ســـــــودانيز أون لاين ..!!

ســـــودانيز أون لايــن ...!!
المنبر العــام ....!!
2003 _ 2004 _ 2005 _ 2006
والهوادة كم ســــــنة كمان ..
كانت :
دوحة ســـاحرة
( فيها ما يسر العين ، ويسعد القلب )

فيها البخليك تتمدد علي ضهر مركب والدنيا صيف
وتركب البحر الأسمو نيل ... وتغازل الموج بي ايديك
وتكتب ابيات القصيد ..
وتمرق ترقد علي الرملة وتشخبت وترسم الصور .. البحر حاضناهو شيمة
وفووق تعاين تلقى غيمة
جوة بيتنا تلاقي نيمة .... والرواكيب القديمة
منبرنا كان ..
ســـــاحة ملم ..
وصفحة للراي والفهم
تلقى .. كاتب .. وتلقى ناقد ... وتلقى شاعر ... تستلف منو القلم ..

منبرنا كان ..
كان زمان ...!!!

سلام يا خية
لا نبك علي الماضي إلا لسؤ الحاضر
ايدك وايدي وايد غيرنا
لنكون كطائر السمندل
نقوم من رماد الموت
دعوة للارتقاء

التعديل :
سطر طويل عريض بالأنقليزي دخل عارض

عدلت ... الشِيمة ... لي شـيمة
عشان البحر ما يزعل

أخوي ود اب ســـن
بقولوا العين بصيرة .. والليد قصيرة
ايدينا محتاجة طواري شان تحفر وتلقى السر
في الاول .. حتى بعد داك نشوف الارض البور الكانت خصبة
ونرمي الحبة .. ونزرع ونسقي
يوم ورا يوم وسنة ورا سنة والمنبر بقى خاتي الخدرا
بقى زي فرن اليمانية وسموم ناروا تلاقي وشك وانت داخل
وين الناس الكانت زمان ...
الأبداع والثقافة والفن والأدب ... ما عندو سن للتقاعد
الناس الأثرت وجداننا وكانت قوة جاذبة تجبرك علي الدخول والكتابة
افتقدنا اسماء لا يمكن نســيانها كانت بتكتب بحروف من نور
سمندلاوي
Zumrawi
ود عقاب
انور كينج
ولياب
مهاجر
قرنفل
ود قاسم
الكتيابي
هدهد
.......
والسمحات :
الجندرية
تماضر الخنساء
عشة بت فاطمة
ابنوسـة
بيــــان
مريم بت الحسين
rummana
Tumadir
وحاليا الملكة أســــماء الجنيد
وكتيريين
لماذا ذهبوا ؟ ونأو بأنفسهم ؟
لهم ولهن التحية ونأمل بأن يعودوا قريبا
..
تسلم ود اب ســـن

لك التحية أختي الفاضلة : رشا بابكر

Quote: وين الناس الكانت زمان ...

بالتأكيد الناس موجودون .. ولكن مشاغل الدنيا قد
تكون الحائل بينها وبين المنبر ، علاوة على اختيار
البعض الواتساب وغيره من الوسائل وسيلة للتواصل
عوضاً عن البورد ..

مرحب حبابك د/ يوسف
إن شاالله كل الطريتم بالخير يكونوا طيبين وفي خيريين
بس القطع كراعم من هنا قطع شك ما مشاغل الدنيا بس
منو الما مشغول بهموم الدنيا
الناس الموجودة هسي هنا عندها من مشاغل الدنيا كيمان
إن شاالله كل الغايبيين يعودوا
ويعود المنبر لي صفاهوا وجمالوا

ألأخت/رشا السلام عليكم...فقدنا الكثير وما زلنا نفقد..لو إستمر الحال سيظل البوست بور......لك التحية ...من السمحات المفقودات أضيف ميادة كمال( إيمان .ميمى) آسيا ربيع ومنى ومنال وماجدة عوض خوجلى ومن ألأحباب عمر الفاروق وشتات ومحمد الشيخ ومعتصم دفع الله وداش.

عادل جبارة ..وودالزبن الوجيه.وحمد فتح الرحمن. ...والجميلين كثر..

فاتح نفاج مقارب..لك التحية وألأحترام.

اخوي الفاضل / سماعين ود عباس
غياب الناس الجميلة ترك اثره في المنبر
عدا من لا يعرفهم .
واظنهم ومن خلف الكواليس متابعين حال المنبر
ومن هنا ننادي بأعلى الصوت
للجنيات وللبنوت
غيابكم طال
متين تعودوا ..

