التلفزيون فى العيد

نحنا فى غربة واجازة العيد كلها قدام التلفزيون
فى البوست دا نعلق على برامج الفضائيات السودانية فى العيد وما داير زول يقول لى انت بوديك تحضر شنو

اها
اول القصيدة الان على الفضائية السودانية مجموعة من النساء متعلمات ومثقفات
فى النص قاعد كمال افرو
المذيعة قالت استاذ الاجيال كمال افرو
والله العظيم المذيعة لو شافت كمال افرو دا فى دار الرياضة ام درمان والالفاظ بتاعتو
استاذ الاجيال دى اصلو ما بتقولا

فى القناة السودانية اعلان عن مسلسل سودانى جديد
نشوفو وخاصة فيهو الممثل القدير عبد الرحيم قرنى

أها .. انت البوديك تحضر شنو ههههههههه
كل سنة وانت طيب يا محمد و يعود عليكم بالصحة و العافية و السلامة
وهاردلك للعين

اعمل حسابك كمال آفرو دا عندو مسطبة كاملة في دار الرياضة رابطة معجبين وما برضوا فوقه :)

عيدك مبارك ود البشرى
عليك الله العين دى
جنينة الحيوانات- المبزرة الخضراء
تانى الواحد يعمل شنو غير التلفزيون

اها كداا نت حرشتنى اقول اكتر
كمال افرو دا لانو فروض علينا يعنى ناس التلفزيون ديل اى زول حايم فى امدرمان بفرض علينا
اى مشجع كورة هايف يفتى فى اى موضوع
واى زول شال ليهو رق يبقا فنان
واى مشوكش قطع ليهو قصيدة

غايتو الله غالب

فى قناة الشروق
بنات غنايات وسمحات وصبوحات
فى تياب ليمونية
كوارل الاحفاد
اصوات جميلة ومضامين الغنا جميلة مع قضايا المراة وقضايا الريف


فى النيل الازرق حلقة جيدة مع فنانيين وزوجاتهم الهادى الجبل -عمر احساس-مجذوب اونسة-

من الكوارث ظهور مختار دفع الله ربنا يسترنا فى باقى الايام ما يظهر التجانى حاج موسى

لقاء فى النيل الازرق مع ود المكى
محمد المكى ابراهيم


كالعادة يطل علينا فى العيد خالد شقورى

بكرة الاتنين يا محمد في قناة الشروق ستكون هنالك حلقة عن أعمال مصطفى سيد أحمد من اعداد وتقديم عفراء فتح الرحمن .
الحلقه ستبت في تمام السابعة مساءاً بتوقيت السودان



-----------------------------------------------
كل عام وانتا طيب .

عيد اضحى مبارك
في فضائية السودان كان هناك لقاء حوالي السابعة من مساء اليوم لقاء مع الشيخ مهدي الطيب المكاشفي
الشيخ تحدث بالروح الطيبة للصوفيين وبسماحتهم وبخفة روح المتصوفين، من يتحينون الفرص للاساءة لمعتقدات ومذاهب الاخرين قد يأخذون اللقاء فرصة في محاولاتهم للنيل من الطرق الصوفية

فى العيد
دايرين نسمع غناء للزهور والجمال والطبيعة


شابكننا
دخلوها وصقيرا حام
سيوف واشلاء وصقور تنهش

ذوق عجيب

سلام يا فتحى
مصطفى يطرب ويشجى
لكن البت دى متفلقصة

سلام مهدى
ما شفتا اللقاء
رجال الطرق الصوفية فى السودان ونستهم جميلة واسلامهم سمح

كل عام وانتم بخير
غايتو انا زول BeIn بس
القنوات السودانية دي علا زوجتي
عندي كلها لي رداى دبنقا علا بيني وبينك
ماعندهم موضوع والمواضيع البجيبوها مابنجضوها
ياخ انا بتمني يكون في برامج تجمع الشباب لمحاربة
القبلية والعنصرية وعدم قبول الاخر
عنوان البوست ذكرني كتاب المطالعة وهاشم في العيد
ياخ انا رغم اني بحب الكورة السعودية اكتر علا العين
والوحدة الفريقين اللي بحبهم في الامارات باقي
انا زى شيخ عبدالقادر فى كل بلد سوا لو ولاد
في السعودية مثلاً:
والترتيب مهم
الاتحاد , النصر. الإتفاق , الرائد ,

