انحسار حالة فترة الخطوبة الطويلة

في زماننا هذا أصبحت السمة اللازمة للارتباط هي أوّل ما تفتح خشمك احتمال يعقدو ليك قبل ما تصمّو تاني يعني حار حار .. بس تفتح خشمك تتلفت وراك تلقى المأذون شايل دفترو وصارّي ليك وشّّو (زي بتاع عدّاد الكهرباء زمان) وطبعاً الزغاريد بتكون already انطلقت قبل ما تفكّر في البت ذاتا هي منو

لاحظت يا رفاق في الكثير من الزيجات مؤخراً شبه الاختفاء لفترات الخطوبة الطويلة .. يعني لو جاملوك كدا لن تُكمل أربعين يوماً (وفي رواية أخرى ليلة )


السؤال: الشفقة لزومها شنو .. وأيّهما أفضل .. تسريع الزواج أم فترة خطوبة طويلة ليدرس كلا الطرفين الآخر ؟

مرحب مجددا اخ صبري
حقيقة يجدر بك القول بأن الشغلة رجعت لي اصلها و سابق عهدها
لان فترة الخطوبة الطويلة دي من افرازات العولمة و كدي و من المعروف تاريخيا و ثقافيا الزواج عندنا كان زقلة بصلة زي ما بقول اخونا احمد الحمري ربنا يطراهو بالخير
او بلنتي بس طاخ و قون
لكن مع الانفتاح و الاغتراب و انتشار التلفزيونات في بداية الثمانينات ظهر ما يسمى بالخطوبة بشكلها الغربي و نظام الخاتم و البت مخطوبة و خطيبي جا و خطيبي جاب لي و انا و خطيبي
و ازداد ولع الفتيات بالخطوبة و الخطيب و اصبحت الخطوبة في حد ذاتها ارتباط اشبه بالزواج و مع زيادة الانفتاح و القنوات الفضائية و المسلسلات و الاغتراب اصبح الخطيب في كثير من الاحيان سيد بيت و لما يجي عاادي عند الكثيرين بيختلي بالفتاة ( مااااا خطيبي و كده كمان فيها شنو ؟؟)
ثم ما لبثت ان اصبحت وسيلة لتضييع الزمن و استغلال الفرص و اصبح بعض الشباب حينما لا يجد فرصة للقاء احداهن او التقرب منها يقوم بخطبتها ثم يفعل بها ما اراد و من ثم يتركها بحجة انهم ما نفعو مع بعض و كده
و عندما يتم رمي الفتاة المخطوبة تواجه مشاكل عديدة في الفوز بخطيب اخر او عريس جاهز بحسبان انها كانت مع احدهم سابقا داخلة و مارقة معاهو و كده
ثم انه و قد كثرت الاحداث في هذا الشأن و البلاوي المتلتلة و ما خفي اعظم فقد تنبهت الاسر لهذا الخطر اخيرا و اصبحت لا تثق في الخطاب الاستراتيجيين ، لست ادري هل هو خوف على مستقبل الفتاة ام من اجل الوضع الراهن الذي يحتاج مساهمة زوج البنت العاجل في المعيشة
و يبدو ان الأسر و أولياء الامور شافو العجب العجاب في قدر ظروفك و الكافتيريات على النيل و الاسواق لذلك اصبحو يفضلون نظام التاكتيك او التيكي تاكا البرشلونية
....

بعدين دراسة اخر شنو نحن زمان كان الواحد يجي من الشغل بي هدوم الشغل بيعقدو ليهم تقول لي دراسة الاخر و ياهو ده الحمد لله كنا نحن نتاج هذه الزيجات المباركات و هل تعتقد انو في اجيال افضل من اجيال
السبعينات و الثمانينات ؟
الواحدة تقول ليك انت من ياتو برج العقرب و لا الجوزاء عشان انا من برج الحمل و قالو الزواج من برج الدلو احسن !!!
و تقول ليك انت بتحب ياتو لون لانو انا بحب الفوشي و حتى صاحباتي
ياخ معقول ؟

الماذون خلف الستارة .....
والطُوَلْ فيها الهُوَلْ ....