مامون حميدة يدعونا لاكل القعونج

قال مأمون حميدة وزير الصحة بولاية الخرطوم ان حكومته بإمكانها مكافحة الذباب والناموس لتلافي آثار الفيضانات (اما الضفادع فعلى المواطنين أكلها) .

وأضاف هازئاً من الشعب ومن مطالب بعض النواب في مجلس تشريعي ولاية الخرطوم طالبوه ببدء حملة (رش) مكافحة لتلافي الآثار السالبة للفيضانات ( البعوض والذباب ديل حقننا وممكن نكافحهم لكن الضفادع دي ما تبعنا وحقوا الشعب يستفيد منها وهي بالمناسبة بروتينات مفيدة ).

وواصل إستفزازه قائلاً ( رب ضارة نافعة وعلى المواطنين أكل الضفادع لدرء آثار الفيضانات ، وبذلك سنضمن بيئة نظيفة وقيمة غذائية جيدة) !

وأجمع عدد من النواب بالمجلس خلال تداولهم لتقارير حول السيول بالمحليات على فشل السياسات الحكومية وغياب التخطيط ، وطالبوا وزارة الصحة بالولاية لمكافحة الذباب والبعوض المنتشر بكثافة في الولاية ، وقال أحد النواب لمأمون حميدة : ( ما قدرنا على السيل خلونا نقدر على صحة المواطنين عشان ما تبقى علينا ميتة وخراب ديار).

وفي السايق حمّل النائب جودة الله الطيب والي الولاية عبد الرحمن الخضر مسؤولية ما حدث من كوارث بسبب السيول والأمطار ، وصف وضع حكومة الولاية بالمخجل .

وقال جودة ان كل التقارير التي قدمت أمام المجلس فضفاضة وباهتة (ولا تسمن ولا تغني من جوع) .

وإتهم عبد السخي عباس رئيس لجنة الشؤون الثقافية بالمجلس وزارة التخطيط ومهندسيها بالتسبب في الكارثة : ( الوزارة تعين مهندسين بشهادات ضعيفة لا يجب أن يوكل لهم مثل هذا العمل).

في حين وصف معتمد الخرطوم السابق عبد الملك البرير حكومته بالفشل وعدم المنهجية ، قائلاً : ( الأمور في البلاد أصبحت تدار تدار بالأزمات وليس بالخطط والمناهج).



منقول

لا اظنه جادا في حرفية قوله
فلو قصد المداعبة والفكاهة فقد اخطأ ,, واظهر عدم مبالاة بأوجاع الناس , فلا يصح لمن هو في مركزه ان يطلق مثلك تلك الدعابات , فالأمر جد لدرجة الموت وضياع البيوت وتفشي الامراض
ولو كان جادا
فليأمر سيادته بسلخانة حديثة للحوم الضفادع , ولينشئ شركة توزيع علي غرار شركات توزيع الدواجن

ارجو ان يكون ما تم نقله غير صحيحا

نعم نرجو ذلك.
نرجو أن يكون ما تم نقله غير صحيحٍ يا عبدالحفيظ غير صحيحٍ.
لكن كيف وسوء إدارة الدولة مسالة قارّة ومستوطنة كالوباء في بلدنا كما ترى؟ كيف كل أمر يتم التفكير فيه وقت نشوب الأزمة؟.....

حتي لو ما صاح ده ما بينفي انه مامون حميدة حرامي و########

تكون مقترحاته من باب عولمة الصينيه السودانيه!!

البقت فت صحن وهم عايزينه كمان يبقي ضفادع!!




الله لا كسبهم يا ابوسن.

اوصل بهم الحال لمثل هذه التصريحات؟!

