النزول السري للدولار !!؟

الدورار ! عملت عشرة
وقالوا هسة ماشي لي خمسة
يعني هبط سعرو النص
وبلغة اخري 50% من قيمتو
وهذا يوجب ان تمخفض الاسعار النص لأنها قاعدة ترتفع معاهو
آي طوالي الناس تقول الدورار ! بي كم وتضرب السعر الجديد
الحكومة زاتا بتضرب كدة . ويقولو ليك سوف نرفع الدعم .. لأنو ملوة الويكة في سويسرا بي حداشر دورار! يعني في خمسة ومعاك الخمستطاشر بي ما يعادل تلات دورار! ونحن بندعمكم بي تسعة دورار ! آي عارفين الحساب داك كموشين ما محسوب
لكن
الاسعار ما تغيرت بل سادرها في جريها كل يوم
داير بتاع اقتصاد يكون عندو دبلوما في الزراعة ودكتوراة في تفسير الاحلام يشرح لينا ويفهمنا
نزل كيف وآثار ترتفاعه لازالت متصاعدة

اها الدولار دة وحدو مافيهو كضب
كيس التمباك كان بي نص جنيه بق بي جنيه ونص . قالو ارتفاع الدورار!
غلطت قلت ليهو طيب الدولار الدخلو شنو في منتج محلي غير مستهلك عالميا عشان ما تقارن لي سعرو في بورصة نيويورك
نظر لي كمن ينظر عالما لي جاهل .. وصمت مليا ثم تنحنح . وبصق سفته وكور اخري وقال متلبسا قفطان من يظهرون في التلفاز
اولن انت قايل الصعوط دة انا زارعو تحت زيري !! الصعوط مزروع في دارفور . وشان يقوم ويجيك داير عربات . والعربات دايرة جاز واسبير وديل بجن بالدورار! والدورار! زاد معناتو هن زادن والاستك بقا الجوز بي سبعة مليون وكان بي ثلاثة .. السواق زاتو سعرو زاد كان شهرو بي اتنين بقا بي خمسة لانو الدورار! زاد والحاجان زادت وماهيتو ما بتكفيهو بقت وووو
اقتنعت . وانا زول حساب كلامو صاح وفق معلوماتو الانا ما عارفها
ف شنو
الدولار دة لو نقص ما داير دق نقارة بتاعت الدوكة بتكلمني بيهو

المقصود
بتاعت الدكوة وليس الدوكة .. لكن ممكن تعتبرها بتاعت الدوكة .. الكسرة برضو تبع الدولار وبالذات خريف امريكا السنة دي قالو فاشل . الضراع اتأخر وخش في النترة . وجاهم الفار وعيشهم ما جاب التكتح
انا مارق كتابتي غلط
يا
نظارتي بقت ما كويسة
ولا والموبايل
ولا الملاريا ما مرقت
اها حبوب الملاريا بي 75 ج

الدولار لما يكون في تصاعد التجار بيضيفوا قيمة الدولار المتوقع حين انهاء البضاعة من الأرفف وشراء جديدة

وعندما يكون الدولار في انخفاض فلن يظهر الإنخفاض إلا بخلو الأرفف والمخازن من البضاعة التي اشتريت بقيمة الدولار المرتفعة

فالتاجر لن يخسر إذا صعد الدولار أو انخفض

لذلك ردة فعل التجار بصعود الدولار لحظية تجنباً للخسارة وردة فعلهم مقابل هبوط الدولار بطيئة ترقبية.

لكن لو في تاجر اشرى بضاعة جديدة بسعر الدولار المنخفض وقرر يبيعها بسعر منخفض فسيفقد تعاملاته في السوق إلا إذا كان معتمد على نفسه تماماً لأنّ التجار الأخرين سيفسروها جايي يخرب ييوتهم ويشن عليهم حرب معلنة.

ومثل ما قال ليك تاجر الصعود الدولار مرتبط بكل شيء بصورة مباشرة أو غير مباشرة.