....
الأخ هارون الرشيد ( من الفيس بوك )
اشاركك السؤال عن الأخت سلمى سلامة ... سلمى وينك أنتي ؟

ياود ابسن الـ بنت رشا دى كيف ماتسجلوها فى لمة الناس السمحين
دى كان جاتكن بى هناك بتشيلو كاس بِل غيت لدورى الخلا الاسفيرى
ازيك يارشا ـ انتى ساكنة فى الخلا بتاع السعودية البسموهو واى عبقر داك؟

كيف حالك أخوي الفاضلابي
قالوا اللوم بجي بالغفلات
وناس ود اب ســـن وطرايدو حاشاهم اللوم
هو بالله بي هناك في لمة للســـمحين !!
وأنا بي جاي احاحي في السمحين الغابوا
يا الفاضلابي . اريتني كان ساكنة لي في وادي
ما كان ده حالي ..أنا ساكنة في البلد الــ لا فيها
طيراً تهشو ولا حوشن ترشو
بلدا سماها خاتي النجمة والعجب كان داير تشوف القمرا
بلدا لئيمة .. لا بحر لا فيها نيمة
المطرة بتصب من ســكات
ومطرتن ما بتشم فيها ريحة التراب اخير عدمها
غايتو زعلانة من ود اب ســن والمعاهو
وبقول ليهو ... أنا من كتر السُكات وعدم النضم
بقيت احدث روحي ... الغربة وصلت للعضم
وصف لي دربكم بلفح توبي واجيكم .
وتسلم يا الفاضلابي
وإن شاالله دايما ملمومين وطيبيين وسمحين

رشاء بابكر
فتيل العطر
زمان كان ريحة الصاروخ وبت السودان والسيد علي .. السيد علي بسوها للحنوط . وسوار دي باريس وريحة الريش .. الاسبراي لسة ما اكتشفوهو .. والسبراي اي رشة منو بتطير وتقد الاوزون .. شفتي كيف حت ريحتنا كانت صديقة للبيئة
يا بت بابكر الزعل مرفوع والدين ممنوع والنفوس المتطايبة قاعدين مع بعض ومشتاقين
ود الفاضلابي البنية دي وصفها الدرب ما تبقالنا متل وضاحة وتشبكنا خالو وعمو
من هسة اكان بتسوي زي سواتا انهجري في بكانك
حبابك والله وتشرفينا ويزيد مقدارنا
عندي جد لي لو زعل بزيد الطاقية ما بتخش في راسو .. ونحن كان هوشنا وفرحنا وحات ابوك السمح المنبر ما يشيلنا
ف شنو
ألفحي ليك اقرب توب وختي في راسك وشيلي كرعينك في راسك وابقي مارقة
راجينك

صبحك الله بالخير ود اب ســن
ات وصف لي دربكن
أكان في حلالن ورا الترع بركب البكاسي وبتبلم واغطي راسي
واجيكم شاقة حواشة ودشــيوقوق
واكان كمان بكانكن جمب الظلت .. وصلت تب
واكان كمان في ضهرة البطانة أنا جمبكن وهدا دربي
أنا سواتي اسعل منها ود البوش وود شيقوق خابرنها بلحيل
ناس وضاحة ديل ناس الروضة والمراجيح
وأنا كت بودي الغنم الساروحة
وبشرب الشاي بالليقيمات واشيل فطوري في الكوره الزُهرية
وبحوكر النيمة السغيرة وقت يجي الخريف
هسع الكلام ده كان سعلت منو وضاحة بتخبرو ليك
غايتو يا ود اب سـن الما بعرفك يسويك حنكوشــة ..!!

ود ابوسن، ودشيقوق، ود البوش، ود المنسي: انتو ناس سمحينود ابوسن، ودشيقوق، ود البوش، ود المنسي: انتو ناس سمحين

بوكانا جمبك
تعالي مارقة بي توب الزراق ساي
وحاتك اتي تلقي اللخوان والحبان
العربي لو قال ليك المكان قريب .. تمشي يوم وضحوة
واكان لحق ومد لي عنقرتو وقال ليك ورا القوز دة .. شيل مويتك وزوادتك
سفرا للحبان ما هو بعيد .. لا دايرالك برنسة ولا ضهر لوري ولا دحيشة . مرقتك من خشم الباب تلقانا في وشيك
نحكي ليك
مرة ماشة لي بكا في العريباب شرق رفاعة . اهل الوالد عليه الرحمة . ضربولنا تلفون واجرنا هايس وقمنا بي صمتنا .. والدنيا مغرب .. مشينا بي حنتوب نعمنو البنطون بقيف عشرة .. اها بعد مرقنا من كبري حنتوب .. وخشينا البطانة .. وابوي يوصف .. كنت بشرك للطير بي هنا .. وكنت بسرح هنا وانا صغير .. ووو
والدرب راح ليهو
والدنيا ليل
اتلهمنا ناس قاعدين جمب كنتين
ها ناس بنسأل من شارع العريباب اولاد الناير ( اخوال ابوي ) وصفولنا واختو البحر اعصروا يمينكم بتلقو صهريج .. الصهريج امشو منو يمين بتلقو العريباب
مشينا لامن الهايس نفسو انقطع لا لقينا بحر لا صهريج .. لقينا ناس تانين قاعدين قدام كنتين الحلة
ها ناس بنسعل من شارع العريباب
ضحكو
هسعتي ما وصفنا ليكم
رحم الله الوالد
محمد علي ابوسن جلي
محمد علي ود بتول بت الناير
ورحم الله امي
فاطنة بت حليمة
فاطمة حسب الرسول مليك

