عفاف حسن أمين تسعى لرئاسة نادي الهلال وصلاح ادريس يرد عليها

بين حضور كثيف امتلأت صالة تحرير (الرأي العام) نهار السبت الماضى و بأحرف موسيقية ونغم طروب ، ارخى محرروها سدول اذانهم لسماع تجربة الملحن علي احمد او صلاح ادريس تختلف الاسماء والرجل واحد ..اذ اختلفت التجربة عن سابقاتها فى ان الارباب غنى وعزف على العود وفعل به كما فعلت بالكران عبادة الطنبورية فى عهد العباسيين فكان العود اذا جاوزهما هذيان..
جلوسا كان على منضدة التجربة ازهري محمد علي من لدن الشعراء والمكاشفي الشاعر الذى يكشف عن مكامن ابداع المفردات المدهشة ومجذوب أونسة وتمتام وسيف محمد الحاج الذى هو سيف الجامعة وجاء عبد القادر سالم فاكمل روعة المغنى.
قال صلاح ادريس ان اجداده شعراء وكذلك والده وكثير من افراد اسرته وقد لمع منهم ابن خالته مدني النخلي كشاعر اصبح صنوا للنيل بعذوبة مفرداته ..وحكى ان العود زامله منذ دراسته فى المدرسة الحكومية ببورتسودان وفى غربته وحضوره .. وبقربه كان الموسيقار حافظ عبد الرحمن يستمع الى ألحانه من حناجر المبدعين ..قال فى افادته ان الالحان جودتها فى عدم المشاترة وعدم مفارقة الايقاع لخط سير الاغنية ما عدا ذلك فهى مقبولة وان تجربة صلاح اصفها بالجودة بحسبان خبرتى وتخصصى الموسيقى..
حكى صلاح ادريس ان تغول الفن الخارجى على الاغنية المحلية لابد من مقابلته بفن اصيل موقر .. وحين ادلهمت الخطوب الفنية بجيل الستينيات وهجم عليهم نمر (البيتلز) وغناء الخنافس وعزل الناس عن الاغنيات المحلية ،جعل من اسلاميي جامعة الخرطوم منبر الوعى ان يحاربوا البيتلز باغنيات الحقيبة واشاروا لصاحب الصوت الطروب الراحل بادي محمد الطيب ان يعتلى خشبة المسرح الجامعى ويدندن بغناء الحقيبة وفعلا استطاع بادي ان يحجم انتشار البيتلز على أقله فى الجامعة وكان حينها يعمل فى كافتريتها..
يدأب هذه الايام الملحن صلاح ادريس فى التعامل لحنيا مع نص شعرى جديد استلمه بطريقة طريفة حيث انه كان خارجا من قسم شرطة فنادت عليه امرأة تحمل رتبة الصول اسمها حياة حسين وناولته نصا وصفه بالجمال قرأه للحضور ، فداعبه الاستاذ كمال حسن بخيت بعد استمتاعه بحلاوة النص قائلا:
المرا دى لو كانت (لواء ) كان كتبت شنو..؟!!
الشئ الذى جعل صلاح بأن يصفها : ياخى دى ما (صول ) دى ( صولا ) عديل؟؟!
بينما الناس فى استغراب من هذا الابداع الذي يقدمه الرجل بعد ان طالته اقلام النقاد واصفة تجربته بالمجاملات دلفت الى المكان الاستاذة عفاف حسن امين فترك صلاح العود محيياً (عفاف حسن امين عديل كدة)؟
ولم تكن عفاف تعلم بشأن المنتدى وتفاجأت بالحضور فردت بطبيعتها المرحة:
منو.. صلاح ادريس ذاتو..!
قالت عفاف انها تسعى لرئاسة نادى الهلال ، فرد عليها صلاح: غايتو الا هلال كادوقلى ..شوفى ليك هلال تانى..!(اعذرينى) تلك الاغنية التى استطاعت ان تدق عودها فى وتد الغناء السودانى .حكى ملحنها صلاح ادريس انها اصلا يفترض ان يتغنى بها الفنان عثمان مصطفى الا ان سيف الجامعة سمعنى القنه لحنها فحلف بالطلاق انو ما بيديها زول وعلى قول سيف الجامعة نفسه(ساعدتها بي جعرة) الشئ الذى جعل دموعه تحول له الاغنية وقال ادريس ان فرفور اسهم فى شهرتها ولكنها لسيف الجامعة وسبق ان طلبها منه نادر خضر ولكنها لسيف الجامعة..!
وعندما غناها سيف الجامعة على حضور المنبر الدورى استبدل عبارة( قسمة الزول مابتفوتو واليجينى معاك يجينى) بمقطع طريف ولماح، قال (غنية الزول ما بتفوتو) هامسا الى ان الاغنية لفت وجاتوا راجعة تانى..!
الفن ان صدر من موسر..ربما نظر الناس اليه بعين معسرة ... ولكن انتصر احمد شوقي ويزيد بن معاوية لابداعهما رغما عن بذخهما المترف.. وقد عزف صلاح ادريس بكلتا يديه ولم يكن غير مبدع ... لم تتململ الساحة من الحان من لدنه ..قال انه يخبئ موهبة تضارع التلحين وهى اجادته للتقليد والمحاكاة بصورة مقاربة للاصل واخاف ان افصح عنها يقولوا (الزول دا كلو مرة ناطى لينا بى حاجة مالو.؟!)

