رشا يا كحيل ... حينما يُبدِع الجابري ... في وصف أبوصلاح و نغم كرومه !!!

Post: #1
Title: رشا يا كحيل ... حينما يُبدِع الجابري ... في وصف أبوصلاح و نغم كرومه !!!
Author: يحي قباني
Date: 08-09-2014, 03:33 AM

قيل رَشأ رَشأً الظبي .. أي قَوِيَ و مشي مع أمَه ..
و رَشَأتْ الظبية ... أي ولدت رَشأً ..
الرَشأ و جمعها أرشاء .. ( للأنثي ) هي بنت ( الظبية ) التي تحركت و مشت !!!
_________________________________________________________
و من ( لينها ) و من ( جهالة سنها ) ما هان علي شاعرنا ابوصلاح ان يصفها و لا حتي بالظبية !!!

فقال ...

رشا يا كحيل ... غيثني ... الهوي سباني !!!

Post: #2
Title: Re: رشا يا كحيل ... حينما يُبدِع الجابري ... في وصف أبوصلاح و نغم كرومه !!!
Author: يحي قباني
Date: 08-09-2014, 03:35 AM
Parent: #1

لو للشعرا قصيد ومعانى ........... مابجيد وصفك غيرَ لسانى

Post: #3
Title: Re: رشا يا كحيل ... حينما يُبدِع الجابري ... في وصف أبوصلاح و نغم كرومه !!!
Author: يحي قباني
Date: 08-09-2014, 03:46 AM
Parent: #2

هبتلى روائح داهشانى ............ يانسيم عقب وعود علشانى
قول ليه غرامك اغشانى ............ وادركنى الدمع الرشانى
الجمال شانك والحب شانى ........... يانسيم روح بلغ واغشانى
بى حق من انشاك وانشانى
_________________________________________________

قال :
قول ليهو غرامك ( أغشاني )

و رجع قال :
يا نسيم روح بلغ و ( أغشاني ) ...

الاولي ... الغرام ( الدوّخوا ) و جاب آخرو ...

و التانية امشي ( حدِّثو ) و تعال غاشي ورينا الرشا حيحن علينا ؟ ...

الكلام ده قبل مية سنة يا ناس ؟!!!

الشُعرا مالهم ( عِدموا الجمال اليومين ديل .؟ )

Post: #4
Title: Re: رشا يا كحيل ... حينما يُبدِع الجابري ... في وصف أبوصلاح و نغم كرومه !!!
Author: يحي قباني
Date: 08-09-2014, 04:00 AM
Parent: #3

لو للشعرا قصيد ومعانى ........... مابجيد وصفك غير لسانى
فى فوادى الحب مسانى ............. واصبح بى هواك وماسانى
ما بصح إنك تنسانى ............ لوغاب شخصك عن إنسانى
غير شك اوصاف حسنك مؤانسانى

_______________________________________
لو غاب شخصك عن ( إنساني ) ...

عمنا ابوصلاح ما بشيل عينو من ( الشافعه ) ..

و بلومها لو ( اتناست ) ... لما تكون بعيده من ( عينو ) ...

و بقول للبنية يعني البعيد من العين ... بعيد من القلِب ؟

دى ريده ... ولا موت ؟

Post: #5
Title: Re: رشا يا كحيل ... حينما يُبدِع الجابري ... في وصف أبوصلاح و نغم كرومه !!!
Author: يحي قباني
Date: 08-09-2014, 04:34 AM
Parent: #4

لو قعدنا لعمنا ابو صلاح ...

وجبنا زول رسااام ... ووصفنا ليهو ريدات ابو صلاح دى من ابيات شعره

من قصيده هنا ... و قصيده هناك ...

حنطلع بملكة جمال الكون ...

شافعة ... ما قامت لسه ...

امسك عندك هنا :
( رشا يا كحيل )
... بنيه سغيرونه دوب فرهدت ...

عيونها كحيله كُحل الريم الرباني ...

( ومال صدرك لحشاك تاني ) ...
مخنصره و صدرها باني ... تحمد ربها ...
_________________________
ياخ عمنا ابوصلاح ده مره وصّف وصِف و جاب مترادفات ما سبقوا عليها زول
مره قال :
ليلى طال زى ديسك الهضلم نزل.....لضميرك يا فريهيدا انسبل
والجبين النورو يتلاصف لمع............ضوّه لينا الحله بالاربع قِبل

سواد ده ولا موت ؟

الديس و الهضليم ما ياهو الشعر ...

