Post: #1
Title: عجبني شديد كلام الرئيس ...
Author: الجنيد حمد
Date: 12-03-2014, 08:36 AM
ده الكلام
ونجي برواقة
|
Post: #2
Title: Re: عجبني شديد كلام الرئيس ...
Author: الجنيد حمد
Date: 12-03-2014, 08:40 AM
Parent: #1
بدأية
نجاح مشروع الجزيرة هو امتداد لنجاح الادارة الانجليزية
ومنذ ايلولة الادارة الى السودانين كان الانهيار الذي ضرب كل الدولة .
ربما حافظ مشروع الجزيرة على بعض الخصوصية طيلة فترة (العهود الوطنية)
ولكن حدث الانهيار الشامل منذ صعودك ياسيادة الرئيس الى السلطة
|
Post: #3
Title: Re: عجبني شديد كلام الرئيس ...
Author: الجنيد حمد
Date: 12-03-2014, 09:00 AM
Parent: #2
يارئيس
حلتنا غرب المحيريبا
سكانها حوالي 1000 نسمة
الكان منهم في الخرتوم تلاتة
الخرتوم دي زي النبزه عندنا
حواشتنا يارئيس
كانت مصدر الدخل الوحيد
خيلاني وانا واخواني
درسنا منها وبناكل وبنشرب منها
حواشتنا يارئيس ما كانت مديونة للحكومة بقرش واحد
بيوت اهلنا يارئيس اتبنت من فوائد زراعتهم
لامن النميري غير الحساب لفردي
القروش الدخلت جيوب اهلنا ما كان عارفين يودوها وين
يعني النميري ده كان بعد الستينات ولو كان المشروع خسران ما بصرف ليهم قرش
يارئيس
الفدان بجيب 15 قنطار قطن
قسماً تعب الفتيش لحجار البطارية عشان الماركة اتعبنا ونحنا صغار
يارئيس
ناس الجزيرة عارفين انو الخرطوم اتبنت بعرق اهلها
لكن الكلام على الزول الكان مفلس وبعد ما استوزر عمل عمارة
من سنة تسعين حواشتنا ما صرفت قرش
ونفس الانتاجية
الناس طلقت الزراعة بعد ما عرقها بقى بمشي الجهاد
انحنا يارئيس عارفين حقنا منو الاكلو
محاولة اثارة كتاحة عشان تبيعوا المشروع ولاتعملو فيهو مصيبة دي ما بتمر على اهلنا
والناس الصابرة دي ما تفتكر انها بتسكت
وقت تشيلو ارضهم القاعدنلها شنو
الموت واحد يارئيس
بالمناسبة
الشيوعيين تطير عيشتهم ياخ
|
Post: #4
Title: Re: عجبني شديد كلام الرئيس ...
Author: الجنيد حمد
Date: 12-03-2014, 09:34 AM
Parent: #3
يارئيس
محاولة (نجر) تاريخ من راسك ما كويسة ياخ
الناس الحضرت تأسيس المشروع لسة موجودة
وبعدين
لامن المطامير كانت بتتملى قزاز بيرة البيبسي ده ما كان مرغوب ياخ
يعني ناس الجزيرة الشركات بتجيهم في مكانهم وتعرض بضاعتها لانهم منتجين واصحاب مال
مش بكونوا مافارزين ورق الدعاية من صهريج البيبسي زي ما قلت
رحم الله
المزارع الذي اصبح وزير السيد الامين محمد الامين
وجميع قيادات اتحاد المزارعين
ورحم الله مشروع الجزيرة
.........................
بختك يامحمد موسى اهو لقيت نكات الموسم
يلا دور
|
Post: #5
Title: Re: عجبني شديد كلام الرئيس ...
Author: Abdo Mustafa
Date: 12-03-2014, 10:24 AM
Parent: #4
الأخ الجنيد
الكلام القالو البشير دا .........ما اظن زول واعي بقولو
فيا إما الذول دا هبشو دخان سجارة ... أو كتر في المورفين
الحواشات دي اتربينا فيها ومنها
شوفنا عزة المشروع
وأدهشتنا الحالة الوصل ليها
...............
والدي متعة الله بالصحة والعافية كان شابا عند بداية المشروع
يحكي مازحا ....إنو الخواجات فاتو مننا عشان زهجو
يقولو ازرعو في ضهر السرابا ....أبواتنا يزرعو في بطن السرابا
عشان دا محل الموية بتجري
............
حديث البشير حديث زول جاهل
وداير يفقع ليهو مرارة ليس إلا
لأن مشروع الجزيرة حتي وهو متهالك كدا لا زال معطاء
وأرض الجزيرة لا زالت منتجة ...ولن تتوقف
وبكرة بتلقاهو حايم بيغادي .
|
Post: #6
Title: Re: عجبني شديد كلام الرئيس ...
Author: الجنيد حمد
Date: 12-04-2014, 09:02 AM
Parent: #5
تحية طيبة
العزيز / عبدو مصطفى - اسعد الله ايامك بكل خير
حفظ الله والدكم وجميع ابهاتنا المزارعين
...............................................
وبنقول ياريس
لو ختيت السخرية
وما علقت فشلكم كحكومة على المزارع المسكين كان اخيرلك
زي ما قلت في بدأية حديثك المشروع كبير وممتاز وممكن يعود زي اول
طيب المشكلة وين
ياريس
ببساطة المشكلة انت
تفكيركم محصور في الفوائد البترجع ليكم
كل الناس المعاك بقوا تجار
وكل شيء قابل للبيع
ياريس
تقريباً اي زول عندو عقل في الجزيرة بقبل منك لا غادي
واي زول عندو حبة ضمير في البلد الاسمو السودان
بلعن فيك ليل صباح
من زمان كلمنا اهلنا
بس هسي بقولوا الفيك اتعرفت تب
سؤال ياريس
وين مشروع النيل الازرق الصحي
لو ما عارفو اسأل علي شمو
|
Post: #7
Title: Re: عجبني شديد كلام الرئيس ...
Author: عبدالعزيز عثمان
Date: 12-04-2014, 09:29 AM
Parent: #6
mitabeen, mafi arabi
|
Post: #8
Title: Re: عجبني شديد كلام الرئيس ...
Author: محمد حيدر المشرف
Date: 12-05-2014, 00:22 AM
Parent: #1
Quote: تقريباً اي زول عندو عقل في الجزيرة بقبل منك لا غادي
واي زول عندو حبة ضمير في البلد الاسمو السودان
بلعن فيك ليل صباح
|
عبارة بليغة جدا ..
|
Post: #9
Title: Re: عجبني شديد كلام الرئيس ...
Author: فتحي الصديق
Date: 12-05-2014, 06:27 AM
Parent: #8
Quote: محاولة اثارة كتاحة عشان تبيعوا المشروع ولاتعملو فيهو مصيبة دي ما بتمر على اهلنا
والناس الصابرة دي ما تفتكر انها بتسكت
وقت تشيلو ارضهم القاعدنلها شنو
الموت واحد يارئيس |
وليعلم الأهبل ذلك جيداً
|
|