مسافر السودان: عليك الله عندي كيس صغير شيلو لي معاك

يا أخوانا هوي:
مافي زول بيسافر السودان ووزن عفشو ناقص ... الا يكون في سفرة مفاجئة !!
أي زول بكون مسافر عفشو بكون قدر المسموح بيه أو زيادة
وبالتالي أي كيلو حا يدفع حقو من من جيبو

آخر سفرة لي اضطريت ادفع حوالي 100 دولار لزوم الوزن الزايد للعفش ( ناس انا ما بعرفهم اصلاً .. بس اصحاب اصحابي) رغم انو حقيقة وزن العفش بتاعي كان بالظبط قدر حقي القانوني.

ايمن محمود
انت من زمن الوزن الزائد!
الان الحساب بالقطعه والزياده 500 ريال ومضاعافاتها

Quote: سفرة لي اضطريت ادفع حوالي 100 دولار لزوم الوزن الزايد للعفش ( ناس انا ما بعرفهم اصلاً .

!!!!!!!!

في حد فاصل بين الطيبة والساذجة بين المرؤة والغباء هذا الحد الفاصل تحدده فراسة مقدم الخدمة فهناك أناس يمكنك الإعتماد والوثوق في كلامهم وهناك آخرين يستغلون طيبة الإنسان بالقدر اللي يلبسوك فيهم الطاسه.
ذات مرة والممرات كثيرة وفي أثناء مروري في إحدى المطارات الخليجية طلب شخص سوداني من شاب سوداني مسافر ولا يحمل أمتعة أن يتكرم عليه ويحمل له جهاز كمبيوتر محمول وجهاز موبايل واحد فقط فلم يتردد الشاب في قبول الطلب لكنه قبل أن يقوم بحمل الأشياء طلب من الرجل مبلغ من المال ربما يقارب المائتي دولار أمريكي ، إستغرب الرجل وحاول إثناء الشاب عن طلبه غير المعهود في السودانيين لكن الشاب إزداد تمسكا بموقفه وإندهشت لبعض الوقت ، ولم تكتمل العملية بالضرورة لإمتناع الرجل عن الدفع وفي المقابل رفض الشاب أخذ الأشياء معه ، وأثناء جلوسي في صالة المغادرة شاء الأقدار أن أكون بجانب الشاب بطل القصة فبتسمت في وجهه فقال لي حينها أن هذا الرجل وأمثاله يتاجرون بهذه الأشياء ويحققون مكاسب من وراءها والحال كذلك لابد أن يكون لي نصيب أو حصة من الأرباح حيث أنني أقوم بالتوصيل ، وقلت له ماذا لو دفنت دقن وطنشت ولم تقم بالوفاء بتلك الأمانة ضحك وقال لي أولاً قبل أن تضع قدمك في أول درجة من درجات سلم الطائرة في مطار المغادرة يكون الرجل قد قام بإرسال وصف دقيق لك للشخص الذي يقوم بإستقبال البضاعه محطة الوصول ، إستهوتني القصة وتذكرت مقطع في أحد الأفام السينمائية عند قام البطل بلبس معطفه من الجهة الأخرى ذات اللون المغاير للون المعطف ونجحت عملية التمويه فقلت للشاب ماذا إذا ؟ فقال لي يا عمك ما تتعب دا لو وصلت معاهو لإتفاق بحمل البضاعة حا يشوتك من أى زاوية بالكاميرا ويقوم بإرسال صورتك للفانيل ديستنيشن بالواتساب.
غايتو البشيل فوق الدبر ما بميل لم يعد موجودا لأن الكثير منالظروف تغيرت كما لمن أشيل ما تدفع حق الميزان ، يعني مش كفاية أنا حا أتعطل بسبب هذه القطعة الزائدة وأنتم أدري من غيركم بالمعاناة في مطار الخرطوم ومازاد الطين بلة هو إذا كان من ضمن هذا العفش أي جهاز إلكتروني يقوم العمال والمسئول عن جهاز الإكس ري في خارج الصالة بكسر الشنطة وبس حدث الأمر معاي في يوليو الماضي ولم أجد من أتحدث معه أو أشكو إليه.
Have a pleasant flight مالكم برره (دي بالأمهري) لعيون زبائن Ethiopian Airlines