طبعا مستحيل
التجانى حاج موسى ما يظهر

من ايام التلفزيون ابيض واسود

وفى كل الاعياد
الاضحى والفطر
عيد ثورة مايو
وعيد الانتفاضة
وعيد ثورة الانقاذ


هسا قاعد فى قناة الخرطوم

اخونا محمد سيد احمد

التلفزيون ده اختاه ايام العيد فاي برنامج معاه رنه عود وابوصلاح وابو رياح
وامبراطورية حسين خوجلي هو قاعد في الفيحاء ياكل تفاح
ومشاهدينو قاعدين في سوق العناقريب ام درمان ما لاقيين التكتح
ولسه معيشنهم زمن الخليل وبرامج توديك البحر وتجيبك عطشان علي قول الحلنقي عطشان والبحر جنبك.

تحياتي للعين وجبل حفيد والموية السخنة ومعتز ووالبشرى والتاج مكي وابو العايلة الشاعر الجميل.
العين الجميلة

سلام ابراهيم الفنان

انا طبعا ما محظوظ ما لافيتك فى العين


التلفزيون اختاهو كيف اقبل وين

غايتو جنس غنا

قبل شوية فى فنان اسمو ابوطالب
المذيع بيقول ليهو انت مختفى من الساحة

الاجابة

انا بعد ما نجحت محليا
هسا بفكر فى العالمية

لقاء جميل شاهدته فى قناة ام درمان مع الاستاذ الصحفى فيصل محمد صالح

ذكريات وحكاوى لطيفة واختيار جميل للاغانى


نادر ولد عثمان جمال الدين يغنى فى اكثر من قناة

برضو فى قناة كدا واحد اظنو ولد حمد الريح

برامج الفضائيات السودانية فى العيد فى غالبتها فاقدة للجاذبية ونمطية وتقليدية

من الاسباب
غياب الافكار الجديدة والجرأة فى الخوض فى اشكال جديدة وفى اختيار ضيوف جدد

ضعف القدرة الحوارية الغالبية من الشباب تعوزهم الثقافة الموسوعية يلتزمون باسئلة المعد التقليدية
يتم طرح السؤال ثم الانتقال الميكانيكى الى السؤال التالى وفى بعض الاحايين يكون الضيف قد اجاب على السؤال التالى ضمنيا

الانحيازات الساسية والايديولوجية تحصر الضيوف من لون سياسى واحد وتحظر استضافة شخصيات عامة ذات كفاءة ولكن تختلف فى الميول السياسية

التشابه فى اشكال البرامج الفضائية السودانية
الخرطوم
امد رمان
كسلا
البحر الاحمر
النيل الازرق
الشروق
قووون

التشابه فى البرامج والشخصيات والاسئلة ونوعية الحوارات وعبارات مستهلكة مثل ................نحيى فلان....وياريت نكون خفيفين ونقدم مايفيد...والراحل المقيم...شكل وجدان الشعب السودانى

تحيات لصاحب البوست والمتداخلين ...

القاسم المشترك في كل قنواتنا هو تشابه أفكار البرامج بالإضافةإلى
تكرار الضيوف ، يعني الضيف البتشاهدو في الشروق من المؤكد بعد يوم
أو يومين تلقاه منتظرك في النيل الأزرق ..!! وكأنوا السودان ده ما فيهو
وجوه غيرهم ...!!
يا خي ناس التلفزيون ديل ما إطلعو الأٌقاليم دي والله فيها كل أنواع الإبداع
ومن غير تكلف كمان ..!!!

