ضل الشاتي

في ضل الشاتي في سنين ..دفنت جواها ..اجمل واسعد الايام واللمة
الغائبة ..كانت حدود الدنيا عند طرف القرية ..والغابة..كنت بتامل
الطير في صفوف ..الي ان يبتلعه المدي البعيد..واسال من كان قربي ..
ماشي وين ..ماشي بلاد الله ..حد الاجابة وقف ..
بعد سنين كنت انا محل الطير ..وفي بلاد الله ..
بين فرجات اللوري شفت ونحن مرحلين وسط كوم من العفش كنت بشوف النسوان ينشلن الموية من البير
كنت بسال امي نحن ماشبن ..وين... قريب وجاين ..ومن يومها انتزعت من القرية ..
ومازالت جواي ..الطاب ..والمركب ....وحبل المريد والمناجل ..
ورائحة فراد الدمور ..في بيت النساجين..ورائحة القطران ..في القرب ..لما يكون في فرح
واسماء البهائم والوان الحمير..وطنابير شباب الفريق ..وصوت الشتم والدلوكة تتخنق..
وابلعتني المدن ..وسكنت ..جواي ...الام الذ كري ..
والوطن ..عندي القرية ومازال ..كل مرة ينبت تاني من جديد
الوطن الان خواطر مرحلة تنازع كل واحد منا كل مساء..
ودون استاذان

ضل الشاتى

يا سلام يا باسط

بالله دى نكتها من وين
وافتتحت بيها الكتابة الحنينة دى

Quote: ضل الشاتى يا سلام يا باسط بالله دى نكتها من وين وافتتحت بيها الكتابة الحنينة دى

الاستاذ محمد سيد احمد
لك التحية ومروك سخي جدا
الفهم كمل واجترار الخواطر بواسينا
تحياتي ايلك

الصديق العزيز \ ود المكي ..

كيفك يا النافذابي ؟ وكيف اخبار النافذاب

الله يشهد مشتاقة ليهم كما الوطن . تصدق يا باسط

ذكرتني النافذة والحياة السمحة يااااا حليل النافذاب

عقب مشيت زرتهم ومشيت حي الهمباته وحجزتة لي قطعة ارض

لخيمتي الجديدة عله قالوا لي انتظر ود الاسد عشان اسدد الرسوم

ويديني الاوراق الثبوتية اها انا في انتظارو . لكن البسطني تب يا ود المكي

لقيت نفسي قرييييبة للخنساء ولي محمد الحسن ابنعوف وحتي ود الاسد في المربوع

التاني من قطعتي والحمد لله .. وبالمناسبة دي كدي النقول مسداري هيل ( جيلاني الرسول

سلم علي الهمباتة ) هههههههههه تذكرو موش ما اعظمك يا ايامنا الخوالي ..

مسدار جيلاني الرسول .. المناسبة وفاة الزعيم ( جون قرنق )

المسدار :

جيلاني الرول سلم علي الهمبـــاته
وبلغهم اشتياقي وكل الظروف بذاته
واوعاكم تقولوا مهيرة قاطعة صلاته
والله العظيم دي مهيرة مــو عاداتـه
بس حال الظروف ربكت جميـع فكراته

ود المكي ياخي هدي دموي نزلت ..

ولي عودة .