بروق الشوق ... جديد الكلام

جديد الكلام ....

بروق الشوق ...
............................................

هلّت بروق الشوق
قبل الخلوق ما تفوق
قبل الشمس تطلع تدي السلام من فوق
قلت ليها يا بنية فتي ورحلتي بعيد
سبتي العشم مخنوق
سبتي القليب مشنوق
بين المني وصمتك
وبين الوفا الممحوق
وبين الفراق المر
ودمع الأسي المحنوق ..
بين احتراب الروح
وجوف الحشا المحروق
تعالي نكون سما وأطيار ..
تعالي نغني غنوة فال
تعالي نسربل الآمال
ونتماسك علي شط الأماني وصال
ونتعاهد علي الفكرة ..
عشان خاطر عيون أطفال عشان بكرة
عشان أجيال تعدل العترة بالخطوة
ونتكاتف ونمشي السكة لي قدام
يضلل فوقنا ألف غمام وسرب حمام
وسحر نغم وصدق كلام
علي شط القلم والوردة والأحلام
تعالي نجمّل الواقع
تعالي نطرز الأيام
لا آلام ولا هدّام
لا كاتل ولا مكتول
لا معبور ولا محزون
نهدهد دمعة المغبون
ندوبي الفرحة شتلة ولون
ونهديها الجمال موال ونقدل في مرافيها
يطل ( الدوش ) مع الموجة الصباحية
يجمل للحزن ممشي مع الدهشة
يحجيها ويدوبيها
مع الضل الوقف ما زاد ..
كما النخلات كما الغنوات ..
كما النيل الرثاهو وفات
يناجيها ويناديها ..
ويعزم كلو زول يرتاح علي ضحكة عيون فيها
ويعزم كلو زول يرتاح علي ضحكة عيون فيها
..............................
( بريقع )