تشابه القنوات السودانية يغيظ

قناة البحر الاحمر عندها برنامج تعليق على اقوال الصحف
نفس الصحف البتصدر فى الخرطوم
ويجى معلق سياسى عايش فى بورسودان يقول نفس كلام المعلق الفى الخرطوم

كل ما تظهر قناة فضائية سودانية اظن انها سوف تنهل من التعدد الثقافى الكبير والمتنوع فى السودان
وتفوز بريادة المختلف
ولكن الجميع قانع بصورة النسخة

مثلا

برنامج لقاءات مع ناس فقراء ما قدرو يجيبو خروف العيد

مش بطريقة نزوركم ونديكم شوية قروش او لجمة


لكن لعكس صورة الذين لا تقف عندهم الكاميرا

او برنامج عيدية فى معسكرات نازحين

الأخ محمد
لك التحية
قضيت معظم الوقت في البيت وكان التلفزيون قد أخذ الكثير من وقتي وقد خرجت بعدة ملاحظات وأود أن أوجز لك وللإخوة حسب رأيي ما يلي:
1- تشابه فقرات برامج القنوات. غالبية البرامج، طبعاً منوعات، تستضيف عدد من الشخصيات تتحدث عن موضوع ما والفنان جالس ليؤدي وصلته الغنائية كأنما لا رأي له.
2- تكرار الضيوف وكأنما القنوات أصبحت حكراً لشخصيات بعينها تتباهى باستضافتها حتى فقد أولئك الضيوف أي شئ يقلونه للمشاهد. مثال على ذلك الشاعر الكبير أسحق الحلنقي والشاعر التجاني حاج موسى. يضاف إلى ذلك كثرة تكريم رموز الغناء وتحديداً الفنان إبراهيم حسين والذي لاحظت تكريمه في ثلاث قنوات وفي وقت واحد.
3- السبهللية واللامبالاة في الزي والانضباط في المظهر من مقدمي البرامج. بالله عليك ملاحظة برنامج اسمه "دندنة" واحد مستضيف الفنان بلال لابس شنو؟ قميص سائب، كم طويل مكفكف إلى الكوع وكأنما هو ما يك تايسون. كيف أطيق ساعة أو ساعتين في مشاهدة مقدم برنامج أو ضيف وهو يخطف أقرب قميض وبنطلون من الشماعة ليتحكر في القناة دون احترام للمشاهد من حيث الإعداد والتهيؤ للقاء يشاهده ملايين البشر وفي كل أصقاع الدنيا؟ يجب على القنوات إلزام مقدمي البرامج والضيوف احترام ذوق المشاهدين. شاهد القنوات الأخرى ولاحظ الفرق بينن مظهر (وليس خلقة) مقدمي البرامج وضيوفهم وبين مقدمي البرامج في قنواتنا؟
4- تكاد القنوات تخلو من برامج التراث والبيئة والزراعة خاصة ونحن نعيش عز الخريف وتحديداً في مناطق كردفان ودارفور والنيل الأزرق والجزيرة وكأنما الأعياد هي ساحة للغناء فقط.
لك تحياتي،،،،
ببـــــــــــــــــو

سلام اخى اسماعيل

اتفق معك فى ملاحظتك
تكرار الضيوف
تقليدية طريقة اعداد البرامج يعنى كلام وفنان يغنى

ظاهرة الحديث فى القنوات السودانية مشكلة

الفنان يريد ان يتحدث بدلا من ان يكتفى بدور الغناء
ولاعب الكورة داير يتكلم
والمخرج داير يتكلم وفنى الصوت وبتاع الديكور والاضاءة
ومشجع الكورة الفالت يصبح استاذا للاجيال

معك ايضا فى ملاحظة ندرة البرامج التى تتحدث فى موضوعات هامة مثل الزراعة او البيئة او الرعى


اذكر من البرامج الجيدة فى تلفزيون السودان زمان

برنامج اسمو من الحقل

.