لكن قال ليها ( ليلي طال )... خلاص الشعر هنا بقي سواده داكن و حالك ...

ورجع يشاغل وقال ... ( لضميرك ) يعني نازل لي خصرك ...

ضميرك ... و فريهيدا ؟؟

مش هو زاتو ( عشان نزروا عمنا ابو صلاح ده ) قال:
ضامر قوامك لان...
طرفك قِسِ و جافيت
الصيد يا جدي الغزلان
اسهرت جفني ملان
يزرف دمع نازل
كالمزن في الهملان
مابصح ليك يافلان
طرفك دوام ناعس
وانا طرفي ماغفلان

( كالظبيه ) في اللفتان

مش ياها زاتها ( رشا يا كحيل ؟ )

عمك شكلوا كان مكتول في الشفيعه زاتها ...

مره يجيها بيجاي و مره بيغادي ...
_______________________
و لسه !!!

Post: #6
Title: Re: رشا يا كحيل ... حينما يُبدِع الجابري ... في وصف أبوصلاح و نغم كرومه !!!
Author: يحي قباني
Date: 08-09-2014, 09:58 AM
Parent: #5

جاني احساس انو فتح بوست زي ده بقي زي ( العيب ) كده

في زمن البونية و عدم الموضوع الحايم ده

كدي النديها صنة

Post: #7
Title: Re: رشا يا كحيل ... حينما يُبدِع الجابري ... في وصف أبوصلاح و نغم كرومه !!!
Author: محمد على طه الملك
Date: 08-09-2014, 11:25 AM
Parent: #6

ياسلالالام يا ود قباني يازوق..
يازول الجابرى دا تجيبوا والمدافع رازة يا وقفت تتنصت ..
يا دوزنت روحا مع صوت الجابري ..
يا ود قباني أنا عندي فنانين وفنانات ما بغنو ..
أبدا ..
ديل بتبتلو بمزامير داؤود عليه السلام ..
الغنية دي بالذات كملت الما بكمل..
الكلمات كوم إبداع ..
واللحن كوم إبداع..
أما صوت الجابري فدا كوم براااه..
عليك دينك شوف الهارموني في صوت الزول دا ..
ياخي دا براااه كدا اورقن بحالو ..
شكرا علي المتعة وروعة الاختيار.

Post: #8
Title: Re: رشا يا كحيل ... حينما يُبدِع الجابري ... في وصف أبوصلاح و نغم كرومه !!!
Author: يحي قباني
Date: 08-09-2014, 03:56 PM
Parent: #7

Quote: ياسلالالام يا ود قباني يازوق..
يازول الجابرى دا تجيبوا والمدافع رازة يا وقفت تتنصت ..
يا دوزنت روحا مع صوت الجابري ..
يا ود قباني أنا عندي فنانين وفنانات ما بغنو ..
أبدا ..
ديل بتبتلو بمزامير داؤود عليه السلام ..
الغنية دي بالذات كملت الما بكمل..
الكلمات كوم إبداع ..
واللحن كوم إبداع..
أما صوت الجابري فدا كوم براااه..
عليك دينك شوف الهارموني في صوت الزول دا ..
ياخي دا براااه كدا اورقن بحالو ..
شكرا علي المتعة وروعة الاختيار.

استاذنا الملك ...

جبر الله خاطرك ياخي بمرورك البلسم ...

الجابري يا محمد علي من القلائل جداً اللو عاش في اي مكان في العالم كان حيكون ايضا من النجوم ...

ياخي بلعب بي صوتو زي ما داير ...

رشا يا كحيل ( دلعها ) دلع لا ليهو اول لا ليهو آخر ...

بعيدن كام الله هونها ... بجيع راجع و اوريك محمد وردي قال شنو عن الجابري ...

الله يرحمهم جميعا بقدر ما امتعونا و بقدر ما تركوا من ارث ثمين من فن اصبح نادر التكرار الآن ...