يا ود اب سن
رحمة الله علي اهلك الطيبيين
والبركة فيك وعيالك
سبحان الله وحكمتو فينا
الناس تسافر للبلود البعيدة تكوس في الجمال والطبيعة
والزي انا دي
لما اطوول من البلد واصد
من ما امسك درب حلتنا .. اقعد اتلفت زي الضهبانة .. اي حاجة اشوفها سمحة
البيوت .. والبهائم .. والشدر
زمان بنعدي بالبنطون ونحن راكبين الكارو ماشين عليهو .. بس اشوفو مدودر في نص البحر طوالي اقعد ابكي
واقش دميعاتي واغني ليهو .. تعال طولنا ... ودينا اهلنا
تقول لي ماليزيا .!

الأديبة الراقية رشا بابكر
أحييك وأشدد على يدك وأنت تنادين زمن السماحة
والجمال .. ذاك زمان ما كان خلافه يفسد قضية ود ..
ذاك زمان اتّسم بالمحبة والوداد السوداني المتوارث
لم تكن هناك شقّة ولا مشقة .. وماكان الناس كسالى ولا حيارى
وهذا يا رشا وضع عام
السودان كل يوم يتدهور ويتناقص ويتآكل
ومعه يضعف أهلوه ويهن الشيب والشباب
البلد كلّها مصيّفة
ناشفة .. حتى خريفها جاف .. وشتاءها لؤم وبخل وظلم
ليلها ظلامه قاتل .. ونهارها يموت بتناقص قيمة الإنسان
انحنت الظهور .. وشابت الشعور .. ووهن العظم منّا
كيف لبلاد هذا حالها أن تخرج نباتا طيبا
من تتحدثين عنهم عاصروا جزءا من السودان السمح
لكن العملة الرديئة انحشرت إلى دواخلهم وطردت عملتهم الجيدة
المزاج لم يعد بخير
والنفوس لم تعد تحتمل الأذى المستمر
والكتابة مولود شرعي لبيئة طيبة
فغابت الطيبة ، وغاب الحب المتبادل بين الإنسان وأخيه الإنسان
كيف نكتب عن سماحتنا وكرمنا وشجاعتنا وفينا من يقتل بلا سبب ..
وفينا من يغتصب الحرائر
وفينا من ينشر الرعب بين الآمنين
وفينا من ينشغل بفتاوى الرق
وفينا اليتيم المقهور
وفينا من يجاهر بالعنصرية
وفينا كل هذا القبح
وزيادة
من أين يأتينا سمح الكلم
وسمح الفكر
وسعة الصدر
إننا ننتحر يا رشا
إما ظالمين ظلما ييّنا وإما مظلومين ظلما بيّنا
لك التحية ..

لك التحية أستاذي / ود قاسم
وطئت اقدامي ساحة هذا المنبر في العام 2003
دخلته بلهفة من به ظمأ ..
لترتوي روحي العطشى من فيض انهاره العذبة
ولأتنسم عبير شذاه العطر
ولأكحل عيناي من سيل جماله
ذلك : لأن من فيه أناس مترعين بالجمال والنقاء
وكأني بهم قد غُمسوا في ينابيع طهر لم يُدنس
أناس توحدهم قداسة القلم ..
فإن كتبوا ... كتبوا بعقولهم
وإن تسامروا ليضحكوا ... اعادوا لك حكايات الأجداد
فتخرج باثنتين .. ان ينشُرح صدرك .. وان تاخذ مما يستفاد من الحكم
كانوا يكتبون لا لمجد ولا لشهرة
يكتبون لأجل الكتابة بشتى انواعها
كانت الهوية ســــــوانية
لا مكان للنعرات العنصرية
القبيلة لها إسم واحد ... قبيلة الأخوان .. والأبو السودان ..
الأن هناك من يختزن الكثير من الجمال ولكن يخشى إن كتب
من اعين اختلط عندها الجمال بالقبح .. وايدِ تهوى العبث لتحيل الأخضر الى اسود
وللحديث بقية

التعديل .. عشان حرف واحد

http://www.sudaneseonline.com/board/129/msg/%d8%b3%d9%81%d9%...8%a8-1191200206.html

قلنا نجيك بى قدحنا
مرحبتين حبابك استاذة رشا

لك التحية أخي عبدالمنعم
الم اقل لك بأن المنبر كان حديقة ذات ازاهير
التحية للأستاذة زينب الحويرص