الملا عمر سلامات
قبل خمسة سنين كنت مسفر قريبي من مطار دبي وقريبي حاجاتو كلها شحنها وماشي فاضي ... اها لما فينا واحد وقال الا يشيلو لابتوب
.. انا رفضت الفكرة بس قريبي قال ما مشكلة وشال اللابتوب وادى الزول رقمو في السودان ...
أها لليلة الزول بتاع اللابتوب ما اتصل واللبتوب موجود (شكلو ضيع الرقم)
-

Quote: Have a pleasant flight مالكم برره (دي بالأمهري) لعيون زبائن Ethiopian Airlines

ايه رايك انا الاسبوع الفات حاجز بالاثيوبية

Quote: !!!!!!!

يا مسلمي لو انت خايف علي ... اطمئن
انا ما بشيل حاجة ما متأكد منها نهائياً ... وبعدين حرم تاني غير الورق والادوية ما اشيل حاجة لزول الا بمزاجي
-
وصلتو وين في دامس؟

يا

Quote: الان الحساب بالقطعه والزياده 500 ريال ومضاعافاتها

شايف بعض الخطوط بتحاسب بالطريقة دي - بس ما عارف الحكاية عند بعض الخطوط والا كلها - المهم الموضوع فيهو عوجة شديدة
قبل تلاتة شهور اضطريت انقص من الاشياء بتاعة الوالدة عشان اقدر اضيف ليها حاجات ناس !!
المشكلة الكبيرة انو في ناس بتزعل حقيقي لو ما شلت ليها

والله يا ايمن قمة الاحراج ..

ما بتحصل إلا بين السودانيين

واحد يقول ليك عندي كيس صغيييروني ....يجيب ليك كيس وزنو 5 كيلو..

خيط مهم

ننصح الاخوة المسافرين بعدم حمل اي شي لا يخصهم شخصياً


في ناس ضمايرها مرتاحة وبترتاح اكتر لما زول يقع في مشاكل باعتباره فتك ومرق منها




شكرا

Quote: الملا عمر سلامات قبل خمسة سنين كنت مسفر قريبي من مطار دبي وقريبي حاجاتو كلها شحنها وماشي فاضي ... اها لما فينا واحد وقال الا يشيلو لابتوب .. انا رفضت الفكرة بس قريبي قال ما مشكلة وشال اللابتوب وادى الزول رقمو في السودان ... أها لليلة الزول بتاع اللابتوب ما اتصل واللبتوب موجود (شكلو ضيع الرقم)

يا أيمن في آخر إجازة لي للسودان في شهر فبراير الماضي .. أها جيت داخل صالة المُغادرة بمطار الملك خالد بالرياض .. ومع دخلتي كدا جاني واحد هاشي وباشي وشايل معاهو لابتوب وقال لي ياخي أكلفك بس تشيل لي معاك اللابتوب دا وحيستلموا منك واحد في مطار الخرطوم.. قُلت ليهو مافي مُشكلة .. سجّل رقمي بتاع السعودية ورقم أخوي في السودان وسجّلت رقمو ورقم المُستلم وقبل ما أمشي منّو استغربت قُلت الزول دا وثق فيني كيف فقمت سألتو: يا ابن العم هسي إنت ضامني كيف ما أعمل نايم باللابتوب دا .. فقال لي بابتسامة نحن ناسنا بنعرفهم من ملامحهم .. قلت ليهو شكراً ليك وعشان ثقتك دي حقّو أعمل رايح عشان تاني تثق كويس .. ضحك وودعني ...