مرحب فرانكلي وحبابك والله
شاكرا لك تداخلك
التاجر ما بخسر
لكن ممكن يخسر غصبا عنو ..
ما حدث ليس نزولا للدولار بل انهيارا لسعره . ان ينخفض نصف سعره في زمن وجيز هو كارثة للتجار
كويس
نفترض واحد مشتري سلعة بي تمانية وببيع فيها بي عشرة . وهو مستوردها . طيب مع الانخفاض بقت بي اربعة .. والدولار يواصل انخفاضه .. اقل شئ بحاول يتخارج منها .. اول بقنع من ربحو وبفكها بي راس مالها اللهو 8 . ثم سيخاف اكثر وسيحاول كل يوم ان يتخارج منها . سيبيعها حتس لا يخسر اكتر ..
لكن الشاهد هو عكس ذلك . لا توجد علامان لإنخفاض الاسعار. بل زيادة مضطردة فيها

اخونا باريس من ظرفاء كوستي . وهو جزار معروف
ود اختو قال ليهو
يا خال العربات نزلت قالو
رد ليهو باريس
يعني بقت مية ألف !!
احتج عليه ود اختو غاضبا فرد ليهو باريس
مالي ومالها انا . العربية من سبعين مليون لي خمسين مليون .. لا عندي دي ولا دة لامن تبقا بي مية ألف كلمني
ف شنو
الدولارسلعة مضاربات تخضع لقانون العرض والطلب . انخفاضها سببه زيادة المعروض او قلة الطلب
المعروض لا نر انتاجا صدر بزيادة بل مصانعا تغلق ابوابها كل يوم لندرة وارتفاع الدولار . ولا صدقة اتتنا من الخارج
بفضل الطلب
ولم نشهد اجراءات اقتصادية تقشفية صارمة وقاسية في الانفاق الحكومي . هاهو الحج الذي حج فيه مئات موظفي الدولة علي حساب الوطن مجانا في جميع الولايات . وكل يوم نري احدث الموديلات تجوب المدن .. والوفود تسافر كل يوم
ودة اس المشكلة
الدولار لم يصر عملة للتداول بل سلعة للمضاربة علي اعلي المستويات المدعومة سلطويا وسياسيا
هل يوجد دولار لإعتمادات الاستيراد بذات السعر في البنوك ؟
الدولار يؤثر في الاسعار ولكن ليس بنفس الفهم الميكانيكي الحادث
بل انها فوضي الاقتصاد . وتفشي الاحتكار من قبل كبار رجالات المال المسنودين
الاسعار في السودان تخضع للسند السياسي وليس قانون العرض والطلب

!!!؟؟
اسم البوست ليس
سر نزول الدولار
ولكن
النزول السري
علي وزن الحبر السري
لذا لزم التنويه.اه!

قبول شهور عملت تداء لشراء ماكينة غسيل كلي
اتصل بي من الدوحة الصديق قدورة بردسول عندو واحد قطري مستعد يشتريها .. للشفافية اديتو تلفون الشركة .. قالو ليهو بي 80 مليون .. طلبوا منو الايميل شان يرسلوا فاتورة مبدئية بالسعر.. ضربوا ليهو تاني بعد نص ساعة تقريبا قالوا بي 105 مليون .. وبكرة بدوهو الفاتورة
بكرة قالو بي 125 مليون
احتج قالو ليهو الدولار زايد
ممكن معاوية الزبير يؤكد او ينفي القصة بي سؤال بردسول
ودخلنا في مشكلة .. قدروة قال للقطري بي 80 ووافق ... تاني رجع ليهو قال بي 105 ووافق
اها تاني يقول ليهو بي 125 فدخل في حرج ان يظن به الظنون .. زيادة النص
ودي شركة هندسية جامعين وبعرفوا الاقتصاد مش بتاع صعوط
المشكلة في السلطة البثت ثقافة الهلع والابتزاز وانتهاز الفرص والتشفي
تمشي لي مدير بصرف 20 مليون لي تبرع من مصلحتو بي مليون لعمل خيري ملح يعتذر ليك بضيق الامكانيات ويتبرع بأكثر منها للشهرة
مركز الكلي داير شان ينفتح سايفون بي مية مليون ولي الليلة الناس ساكة الولاية وتتبرع الولاية بدعم فريق بأكثر من مية مليون ويوميا

