رسالة من مطلقه ( للاستاذ ميرغني سوارالدهب)

Mirgni Swaralzhab
11 hrs · Edited ·
(رسالة خطيرة في الخاص من مطلقة) قبل أيام جاتني رسالة فيها حزن وأسى ومرارة .. بدون تعديل إليكم الرسالة ولكم التقييم..
صباح الخير أستاذ ميرغني إترددتا كتير قبل أكتب ليك .أول حاجة إنت زول تبارك الله كتاباتك جميلة ومميزة وبلقى كتير من منشوراتك في الواتسآب والناس بتتفاعل بيها فبقيت من متابعنك ولأنك بتتطرق لقضايا مهمة في المجتمع والله مامجاملة وربنا يحفظك. ياسيدي حاكون معاك صريحة وربنا يعلم بما أكتب . أنا زولة أربعينية ربنا حباني جمال وأخلاق وعلم وطيبة . حاتقول الزولة دي عارضة نفسها للزواج ؟ لا والله بس أنا شفتك كتبتا كم مرة عن قضايا المرأة وكل مرة كنت بقول يارب يكتب عن قضايا المطلقات .. أيواا أنا مطلقة والطلاق في بلدنا دي عمل فاحش ! تصدق إني عايشه جحيم رغم شهاداتي ووظيفتي ومامعتمدة على حد.من أطلع الشغل ولما أرجع البيت مضايقات وتحرشات وإحتقار وقطيعة!أنا مخنوقة من المجتمع ومن ناس بيتنا أبوي وأخواني وقبل الزواج كنت حرة مش دا شي غريب !! أنا زي ماوريتك أنا أربعينية تصدق إنو ماشفع لي قدام المجتمع إني ناضجة ومتربية كويس وتعليمي عالي لكن حتى بتاع اللبن في الحلة كنت بشوف منو نظرات دونية! ياخي أنا الطلبتا الطلاق من زوج عاطل ماعندو غير شلة كتشينة وعلبة سجاير دا همو في الدنيا. ورغم إني كنت بصرف عليهو لكن ماكان بحترمني . لكن تصدق يا أستاذ المجتمع ندمني وحسيت إنو جحيمي في الزواج كان أرحم لي من جحيمي وأنا مطلقة. إتخيل؟؟مجتمعنا ظالم وشفتا من الرجال نوع البعرفك مطلقة ويبدى في رمي شباك التحرشات.. ناس بيتنا لو إتأخرتا في مناسبة أو مع صديقة تبدى التحقيقات يجوني زي 50 تلفون لغاية ما أوصل البيت.. فأي ظلم نعيشه . والله إتمنيت إنو ربنا يبدلني ظلمة القبر بديلا لنور بيتنا حايكون أريح لي. يا أخي آسفة على الإطالة وإقتحام الخصوصية لكن بطلب منك تكتب عن الموضوع دا وكيف هو فات عليك؟ إتكلم ماعشاني بل عشان كتااار من الأخوات فاضلات ومظلومات في مجتمعنا ظلم الحسن والحسين. وزي مابقول المثل الله يخدر ضراعك ومشكور وجزاك الله خير .
(إنتهت الرسالة)
¤ ¤ ¤ ¤ ¤¤
طبعا قريتا زي 5 مرات بحاول أشوف مقدار ألم الزولة دي البقت وهي التي حباها الله العلم والجمال والأخلاق تتمنى ضيق القبور على إتساع الدور!!:-/ .. ياخ إتخيلت إنو الزولة دي لو إتقدم ليها مخمور أمي عاطل بتاع مشاكل حاتوافق بيهو شان تتخلص من وصمة مطلقة ! طوالي إنفتح جواي شريط ذكريات بأصوات شخوص مختلفين (إنتي ماسمعتي بت ...قالوا طلقوها) (عجبني ليها المتفلهمة) (بالله فلانة دي مطلقة والله راجلا ماكان بي جمالا دا بفرط فيها كان مالقاها في الشين) وحين تقع في ألسنة الناس الله وحده فليكن في عونك .. مجتمع جلاد هو ذلك الذي يساوي بين الجلاد والضحية ..
ياخوانا ليه الناس ماتكون متحاننه مع بعض مش كلنا أسرة إنسانية واحدة؟ ليه الظلم الكبير على المرأة المطلقة (وصمة)! في حين إنو الرجل المطلق تلقاهو ماشي رافع راسو وسط السحاب !! شنو البخلي أهل زوج يرفضو زواجو من مطلقة في حين إنو أهل ذات الزوج ممكن يدو أجمل بت في أسرتهم لي رجل مطلق! (الطلاق للرجل مفخرة والأسد النتر وهو للمرأة وصمة تطاردها حتى القبر)..
ومجتمعنا دا للأسف بيعامل المطلقة بالريبة والشك والتحرش يحاصرها من كل صوب . فيكفي أن تقول المرأة أنها مطلقة حتى يسيل لعاب الكثيرين !:-/
ليه دايما في الطلاق تعتبر المرأة هي الطرف المذنب حتى لو كان سبب الإنفصال منطقي زي نموذج الأستاذة الراسلتني دي ؟ وليه أهل المطلقة يشكو فيها ويلوكو سيرتها ياخ والله البت لو لعوب كان متروجة أو فتاة أو مطلقة حاتخوض في الوحل .والعكس صحيح فمافي شي يخليك تراقب بنتك المنفصلة عن زوجها لو قالت ماشه الدكان ساي وتثق في بنتك الما متزوجة وبتقرا في الجامعة وبترجع بسبب سوء المواصلات تسعة باليل .. مش الإتنين بناتك ؟ مش ربيتن إنتا على يدك وسقيتن قيم واحدة؟ أسئلة ليست للإجابه بل للتعجب ..
طيب البت البتكون مخطوبه وتفرتق ليه الناس مابتعاملا كدا؟ دا إنفصال قبل عشرة والتاني إنفصال بعد عشرة الأول توصل للنتيجة مبكرا والتاني وصل ليها متأخر ربما حتى بعد إنجاب أطفال ..والله أنا إشتغلت مع مطلقات كانوا غاية في الإحترام والأخلاق واثقات بأنفسهن. أنا نفسي إنفصلت قبل كدا من زولة فاضلة وكان لدينا من الأسباب مايدفعنا للإنفصال بهدوء ولم يحدث أن ذكرتها إلا بالخير حتى بعد أن تزوجت الآن وتزوجت هي والآن وجد كلينا السعادة مع طرف آخر . ودا البسموهو القسمة والنصيب . وربنا قال (ولا تنسوا الفضل بينكم)..لكن في أزواج بشوهو سمعة طليقاتن وديل مافيهم ذرة رجولة ..وربنا لمن شرع الطلاق إذا إنتفت المنافع والمصالح من مودة ورحمة وإستقرار عاطفي وجنسي . وعدم الإنجاب أو المرض وغيرا من أسباب ..
والقرآن دا بحر ماعندو ساحل (وإن يتفرقا يغن الله كلا من سعته)(الطلاق مرتان فإمساك بمعروف أو تسريح بإحسان)(فإذا بلغن أجلهن فأمسكوهن بمعروف أوفارقوهن بمعروف) لاحظ بمعروف دي ؟ (فمتعوهن وسرحوهن سراحا جميلا) . شوف الطلاق دايما متبوع بأوصاف المعروف والإحسان لأن الزواج والطلاق علاقة إنسانية سامية وليست حرب . ورسولنا الكريم ص قال(أبغض الحلال عند الله الطلاق). شوف يبغضه الله وبحكمته جعله حلال . وإن كان أعطى الرجل حق الطلاق فقد أعطى المرأة بالمثل حق الخلع .
ياهؤلاء : إتركوا المطلقات وشأنهن كفوا عن التحرش بهن فهن أخوات وزوجات سابقات وبنات عم أو خال ومن منكم ليس في عائلته مطلق أو مطلقة وهذه سنة الحياة. هي فقط تريد أن تتنفس في هذا المجتمع هواء نقيا خاليا من الشكوك والتحرش والقطيعة فيهن.
كسرة :
المطلقة إنسانة خارجة من تجربة زواج فاشلة وأولى بمن حولها أن يتضامن معها ويجبر بخاطرها لا أن يقف ضدها وينظر إليها تلك النظرة التي يحفظها كل المطلقات .

