البلد بس يظهر أنو برنامج السودان الجديد ما فيهو حاجه عن التلفزيون.

دا منظر كويس
أنا قبل يومين شفت مجموعة من المستضافين عاملين جلسة في حدائق 6 ابريل ، وانبرت من بينهم ( شيخة ) شابة تتوهج من make up الكثيف وبدأت تتحدث عن الاسلام وقضايا الدين
ألم تلاحظوا كثرة أطلالة المتنبئات علي شاشة التلفزيون السوداني خلال هذا الشهر.. بل هذه اصبحت ظاهرة جديرة بالدراسة .. فهل تستطيع المرأة السودانية أن تنتصر للمشروع الحضاري للأمة أكثر من الرجال ؟؟؟
وكثيرا ما اضحك وأنا اشاهد الدكتور الغبشاوي وهي تحاول التكلم بعربي جوبا !!! فالمشاهد يحرص علي متابعة طريقتها في الكلام اكثر من مادة الموضوع المطروح .. مش كان احسن أن يأتوا بامراة جنوبية مسلمة بدل الاعتماد علي التمثيل

تستاهلوا انتوا البوديكم تتفرجوا فى ميجروس السودان شنو!!
جنى

سيف النصر
دبايوا
السهرة كانت جميلة جدا اول مرة يشدنى التلفزيون السودانى واتمنى ان يمد التلفزيون
زمن هذه السهرة على حساب ساحات الفداء وبرنامج احمد البلال.
الموضوع المطروح غاية فى الروعة نعم كان هنالك سؤء فى الاعداد ودخول مصطلح جديد
على التلفزيون السودانى(وصلت الفكرة)

صحي و الله الشكلة كانت رابة و الصراخ
يسبب الطرش عديل ... لدرجة إنهم واصلوا
في صراخهم حتى بعد ما عملت (Mute) للتلفزيون
و الريسيفر كمان !!!!!!
و المصيبة في إنهم قايلين نفسهم إخترعوا حاجة
جديدة ، غير تقليدية و متميزة ..

العزيز سيف وضيوفه الكرام
لكم الود والتحايا
في فترة المنوعات التي تبث عقب الافطار بتوقيت السودان مساء الاحد كانت هنالك المغنية سمية حسن من ضمن ضيوف الفترة0 ولعدم جدية الموضوع المطروح للنقاش التفتت اليها احدى المذيعات وسألتها بعد أن أكدت أن الفنان انسان مرتب (من الداخل والخارج)0((كدة والله))00هل أنتي مرتبة ومدبرة؟000كان الرد الغريب والذي لم أفهم منه شيئا: انا معروفة بالتبذير رغم اني تربية حبوبات ومدبرة والفنان معروف بأنه فوضوي00وغنت المغنية بعدها ونحن ما عارفين الترتيب من الداخل والخارج ولا عارفين تربية الحبوبات ولا عارفين حتى السلام من الداخل اللي ما غير شيء ببرامج التلفزيون(القومي)00

الأخت ساره عيسى المشكله في الأخوهت المتنبئات هو الكم الهائل من الأدعاء..إدعاء المعرفة و محاولة تجهيل الأخرين حتى لو كانو ضيوف على البرنامج.

الأخ فتحي لعلك لاحظت أيضا أن سميه حسن قد أجلست بعيدا عن بقية الضيوف و أنا في ظني أن ذلك فيه أشاره واضحه للنظرة الدونية للفنان عند القائمين على أمر التلفزيون رغم أنهم يصرون دائما على حشر الغناء في معظم البرامج