السودانيين لآمِن يكونوا زهجانين من زول يقشروّهو ويقصفوّهو !. أكلوني البراغيث ...

وآحد بيحِل في الكلمات المتقاطعة، وحبوبتو قاعدة جنبو.
قال لحبوبتو، يا حبوبة سريع اديني كلمة بمعني يكره.
الحبوبة قالتلو، يكجِن .


يكجِن دي زااااتا يعني شنو، ونحن جبناها من وين ؟،
وغيرها عِيييييك لكن كدي في اللوّل النشوف موضوع
التقشير والتقصيف دا جا من وين ؟...

تحويل الإسم للتقصيف والتقشير دليل علي ان المحوّر إسمه
غير مرضي عنه، والمتحدث شاميهو ...

مثال:

مثلاً وآحد يقولك، يا اخي الزول دا كرهنا المنبر،
وكرهنا السودان زاتو.
تقولو، مِنو ؟.
يقولك، قصفي.
(يعني بكري ابو بكر)
طبعاً الزول في الحالة دي بيكون شامي بكري...

مثال آخر،

وآحد يجيك زهجان ومطرّم.
تسألوا، يا زول مالك، نعال مافي عوجة ؟.
يقولك، يا اخي دي كرهتنا البيت زاتو .
تسألوا، مِنِي الكرهتك البيت ؟.
يقولك، قاشر !.

يعني زوجته هاجر،
وهكذا.

تلقى وآحدة تكورك لولدا من الشارع،
قشيّر تعال تجيك الرآفعة ضنبا.
بشير يجي طاير زي الساروّخ....

الكلآم دا نحن بنجيبو من وين ؟،
ومصدرو شنو ؟،
وهل له أصل في اللغة العربية ؟،
وهل هنالك بعض الدول تشاركنا فيه أو
في ضرب قريب منه ؟...

جيناهم، (الجماعة) وأنا ، في زيارة ...
سألتها أستاذ (....) موجود؟؟
قالت لي :
هاداااااااااك ...
تراهو قاعد من الصباح في
قشريوتره!!!!!
ولك وللجميع وللقشريوتر

تحياتي

عزيزنا معاوية
سلامات
وأحدة بتقول لي خالات زوج بنتها قشرات ( قشراتو ) يعني خالاتو .
وقشراتو ديل تاعبات بنيتي المسكينة بي الخدمة والملاح وهن نايمات نوم البراميل . ههههههههها
..
أتاريهو يا معاوية الخواجات برضو عندهم الحاجات دي . وكمان الخواجات و الخواجيات دأعسات البنزين حبة .

Quote: جيناهم، (الجماعة) وأنا ، في زيارة ... سألتها أستاذ (....) موجود؟؟ قالت لي : هاداااااااااك ... تراهو قاعد من الصباح في قشريوتره!!!!! ولك وللجميع وللقشريوتر تحياتي

أُستاذنا درديري،
سلآمات.

القشريوتر والقصفون الناس بقو ما عندهم شغلة بلآهِن.
والله صحي.

الغريبة عندنا بعض الكلمات ليها أساس في العربية، وبعض الناطقين
بالعربية يستهجنو علينا إستعمالها ؟!.
عندك مثلاً كلمة خليّت.
يقول ليك فلآن خليتو في الحواشة. اي تركته.
أو وآحد يقول ليك يا اخي الزول دا خلّو. اي اتركه.

Quote: أبو عثمان بكر بن محمد قال‏:‏ وفدت على الواثق فلما دخلت وسلمت قال‏:‏ هل خليت وراءك أحداً يهمك أمره قلت‏:‏ أخية لي ربيتها فكأنها بنتي

بعد دا القصف يقولوا علينا نحن ما عم بنحكي عربي.
هسّع عم دي يعني شنو ؟.
شنو دي اللتنا نحن. اللتنا دي زاتا جات من وين ؟...

لآقيت والدة صاحبنا في الشارع،
سألتها، خالد في البيت ؟.
قالت لي، قاصف ما سجمو .

!!!،
ما عرفتها زهجانة مني عشان خالد بيباريني
واللآ زهجانة من خالد ؟!...

عارف يا معاوية السودانيين ديل رفقتهم ممتعة الا على البيتش،
قاليك السوداني مشى اخر حتة في الكرة الارضية بشرط ما يكون فيها سوداني،
اخد راحتو على الشاطي وكذلك اسرتو،
بعض شوية جاهو واحد، وسال مباشرة: الاخ سوداني؟
ياني قشراني، يا مرة اتغتي....