Post: #9
Title: Re: رشا يا كحيل ... حينما يُبدِع الجابري ... في وصف أبوصلاح و نغم كرومه !!!
Author: Osman Musa
Date: 08-09-2014, 04:13 PM
Parent: #8

عارف يا قباني
أنا بتخيل أي رئيس دولة في العالم
لو علاقتو خربانة مع أمريكا و داير يصلح علاقتو بس يجي
شايلو أستريو أبو سماعتين ويشغل فيو يا رشا يا كحيل و في نص الكونغرس .
تعال بعد دأك شوف الحاجات البتنبهل علي البلد .
..
عان . ياخ بيتكم هناك أنشاءالله سلامة مع السيول دي ؟

Post: #10
Title: Re: رشا يا كحيل ... حينما يُبدِع الجابري ... في وصف أبوصلاح و نغم كرومه !!!
Author: يحي قباني
Date: 08-09-2014, 05:38 PM
Parent: #9

Quote: عارف يا قباني
أنا بتخيل أي رئيس دولة في العالم
لو علاقتو خربانة مع أمريكا و داير يصلح علاقتو بس يجي
شايلو أستريو أبو سماعتين ويشغل فيو يا رشا يا كحيل و في نص الكونغرس .
تعال بعد دأك شوف الحاجات البتنبهل علي البلد .
..

و الله يا عثمان غُنانا ده سمح سماحه ...

بس داير البيفهم ...

Quote: عان . ياخ بيتكم هناك أنشاءالله سلامة مع السيول دي ؟

الحمد لله ... بس الكهرباء لامن ( رجعت ) حرقت اي شئ مدور في البيت يا عثمان ...

تقول الناس ناقصه ...

طمنا كيف عقابكم ...

Post: #11
Title: Re: رشا يا كحيل ... حينما يُبدِع الجابري ... في وصف أبوصلاح و نغم كرومه !!!
Author: علاء سيداحمد
Date: 08-09-2014, 06:13 PM
Parent: #10

شكرا يا ودقبانى يا امير .. شكرا ليك وانت رديت لينا روحنا المخطوفة .

Post: #12
Title: Re: رشا يا كحيل ... حينما يُبدِع الجابري ... في وصف أبوصلاح و نغم كرومه !!!
Author: يحي قباني
Date: 08-10-2014, 05:21 AM
Parent: #11

Quote: شكرا يا ودقبانى يا امير .. شكرا ليك وانت رديت لينا روحنا المخطوفة .

تسلم يا جميل ...

الجابري يرد الروح و يروي العطشان يا علاء ...

ملكة صوتية ما عندها شبه !!!

بيسوى بي صوته الدايرو ...

الله يرحمو بس و يرحمنا انحنا زاتنا معاهو ...

Post: #13
Title: Re: رشا يا كحيل ... حينما يُبدِع الجابري ... في وصف أبوصلاح و نغم كرومه !!!
Author: محمد خير الشيخ
Date: 08-10-2014, 05:28 AM
Parent: #1

يا الأمرضني وما طباني
في خديدك يلوح نور رباني
نيران اشواقك لاهباني
وسهام ألحاظك نشباني
من ضمن ألحانك تعباني
مهموم تشهق قصرك بان
يتهادى يميل خصرك فريع بان ......
يــــــــــــاخى حاجة تفتح النفس من الصباح وتعيشك فى عالم تانى

Post: #14
Title: Re: رشا يا كحيل ... حينما يُبدِع الجابري ... في وصف أبوصلاح و نغم كرومه !!!
Author: يحي قباني
Date: 08-10-2014, 02:09 PM
Parent: #13

Quote: يــــــــــــاخى حاجة تفتح النفس من الصباح وتعيشك فى عالم تانى

صباح شريف يا محمد خير ...

اكتر كلمة بتعجبني عند الاتراك ( صباح شريف ) دى ...

فعلا حاجة تفتح النفس و تعدل صباحك ...

الكلمات الجبتها دايره شوية تعديل يا حبيبنا ... بجيك راجع ليها

خُت في بالك ... معظم الفنانين بغيروا بعض كلمات النص الاصلي

حسب ما برتاح في الغنا او حسب ما بيعجبوا من اداها من قبل ...

و الجابري غير هنا ... لكن بتصرف

Post: #15
Title: Re: رشا يا كحيل ... حينما يُبدِع الجابري ... في وصف أبوصلاح و نغم كرومه !!!
Author: يحي قباني
Date: 08-11-2014, 03:00 AM
Parent: #14

Quote: Basher Akasha · الأكثر تعليقا · San Jose, California
الهلكني وطلع ايماني .. قباني ياحساس ابو صلاح لا يقل شانا عن المتنبي وكل الجاهليين
رد · · منذ ‏17‏ ساعة

شكراً علي مرورك يا ود عكاشه ...