يا ود سيد احمد
لتفادي فقع المرارة وآلام المعدة الحادة!
اوصيك تخت قدامك جك "فلاجيل" بارد جدا


يا محمد سيد احمد انت تشاهد جانب من صورة المأساة التي نعيشها!

سوي دعا
.

سلامات يا محمد سيد أحمد
وعيد سعيد عليك وعلى الجميع

Quote: اول القصيدة الان على الفضائية السودانية مجموعة من النساء متعلمات ومثقفات فى النص قاعد كمال افرو المذيعة قالت استاذ الاجيال كمال افرو والله العظيم المذيعة لو شافت كمال افرو دا فى دار الرياضة ام درمان والالفاظ بتاعتو استاذ الاجيال دى اصلو ما بتقولا

أنا شوفتا جزء كبير من البرنامج دا.. كمال آفرو دا واحد متخلف..

ياسر

سلام سيف

ولا نسسى نصينا من المأساة حتى لو بالصور

شريف الغحيل

بالببسونة

شريف بالتى شيرت

شريف الفحيل حالق مارينز

شريف الفحيل بالباتم

غايتو اللة يحلنا من قنواتنا ومذيعاتنا

فى قناة الخرطوم

فنان اسمو عبد العزيز بقالة
قال اللقب لانى كنت شغال فى بقالة والنس بتجى تتفق معاى للحفلات فى البقالة

انطلق على لقب بقالة
انطلق على

مغاهو زول بتاع نكات بايخة
بيقول نحنا بنعالج الظواهر ونطرح حلول
مثلا اولاد ميكى ديل ظاهرة ونحنا بنسميهم الرخويات وعمل حركات راخية

وحكى مرة ود ميكى دخل حمام نساء
النسوان كوركو راجل راجل
قال ليهم وينو

الثقيل دا قال بيعالج الظواهر

شباب النكات سوق بضاعتهم المسمومة رايج

استضافات فى كل القنوات

يهرفون بما لايعلمون فى كل الموضوعات
ثقافة الشعب السودانى عاداته تقاليده قيمه

عند بدايات ظهورهم بيكونو رقاق
بع د سنة سنتين
كل واحد عمل فقرة من اكل الفنادق وحفلات العرس
واللمعان واستخدام الكريمات
والجلسة المحكرة فى التلفزيزن وثقة شديدة وهو بيقول كلام فارغ

نكاتهم السمجة تكرر باستمرار

اول امس سمعت نكتة بذيئة عن واحد من اولاد ميكى كما يقولون فى التلفزيون وفى نفس الامسية واحد من فرقة
تيراب يلقى هذه النكتة الفجة فى حفل عام فى النادى السودانى فى العين

ما تموها وجابو حرم النور تغني ترسو البحر صددوا ؟؟

Quote: كمال آفرو أستاد الأجيال

هاهاهاهاها
سلام يا محمد سيد أحمد

سلام طلحة

انت بخبرتك الرياضة

طبعا بتعرف نوع كلام استاذ الاجيال البيقولو فى الاستاد

معقولا بس يا سيف الجامعة

فل سوت وكرفتة

مع جزمة قماش من غير شراب

برنامج همس القوافى تقديم الشاعر ود مسيخ

مجموعة من الشاعرات

اشعار جميلة استمعت لشاعرة استخدمت مفردات تراثية عامية بقصيدة جيدة

ثم اشعار بكلمات عادية وبسيطة بثثن فيها روح الشعر

الحوار ايضا بسيط ومريح من الشااعرات المبدعات

امس برضو
التجانى حاج موسى متحكر فى برنامج للحديث حول الشاعر الراحل محمد عثمان ابراهيم

قال انا هنا نيابة عن الشعراء

ينوبك ثواب يا اخ حل عن سمانا

الشاعر هلاوى منتشر جدا بحكم اصلو هو شغال فى التلفزيون


الممثل الكوميدى محمد عبد الله ممثل جيد وكوميدى لطيف
لكن فى يوم واحد ممكن تشاهدو فى 4 قنوات فضائية
اعمل حسابك من كترة الطلة