مرحبا استاد بشري
هي امنية كتكذيب موت من يقضي نحبه بين ايدنا ,, ثم نكذب ذواتنا لحبنا له
الامنية في ان لا يصل المسؤلون هذا الدرك اللاانساني فيتندرون بمآسينا
فالامر بالنسبة لنا غير مضحك ولايدعو للدعابة

تراجي يا خية
حبابك
بقت فرد صحن بدون سلطة وبدون دكوة ,, فالسلطة غالية ومسرطنة والفول السوداني نار
أكل الناس دون سيول بحاتات الجداد وجلد راس البقر وعملوا ملاح من لحاء الشجر
لكن القعوي دي كتيره

Quote: ارجو ان يكون ما تم نقله غير صحيحا

سلام عبد الحفبظ
اسمح لى بان اخيب (عشمك ) ودا من خبرة عندما كان مدير جامعة الخرطوم
وبعدين قصدة ليس للسودان الفضل ، بل تلميح
لشعارة ( "Nothing personal, it's just business.")

عبد الحفيظ،
سلامات ..
يا أخى الزول دا حضارى شديد .. فى الغربة البطالة وجدت طلب الضفادع أغلى وجبة العالم ..

اليوم يا أخوى عبد الحفيظ تودى وشك وين .. جيب ليك ليمونة بس .. وأبقى على المصصان ..










هنا طبق الضفادع .. الجماعة من الضفادع كمونية ..


هنا الطبق اليابانى .. Sashimi .. القعونجاية بجيبوها ليك حية .. ثم يشووها أمامك .. ولا شنو يا ناس اليابان ..



لو الوزير أكلنا القعونج والعناكب والأخطبوط .. والله أكون ممتن منه أمتنان لا حدود له.

بريمة

لو كان السيد حميدة جاء بهذا الاقتراح -تناول لحوم الضفادع- في ظروف عادية بمعني ليس في موسم فيضانات و سيول كارثية كهذه، و انه قدم الاقتراح بشكل مهني و علمي مثلا ورقة في برلمان الولاية او في واحدة من الجامعات او المعاهد او او ...الخ، لكان الفهم مختلفا و لاعتبره الناس اقتراحا مهنيا لادخال الضفادع كبديل غذائي في ظل ارتفاع اسعار اللحوم و الدواجن. اما ان يأتي الاقتراح في ظل الكارثة و ضمنا عبر تصريح صحفي فلا يمكن ان يفسر الموضوع غير سخرية و تهكم من مسؤول لا يستحق ان يولي امر جمعية تعاونية صغيرة دعك من وزارة تضطلع بشأن صحة تلت سكان السودان و ربما اغلبهم بإعتبار ان كتير من سكان الاقاليم يستجدون العلاج في العاصمة الخرطوم.

سلام حفيظ و الاحبة

انت زمان مش درسونا انو القعونج بياكل البعوض ؟

طيب مامون حميده مالو ؟

اليابانيون وغيرهم لا ياكلون الضفاضع من البالوعات والمياه الراكضة يا هؤلاء

مرحبا هاشم
يعني الامر كلو بزنس ,,, معناتو ممكن يعملو رسوم للقعونجه الواحد ,,, ويقفلو السوق لي واحد منهم
محن
مرحبا بريمة
ولكنها ليست من طعام قومنا ,, الناس بتعافها هنا ,,, وبتعتبر مجرد التعليق استفزاز
ما حرام لكن عيفه

مرحبا الشاهر
تفكير قادتنا بجي وقت الكارثه , والتفكير ما بكون لي حلها
بل
اخلاء المسؤولية
والاستفادة من الكارثة
مرحبا محمد عثمان
صدقت سمعت المعلومة , ماممكن يأكلنا قعونج حامل لكل الاوساخ والبكتريا

مرحبا يحي
ههههه
اي بياكل الحشرات
ومافي زول شكي من القعونج ,, حشرو ساي

ولدي الصغير 8 سنة عمدة , بشيل القعونج ويقبضو ,
وكل الناس بخافو منو ,, ويأمروهو ما يشيلو ,,, امكن يبول ليهو في يدو ويعمل ليهو مرض ما يتعالج
سألني , فوضحت ليهو انو ده كلام فارغ ساي وما صاح

عبد الحفيظ،
سلامات ..