الغريبة أوّل ما طلعت من صالة القدوم بمطار الخرطوم وقبل اتّصل على المُستلم جاني براهو وسلّم علي وفتح لي سيرة اللابتوب الوصية وكدا .. أها قُلت ليهو فعلاً إنتو بتعرفو ناسكم .. بس المرّة الجايا ما يصادفني بتاع مُخدّرات ويقول لي بنعرف ناسنا



ــــــــ

شوف ديل يا صبري

- مرة (لما كنت بشيل حاجات للناس) كنت شايل لي وصية (موبايلات) على اساس انو في واحد حا يستلمها مني لما اصل ..
أها وانا طالع من الصالة بتاعة القدوم وقبل ما اطلع ناداني واحد باسمي (أيمن ... أيمن) وقفت ليهو ... قال لي انا صاحب الوصية
لثواني صدقت طوالي انو ده صاحبها فعلاً ... بس قلت أتأكد ... قلت ليهو وصية شنو؟
قال لى مش انت جاي من الشارقة ومرسلن لي معاك وصية؟!! قلت ليهو المرسلها منو؟!!
صاحبنا انسحب طوالي وقال شكلو ده زول تاني ... وزاغ جوه الصالة (شكلو محتال) ... وفعلا اتضح انو صاحب الوصية زول تاني !!

- المرة التانية واحدة ادتني موبايلين من جوة مطار الشارقة وشالت رقمي بتاع السودان وادتني رقم واحد في السودان وقالت انو حا يتصل علي (أدتني اسمو) وحا يستلمهم مجرد ما اطلع من الصالة
وفعلاً مجرد ما طلعت ندهني بأسمي وقال لي انا فلان الفلاني ووراني رقم موبايلو وانا اديتو حاجاتو ...
أها مجرد ما وصلت البيت اتصلت علي واحدة في الموبايل وقالت لي عايزين الوصية المرسلاها فلانة !!
قلت ليها الحاجات دي استلم واحد من باب المطار !!
رجعت اتصلت تاني وشاكلتني ليه اديتم ليهو وما عارف شنو ونقة كتيرة
اها من ديك حرمت اشيل من زول في المطار الا ورق بس !!

Quote: واحد يقول ليك عندي كيس صغيييروني ....يجيب ليك كيس وزنو 5 كيلو..

يا ياسر انت الزول الرسل معاي كرتونة اسبيرات الكورلا والا شنو
قبل سنتين ونص حصل معاي المنظر ده بالظبط ..
يا أيمن ياخ عندي صاحبي عندو كيس صغير ما بجيب كيلو ممكن تشيلو ليهو ؟
المهم القصة انتهت بكرتونة صغيرة بتاعة اسبيرات كورلا

ايمن سلام

مره كنت في مطار القاهرة وجاني واحد قال لي عندي كرتونة صغيرة عايزك تسلمها لواحد في السودان

وبداء يتكلم انها كرتونة صغيرة والزول حايجيك بعد تطلع من الصالة طوالي وقعد يحنك فيني المهم رفضت نهائي

وبعد ركبت الطايرة لقيتو هو زاتو مسافر معاي في نفس الرحلة

اها دا تقول عليهو شنو ؟؟؟؟؟؟؟

ايمن بوستك دا تبيع ؟؟؟؟

وتقبل كامل احترامي

Quote: رجعت اتصلت تاني وشاكلتني ليه اديتم ليهو وما عارف شنو ونقة كتيرة اها من ديك حرمت اشيل من زول في المطار الا ورق بس !!

ياخي دي لذيذة .. ودا حالتو هي ما داخلة في الصورة من طرف المُرسل .. غايتو لو كانت داخلة كانت وصلتك في بيتكم :)

ـــــــــــــ
وهاك دي:-
أوّل إجازة لي جيت بالباخرة عن طريق سواكن .. وطبعاً في الحالة دي ناس المراسيل ما بقصّروا باعتبار إنّو وزنك وزن فلاديمير كليتشكوand#8236;‎ .. فبقوموا يمتّروا ليك شنط من الوزن التقيل ...
واحد أدّاني وصية كسوة كاملة للأسرة الزوجة والأبناء بنين وبنات .. ورحلتي كانت عبر الأسكلا .. تنزل في الحصاحيصا وتستلم عفشك تاني يوم أو تالت يوم (ما بتذكر) .. أها نزلت ومشيت رفاعة وجيتم تاني يوم .. قووم يا عمّك تلقى الشنطة بتاعة المُرسال (مشى وما جا) ما تلقاها .. وبعد ذهاب وإيّاب رفاعة الحصاحيصا .. وجوطة شديدة مع الموظفة القاعدة في المكتب (غايتو لو ما كانت سمحة كُنت رشيتا بونية) لكن خفت أشوه ليها سماحتا ساي .. أها قومي وقولي لي شنطتك إتلخبطت مع شنطة واحد تاني من الهلالية ولاّ وين ما عارف .. قُلت ليها الحل شنو .. قالت لي هو الاتّصل وقال بجيبا في أقرب وقت (يعني لو ما هو اتّصل الشنطة كانت راحت شمار × مرقة) قُلت ليها خير .. أها ومن تاني يوم أنا شغال مواصلات رفاعة الحصاحيصا لقرابة الأسبوع وناس الشنطة شغالين اتصالات وزيارات لحدّي ما اتصلت علي الموظفة وقالت لي الزول جابا .. وبعد ضياع الأسبوع الأوّل مع الشنطة والأسبوع التاني مع الفواتح .. قُلت تاني لي روحي دي ما بشيل لي حاجة .. لكن تقول شنو زعلة وفكّت ورجعت حليمة لي قديما :)