والدي رحمه الله كان يردد
اعوذو بالله من بطنا لا تشبع وقلبا لا يخشع
ويقول للشره
الزول دة
مزلوع

حكي لي الخير سيد بشير
قال لي
عندنا دكتور ثقيل جدا قال ليهم مرة
انا زول اجتماعي جدا لكن الناس ما عارفاني
وشوش مدردقة من الضحك البشرط الزول

كيس التمباك كان بي نص جنيه بق بي جنيه ونص . قالو ارتفاع الدورار!

إن شاء الله يا أب سن يصل 15 جنيه
إن شاء الله
يا اااا رب
عليك الله لو أدوني 50 ألف بشيل لي كيس تمباك في جيبي خليك من أختو في خشمي ؟؟؟

مرحبا بدر
هههههه
المزاج لا يناقش

مرحبا بدر
هههههه
المزاج لا يناقش

سلام عليكم ود ابوسن وبدرالدين والمتداخلين.

Quote: كيس التمباك كان بي نص جنيه بق بي جنيه ونص . قالو ارتفاع الدورار! إن شاء الله يا أب سن يصل 15 جنيه إن شاء الله يا اااا رب عليك الله لو أدوني 50 ألف بشيل لي كيس تمباك في جيبي خليك من أختو في خشمي ؟؟؟

وريهو يا بدرالدين بالله......يا أحباب أسوأ شىئ والله التمباك ده فعلاً...عندى صاحبى بقول والله الله يبارك فى ألأقترع الدخان والدلكة والله يلعن ألأقترع الدخان (السجائر)والصعود

تحياتى وسلامى......الله ينزل الدولار ويرفع الجنية ويبعد التضخم ويصلح حال البلاد.

مرحب اسماعيل
وينك ياخ
فاقدك
اهلنا بقولو
راسن خاتي الكيف اريتو بالسيف
ففي السودان يا نسكر يا نسف .. الحمد لله بنسف الصعوط ما شي تاني
احكي ليك قصة العريس ولا بتقولو بقيت بذئ

Quote: اتصل بي من الدوحة الصديق قدورة بردسول عندو واحد قطري مستعد يشتريها .. للشفافية اديتو تلفون الشركة .. قالو ليهو بي 80 مليون .. طلبوا منو الايميل شان يرسلوا فاتورة مبدئية بالسعر.. ضربوا ليهو تاني بعد نص ساعة تقريبا قالوا بي 105 مليون .. وبكرة بدوهو الفاتورة بكرة قالو بي 125 مليون احتج قالو ليهو الدولار زايد ممكن معاوية الزبير يؤكد او ينفي القصة بي سؤال بردسول ودخلنا في مشكلة .. قدروة قال للقطري بي 80 ووافق ... تاني رجع ليهو قال بي 105 ووافق اها تاني يقول ليهو بي 125 فدخل في حرج ان يظن به الظنون .

سلام يا اب سن
المقتبس اعلاه مدخّل كتير من السودانيين فى حتة ضيقة شديد
فى رمضان اخونا قطرى ادانا مبلغ من المال لصيانة مسجد
رسلنا القروش للوكيل ومن ضمنها شراء فرش الزول كان فى الجزيرة
مشى سوق ليبيا اتفق مع بتاع الفرش وقال ليه انا بمشى شرق النيل اجيب القروش
والعربية لما جاه راجع التاجر مسك ابنص ورفع ليه السعر بحجة انو الاسعار زادت هههههه تقول لى شنو

مرحب يوسف
وحبابك
آي لكن معقولة في اقل من 24 ساعة
بعدينك اقتصاد عرضة للهبوط والارتفاع دون مبرر دة اقتصاد منهار
ارنفاع جاد وهبوط حاد ودون مسوغ
ضخ الدولار في السوق ومن ثم تسربه
اتخاذ تدابير تقشفية صارمة. وخفض الانفاق الحكومي ومحاربة فوضي الاستيراد واهدار القليل المتبقي
وقف الاستدانة من البنك المركزي وفوضي صك النقودهي خطوات عاجلة وملحة