Quote: مرحبا بريمة ما حرام لكن عيفه

الرسول لما ذهب إلى أهل نجد .. أو الطائف لا أتذكر النص .. قدموا له لحم الضب .. رفض أكله .. لكنه لم يقل عيفه .. قال إنه ليس من طعام أهلى ..
خلى الوزير يوصل الضفادع كوجبة .. والزول العايز يعاف مخير فى قرشوا يأكل ما يحب .. نحن بنجازفها .. قالوا الأرضة جربت الحجر ..

فى التسعينات كنت فى جريرة كريبت .. ودعتنى أسرة يونانية إلى تناول وجبة غداء .. هناك جابوا لينا لحم القرقور .. نعم القرفور الواحد المعروف لينا فى السودان ..
بسخنوا موية سخنة ثم يلقوا فيها القراقير .. بعد تبوش .. بدفقوا الموية ثم يضيف موية أخرى .. ثم البهارات الكريتاوية .. مثل الريقنو وغيرها .. تصير القراقير ألذ طعام ..
جافزفت لى قرقور واحد .. لكن أمتلأ فمى ماء وسالت ريالتى مثل الأهبل .. فخرجت من الصالون مسرعاً إلى الحديقة الخلفية وتفلت لحم القرقور ومضمضت فمى .. وتسوكت بمسواك عراك أحمله فى جيبى ثم عدت.

سألونى ماذا ألم بك .. فقلت لهم لاشيئ .. وواصلت أكلت غيره .. أنا أستطيب أى نوع من الطعام مثل الأخطبوط والمحارة والأصداف البحرية .. والجمبرى والشريم .. إلا القراقير ما قدرت عليها .. والأن أنا جاهز للقعونج لو لقيت مطعم
متحاود أضرب لم أقول بس ..

نحن لازم نغير من طريقة وجبتنا .. ما ممكن المطبخ السودانى يظل ملاح أم رقيقة وملوخية .. خلوا الوزير يدخل فيه حاجات Exotics حتى لو لا تجذبنا دعها تجذب زوار السودان.

بريمة

ههههههه
لكن بالغت ياخ
طممت بطني بالونسة ساي يا بريمة
نعم القصة كانت مع خالد بن الوليد , ولكن ليس ضب الشقوق حقنا ده ,,, ده اسمو الوزغ ,, ولي الليلة ناس السعودية بياكلوهو وهو قدر العتود المدوعل
مافي مشكلة نطور مائدتنا ,, بس مافي الوقت ده ولا بطريقتو دي
القعو شان يتاكل محتاج لمزرعة مافيها القاذزورات والبكتريا دي ,,, يربوا لينا قعوج نضيف بناكلو ,,, خليهم يقبضو القعو ويعملو ليهو حجر صحي اسبوعين ويضبحو ضبح حلال
نحن بناكل الفيران والجراد واللحم الني بغلبنا القعونج

ألمي حار ولا لعب قعونج

في النيل في سمكة اسمها التامبيرا ,,
وهي سمك تستعيض عن ضعف جسدها وخلوها من الشوك بأن تنفخ جسدها وتصير مثل الكورة لترعب الاعداء
والناس بتشبهها بالضفدعة ,
فتعافها ولا تأكلها
الصيادين كانو برموها لامن يلقوها في الشبكة
حتي الآن لا يأكلها كثير من الناس , رغم انها لا شوك لها ويفضلها اصحاب الفنادق والمطاعم

