اقالدك مرة واقاودك مرة

يا مدفوقة في جواي
ترياق وحنين
يا مكشوحة حزمة ضو
ويا منسوجة من حرفين
حا الحنية
وباء البسمة الصافية
بين شفتين
ويا مسقية رحيق
الصدق
ويا مغسولة ندى الاسحار
شلتك
يوم لاقيتك
صدفة مؤكدة
في قلبي
امسح منك
تمسحي مني حزن وانين
واتفاكرنا
عن كيفن
بيكون الفجر بيمرق
صافيورايق
من اعماق الناس
الحاملة يقين
وكيف بيكون تغيير الحالة
غصبا عن
عين الزمن القاسي ضنين
واتهامسنا وانت
بتضحكي مرة
وتبكي كتير
ولي تقولي
عشعش فيني الحزن سنين
الف سلامة
تعالي اقاودك
ومرة اقالدك
ومرة اسوقك خطو الواثق
نمشي نصابح النيل
ونقول
يانيل ياليل ياعين
موجة بتمرق عبر القيفة حدانا تقيف
تغسل فينا الوجه الضاحك والقدمين
ونصلي الفرض العشق
وتكون النافلة قصيدة ريد
واحس النشوة الصافية
بتمرق جذلة وراقصة
بين عينين
يا مريودة
حسيس الوجد الكامن
فتق
في الاعصاب
مخزون الرعشة
وكانت شهقة دهشة جلية تبين
اتشاوفنا
عين القلب الديمة بصيرة
وانا يا حليوة
كتير برقيك
بي الاخلاص
والتعويذة وسورة الناس
وايات يس
وبس

عشان المطرة
بتحي الارض
الجدبة بعد موات
بنفرح نحن عشان المطرة
بغد جفاف
طلتنا وجات

دكتور محمد

من وين يلج إليك هذا الحنين؟!
قاسي طقس الحب
ميمون بإشكالاته في كافة الأوقات.



لك ولأصدقاء الحب احترامي ومحبتي .

صفاء فقيري

يازولة نازلة مع الندى
اجمل ندى

فرحي بيك
عالي
كا عام وانت الصفاء والنقاء