Quote: Salma Salama · الأكثر تعليقا · Cedar Crest College معاوية ازيك ، والعجب لمن تجيك طايرة كلمات زى يا سجم الرماد ، يا زفت الطين ، ياوش الدواك ، المخروب ، العيفة الجيفة البو وعشرات الكلمات ، اطرف حاجة امى كانت زولة مسالمة جدا رحمها الله ، قول يا معاوية مرة سافرت بورتسودان ولقيت طواقى قش ، جبت واحدة وكان عندى اخوان صغار اتنين ، اتشاكلوا فى البرنيطة كما اسمتها امى ، فجاها واحد من اخوانى قال ليها احمد ومغيرة متشاكلين فى البرنيطة ، من محلها داك رسلت الكلام للمتشاكلين "يا ولد اديى اخوك البرنيطة يبرنط قلبك ، هسى دى موقعها من الاعراب شنو ؟

يا بت الشيخ طولت علينا الغيبة لآمن (إلي ان) الشوق
عشعش في نفوسنا. والله مشتاقين.

إزيّك، تعني إزاي حالك، أو كيف حالك ؟.
اريت حالك زين ؟.
سجم الرماد، السجم هو ما يلتصق في قعر الدوكة، ونسميه ايضاً السكن،
والرماد هو الهبوّت واللتنين ما فيهن فايدة، سجم الرماد تعني الزول المافيهو
جدعة عصا تب وفي روآية طب وتأتي للتأكيد. جدعة عصا دي جات من وين ؟.
زفت الطين. هههههههههههههههه.
وش الدواك و المخروب ديل يا بت الشيخ وقعيهن لي.
العيفة، أها دي مجهولة الهوية.
الجيفة هي الفطيسة، والفطيسة دي اظنها بعض مخترعاتنا. يقوليك، النكتة دي
فطصتني من الضحك، فلآن فطصنا بالضحك.
البو عربية فصيحة وفي عاميتنا نسميه العبوب.
رحم الله الوالدة.
يبرنط قلبك ننتظر سيبويه يبعث عشان نعرف موقعا من الإعراب.
البرنيطة ذكرتني عطبرة ومجد السكة حديد.

Quote: العيفة، أها دي مجهولة الهوية.

ليه ؟؟ ...
الذي يعافه الناس فهو (عيفة ) ..
زي زول كده بنعرفو ..
إسمو قاشر العيفه ....
قبل كم يوم كان ( قاديني ) قي الواتس ..

ـــــــــــــــــــــــــــــــ

هي مناطقيات فيما يبدو ..
قاشر وقشروني والقشار داكـ ..
نعرفها ..
لكن قاصف دي ما مستعملة في نواحينا ...
ومنك نستفيد يا مدير ..

مرحب ود المدير
وضيوفه
واخص سلمي وود عكر
آي قاصف دي اول مرة اسمع بيها .. سمعتها عند الامهات مقصوفة الرقبة .. ودايما بتكون لي بتها
نحن طوالي روحنا محرقانا ..
قالو الزول الغدا اتاخر .. وهو قاعد مع الضيف
ما خلي ولد ما ناداهو
وفي النهاية
يا مرة الغداء الله لا غز فيك بركة
يا ولد الغداء انعل ابوك وابو الغدا وابو الضيف زاتو
والزول العيفة التليفة ..
الاخمب .. الرفل
ويقولو
ليك
الخمبة ولادة
الرفلة ولادة

Quote: عزيزنا معاوية سلامات وأحدة بتقول لي خالات زوج بنتها قشرات ( قشراتو ) يعني خالاتو . وقشراتو ديل تاعبات بنيتي المسكينة بي الخدمة والملاح وهن نايمات نوم البراميل . ههههههههها .. أتاريهو يا معاوية الخواجات برضو عندهم الحاجات دي . وكمان الخواجات و الخواجيات دأعسات البنزين حبة .

ههههههههههههههههه،

حبيبنا يا ود موسى،

يا اخي حكاية النسابة دي غريبة خلاس !، وكت الخطوبة تلقاهم آخر محاننة،
وبعد الزواج تلقاهم آخر مكاجرا. مكاجرا دي أعتقد أنها من المنجور في لغتنا.
بعدينك نوم البراميل دا شنو ؟. غايتو نحن بنعرف نوم الديك فوق الحبل.
النسيبة تقول لصاحبتا، القبحة فوقو مقابلني بلا سبب.
تقولها، هو منو ؟
ترد عليها، مِيا قاشرا. يعني راجل بنتها (حماها).