حبن ميسرة

ود ابوسن
ماك طيب ..
طول ما الحاكم واتباعه فاسدين والظلم منتشر وكذلك الرشوة ..
وطول ما المال مكتنز من قبل فئه قليلة ...
وطول ما الضرائب والاتاوات في زيادة ..
الجنيه كان بقي خمسة دولار .. الاسعار ما بتنزل

وبجيك صاد كان الله هون ..

تحياتي يا أبو سن

Quote: الخير سيد بشير

الدكتور ؟

لو ياهو الزول دا صاحبي شديد

لمني فيهو وإنشاء الله الدولار ما مرق منها ياخ

وما طالبني حليفة لكن من طريقة سردك وكوستي تأكدت إنو ليك صلة بالخير دا نفس أسلوب الحكي والسخرية

مرحب ادريس
تحياتي لك ولأسرتك
تعرف الحكومة شغالة زي التادجر الجشع
اي سلعة هي متحكمة فيها بتوصلها لي سعر السوق الاسود
السكر مثلا كلما التجار زادوهو هي نقصت من سعرهم 5 ج وخلتو سعررسمي .. وهكذا
فعلا لن تنخفض الاسعار ابدا .. فالجبايات والضرايب وغيرها مبارية السوق

مرحب حمد
اياهو زاتو
وصحبي كمان قبل يغترب
في عمان هسة
+968 9240 3177
دة تلفون كمال معاذ هناك اسالو

تحياتي أستاذ عبد الحفيظ أبوسن وكل عام وأنت والاسرة بخير
وشكرا علي هذا البوست المختلف وفعلا طالما أن السلع والخدمات وعجلة الإنتاج مرتبطة إرتباطا وثيقا - بقيمة وقوة العملة المحلية-الجنيه-وطالما أن أسعار السلع ترتفع تبعا لإنخفاض قيمة الجنيه فيبقي من
المنطقي أن نسأل معك:-
ماهو إنعكاس ومردود إرتفاع قيمة الجنيه وإنخفاض العملات الأجنبية علي أسعار السلع ومعيشة المواطن ? فالجنيه كما تردد الالة الإعلامية قد إرتفع ووصل الثريا والدولار قد هوي ووصل الحضيض - حسنا- إذا ماهو
مردود ذلك علي معيشة محمد أحمد وعلي الاسعار ? لم يحس محمد أحمد إي تغير علي حياته إثر الإرتفاع الصاروخي لقيمة الجنيه ولم يلمسه في رغيف خبزه ولقمة فوله ! فما العائد والناتج الإقتصادي لهذا الإرتفاع طالما مالحال هو ذاتو الحال ?!!
** نأتي للغة الإقتصادي ونظرياته
قيمة العملة المحلية يحددها الميزان التجاري وميزان المدفوعات وإرتفاع قيمة الصادرات مقابل الواردات ومنصرفات الدولة مقابل إيرادتها والناتج القومي والموازنة العامة ! فما هي الطفرة المالية والإقتصادية التي جعلت الجنيه يرتفع ? هل إنخفضت الواردات وزادت قيمة الصادرات مثلا ?
** ثانيا محاصرة السوق السوداء تكون مؤثرة - إذا ماتحققت الوفرة - وزاد العرض علي الطلب وإستطاعت الدولة أن تضخ عملات أجنبية في البنوك والصرافات بحيث تغطي الطلب -وبحيث يكون السعر الرسمي للدولار حقيقي واقعي - وفي هذه الحال علي الحكومة أن توفر النقد الاجنبي للمواطن بنفس السعر الذي تحدده رسميا - يأخذ المواطن خمسة جنيه مثلاليشتري بها دولارا واحدا من البنك - هنافقط ستتوقف المضاربة
بالعملة !
** الواقع يقول إن مثل هذه الإنخفاضاتالمؤقتة والبسيطة - في قيمة النقد الاجنبي تكون مرتبطة - بقرارات أمنية وسياسية - أكثر منها واقعاإقتصاديا - إعتقال تجار العملة ومطاردتهم والحديث عن قرض ومنحة إقتصادية ضخمة - من دولة إجنبية -يتبع ذلك بطبيعة الحال حذر وترقب وإنخفاض مؤقت - ثم يتمخض الجبل ويلد فارا وتعود حليمة لي "قديما"
وللأسف يتحدث المراقبون إن مثل هذه القرارات الامنية والسياسية تطبخ لجهات معين - تدخل لتشفط الدولار بالسعر المخفض ثم ترفع الدولة قبضتها عن تجار العملة وتكف عن التضيق ليرتفع الدولار مجددا بشكل
تستفيد منه جهات محددة وهكذا !
** والسؤال ماهوموقع المؤتمر الوطني ورأسماليتها الطفيلية من من المضاربة بالعملة وإمتلاك الصرفات ?
** الحديث عن عافية الإقتصاد لا ينفصل عن غسيل الاموال والمليارت الدولارية -التي تدخل البلاد خلسة وبعيدا عن قنوات الدولة والمضاربة في الاراضي والعقارات - والاموال المنهوبة والموظفة في الخارج بعيدا عن عجلة الإقتصادالسوداني ** أعلاه مجرد مؤشرات وخطوط عامة للازمة أما نقرأه من هتافيات وأحلام من أبواق النظام حول الاقتصاد وقيمة الجنيه فلا يستحق مجرد التعليق لأنه مناف لحقائق علم الإقتصاد وللواقع المعاش !
............. .............

