الهلال يدفع مزيد من ثمن شطب هيثم مصطفى ؟

ـ
قال لي محدثي الموثوق ، قريب الصلة بأطراف صناعة الحدث الرياضي الأبرز مؤخراً
أن سيناريو إنتقال بكري المدينة للمريخ تم وفق مجريات أحداث عدة ولكن عاملين فقط هما اللذين حسما اللغط وحملا الفتى على تغيير رائه ـ
الأول هيثم مصطفى ـ الثاني عرض المريخ

فقد كان تسلسل الأحداث كالأتي ـ

وافق بكري على العرض الذي قدمه له الكاردينال بملبغ مليار و800 مليون ـ يدفع منها 800 كاش والباقي أقساط
وافق بكري على العرض تحت تأثير زملائه بالفريق الذين لم يجدوا صعوبة كبيرة في إقناعه بإعادة قيده ساعدهم رغبة اللاعب في الإستمرار بالهلال وحبه للشعار ،
حيث كانت تسود لغة الولاء في معسكر الفريق قبل مبارتي القمة الأخرتين ،

بالمقابل كانت هناك إتصالات متكررة تستقبلها هواتف أقرباء بكري بما فيهم والده المتواجدين بقريته ديم المشايخة ـ

أخرها إتصال من شخص قدم نفسه بأنه قيادي كبير بنادي المريخ حيث قال لهم بالحرف الواحد ( ولدكم عاوز يضييع مستقبلوا ويضييعكم معاه ،
نحن عرضنا عليه ضعف المبلغ القدموا ليه الهلال ) ، فما كان من أحد أقاربه أن أخبر خاله المتواجد بأحد مدن السودان بذلك ،
فما كان من الخال الذي يكن له بكري تقدير خاص ولا يرد له طلب ، أن شد الرحال مباشرة للخرطوم والتقى ببكري ـ فدار بينهما الحوار التالي :
ياولد إنت ناس الهلال أدوك كم ؟
بكري (يتحدث وهو مطأطأ الراس لإحترامه الشديد لخاله) مليار و800 مليون .
الخال وناس المريخ أدوك كم ؟
بكري (ومازل مطأطا الراس ) ـ ما قدموا لي عرض مباشر ، بس في بعض زملائي من لعيبة المريخ وصولوا لي كلام
الخال : كيف ما قدموا ليك عرض وإتصالتهم على أبوك وأهلك في الحلة ما وقفت دقيقة ـ شوف الناس ديل قالوا بدفعوا 3 مليار
يرفع بكري راسه مندهشاً
الخال ـ حيدفعوا 3 مليار وأنا وأبوك ما عندنا مانع توقع ليهم
بكري يبدي عدم الرضا ـ بس يا خال أنا أديت كلمة للكاردينال ووقعت معاه على عقد جديد وأستلمت منو 800 مليون الموضوع دا ممكن يدخلني في مشكلة
الخال ـ لا ترجع ليهم قروشهم عادي
بكري معترضاً ـ بس يا خال موقفي كدا بشعرني بالخجل أمام زملائ وأصدقائي لعبية الهلال ، وهم ناس أخوان
الخال ـ ياولد صداقة شنو ـ دي فرصة جاتك عشان تأمن مستقبلك ومستقبل أخوانك ، أنت قايلا بتجيلك تاني ـ ما تضييع الفرصة
بكري غير مقتنع بكلام الخال ـ والله يا خال
يقاطعه الخال ـ أسمع ياولد نحن بتهمنا مصلحتك والزمن بقى صعب والحال ضائق وانت شايف الناس يتعاني قدر شنو
هلال مريخ بتاع الساعة كم ، ما تضييع الفرصة
بكري ـ ياخال بس الهلال بالنسبة لي ...
يقاطعه الخال ـ هلال !!! ـ والله قال هلال ، هيثم مصطفى لعب كم سنة في الهلال ؟
بكري : 17 سنة
الخال ـ طيب مصيرو كان شنو ؟
بكري ـ أتشطب
الخال ـ أتشطب وأتذل وإتهان كمان

هنا فقط أستدرك بكري وأبدى مرونة وتغيير موقفه 180 درجة

الخال : ـ ـ كلها خمس ستة سنوات وتلقى نفسك حائم بكرعيك زول بعبرك ماف ـ ياود شوف مستقبلك ، بكرة تشتري شقتك وتركب أخر موديل ، تعرس أفضل عرس ،
وتركب أبوك وأخوانك عربية سيبك بالله لا هلال لا مريخ مصلحتك وبس

وبعد هذا الحوار كان الجميع في منزل الوالي يضعون الترتيبات لإستلام 2 مليار القسط الأول

هكذا تتداعى نتائج شطب هيثم على الهلال
وهكذا يدفع نادي الحركة الوطني ثمن مؤمرات بعض أبناء الهلال على ناديهم
سيكون شطب هيثم غصة لن وجرج لن يندمل في الجسد الهلالي
ولن يكون بكري الأخير في سلسلة مأسي التفريط في المواهب التي يرعاها الهلال ويصقلها وتذهب تحت بريق المال للمريخ ،
ولكن الأسواء أن معظم هذه المواهب ذهبت أدراج الرياح ولم تحقق نجاح يذكر مع المريخ