نواب يطالبون بعدم توظيف أبناء الولايات بالخرطوم ..عنصرية بامتياز

انتقد نواب تشريعي الخرطوم توظيف ابناء الولايات بالخرطوم وقالوا أن الخرطوم اصبحت جمهورية لأن الولايات فاضية
وانتقلت كل مشاكل الولايات لها ، وطالبوا بمراجعة كل المشاريع التي نفذتها الولاية . وأشارت البرلمانية عائشة البدوي
خلال جلسة مجلس تشريعي ولاية الخرطوم الي ارتفاع البطالة داخل الولاية وطرحت تساؤلا حول "هل هم أبناء ولاية
الخرطوم أم أبناء الولايات الأخري"
المصدر: الجريدة

تحية طيبة

الفكرة في مجملها ما بطال

نواب تشريعي الخرطوم يمثلون سكان الخرطوم ومن حقهم المطالبة بتوظيف قواعدهم في الوظائف بالولاية
وليس في الامر تمييز او عنصرية .

الوظائف القومية مشروعة للجميع وفيها باب المنافسة .

الدور بقع على حكومات الولايات وبدل يعدوها نفرات وتكويش على موارد الولايات يوظفوا مواطنيهم

وده بقودنا لحق اي ولاية في انتاجها
يعني مثلاً ناس القضارف يمسكوا عيشهم وسمسمهم ويدفعوا للخزينة المركزية حسب المتفق والاولوية لها في التنمية وكده

لو اتطبق الكلام ده تقريباً الخرطوم حتكون من افقر الولايات .

دا ممكن يكون قرار صايب
لو وفروا مجالات عمل كافية في
الولايات . لكن بدون ما يوفروا يطلعوا
قرار ذي دا يكون قرار مافي محلو .


________
السوال هو في وظائف في الخرطوم !!!!
بعدين نشوف حتت المنع دي

طيب هم اصلا عملوا للولايات شنو عشان تكون مقر عمل خليك من استقرار
حقو ناس الولايات كلهم يرحلوا للخرطوم ويضيقوا عليهم العيشة عشان يعرفوا حاجة

-
يكون عايزين يطبقوا كلام اخونا توفيق عيسى مكي (ناس الضهاري )

سلامات يامان

ربنا إبتلى السودان بعقول غبية تسيطر عليه و تكون في مكان إتخاذ القرار

الغباء يكمن في إنو نواب مجلس تشريعي الخرطوم اصلاً هم ما عارفين نفسهم موجودين في المجلس نيابة عن منو

الخرطوم او أي ولاية عبارة عن وحدة إدارية و مجالسها تمثل سكان الولاية و لا توجد جنسية او جواز سفر مختلف لهؤلاء السكان عن جنسيات و جوازات سفر بقية سكان الولايات الأخرى

و حق السكن و الإنتقال من ولاية لأخرى مكفول لجميع السودانيين بمعنى إنو سيد احمد المولود و الساكن في كريمة يحق له الإنتقال و السكن في دورديب بنفس حق اوشيك كما أن لأوشيك كامل الحق في السكن في كبكابية كما اسحاق المولود فيها

في اليوم الذي ينتقل فيه اوشيك للسكن في الخرطوم يصبح من ابناء ولاية الخرطوم و مجلس تشريعي الخرطوم يمثله تماماً كما حسن المولود في نمرة اتنين

أشك في أن نواب مجلس تشريعي الخرطوم يعلمون أن هنالك شيء اسمه دستور السودان

الاخ / محمدين اسحاق
قرار جميل ودقيق في تنمية الولايات

لو فكرت الحكومة المركزية في تطوير السودان لي فتحت عديد من مشاريع التنمية في السودان
فهل تعلم ان مخزون محلية امبرو وكرنوي بولاية شمال دارفور يعادل مخزون دولة بلجيكا واكرانيا
الارض تنتج الكثير والخير وفير .
بس هؤلاء الاغبياء وبل اسميهم اغبياء ، لان عقولهم غير واعية لمعرفة السودان وان كانوا حكماء لاوقفوا الحرب
وبدل القنبلة سنبلة ومصنع مصنعين
بامكاننا ربط السودان بسكة حديد والحديد من محلية كرنوي بجبل شري حامي ، نسبة الفلز فيه 72,7% بعد اكرانيا
ولذا نسأل هؤلاء التنفيذيين في مجلس تشريعي الخرطوم ، هل انتم ابناء الخرطوم ام ابناء السودان؟

وفتك بعافية

لا توجد عنصرية ولا يحزنون ..
لا يحق لابنااء الخرطوم العمل في الولايات الاخرى عبر لجان الاختيار في الولايات.. ده النظام الموجود في السودان حاليا ، كل ولاية تعين مواطنيها فقط في الوظائف الحكومية المطروحة في الولاية المعنية وهذا فيما يخص المؤسسات الولائية ، اما الوزارات الاتحادية فيحق للجميع التقديم والعمل بها " اذا عندهم واسطة طبعن" .. ولذا فمجلس تشريعي الخرطوم خاص بولاية الخرطوم فقط ولا علاقة له بالحكومة الاتحادية
تحياتي

.

قرار صائب واعتقد ان هذا النظرية من ضمن تشريعات الراحل قرنق في كيفية حكم السودان
وظائف ولاية الخرطوم واللي متخصصة في ادارة موارد الولاية ملك لابناء الولاية
وهذا هو حال كل الولايات والمحليات هناك تجد ان موظفيها من ابناء الولاية ما عدا السياسيين الذين تتغير وتتبدل مواقعهم