تحياتي

Post: #16
Title: Re: رشا يا كحيل ... حينما يُبدِع الجابري ... في وصف أبوصلاح و نغم كرومه !!!
Author: Hamid Elsawi
Date: 08-11-2014, 11:49 AM
Parent: #15

شكراً قباني علي هذا الابداع
أبو صلاح فعلاً هو ملك القوافي
متابعة و استمتاع معك و مع ضيوفك
الكرام

Post: #17
Title: Re: رشا يا كحيل ... حينما يُبدِع الجابري ... في وصف أبوصلاح و نغم كرومه !!!
Author: يحي قباني
Date: 08-11-2014, 11:19 PM
Parent: #16

Quote: شكراً قباني علي هذا الابداع
أبو صلاح فعلاً هو ملك القوافي
متابعة و استمتاع معك و مع ضيوفك
الكرام

مشتاقين يا صاوي ...

غيابك مفهوم مع الحروب المدوره هنا دي ...

ما بلومك ... لكن انحنا حنحددها لغاية ما نشوف آخرها شنو ...
_________________________________________
اما ابو صلاح !!!

فده داير ليهو رجعة بي رواقه يا ملك ...

Post: #18
Title: Re: رشا يا كحيل ... حينما يُبدِع الجابري ... في وصف أبوصلاح و نغم كرومه !!!
Author: Osman Musa
Date: 08-12-2014, 01:59 PM
Parent: #17

وأحد قال :
لمان تستمع لي الأغنية دي زي الاخدتلك حبة بتاعت pain reliever ألف ملجرام .

Post: #19
Title: Re: رشا يا كحيل ... حينما يُبدِع الجابري ... في وصف أبوصلاح و نغم كرومه !!!
Author: ماهر الحويرص
Date: 08-12-2014, 03:17 PM
Parent: #18

يا رشا يا كحيل غِيثني
الهـــــــــــوي ســـــــــباني
يا الأمرضني وماطباني
في خديدك يلوح نور رباني
نيران أشواقك لاهباني
وسهام الحاظك ناشبانـــــــي
ومن ضمن الحاله التاعباني
مهضوم كشحك وصدرك باني
يتمادي يميل خصرك فريع باني
من شفت الحسن الفتاني
قلبي ترحل ووجدي أتاني
ومال جيش حبك عتاني
بسهامو الما بتختاني
ومال صدرك لحشاك تاني
وكتفك مال ب فريع بستاني
يتكل في دروعه يبوس تاني
لو للشعر قصيدو مساني
ما بجيد وصفك غير لساني
في فؤادي الحب مساني
واصبح بي هواك وما ساني
مايصح منك تنساني
لوغاب شخصك عن إنساني
غير شك أوصاف حسنك مؤانساني
هبت لي روائح داهشاني
يانسيم عقب عود علشاني
قول ليه غرامك أغشاني
وأدركني الدمع الرشاني
الجمال شانك والحب شاني
يا نسيم روح بلغ وأغشاني
بي حق من أنشاك وأنشاني
ليه يا ملاك حسنه سباني
====
ليك نور وليك نار سارجاني
طرفي اللمحك هو الجاني
في بحور اشواقك زجاني
فيك خاطر بي ونجاني
اعلم اقبل سعدي وجاني
لو في الاحلام طيفك نجاني

كلمات تنساب للمسامع وتتغلغل فى الاعماق جوه ,,, شكرا لك اخونا قباني جملته يومي متعك الله بالصحه
حقيقة شعراء الحقيبة ديل كتبوا كلام يحير شتان بيبنهم و شعراء اليوم

Post: #20
Title: Re: رشا يا كحيل ... حينما يُبدِع الجابري ... في وصف أبوصلاح و نغم كرومه !!!
Author: يحي قباني
Date: 08-14-2014, 01:58 AM
Parent: #19

Quote: كلمات تنساب للمسامع وتتغلغل فى الاعماق جوه ,,, شكرا لك اخونا قباني جملته يومي متعك الله بالصحه
حقيقة شعراء الحقيبة ديل كتبوا كلام يحير شتان بيبنهم و شعراء اليوم

سلامات يا حويرص ...

و الله انت جبت الكلمة الصاح ...

ياهو الكلام ( البحيّر ) يا جميل ...

و شعراء اليوم برضهم ( بحيّروا ) ... ههه

(بعضهم ما كلهم ) عشان ما نعمم ... :)