يا مجلوبه من ضى الشموس

يا مكتوبه
روايه فى اللوح الأمين
ساكنه فى طين النفوس
مرتبة زى دعا الأمات
وطيبه زى جود السنين

يا مجلوبه
من ضى الشموس
معطرة بى غنا النجمات

عشان مصلوبه
روحى على الحنين
راجيه غيمك من امس
طعم الرذاذ الراح وفات

جات محلوبه
من نبع الأنين
حردت رضعة النيل السكن
بين المشاوير والبيوت
خلت موية المطر الحرن
قسم سحابو
على مسافات السكوت

عشان مطلوبه
جيتك يا بنيه ورجعتك
قبال غروب الروح
قبال شفق فرح الغنا
يزعل يفوت
امرقى وشرى فى حبل الحروف
لبس باكر
هدوم العيد
امرقى ورتبى الفجة
عطرى الناس بى سناكِ
ومشطى شعر الجروف

وعشان مرغوبه
شوفتك يا بهيه
امرقى اقيفى قدام الصفوف

عشان محبوبه
طلتك البتفتح للفرح
كل الظروف
ابقى الحديقة
العصافير والفراش
بستان وئام
دانى القطوف
ومافى غير وجهك حقيقة
والناس وافواج الزحام
القصائد والمدائح
الحجا وعطر الكلام

حولك يطوف
حولك نطوف

يا مطر..

صنعت مسائي بالمجلوبة من ضي الشموس,,

وانا ذاهب لانام غرير العين..كأبني ابراهيم..

فسأغمض جفني على رنين هذه الموسيقى التي اطربتني حتى الثمالة..

دم بخير يا مطر..

محمد الخليل
صديقنا الجميل

كل مره ياخ جيتك بتفوح عطور
ويعم الطيب فريقنا

وكمان يتبل ريقنا

تطيب ايامك يا ابو حميد
ويسعد عمرك

قول آمين