الأكل ثقافة مجتمعية
نسمع بمن يأكلون القرود والثعابين فتشمأز نفوسنا ,,, وقد يستفرغ البعض ان رأي منظرهم
وبل حتي اكل الارانب والبط في مناطق جغرافية شاسعة يعتبر مقرفا
فالناس تاكل ما يأكله اهلهم , يتعود علي ذلك الطفل منذ صغره ويكبر فلا يراه غريبا
في بعض مناطق السودان يأكلون
الجراد ,,, الفئران ,, القطط ,,, الارانب ,,, الصبر ,,, التمساح ,,, اللحم النئ كالمرارة والكبدة,,, السمك المعفن ,,, اللحم المقدد النئ
ولكنهم يعافون اكل الضفادع
وبل يعدونها اساءة لمجرد الاقتراح عليهم بذلك

بعد اقتراح مامون حميدة , وكرجل مسلم خشوت ان يكون ذلك توجيها حكوميا ملزما اضطر له
فبحثت عن جواز اكل الضفادع من خلال البحث في النت
فلم يشف غليلي
بعضهم حلله
وبعضهم جوزه
وبعضهم حرمه
وكل بأسانيده

Quote: وكل بأسانيده

Quote: نحن لازم نغير من طريقة وجبتنا .. ما ممكن المطبخ السودانى يظل ملاح أم رقيقة وملوخية .. خلوا الوزير يدخل فيه حاجات Exotics حتى لو لا تجذبنا دعها تجذب زوار السودان.

وانا لو فى محلك بتبع مقولة اهلنا بالفطرة ( ماخليق الله ما نابها الا الفيك اتعرفت يا -------- ) ضع ما يناسب حسب الشخصية والزمان الماشى
وهو حيقول ليك الدولة الفلانية بتسورد ضفاضع بكذا مليون دولار فى السنة ، وانتو بس كسلانين وما عندكم اى قدرات ابداعية .
وانتو لا ترحموا لا تخلوا غيركم يسترزق ،
ما اطول عليك واكرر ان هذا هو شعارة ( "Nothing personal, it's just business.") *

وربنا يكون فى عونك وعون كل من بطرفكم.

Quote: الصيادين كانو برموها لامن يلقوها في الشبكة حتي الآن لا يأكلها كثير من الناس , رغم انها لا شوك لها ويفضلها اصحاب الفنادق والمطاعم

يا حليلك يا أبسن،
تعرف كل المحلات البتبيع سندوتشات سمك في الخرطوم، بتحشي السندويتش لحم تامبيرا والناس ما فارزاهو (المهم سمك).

عموماً، السمك - أياً كان نوعه - ياهو سمك ....... لكن مامون حميده عايز يأكل الناس قعوي ..... الله لا غزّ فيهو بركة.

الأخ عبد الحفيظ ممكن تورينا كيلو الضفادع في الخرطوم بي كم؟ وأحسن مكان يقدم ضفادع؟ وكيفية ذبح الضفادع؟ وأفضل طريقة لطبخ الضفادع؟

والله يا هاشم جنس الكلام ده قالوهو
لكن
لماذا لا يشبهون مسؤولي تلك الدول
بنقرا حاجات كأنها اساطير عن مسؤولي دول الاستكبار
ثم نلق البصر كرتين في ما ابتلانا الله بهم ونتأكد
الناس ديل بكتلونا مغسه ناقصين عمر

اخي حفيظ ،،اسف اذ اني لم اري بوستك الشهي قبلا،،ولكن هون عليك،،فيبدو ان مائدة القعونج كبيرة عامرة،،،اعتذار واحترام ،،، عليكم بالقعونج،،،فقد افتي به الخليفة المامون...فهو احلي مرقا،،واشهي لحما،،واهش عظما،،وفوائده معروفة،،جلاب للسرور،،بعاد للمرض والقبور،خفيف علي الجيوب،،خال من الغش والعيوب..قال محدثي،،،قيل في الاثر،،ماهلك قوم نق قعونج في مدائنهم،،ولعله السبب في ذكاء الفرنجة،،ولطف اهل باريس،،وكثرة اهل الصين وشغلهم كديدبانات..
اللهم الطف بالقعونج من اهل السودان،،فقد وقع معهم وما سما..