يا اخي عليك الله ما تدينا مثال لمقاشرة الخواجيات...

معاوية بصراحة إنت زول فنان لك التحية إنت وضيوفك الكرام

والله بعد دا كله حلوين شديد.. غايتو طريقتنا في الكلام دي بتعجبني

بشكل عجيب بغض النظر إنها فصحى أم لا .

يقول ليك يا أخي أفتح ليهو دا زول مهبب ساكت

أو الزول دا أنا شاميهو

أمشي يا أخي إنت زول ما عندك شغلة

الغريبة حتى أولادنا الولدناهم برا السودان بتكلموا بنفس الطريقة !!!

بصراحة ألفاظ تحس فيها حسن النية متوفر .

Quote: عارف يا معاوية السودانيين ديل رفقتهم ممتعة الا على البيتش، قاليك السوداني مشى اخر حتة في الكرة الارضية بشرط ما يكون فيها سوداني، اخد راحتو على الشاطي وكذلك اسرتو، بعض شوية جاهو واحد، وسال مباشرة: الاخ سوداني؟ ياني قشراني، يا مرة اتغتي....

ههههههههههههههه،

عبد المنعم يا صديق،

تعرف العرب اصلاً ما عنهم بحار وأنهار عشان كدا نحن هنا ممكن نرتع
زي ما عاوزين، نقول ترتار البحر القيفة، الجرف، الدالة، السارة، الكونية،
الكردة...إلخ نتجدع يعني.

مرّة وآحد زهّج بلة الجزار، بلة قاليهو، هسّع بجي عليك بالقاشور دا اقشّرلك
راسك. اي بجي عليك بالساطور دا اكسّرلك راسك، وهكذا...

Quote: ليه ؟؟ ... الذي يعافه الناس فهو (عيفة ) .. زي زول كده بنعرفو .. إسمو قاشر العيفه .... قبل كم يوم كان ( قاديني ) قي الواتس .. ــــــــــــــــــــــــــــــ هي مناطقيات فيما يبدو .. قاشر وقشروني والقشار داكـ .. نعرفها .. لكن قاصف دي ما مستعملة في نواحينا ... ومنك نستفيد يا مدير ..

سلآمات يا ود القوز.

قلعتها بطينتا تب.
كلآمك في مِحِلو فقد ارجعتها إلي مصدرها.
شكراً للتصويب.
كنت إستغرب جداً لعبارة (بايت القوا)، واقول أهلنا ديل لآقطنها من وين ؟،
لآمن يوم عِترت فوقا فهي من أصل العربية الفصيحة وقد وردت في القرآن
في قوله تعالى، (نَحْنُ جَعَلْنَاهَا تَذْكِرَةً وَمَتَاعًا لِلْمُقْوِينَ)، فالمقوين في بعض
التفاسير تعني البايتين القِواء اي النازلين الأرض القاحلة (الصحراء).

نحن تآل السافل بنستعمل مع التقشير التقصيف، وكنت اعتقد انّ جميع
أهل السودان يفعلون.

يا ود القوز شوف الكلمتين،
تآل، بمعني تجاه أو ناحية.
السافل، بمعني الشمال، وعكسها الصعيد.
دا مِن المنجور في اللغة اي لغتنا التي إختلطت بالعربية
وغالب الظن انّ العربية هي التي إختلطت بها، والله أعلم.

مودتي...

Quote: مرحب ود المدير وضيوفه واخص سلمي وود عكر آي قاصف دي اول مرة اسمع بيها .. سمعتها عند الامهات مقصوفة الرقبة .. ودايما بتكون لي بتها نحن طوالي روحنا محرقانا .. قالو الزول الغدا اتاخر .. وهو قاعد مع الضيف ما خلي ولد ما ناداهو وفي النهاية يا مرة الغداء الله لا غز فيك بركة يا ولد الغداء انعل ابوك وابو الغدا وابو الضيف زاتو والزول العيفة التليفة .. الاخمب .. الرفل ويقولو ليك الخمبة ولادة الرفلة ولادة

حباب ود شيوخ البطانة.