ده استقراء خاطئ ومفبركـ ..
ولا يستند لأي أسس إقتصادية سليمة ..
بلد ميزان المدفوعات فيها منكوس وبهذه الصورة المريعة ..
يحق للدولار أن يرتع فيها كما يريد ..
ما يحدث هو فقط تلاعب مؤقت في أسعار الصرف
وتأثيره وقتي .. وعواقبه وخيمة جداً ..
بل من المفروض ان يعلم منظرو الاقتصاد ..
أن أي تلاعب بسعر الصرف ..
له آثار جانبية خطيرة وتكلف الكثير ..
لكن أراهم يجنحوا لهكذا أساليب كلما اتزنقوا ..

دي بتذكرني بالزول البقعد يتسلف ..
ويحتفظ بي راتبه كما هو ..
مغترا بأن معه فائض ..
لكن حين تأتي لحظة جرد الحساب ..
سيكون وضعه زي الطين ..
وده الحااصل لينا مع هذه الحكومة الفاشلة ..
وفي شتى مناحي تنظيرها ...
وتطبيقاتها العرجاء الشائهة ..
التي تعتمد على أسلوب التجريب ..
والجنوح للدعاية والبروبقندا ..

حين
ميسرة

مرحب كمال
عيد قادم وسودان ديمقراطي واحد موحد مالك زمام امرو
كتر خيرك
كان حديثك في صلب الموضوع
لا ينخفض الدولار او ترتفع قيمة الجنية إلا وفق توفر اسباب اقتصادية معروفة وبديهية
اما الانخفاض الاعلامي الزائف فلا يؤثر في القيمة الحقيقية لسعر صرف الجنية
المواطن لم يتنسم فوائد البترول والمعادن ولن يخدعه انخفاض الدولار .
وانخفاضه لا يحتاج لإعلان بل سيظهر تلقائيا في معيشته
حدث مرة ان طرح ( ....... ) من اوائل تجار العملة المحسوبين علي الاخوان .. طرح مليون دولار لسماسرة العملة . وحين بدأ عرضها في السوق لنخفض الدولار ودخل مشتريا . ثم ا تقع الدولار ولم يغادر مليونه خزينته وكسب نصف مليون دولار ..
امبارح طعمت المولود وجاتو حمي .. شراب بندول معدوم وحسب قول صيدلي ولا تفتش ليهو