التحية للاخ عبد الحفيظ وضويوفك الكرام
مطعم العبايجي السوق العربي جوار عمارة الضرائب يقدم اشهى الماكولات قونجة بالرز وقعونجة بالمكرونة والمفاجأة الكبرى ملاح تقلية بالقنوج مع تقديم شوربة القعونج مجانا زيارتكم تسعدنا . توجد اماكن للعوائل ومستعدون لتلبية جميع طلبات المناسبات

صدقت ابوالريش
كلو حوت
لكن قعونج
اخيييييي
قرفنا وطرشنا فتة الفول

Quote: بعد تصريح وزيرنا .. حقيقة حقو نعــــزي قال لحم القـعونج صحي ومفيد ومغذي افرحي يا ضفادع وليكي حق تعتــــزي بعد القالو زولــنا .. امــــــانة ما بتتمــزي ... تصـــريح الوزير خلي العرق يتنـــــزز والعجب القعوي .. رفع القزاز واتعـــزز من زمناً بعيد عايش سعيـــــد ومعزز فــي سيخ الكباب بكرة بنشوفو مغزز ... تصريح الوزير .. تصريح ظريف ومسلـــي تصريحاً عجيب فيهو العجـــب متجلي موضوع القعوي غير مستستاغ ومجلي نفــــطر بي قعونجة وبي جرادة نحلـــي ... الخبر الأكيد الأدهش البابويــــــــــة بعد تصريح وزيرنا الما بخر المويـــــة صدقني البلد ما بتلقو فيها قعــــوية لا ضفدع غليد لا صبرة لا حربويـــــة

Quote: السمك المعفن

عبد الحفيظ، يا أخى أنت زول عواف شديد خلاص ..
يا أخى قول: الكجيك، التركينج والفسيخ .. كله أنواع من السمك المعفن ..
الثلاثة وجبات شعبية فى غاية اللذة ..
أنا من الغرب، لكن بقطع أصابعينى فى التركينج ..
والكجيك بتاع ناس النيل الأزرق بالكسرة .. ألذ من ملاح التقلية.

يا أخى جرب أى أكلة سودانية تجدها لذيذة ..
ألذ شية هى شية الجراد، لا توجد شية ألذ منها .. وأنا أكلتها فى مناطق البقارة ونوبة الجبال.

بريمة

الأخ ود أبسن لك التحية ولضيوفك الكرام
يبدو أنني الوحيد الضقت القعونج في فرنسا ، وهو من الأكلات التي لايأكلها إلا الناس الكبارات ، وهو مثل الجداد في طعمه علا فيه زفارة المهم ما نبلع لي وتاني
ماجربتو .
الإنجليز بضحكو على أعداؤهم اللدودين الفرنسين ويطلقو عليهم (فروقي). الاسكتلندين عندهم أكله إسمها هاقيز هي عبارة عن قلب وفشفاش وكبدة البهيمة والشحم حول
الكلوة مع الثوم والبصل والبهارات ويحشوها كلها في كرش الخروف بي حُترشها دون غسيل الكرشة ويدخلوها في الفرن لمدة 4 ساعات حاجة قرف ،
بعض سكان الدول الآسيوية يأكون جلد البهيمة عليك أمان الله يحلقوه بالموس ويقطعوه صغار ويقلوها في الصاج مع الثوم والبصل.
سافرت الى بلاد اللابلاند في شمال الدول الاسكندنافية وهي تصل فيها درجة البرودة لاقل من 30 تحت الصفر ، قت ما ألقا فيها زول أسود ضمه ،
أنقر مالقيت فيها سوداني شغال في طرمبة بنزين يأكل في الرندير أب قرونن مُكان داك ، ومن حكم الله أن لحمو يطلق في الزول ناريه ويخليه دافي
طول الليل. تركت مكان إقامتي وقضيت معاهو ثلاثة أيام من أجمل أيام أسفارى ، الزول الطيب عثمان أحمد أسال الله أن يسعدك إينما ماكنت.
الجميعابي

مأمون حميده إدارى فاشل مايدير غنمايات عمتي الحرم...