Quote: المعنى الرفله: الخرقاء من النساء التي لا تحسن التصرف ولا تدبير المنزل. يستخدم لمن يعمل دون تفكير فتكون العاقبه عليه بالسوء أو الخسارة. امرأَة رافلة ورَفِلة: تَجُرُّ ذيلها إِذا مشت وتَمِيس في ذلك، وقيل: امرأَة رَفِلة تتَرَفَّل في مِشْيتها خُرْقاً، فإِن لم تحسن المشي في ثيابها قيل رَفْلاء. ابن سيده: امرأَة رَفِلة ورِفِلة قبيحة، وكذلك الرجل. ورَفَل يَرْفُل رَفْلاً ورَفَلاناً وأَرْفَل: جرّ ذيله وتبختر، وقيل: خَطَر بيده.

،
وعندنا نقول، الخرقا ولآدة.
تبقى رفلة لها صلة بالعربية، والخمب والتليفة من المنجور.

حامد العوير الجماعة شاغلوهو قالهم، ما تشاغلونا لرقبتنا عندنا ضيوف
زي الخرا.

يقوليك، نِش يعني خُب...

Quote: يا ود القوز شوف الكلمتين، تآل، بمعني تجاه أو ناحية. السافل، بمعني الشمال، وعكسها الصعيد. دا مِن المنجور في اللغة اي لغتنا التي إختلطت بالعربية وغالب الظن انّ العربية هي التي إختلطت بها، والله أعلم.

تالي .. وتالاهم .. ومن تالانا ..
أي ما يلينا .. والتالي منا ..
كناية عن أنه قربنا أو من ناحيتنا ..
فهو وصف للمكان .. وتم سحبه كذلكـ لوصف الحال ..
( من تالانا ما تشيل هم ) ...

السافل أي الأسفل من المكان ..
والصعيد وصف للأعلى .. فانت تصعد ان اتجهت اليه ..
فهو وصف للمكان ..
أكثر منه وصف للاتجاه وأن صادف ذلكـ ..
فالنيل ينحدر الى أسفل آتياً من الأعلى ..
كما نقول نحن في البلد ( مندلي تحت ) أي تجاه النيل الى الأسفل ..
و ( طالع فوق ) الى أعلى تجاه الحلة ..
وقبلي وبحري ( ومبحّر ومقبّل ) ..
مبحّرمتجه نحو البحر كما النيل شمالاً ..
أو مقبل ( عائداً ) للخلف .. عكس الاتجاه أي جنوباً ...

Quote: معاوية بصراحة إنت زول فنان لك التحية إنت وضيوفك الكرام والله بعد دا كله حلوين شديد.. غايتو طريقتنا في الكلام دي بتعجبني بشكل عجيب بغض النظر إنها فصحى أم لا . يقول ليك يا أخي أفتح ليهو دا زول مهبب ساكت أو الزول دا أنا شاميهو أمشي يا أخي إنت زول ما عندك شغلة الغريبة حتى أولادنا الولدناهم برا السودان بتكلموا بنفس الطريقة !!! بصراحة ألفاظ تحس فيها حسن النية متوفر .

سلآمات يا دكتور.
اسعدتني طلتك.

وتحس فيها الحِنيّة كمان. كدي عاين زي كلمة حليل دي، كلمة مُترعة بالحنان.
الأُم في حضرتها يطرو ولدا المغترب، فتقول ياااااااااا حليلو، ودِميعاتا شوووو
ينزلن. بعدين شوف كلمة يطرو دي وطريت وطاري. يقوليك طريتني فلآن.
السوداني يكون في بلد وإنت في بلد، يتكلم معاك بالتلفون يقولك، عاين جاي !،
كيف تعاين وإنت في بلد وهو في بلد ؟، دا كلآم ساكت.

كلآم ساكت !!!؟؟؟.


مودتي...

سلام معاوية وضويفه

حبيبنا شوف ليك صرفة للكموج دا معاك

Quote: سلام معاوية وضويفه حبيبنا شوف ليك صرفة للكموج دا معاك

والله شوق شديد يا حسين،
ويا حليل منتدى الباوقة.

الكُماج هو الدُوآس، والدُوآس هو الدفسي، والدفسي
هو الدُكشمان،
والكموج دا تسأل مِنّو ناس الشهادة العربية، يجبولك
خبر هسّع تِيّة.



يا اخي مشتاقين. والله صحي...