جمال الشهير عندي ب
ود عكر
التلاعب حدو قصير .. ودة ما كلام يمكن التلاعب به ك
زادت نسبة الناتج القومي كم في المية
ولا تقارير لا تعرف كيف تتأكد من صحتها
دة طوالي بظهر للمواطن
التلاعب في سعر الصرف كما قال كمال سيخدم جهات محددة ويضر الوطن
الفساد السياسي حين يندغم مع الجهاز التنفيذي والاقتصادي سيلحق البلد امات طه

الله يقطع الدولار وطاريهو
ابوي تاجر من طفل لامن مات الله يرحمو ما كان عارف الدولار بي كم . كان واحد جنية سوداني يساوي تلاتة دولار . هسة لو جيت تحسب نسبة النزول تلقاها مالانهاية في المية . دة لوعرفت تحسبها وآلتك الحاسبة شالت الارقام دون تقريب
90000- 0.33
وتقسم الناتج علي 3
وتضرب في 100
شان تجيب نسبة الزيادة المئوية

جاتني نسبة زيادة الدولار من الستينات لي هسة
299989%
حولاااااااااا
يعني قول
300000%
ومن بداية الانقاذ لحدي اليوم بإفتراض انو زمان وقت جو كان 8 ج وقالو جو شان ما يعمل 20 ج !!!!
112400%
يعني بي لغة مبسطة
الحاجة البي جنية في زمنهم بقت بي 112400 جنية
كيس الصعوط غصبا عن بدر واسماعيل كان
0.05 ج

ومن قول 1956 ولحدي 1989 كانت نسبة زيادة الدولار 2324 في 33 سنة
وهسة من 1989 وحتي 2014 نسبة الزيادة 12400
في 25 سنة

سلام أبوسن
صباحك خير و عافية

شفت وزير المالية قال أيه ؟


السودانى 14\10

حبابك تعمات
اهلان ياخية
مرقت كيت
للأسف
ادخل ب موبايل صغير
فلا اري
تعليقات الفيس
ولا الفيديو
ولا اكاد اتبين الصور

نازل
لكن قافل علي كرت عدم والجواكر كلها نازلة

وانكشف المستور
دعم سعودي !!
دة

كما قال المثل

ربيتا يكفي سخانو

سلامات عبدالحفيظ ابوسن

مصطفى عثمان اسماعيل و الكيزان ما يعملوا فيها شفوت ونقصوا سعر الدولار....او رفعوا الجنيه.
1-السعودية بتزيد فى انتاج البترول الخام. غالبا عاوزة تنزل الاسعار شديد جدا. السبب? احتمال عشان تضرب ايران او روسيا. او احتمال عاوزة تطلع (بعض الناس) من انتاج البترول...خاصة فى امريكا. لانه لما اسعار البترول تنزل.. فى ناس بيبقي ليهم انتاج البترول ما جايب همه و بيطلعوا من السوق. وبالتالي ترتفع الاسعار تانى. حقيقي ما فى زول عارف السعودية بتعمل كده ليه!!!!
2- السودان بيصرف جزء كبير جدا من دخله (بالدولار) على استيراد البترول.
3-لما اسعار البترول فى العالم تنزل... معناها فى دولار زيادة فى السوق السودانى لانخفاض الطلب
4- بالتالى سعر الدولار ينزل فى السودان. مع انه طالع فى كل العالم.... قصاد اليورو و اليابانى و الصينى. سعر الدولار طالع لدرجة مزعجة لامريكا. لانه لما سعر الدولار يطلع المنتجات الامريكية بتبقى غالية جدا مقارنة بالصينية و اليابانية. وممكن الناس فى العالم ما تقدر على استيرادها.
5- الحكومة السودانية ما عندها اى فضل فى نزول الدولار.
6- التجار مااظن ينزلوا اسعار السلع لانهم عارفين انه ما فى شئ اكيد فى البلد دى
7- ده غير انه الاسعار ما زادت بمستوى زيادة الدولار

شكرا سمارت ومرحب بيك
لاشك اننا كمواطتين ضحية لحرب النقود

سلام ود أبسن،

ياخ أنا ما محيرني إلاّ لما يجيك واحد مسئول ويقول ليك: (الدولار طلع .......... الدولار نزل) ...... ياخ إنت مالك ومالو طلع ونزل ........ إتكلم عن عملتك ... الدولار ده عملة ثابتة ما بتطلع وتنزل بي أخوي واخوك ....... الشغال نزول طواااالي ده ياهو جنيهكم المجنون ده.