والله أنا ممتن لتجاربنا فى الغربة ..

Quote: سوداني شغال في طرمبة بنزين يأكل في الرندير أب قرونن مُكان داك ، ومن حكم الله أن لحمو يطلق في الزول ناريه ويخليه دافي طول الليل

يا هو ناس الجميعابى .. ضربوا ليك لحمة "حمار ساتنا كلوز" ذاته ..

الجميعابى .. الشغل اب قرونو كتار نحن نسميه حمار ساتنا كلوز .. بجيبوه راكب فيه وقت أعياد الميلاد ..


بريمة

ههههه
عثمان
حدد ياخ
داير
قعو صغار ولا كبار
دعول ولا باطل
تربية مزارع ولا بلاعات

عزيز يا صاحب
‏ الموضوع ذو شجون
ويتحمل اكثر من بوست
بعدينك ناكل ساي كيف
في ضفادع سامة
وبعض سمومها مضاد للايدز
وفيها 5000 نوع من الضفادع

هههههه
المكاشفي
غايتو ونحن ما عارفين
اكلنا لحم الحصين والحمير وقايلنو عجالي
واكلنا ملاح شرموط الخيش
ما بعيد نكون ضربنا القعونج شاورمه

اخي عبد الحفيظ تحية وبعد ...
بتذكر لما كنا في المرحلة الثانوية وتحديدا في مدرسة الخرطوم القديمة ، كان هناك ما يسمى ب (الكديت) ما عارف الكلمة كدا صحيحة ولا لا ؟؟؟ والكديت تدريب الطلاب تدريبا عسكريا ... طلاب الكديت في ذلك الزمن كانوا عادي قدامنا بجيبوا الضفادع وهي حية بتقاسموها وبياكلوها وهي نية لا شوي ولا يحزنون وبتشاكلوا فيها ومعاها ياااااااااااااااااااااااااااع كمان ... برضو بتذكر انه شعبة العلوم في المدرسة كانت بتشرح الضفادع بعد تخديرها وتنوير الطلاب بكيفية عمل الاعضاء الداخلية للضفدعة (وأحيانا أرانب) من قلب ورئتين وكلية ، وكان بعض الطلاب بيخدروا الضفادع بوضعها داخل كيس الصعوط (التمباك) :) ... بتذكر برضو انه كان بيجيبوا دبايب حية وقلتها قدامنا واكلها بكل تلذذ ... التدريب على أكل الضفادع والثعابين بالنسبة للطلاب ومنتسبي القوات النظامية من جيش وشرطة ... الخ ، كان الغرض منه على ما اعتقد التعود على أكل أي شيء في حال انقطعت بيك السبل في الادغال وما حصلت حاجة تأكلها ...
كلامي الفوق ما مبرر لانه الناس تأكل الضفادع ولكن من باب الشيء بالشيء يذكر ...

هههههه
اسامه بابكر
بعد ده شكلنا حنبقي زي الصينين نفرم اي حاجه
خلي افتي لينا في الفيران حفاطا علي المشاريع الزراعيه مقروءا مع ارتفاع اللحوم

هذا بعد أن أكلنا طين البحر يا عبدالحفيظ...
أن ما يحيرنى هو صمت السودانيين على كل اساءات الآنقاذ..
شئ محير فعلا..