فقط ادوية منقذة للحياة ممكن .... غير كدة معليش .

Quote: فقط ادوية منقذة للحياة ممكن .... غير كدة معليش .

ممكن تاخد فيها اعدام عااااادي


في ادوية محظور تداولها باعتبارها مخدرات وتصرف بوصفات طبية مراقبة .......... بعدين ما بنفع جابها لي واحد و و و و و

شوف دي يا ايمن (بما انو انا ما عندي اسلوب سرد مقبول)

مرة كنت مسافر اضطراري ومعاي اولادي وكان عندنا وزن زايد
وصلنا مطار الملك خالد الفي الرياض دا

بس اول ما نزلنا جاتني ليك واحدة قالت لي يا ودعمي ابوي مات وعليك الله تشيل لي العفش دا لأنو وزني زايد عليك الله
قلت ليها ما بشيل (لأنو انا من موضوع الشباب بتاعين جدة القبضوهم بالمخدرات ديلك قررت ما اشيل لي اي بشر اي حاجة تاني)
المهم اصرت علي اصرار شديد لمن ام العيال دخلتها الغيرة على ابو عيالها وجارية واري المطار كلو
في النهاية شلتهم ليها لكن تصدق لمن الطيارة قامت بينا ما لقيتها في الطيارة نهائياً
وكان في واحدي مسافرة معاها هي الاستلمت العفش

يعني كانت تاجرة ووزنها يمكن كان اكتر من 100 كيلو لأنو كان عندي تذاكر اولادي

Quote: آخر سفرة لي اضطريت ادفع حوالي 100 دولار لزوم الوزن الزايد للعفش ( ناس انا ما بعرفهم اصلاً .. بس اصحاب اصحابي) رغم انو حقيقة وزن العفش بتاعي كان بالظبط قدر حقي القانوني.

الاخ العزيز أيمن محمود
سلام

حصل في رحلة من كوالالمبور دفعت 700 دولار أمريكي منها 550 عفش ناس آخرين..
100 دولار دي جاتك بسيطة ياخوي...
................................................................
يندر أن أكلف شخص بأن يحمل لي شيئا الى السودان .. فقط الكاش
................................................................
وحكاية هاك شيل لي ده ودي
بطالع في صحف اليوم وفي خبر عن محاكمة أثنين بعقوبة تصل الى الاعدام..
نيجيري جاء التقى صاحبته هنا التي استقبلته وذهبت الى الفندق ومن الفندق حملت الشنط مرة ثانية الي سيارتها..
وقبضت عليها بواسطة الكلاب البوليسية ووجد أن بالشنط نحو 2 كيلو مخدرات (أكثر من 250 جرام عقوبتها اعدام)
و دلت الشرطة الى صاحب الشنط..
المسكينة اذا كانت لا تعرف محتويات الشنطة تكون قد أعدمت نفسها بغبائها


تحياتي

شكرا الاخ عمر عبد الخالق سعيد للتنبيه
وازيد من نافذة الفيس بوك مشاركة الاخ

Quote: ما تشيل الا الادوية المنقذة للحياة بعد الكشف عليها في الجهة المختصة في المطار وايضا المستندات المهمة بعد الاطلاع عليها ...غير كده (كو )