يا مارق من روح الطين
يا مليان بالضو
ويا طالع من فكرة إنك
عالى و ماهل
أقرب لون فى لوحة أرضك
قاعد فى هامات الجو
وأصعب حاجة بتطلع منك
إنك ساهل
يا شاسع
طعمك صلصال النيل
ازرق زى صبحية العيد
اخدر زى الحلم الواسع
واطعم من حجوات بالليل
ونسة حله
نداوة طله
قمره حنينه
كرعيت وشليل
ومرقة عصريه
سهم مرسوم
فى نص القلب القاعد
فى طرف المنديل
تعال يا نيل
خلينا حداك
نفرش ضلنا
تعال يا نيل
ضفِّر مساير قصتك
ورينا كيف وش الفرح
خلينا من وجع الحريق
هبهب نسايمك عِمنا
وعطِّر بِنيات الفريق
تعال يا نيل
خلينا نفرش ضلنا
قسم بليلة فرحتك
خلينا نآكل كلنا
ورينا فرقات الطريق
شتت تميرات ضحكتك
كرامة للبلد المليح
انسج خرائط فكرتك
نشوانه بى عيون ملهمه
خط استوا النضم المريح
سافنا من خضرة بهاك
صحارى تنده فى السما
وديان حنين
مسقيه بى ريق الوئام
غيمات وريح
يا ضونا
افتح مسامات السكات
خت الكلام
ترياق يزح وجع الأرض
فِج عتمة الدرب الضهب
نوِر ضلام الأمنيات
واغرس تواريب البريق
شان خاطر النيل والتعب
باكر تقوم
شلال غيوم
موكب نجوم
لا حر يجينا ولا سموم
وباكر نقوم
وحداك نفرش ضلنا