لما واحد زيي وزي المتداخلين هنا يقول الدولار طلع ..... ما مشكلة، لأننا لا مسئولين ولا إقتصاديين ..... لكن مسئول في الحكومة يخلي الجنيه ويقابل الدولار؟

أرحمونا ...... الدولار ما طلع ...... جنيهكم هو الحجرو غتس ... الله يغتس حجركم.

صدقت ابوالريش وملاحظة ذكية
واضف ليها عند التبرير لأي موقف
الرغيف دة عندنا ارخص من السويد
والرسوم علي الطرق عالميا بدفعو الناس اكتر من كدة
والضريبة في امريكا اعلي من هنا
دون ان ينظروا ماذا تقدم تلك الدول لمواطنيها . وكيف هو سلوك الدولة تجاه المواطن
دايرين يدفعونا زيهم وهم ما يسلكوا سلوك قياداتهم ..ولا يقدمون لنا ما يقدمونه
وحتي القتل
ماياهون ديك اسرائيل بتكتل في زول سألا ..

تعويم الجنيه السوداني كأنك تطلب من مقعد ان يسابق شابا صحيحا جريا حول مضمار
الشاب يلف المضمار مية مرة ولا ألف مرة ويلقي المقعد لم يتحرك شبرا
عملة لا مدعومة بي انتاج صناعي ولا زراعي.. وبل نصرف فيها صرفا بذخيا استهلاكيا .. ودايرنها تنافس كيف ..

اها
عملتنا زاتا ما عرفنا نتعامل معاها
حتي رسميا
يقول ليك 5 مليون قديم .. واللهي 5 ألف حديثا .. حتي السادة المسؤولين ما واقع ليهم .. عملة تنقص تلاتة اصفار .. كدة بس
شوف الفرق بين الواحد والألف رقم كبير يؤول إلي مالانهاية .. ولتقريب المسافة لو عندك مليون جنية الالف جنية بالنسبة ليك رقم صغير يؤول للصفر
بعد دة كلو يقارنو بالدولار . هو براهو ماعندو مروة

غايتو ناسنا ديل ما بكونو قروا اقتصاد رغم الدالات سابقة الاسماء . والبرهان النتيجة الماثلة امامنا
اول خرمجة
قالوا الجنية دة كافر ولازم نأسلمو .. والدينار يساوي عشرة كوفار !
والدينار هو عملة الاسلام
طقو الجنية زيدوهو صفر وحولو لي دينار .. وتمت اسلمته
اها
واحد في كوستي ود لذينا مع تطبيق القرار .. ولخمة الناس ودوشتها .. ور 500000 جنية في بنك ....... والتمييز مفروض يكون دينار .. وفعلا الموظف القرار جديد وعاين للمبلغ ارقام وكتابة 500000 وحدة عملة متطابقة مع عدو .. شيل اختم للزول التوريدة
اداهم يومين وكتب شيك بي 500000 دينار
واللهي 5 مليون قديم !
الشيك رجع
شال ورقة التوريدة وجا البنك هو مورد نفس المبلغ قبل كم يوم
والبنك عرفان اتدقس
وقال الا اشتكي وتحانيس واعتذار وصرف 5 مليون
اها من ديك الامور جايطة
قديم ولا جديد

Quote: وانكشف المستور دعم سعودي !! دة كما قال المثل ربيتا يكفي سخانو

ونان إت قايل الركزه للمرمطة ديك كانت فوق أم كم ...
ما عشان السمنة دي ..

اووو ود القوز الشهير عندي ب
ود عكر
من يذل نفسه لا يتحرج في إذلال غيره