ولا زلت أحبك أيها.................

الوطن..... واليوم تفصلني عنك خمسة وعشرون عاما باالتمام وهي اخر مرة كنت فيها علي ترابك الطاهر لألج بعدها لا اختيارا بل اضطرارا هذا المنفي الكبير مثلي ومثل الاف وربما ملايين من شعبي العزيز اضطرتهم ذات الاسباب القاهرة الظالمة للهجرة القسرية خارج ترابك العزيز وكلهم لا زالوا يحملون الوطن في وجداناتهم وخواطرهم وهم يحسنون الانتماء اليه في افضل حالات البذل والعطاء والصمود كي يعود وطنا عامرا بالحرية والديموقراطية والعدل والاخاء والنماء والسلام... وأمنياتي للجميع بصمود وثبات علي المباديء موحدين تحت راية نضال واحدة تحت شعارات وافكار ومواقف موحدة تمثل القاسم المشرك الموحد لكل اهل السودان وهي تعبر عن تطلعاتهم ومصالحهم بمختلف مشاربهم الدينية والثقافية والاجتماعية وهي السبيل الوحيد للتخلص من طغمة الاجرام والفساد وأعداء الانسانية والي الامام.

الوالدة متعها الله بالصحة قالت لي : ( اشارطك ما حتعرف درب البيت من المطار) لان كل المعالم المخزونة
في الذاكرة انطمست مع زخم العمران الجديد! 

يا الناظر..
إيه رأيك تجي عيد الأضحى وتلاقي الوالده وتمشي (نعيمه) وتدرع العراقي وتشنِّق الطاقيه
وتديها كسره بنعيميه وشيه بالشطه وشاي كاااارب ونومه في كرَّاب ..
والله يا هشام أصلو ما حاتندم ..
سويها هسه الدنيا ما مضمونه..
ما تبعزق العمر ساي..
قرب تعال ما تبتعد..
رغم التتار لكن السودان ما بتلحق..
أهو بعدبن ما تقول لي ما قلت لي..[/green

الأخ الحبيب هشام ..

يا لها من كلمات .. ويا له من شعور ..

تعرف يا هشام .. حقو نعمل رحلة سوياً الى السودان ..

عشان ما نجتر الذكريات القديمة ..

يا حليل السودان .. بناسو الطيبين ..

لاكين .. ما عارف .. تفتكر .. الشعور حيكون .. زى زمان ..
أنا شايف .. للأسف .. الأجيال الجديدة دى اتشربت بموية من نوع تانى ..
موية مليانة تعصب .. التكفير للغير ..
غايتو .. الله يرحم ناس زمان .. وسودان زمان ..

المهم .. ابقى عشرة ..
والرب يبارك حياتكم وحياة أسرتكم الغالية ..
أخوكم العجوز ..
ارنست
+++

الحبيب عاطف ارنست

Quote: حقو نعمل رحلة سوياً الى السودان .. عشان ما نجتر الذكريات القديمة .. يا حليل السودان .. بناسو الطيبين .. لاكين .. ما عارف .. تفتكر .. الشعور حيكون .. زى زمان .. أنا شايف .. للأسف .. الأجيال الجديدة دى اتشربت بموية من نوع تانى .. موية مليانة تعصب .. التكفير للغير .. غايتو .. الله يرحم ناس زمان .. وسودان زمان .. المهم .. ابقى عشرة .. والرب يبارك حياتكم وحياة أسرتكم الغالية ..

يا حليل سودان زمان يا ارنست ده راح اكلو التمساح.............وين تاني ارجع وبالله سلم لي علي العيال واهديكم كوكب الشرق في خرطوم زمان

Quote: إيه رأيك تجي عيد الأضحى وتلاقي الوالده وتمشي (نعيمه) وتدرع العراقي وتشنِّق الطاقيه وتديها كسره بنعيميه وشيه بالشطه وشاي كاااارب ونومه في كرَّاب .. والله يا هشام أصلو ما حاتندم .. سويها هسه الدنيا ما مضمونه.. ما تبعزق العمر ساي.. قرب تعال ما تبتعد.. رغم التتار لكن السودان ما بتلحق.. أهو بعدبن ما تقول لي ما قلت لي..

سعادة مولانا المستشار

انا عاوز الرجعة بس بعراقي ساكوبيس في الجيب الفوقاني ( طرادة ) بس وسروال دبلان وعمة سادة مش عمة ( راشد دياب) وسفنجة قمر بوبا وطاقية ( سودانية) حمراء مش طاقية تشادية ولا اندونيسية مع ريحة ( صاروخ) وسيجارة برنجية علي الاضان الشمال وراكب من المطار حتي نعيمة علي ( تندة تيمس) بشرط المكنة من غير كوز وعاوز نعيمة من غير ( ستالايت وتلاجة) بزير ساكت من غير ( كوز) وناس سمحين وغلاد ومستقرين وفرحانين وعنقريب هباب وصورة سيدي ( قوقل) علي الديوان بدلا من صورة سيدي (الصادق) وقهوة بشرقرق وسواحة مش ( ستار بكس) واحضر عرس زي ده :

الأخ الحبيب هشام هبانى ..
يا سلام على شعورك النبيل ..
وكم هو جميل اهداؤكم لنا حفل أم كلثوم فى السودان ..
والشكر لكم أخى ..
إقتباس:
"
يا حليل سودان زمان يا ارنست ده راح اكلو التمساح.............وين تاني ارجع وبالله سلم لي علي العيال واهديكم كوكب الشرق في خرطوم زمان "
""
انتهى الإقتباس ..

يا هبانى .. سلام مخلوط برائحة الهبهان ..
بالمستكة .. فى جبنة مدنكلة .. بالشرغرغ والفناجين المدهبة تقول يا ليل ..
ورائحة الصندل تحوم حول المكان .. مع اللمة الجميلة ..
مع أنغام شريط كاسيت قديم ..
للفنان العظيم أحمد المصطفى ..
وأغنية .. حياتى .. حياتى .. أحبك أنت ...

ارجو عمل copy and paste
لأننى وجدت صعوبة فى نقل اللنك حرف حرف .. أعتقد هناك مشكلة فنية
فى الإقتباس .. تجد الويب سايت مكرر فى نفس الخط ..
ولكن كله يهون فى سبيل سمع أغنية حياتى حياتى .. للفنان الخالد
أحمد المصطفى .. حقيقة .. أود لكل زائر أن يستمع الى هذه
الأغنية الخالدة مع نغم أوتار العود ..
youtube.com watch?v=w0jeVloQqi8
ودمتم أخى ..
أخوكم العجوز ..
ارنست
+++