راستافار آي فون

راستافار آي فون


الحاجة دي بتبدأ حول أسئلة تعتمد صعوبتها على موقعك من الصراع الطبقي. بالتأكيد أنا لا أزال ولن أنفك، ولن أبرح حتة الصراع الطبقي دي خالص. وأي زول يُسقط الصراع الطبقي يبقى خائن للطبقة، أياً كانت الطبقة. يعني حين الخلاص منه، لو كان رأسمالياً، سيمشي لرميه في مزبلة التاريخ، العمال والرأسماليين، ولا أضمن لك نفس النتيجة فيما لو غيّرنا طبقة المتوفي!
فطالما هناك أسئلة تتورم مباشرة بعد طرحها فهذا يعني أن هناك صراع.
العادي عندك، عندي ما عادي
والعندي (فَلّة) عندك زبادي
وأهدافنا حدها وين تتقاطع الغزلان!
الأسئلة التي لا تتورم إلاّ بعد طرحها هي أسئلة تتجاوز السياسي للوجودي!
وأديك مثال. هل حصل فكرت لما مات سي إي أو CEO، أو رئيس مجلس إدارة، أو توقعت أن خفير الشركة كان أصلاً يعرف أين كانت المقابر لكي يدوهو (فَرَقة) يتلبب رجل عنقريب أو..... طيب اسمع الكليب دا من حوار بين طالب وظيفة وخفير (البكان) الذي طلب فيه الوظيفة. كيف يبدو طالب الوظيفة وكيف يبدو الغفير؟ هذا لا يهم. لأنه دائماً فاجأنا النهار، رايت right؟ المقتطع يبدو كمونولوج وطبعاً مافي مشكلة. حتة المنولوج دي حلّوها حل نهائي. فمن يحدث نفسه في الشارع اليوم لا يتلقى أي حجارة تحصبه (بحصبانه) فقد عقله أو قد يتلقى قليلاً منها مع انه يبدو في حالة منولوج لا شك فيها! فمنلِج ما شاء لك الهِبالُ. وإذاً... إلى خطاب الخفير لطالب الوظيفة:
- أنت ها! الكلام دا ليك يا المنطط عينيك، قالوا آي فون 8 طلع. ساخن زي الرغيف في الصباح وتحت المطر ووسط الرياح. أها كان فضل عندك عمار، في الصف أقيف! وأن نقول لك قولة سموهو راستافار آي فون 8 ومافيهو فِرد مدحة لكن فيهو طار شديد. وقالوا إن دُرت تناغم زول لازم في الأوال تسمع إشرادات الاوبريتر، تراسي شافمان. بالله ريحة سيجارتا تطقش الأضان. أضاني قالت: صنننننننننن. أها أسمع أن نحدثك كمان ناس الآيباد طلّعوا شيتاً جديد إلا فيهو مشكلة. الدكاترة اتشكلوا معاهم وقالوا ليهم الاسم دا جبتوهو من وين؟ عرفتو يا جنى؟ أها بس يا هو. عِلاّ قول لي يعني كونك داير تقابل المدير الليلة؟ انت ما سمعت خبرو؟......
والآن وأنت بعيد عن تقاطع الغزلان أو حتى صينية مكي، ينبغي أن تضع الأشياء في نصابها. الخدعة الحرب التي مارستها الرأسمالية هي أنها موّهت الأطر، وحقيقة التأطير أسطرة لا ينبغي أن تعمم. ولكن التعميم أداة حيوية للرأسمال. تعميم، تعميم، تكبير! التكبير بيلم الناس. مافي مشكلة،في الصلاة، ولكن زوال الفوارق بمجرد التعميم! هذا لَعمري ....وبتاع! يا زول ألحق نشرة تمنية، إتأكد أول شي وبعدين شوف كيف تنظم الحملة ضد المساواة!
هل قلت الحملة ضد المساواة؟