الشقق المفروشة بالخرطوم

تحية طيبة للجميع

عندى طلب صغير ، انا خارج السودان والاسرة تبحث عن شقة مفروشة صغيرة في العاصمة الخرطوم فقط ، وتعبنا جدا مع السماسرة لانو بيوصف ليك وصف للشقة وتلاقيها اى كلام وبمبلغ غير منطقي

، حوجتنا ما بتتعدى غرفة وصالة او استديو صغير او نص بيت ،والاسرة عبارة عن زوجتى وطفلين مع مرافق وهو خالهم ،والغرض من ايجار شقة هو تكملة دراسة للمدام وفي كل مرة نلاقي شقة بنلقي انو سعرها ما بتناسب مع شكلها وشكل الفرش
يعنى تلقي مطلوب 3000 الف جنيه او 2500 في نص بيت او شقة تعبانة خالص
الايجار عاوزو لفترة 6 شهور وممكن استمر لحتى سنتين لو في حدود 2000 او زيادة شوية

الموقع المطلوب : امتداد ناصر وبري ،اركويت، المعمورة، الصحافات ، الازهري، جبرة، ... او اى حتة قريبة من منطقة الازهري

برجاء من يعرف تلفون او عنوان لاي حتة انو ما يبخل ويمدنا بيه هنا .

وافر احترامي،،،

عزيزنا الأخ أبراهيم
سلامات
تفاصيل أسرتك يا أبراهيم يا أخوي خليها بعيد .
أنت محتاج شقة في حدود ال 1500 ولا 1750 .
القصة ما بتخيل تكون صعبة للدرجة دي
ممكن أي وأحد من شباب أهلك الهناك يخدمك .
وبتخيل بي الاسعار القلتها ليك دي في المعمورة ممكن تلاقي شقة غرفة بي
حمام ومطبخ وصالة . تكون شقة كويسة .
ربنا يوفق

استاذ عثمان

تحية طيبة

وتسلم لاهتمامك بالموضوع ، انا كان نزلت اجازة العيد بس اجازة صغيرة وفتشت والله كتير ووصيت كتير من الناس ، واضافتى لتفاصيل الاسرة بسبب انى لاحظت كل ما اعاين شقة بيسألوك عن الفترة الحتقضيها وعدد افراد الاسرة ، وبعض التفاصيل البتهم مالك الشقة ، وفعلا انا محتاج من سعر 1700 لحتى 2300 ما مشكلة .

المنطقة المحتاج ليها تكون قريبة للازهري ولجامعة السودان العالمية ، ولقيت في الازهري قريب للجامعة لكن المنطقة شبه خلوية والسكان بسيطين ،

ممكن في اركويت ، المعمورة ، الصحافات . بري ، امتداد ناصر

وممكن لو في بحري وفي منطقة المواصلات فيها ساهلة برضو بيكون كويس

مرة تانية اشكرك استاذ موسى ..

وافر احترامي

أم درمان
الواحة
تنفع

لم تحدد الموقع الذي تريد ان تستاجر فيه 00 فهذا مهم ويساعد في خدمتك كثيرا
مثلا في جبرة توجد شقق جديدة وجميلة جدا ومجهزة بمكيفات اسبليت ومطبخ وحمامين
وهي في حدود 2 مليون ورائعة بكل المعاني

في المهندسين الفتيحاب الشقق غالية شوية
في ابوسعد بامكانك ان تجد شقة في حدود 1750

حدد المنطقة وربنا يوفق

Quote: م تحدد الموقع الذي تريد ان تستاجر فيه 00 فهذا مهم ويساعد في خدمتك كثيرا مثلا في جبرة توجد شقق جديدة وجميلة جدا ومجهزة بمكيفات اسبليت ومطبخ وحمامين وهي في حدود 2 مليون ورائعة بكل المعاني في المهندسين الفتيحاب الشقق غالية شوية في ابوسعد بامكانك ان تجد شقة في حدود 1750 حدد المنطقة وربنا يوفق

الرائع أبو حراز
بتاعة جبرة دي مفروشة ، لو كده ممكن حتى في حدود 2 الف ، والمنطقة المحتاج فيها من بري وامتداد ناصر مرورا باركويت والصحافة ولحتى الازهري .. يعنى بفضل داخل الخرطوم وبعيد عنامدرمان وبحري

وافر احترامي ،،،،

الرائع الصادق عز الدين
خيار ضعيف عشان بعد المسافة ، بس خلينى حتى المسا وبشاور الاسرة لان ماعندي خلفية عن المنطقة وقربها من مركز الخرطوم


وافر ودى لك،،،،