أمـــشــــــــاج

برقا صاعق
وشم قلبي جهار ا
وخت الرسمة الما بتزول
ريدة زولا كله صفا
واحساسه وفا
وجواه النيل
والضفة دفا
ويحلو القول
لما يزور براحة ويخش
بدية الليل
والالخاطر بيك مشغول
وابقى اباري القمر الناير
لامن يوصل حلق الليل
ولي يناغم
هي يازول
واتوسد
غيمة مسافرة
وارحل اجيك
عشان اتملى من عينيك
وعندك
كل الوجع الفيني يزول
ونبدا نغني
ونشد الوتر المرخي
من خيط الشمس
النازل زاهي ومسدول
عارفة
يا مريودة
ناوي ادندن ليك
بي احرف تشبه
لون الطمي الغامق
وفيه خصوبة
وامشاج الفال البكري
لي فجرا قادم
ما فيه افول
مفردة جوة الزمن الحالم
تمتد اماني وليك تطول
تزغرد جوة الحالم العابث
جوةة ظنوني يلملم مرة
ومرة يشتت نسق الخاطر
وتشرد مني قوافي خيول
وترجع لي
مع الاسحار
شعرا من خيط النور مجدول
وانت بتعرفي
من يوم جينا
متقاودين عند القيفة
همست يامريودة
بين الموجة
وشفاه الفجر الطفل
اني
زولا ليك مبذول
منك
ريق النيل الصافي
وعاكر
مني فروض الطاعة
ونظم القول الما معقول
ما نحنا
زي حرفي في كلمة حب
بشبهو شكل طيور الجنة
ونحن
بنخت احساسنا حداه النيل
ولو سافرنا للمجهول
بنرجع تاني
عشان نلقاه
انبت فرعا وجوة اتجذر
وليه اصول
وبس

فوق

*