Post: #1
Title: العميد صلاح كرار: مهددات الإنقاذ الفساد، الفساد ثم الفساد: كان مرتبي 155 ج وعندي الآن اسطول شاحنات!
Author: عبدالله عثمان
Date: 08-14-2014, 10:00 AM
Parent: #0
Quote: المصدر: صحيفة المستقلة
التاريخ: 10 اغسطس 2014 الصفحة الأخيرة
كتب عبد المنعم شجرابي فى بابه: ألو..منو؟!
العميد صلاح كرار.. الأمن الشعبي عمل على اغتيال شخصيتي ولقب صلاح دولار وسيلة للإغتيال
* بالمناسبة دي الإنقاذ دي ثورة أم إنقلاب؟
ما تم هو تعطيل لدستور البلاد وانقلاب على السلطة الشرعية وتعطيل لجميع السلطات وشئنا أم أبينا فالأمر جملة وتفصيلا إنقلاب ثم إنقلاب.
*ومعظم اعضاء مجلس قيادة الثورة إن لم يكن كلهم مزارعين..أنت الليلة وين وأوعك تقول لي أنا أبوي كان مزارعاً عشان كده أنا دلوقتي مزارع.
أول حاجة ابوي كان ميكانيكي كومر ولاندروفر..وثانيا أنا والحمد لله أملك اسطول ناقلات وعندي 30 شاحنة.
*يا زول ده كلام شنو القروش دي جبتها من وين؟
يا زول أنا زول حربي أنا طالب كنت بشتغل وأنا برتبة المقدم كنت بقوم الساعة 2 صباحا وأملأ سقف ومقاعد وضهرية عربيتي الكرولا رغيف من المخبز وأوزعه على الدكاكين وارجع مع صلاة الصبح واصلي وامشي القيادة العامة، أنا مقدم كان مرتبي الشهري 155 جنيها ودخلي اليومي من 15 إلى 20 جنيها واسطول العربات جبتو بتسهيلات من بنك الخرطوم والنيلين وام درمان الوطني وقربت اسجن واقعد فى السجن لحين السداد.
.....
.....
*صلاح كرار عليك ربنا الخلقك انت اليوم مع الانقاذ أم ضدها؟
انا ضد كل من يهدد الانقاذ وينذر بسقوطها، ولو داير الجد مهددات الانقاذ الكبرى الفساد ثم الفساد ثم الفساد ولا شئ غير الفساد.
*يعني عاوز تقول الانقاذ عاوزة سمكرة وبوهية؟
عاوز أقول الانقاذ عاوزة مكنة جديدة وجربكس والمكنة الماشة بيها الانقاذ الآن خرخرت وزيتها نقط.
*وتفتكر ليه الإنقاذ ما مشت فى خطها الذي رسمته وليه انقلبت والناس انقلبت عليها؟
الانقاذ حادت عندما وافق الرئيس عمر البشير الإسلاميين على حل مجلس الثورة واكتفى بعضوين فى الحكومة.. يا صديقي البشير ضحى بأعضاء مجلس قيادة الثورة وبمعنى آخر ضحى بالثورة نفسها. |
|
|