السمحة

السلام عليكم اهلنا
بعد غياب ... تسرني مشاركتكم هذا النص



انني اعشق الفكرة
فكرة العشق التي ساقت خطاي اليها
واشتاق
اشتاقها كلما دلفت مواعيد الكلام كل المسام في خاطري
وتوسدت اذني اللهيب

الا غناها
بلسمي
ومياه قد خلقت لظمأي

الا الحديث
حديثها
ينساب كالحب البريء
يداعب الاعماق حتى
تنتشي

الا حديثها واحتي وحديقتي
حين الجفاف
ونحيب اشجار الظلال تبكي فراق خضارها
السمحة ما كانت حديث عابر
فجمالها عمق الكلام
وهواها والصمت الذي
بين الكلام
اصل الكلام

الاها يا ربي هي
عصير عمري وثمالة الإحساس فيني

إلا العيون
عيونها ...
عشقي تمادى ... كيف لا وعيونها
إني فقدت هويتي في عيونها
إني عبدت الله فوق عيونها
إني رأيت الحب بين عيونها
وعزفت لحناً آخراً يشدو الهوي بعيونها
واشتقت اكثر للتأمل الضياع في عيونها

وشفاها اه ... يا لوعتي
تلك الحكاية والرواية الساخرة
فشفاها دنيا من نعيم يانع بالابتسام
لا بل ربيع قد تدسي بين زهرات يبللها الندى
وطغي على كل الفصول ...
لا بل متاهة ...
بل ضياع .. أو قل كما شئت من حديث
تلك الشفاه لا حرف يدفعه التجروء للتوسد في القصاصات والورق
او كلمة تثق المثول امام ذاك السحر فيها
أو جملة من سيبويه تصف الحدث
فالكل يسأل من هي؟
وما هي؟
وكيف جاءت؟
وبعض أسئلة غريبة
وإندهاشات عجيبة
ودهشتي هي أعجب

صديقي واخي..ابراهيم..
يازول الله يهديك ياخي..نحن كبرنا وكبرت احزانا ذاتو..وانت برضك جاي تكلكلنا بالشعر السمح والذي منو؟..

طبعا الضحك شارطنا..وشمتان في صديقتنا الجميلة واستاذتنا بثينة ترويس (رئيسة الجالية السودانية في كالقري)..تشيل وتقدم في ابراهيم عثمان..ولمن يجي ابراهيم عابر في دار سودانيز اونلاين..بثينة بتكون رايحة..!!!
قبل التخاطر و التفاكر في كلام ابراهيم هنا (قصيدة السمحة)..بعض الحاجات لابد من ذكرها..لأنو نحن شعب طيب ما بيعرف يسوق نفسو بصورة كويس...

اخونا الشاب ابراهيم عثمان.. هو اول من علمني ككيف اضيف اليوتوب في سودانيز اونلاين..وذلك قبل سنوات..واذكر كان الفيديو بتاع غنا البنمن مدينة كادقلي..فالرجل فنان.زبحق وحقيقة..في الحاجات دي..ودرس دراسات رسمية في المجال في مقاطعة كولمبيا البريطانية في غرب كندا..!
ابراهيم هذا له اهتمامات اخرى.. فهو مصمم شعار الجالية السودانية في مدينة كالقري..وهو شاب هميم ونشيط للغاية..و قام بتصميم اربعة شعارات..وطرحها للناس لتختار المناسب منها..ولقد اتفقت الجماعة على اختيار شعار..فهل يذكر سيدنا ابراهيم هذا العمل العظيم؟..ياخي الزول ده من شدة التواضع..بكرة يقول ليك انا ما عملت ايتها حاجة يا عم..!!
عرفت ابراهيم شاب هادئ..ولقد سلمني مجموعة قصائد قبل سنوات..وهو يظن انو القبة تحتها فكي وكده..ولازلت احتفظ بتلك القصائد الجميلة.. لكن دهشتي كان اعظم...حينما شهدت بعض الفعاليات السودانية في مدينة كالقري..وكان ابراهيم يغني..اي والله يغني الغنا الواحد ده..وهو يغني في زمن سوداني اخر..ومختلف تماما..من الحاجات التي علقت بذاكرتي.. اداء اغنية صلاح ابن البادية (ننساك وانت وانت بتتنسي).
الواحد يسمعها عندك..ويشعر كأنو في حضرة الشاعر عثمان خالد..واستاذنا صلاح بن البادية..!!

حينما تكون هي شفاه..دنيا في حالها..وتنعم بالإبتسام..ثم تحتار انت وتصفها بالربيع..فهنا يا صديقي نفرح نحن..لأننا نبتز غالبية شعوب السودان..باننا نعرف ماهو الربيع وماذا يعني حتى يصير صنو المقايسة والتشبيه..ليتها تكون صبية من سنار يا ابراهيم..فصبايا سنار هن الجنون يمشي علي قدمين..!

كبر

جذبني العنوان جذبا وقلت في نفسي اكيد عثمان ابراهيم ادم قاصد اميرة بت مصطفى
السمحة والجميلة خلقا وخلقا وباطنا وظاهرا ...ولما دخلت لم احبط كثيرا وقلت ابراهيم
معذور لانه لا يعرف ذات الحسن البديع وذات الصفات كالعسل واللبن...وقلت ايضا ان
ابراهيم عثمان ذو شعور انيق ..وجذبني بشدة هذا البيت من الشعر:
او جملة من سيبويه تصف الحدث
فالكل يسال من هي
وما هي
وكيف جاءت...
ونحن ايضا نسالك ..من هي ..وكيف جلءت..

اما بيت الشعر الذي يقول:
اني رايت الحب في عينيها..

فانه يصف كل الحقيقة الكاملة لشعور الفتاة..
فلا تفمر عزيزي الرجل ان الفتاة تعبر عن حبها بالكلمات
فما اسهل الكذب والتلاعب بالكلمات..ولكنها تعبر عن حبها
بعينيها..فعيون الفتاة دائما لا تكذب وتفضحها اذا ارادت ان تخفي
سرا...فالذي يستكيع قراءة عيون الفتاة سيعرف ماذا يخبئ قلبها..
فنون النسوة مفتاح كل لغز...
ودمت بخير وصحة وعافية
(بسمات الشيخ)