خلعتنا بالعنوان يا هجو هههههه
حقو تخت الى ميرغني سوار الدهب بتكون اوضح

فيلم المطلقات .. يعرض نفس ما جاء فى خطاب السيدة
ونظرة المجتمع للمطلقة وموقف أهل بيتها أمها وأبيها

فعلا مجتمعنا لا يرحم المطلقات وهذا قليل من كثير عن ما يدور في مجتمعنا حيال المطلقات ,, اسال الله ان يخفف عنهن هذه المآسي وان يسترهن بستره وان يحفظ كل مطقلة من شر مجتمعنا ,, وحرم المطلقة صاحبة الرسالة دي لو ما عندها مانع انا استرها على سنة الله ورسوله ,,

تحياتي : ياسر العيلفون

مرحبا اخى يا سر سوف اوصل طلبك الى الاخ ميرغنى

و الله كلام رجال.

شكرا اخى محمد ابراهيم على التصويب

و الملاحظة لقد تم تعديل العنوان.

اخى نادر الفضلى مشكلة المطلقات فى المجتمعات العربية

كبيرة وعويصة . و بعض الاسر تتمنى موت البنت بدلا من

طلاقها .

الأرملة الشابة وضعها كيف؟

حسب ما علمت من الرسالة انها زوله فاهمة و متعلمة

وربنا يسعده كمان.

شكرا اخي هجو ربنا يقدم الفيه الخير ... وان شا الله عند الموعد باذن واحد احد ..


تحياتي : ياسر العيلفون