مبدئيا دي صورة رئيسة ةةةةةة نادي الهلال

واعدكم بصور اكثر وضوحا

Quote: قالت عفاف انها تسعى لرئاسة نادى الهلال ، فرد عليها صلاح: غايتو الا هلال كادوقلى ..شوفى ليك هلال تانى

الأخ معتصم تحياتي

يا زول زميلتنا دي قالت عايزة هلال أم درمان دا الجاب هلال كادقلي شنو . يعني هي كان عايزة هلال كادقلي ما بتعرف دربو . غايتو يا ناس الهلال شوفوا ليكم حل لي الموضوع دا

بحيراوي

والله أنا أول من يثتي





















قول ليها عمر ود نور بسلم عليك

Quote: قول ليها عمر ود نور بسلم عليك

خلاص من هسه دايرين تتشعبطو ,,,

Quote: خلاص من هسه دايرين تتشعبطو

اتشعبط فيك قرد ندي القلعة
قول يامين

والله لو ما خايف من ناس نوبي وود البشري وحكاية نسرين سوركتي كان دخلناها معانا هنا

دي متيمة بعشق الهلال ياخ

والله فكره جهنمية

انت رأيكم شنو ياجماعة يكون الصفر الدولي وعدم احراز انجاز خارجي بسبب الضكـــران ديل


وقالوا يضع سره في أضععف خلقه

والله دي فكره جهنمية ارجو ان يتقبلها الاخوة الهلالاب بروح رياضية


ويمكن ينكسر النحس دا وهاك ياكاسات

واكيد الخبـر وصل لمزمل ابوالقاسم ودا مقال عاوز بروزه

وقالوا الثور لما يقع بتكتر سكاكينو

والمسكينة شايفه الفضائح الكروية والخمسات والستات وقالت يمكن تكسر النحس دا

ونعيش ونشوف

وما مشكلة لو الزوله دي ماعاوزنهاعشان مفسله شوفوا ليكم مروقه كدا

مثل وداد صاحبة طلمبة النحل الجنب السوق الشعبي القديم

ولا اقول ليكم ليه ماتشوفوا وداد عمر البشيـر وتكون المشكلة اتحلت وياكمال شداد شوف ليك بلد

ابومصطفى

مع أنو أنا ما عارف عفاف دي منو لكن أأًيد بشدة، ولو في واحدة دايرة تبقي ملحن، أويد بشدة أكثر، في دعاية بتاعة شركة كردت بتقول
There are things money can't buy
بالعربي (في حاجات القروش ما بتجيبها)
فبالله قول لصاحبك الكلام دا

Quote: حكى صلاح ادريس ان تغول الفن الخارجى على الاغنية المحلية لابد من مقابلته بفن اصيل موقر .. وحين ادلهمت الخطوب الفنية بجيل الستينيات وهجم عليهم نمر (البيتلز) وغناء الخنافس وعزل الناس عن الاغنيات المحلية ،جعل من اسلاميي جامعة الخرطوم منبر الوعى ان يحاربوا البيتلز باغنيات الحقيبة واشاروا لصاحب الصوت الطروب الراحل بادي محمد الطيب ان يعتلى خشبة المسرح الجامعى ويدندن بغناء الحقيبة وفعلا استطاع بادي ان يحجم انتشار البيتلز على أقله فى الجامعة وكان حينها يعمل فى كافتريتها..

فليلحن ويغني ويدير اندية ويشتري من الاراضي ما شاء اما ان يجعل تخيلاته هكذا سردا تاريخيا فامر عجيب ؟؟؟؟ لم يقم الاسلاميون ولا غيرهم بالاشارة الي بادي او غيره بان يدندن ليحجم اثر البيتلز ؟؟ بادي وخضر بشير واسماء كثيرة في ذلك الزمان كانت نجوم الحفلات الطلابية ... صالات غردون وسان جيمس وفندق صحاري كانت حفلاتها كثيرة ويومية ومرتادييها اكثر من مرتادي حفلات الجامعة وكانت الاغاني والموسيقي فيها غربية او جاز .. وجدان الانسان لتقبله لغناء ما لا تفرضه قواعد كالتي يشير اليها هذا الرجل ...دفعات الطلاب من ذاك الزمان بقدرما ارتبطت بالغناء السوداني ارتبطت بغناء غربي فكما كانو يعشقون بادي وخضر بشير وغيرهم كانو في حفلاتهم ياتون بسام اليكس ووليم اندرية ... ( ارجو الرجوع الي واحة صديقنا المرتضي والذي سبقته باعوام كثيرة ناسنا :ناسنا..

الفتاوي العشوائية وتسيطير التاريخ وفق رؤي الاشخاص هو الذي يضر بمجتمعاتنا وبلادنا ...

مبروك للريس الجديد شكلو وشو حلو ..