الأخ بريمه لك التحية
غايتو أخونا عثمان الله يطراهو بالخير زولا نجيض سكينو مابتفارق ضراعو يقبل النصيبة دى على قبلة المسلمين ويضبحها
غير آبه بالخواجات المنطرين عيونن ، قدر ما أقول ليه لازم يحش القرون يموت من الضحك يقول لي إنت شن عرفك؟

وبعدين ياود أبسن شنو العفص دا يعني؟ هسع ونستي دى عليك الله مالا؟ فيما يبدو أنا الزول الوحيد العندو خبره في
حكاية القعونج دى ، يعني يمكن أساهم في النهضة الغذائية في السودان.
ودى للجميع.
الجميعابي

بيان من حركة الضفادع الاحرار
بيان من حركة الضفادع الأحرار الى جماهير شعبنا الوفى ، فى البرك والمستنقعات وتحت الأزيار
والحمامات البلدية ، لقد ظللنا نتابع باهتمام شديد الحملات التحريضية التى شنها وزير صحة
حكومة الإنقاذ والتى تهدف إلى الإبادة الجماعية ، تلك الجريمة الشنيعة التى تحرمها الأعراف
والقوانين الدولية .الضفادع الشرفاء : لقد كنا نظن بادئ الأمر أن حكومة ولاية الخرطوم متمثلة
فى واليها الهمام قد إهتمت أخيرا لحالنا فوفرت لنا بيئة (صحية ) ومعافاة نمارس فيها حقوقن
ا الطبيعية فى العيش والنقيق ، لكن حكومة الإنقاذ أبت إلا أن تحرمنا ذلك الحق وتؤلب الجياع
علينا..ضفادعنا الأبية :يجب أن تعلموا أننا سنقف بقوة وحسم أمام أى مؤامرة خارجية تستهدف
حريتنا ، بل حياتنا ، ونحن إذ نصدر هذا البيان ، إذ نهيب بكل ضفدع منكم أن يسارع ويلتحق
بجيوشنا ويكون فى المستنقعات الأمامية حاميا وذائدا عن حمى الضفادع الأبى قاق قاق..ولا نامت
أعين الجبناءحركة الضفادع الأحرار 16 أغسطس 2014

أيها لضفادع الشرفاء : لقد كنا نظن بادئ الأمر أن حكومة ولاية الخرطوم متمثلة
فى واليها الهمام قد إهتمت أخيرا لحالنا فوفرت لنا بيئة (صحية ) ومعافاة نمارس فيها حقوقنا
الطبيعية فى العيش والنقيق ، لكن حكومة الإنقاذ أبت إلا أن تحرمنا ذلك الحق وتؤلب الجياع
علينا...

قمة الكوميديا السوداء..
والنقد الساخر..
أضحكتنا وأبكيتنا فى نفس الوقت يا صديق الموج..

ناس الإنقاذ ديل أكلوا كل شيئ ولمن ما لقوا حاجة ياكلوها غير الضفادع قالوا أحسن نخلي المواطنين ياكلوهم.

تحية للجميع
وشكرا لتداخلكم
واعتذر
الشبكة طششت كم مداخلة
وصعوبة الرجوع والحركة قي الموبايل
و
المفرح
ان الجميع يستهجنون تصريح الوزير
سأعود للرد الراتب

صرح مامون قال انو ما قال!
بس كدة!
والأسوأ ما صاحب تصريحه
انهم سيواصلون سياستهم رغم المعارضة

الاداري الناجح هو من يقترح الحلول المنطقية الناجحة
يقترحها لغزارة علمه وتوسع افقه . وبصيرته النافذة بابعادها
وما مثال البصيرة ام حمد
الا نموذجا لضحالة العقل وقلةالفكر. وقد حل الشعب السوداني معضلة ان التعليم الاكاديمي ليس دلالة علي توسع الافق فقال
القلم مابزيل بلم

الكيزان أفقروا الناس حتى صار الحفاظ على نظام الوجبات الثلاثة الذي تعود عليه السودلنيون شيئا عزيز المنال
مع مامون حميدة ورفقائه في العصابة الحاكمة حنبقى زي الصينيين ناكل كل ما يمشي على اربع ماعدا طاولة الطعام

تحية وسلام الاخ ابوسن