خط استوا الطعم المريح

يا بت يا ضو
لأنك اجمل لون فى اللوحه
حتى النيل لو عايز يضحك
بنده ليك
ينادى عليك
وياخد منك طعم الفرحه
وحتى المطره
بتاخد اسمك
وتلبس رسمك
بدل الطرحه
وهناك بعيد مع غيماتها
تنضم وتقطع فيك
فى ونسات الجو
يا بت يا ضو
أجمل حاجة بتظهر فيكى
إنك شاتله
زهور البهجة فى دنيانا
وإنك غارسه
روح المعنى جوه غنانا
يا بت يا احلى بشارة بهيه
يا بت يا اسمح طله نديه
مقيل ضحويه
ونسة حلة
سعاده سخيه
عسل الضحكه الدافق جاى
ومنك يسيل
عقد الدهشة الفيك منضوم
سهم مرسوم
فى نص القلب القاعد
فى طرف المنديل
يا بت يا عيد
كل ما تطلى وتانى تجينا
يبقى عنوان جيتك فينا
مناره فى الأفق الفسيح
نشوفك فينا
بهجة دفينه
بشارة للزول البعيد
سافانا من رونق بهاك
خط استوا الطعم المريح
غابات تقالد فى المطر
وديان نشيد
نشوان مليح
منقوشة بى فرح الشجر
غيمات وريح
يا ضونا
فتحتى أبواب السكات
لونتى ابواب الكلام
ترياق يشيل وجع الأرض
يسقى الفراش
نخب الرحيق
نورتى ارض الأمنيات
وزرعتى تيراب البريق
و باكر يقوم
جنة فرح
بستان مستف بالنجوم

يا بت يا نيمه
يا اجمل ُضل
وجيتك غيمه
رذاذ ودعاش
يا ماليه الفجة حدائق فُل
يا مرتبه وقت الناس
و مهندمه حس الدنيا
رقة واحساس
و معطره صوت الغنيه
ندى وايناس
يا بت يا معنى
شايفنك طالعه من دهشة ناس
تعاين فيكى وتتمنى
لأنك وارده
وادى الطعم الأخدر
ولأنك شارقه
اللحظة معاكى
بتصبح أنضر
ونحن حداكى
نفرح نسكر

ونسعد اكتر

Quote: سهم مرسوم فى نص القلب القاعد فى طرف المنديل

عندما كان الحب بريئاً... هناك كتبت المعاني المبهجة... برمزية القلب الجريح بسهم النقاء

لذلك عندما مصطفى مضوي ( منديلي راح ) ما كان غلطان...

كيف الحال يا عبد العزيز

مشكور ياخ على الجيه والمشاركة

أحمد محمد الشيخ الشهير ب الجاغريو
عنده أغنية "منديلى ضاع منى"

الشاله ما يتنى
ما يشيل خلافه

اتسمعت واتعرفت بصوت واداء المبدع خلف الله حمد

وفيها بدعى على الزول الشاله

هل هى نفس الأغنية الذكرتها انت ؟

ولا فى مناديل ضحايا تانية

ههههههههههههه

لا .. لا
ياها زاااتها .... نحن اول ما سمعناها كانت بصوت مصطفى مضوى

الحمد لله طمنتنا يااااخ ... أتاريك من زمن حفرو البحر ...

اسمع ... حفروهو بشنو ... طواريء، ولا عيادات خارجية


إزيك يا ماطر

إنا لله,,,,

مطر الرشاش الرشا..


او هكذا يكون الجمال,,


تحية بطعم خط استوا الطعم المريح..

محمد خليل
صديقنا الجميل

تحايا ليك انت
بكل نكهات الطعم الحلو
المدارية والإستوائية

كيف احوالك

انت قايل يا عبد العزيز
السرق منديل الجاغريو منو ؟

انا السرقته

بس ما تكلم زول بالموضوع ده

مافى زول حفر البحر
وموية البحر دى كلها قالو عبارة عن دموع الناس

كانو ببكو بعد ما عرفو انه نزلوهم من الجنة

يعنى لا طوارى ولا عيادات خارجية

قسم العيون

ههههههههه

شغل مبهج جداً مليان شاعرية وموسيقى



تحياتي، محبتي واحترامي

البلال

كيف الحال

حتما الشغل بقى كده
واتملا بالحاجات السمحة دى

بعد ما شافك انت ولقاك

ازيك يا شاعر
يا زول يا سمح