صفوة السودانيين فى سودانيز اون لاين

الموقع يضم العلماء فى كل التخصاصات فهنالك اساتذة الجامعات...الاطباء..المهندسين
علماء الاقتصاد..الادباء..الفنانين..رجالات الشرطة والجيش والعمال والمزارعين والفنيين.
كل الوان الطيف فى هذا الموقع...لكن الحصيلة صفر كبير.

(Very big zero)

معظم المواضيع تدعو الى القبلية والعنصرية وتزكى نار الفتنة بين مكونات شعب السودان

او مواضيع مثل النجيضة جات ...النجيضة ما جات

او مواضيع مثل

تنقد الرهيفة ان شاء الله ما تتلتق

سلام عبد العظيم

والله شئ موسف مايحدث في المنبر اذا كانوا هؤلاء هم صفوة السودان فهي مصيبة ورب الكعبة

المنبر صار عبارة عن شتم وعنصرية وتفاخر بالانساب شئ محزن والله

الغريب ان ذلك يصدر من اناس علي مستوي من التعليم وعاشو في دول متحضرة تحترم حقوق الانسان

ليس فيها جدي او قبيلتي

الله المستعان

ودمت بخير

ودمت بخير اخى عاطف احمد عثمان

تحيه طيبه يا اخى
مازال المنبر بخير بوجود بعض الركائز المحترمين
الحور تجد الفاتح مبرغنى
الفكر تجد جرسم
الفن تجد العملاق الموصلى
الروح الحلوه تجد ود المدير
التنوع له اساطينه الكثر
اما العنصريه فلا توصم الا ممارسها

احترامى

تحياتى ملهم كردفان. اتفق معك فهنالك ركائز مهمة منهم من ذكرت ومنهم من لم تذكر
وهذا المنشور دعوة لدق ناقوس الخظر. المنبر كان افضل من كدة بمراحل والان فى مرحلة
هبوط حاد ازدادت فيه مواضيع العنصرية والقبيلة والمواضيع الهامشية وعدم احترام معتقدات
الناس. يمكن ان يعود المنبر كما كان وأفضل اذا حاصرنا مثل هذه المواضيع.

شوفوا الناس وصلوا وين ونحن لسة فى انا عربى وانا زنجى. وانا حر وانت ع ب د.

Quote: After a decade-long journey chasing its target, ESA's Rosetta has today become the first spacecraft to rendezvous with a comet, opening a new chapter in Solar System exploration. Comet 67P/Churyumov-Gerasimenko and Rosetta now lie 405 million kilometers from Earth, about half way between the orbits of Jupiter and Mars, rushing towards the inner Solar System at nearly 55,000 kilometers per hour. The comet is in an elliptical 6.5-year orbit that takes it from beyond Jupiter at its furthest point, to between the orbits of Mars and Earth at its closest to the Sun. Rosetta will accompany it for over a year as they swing around the Sun and back out towards Jupiter again

أخ عبدالعزيز المكى...

سلام...

التعميم مخل وفيه اجحاف وظلم لكثير من الكتاب..
وحتى ينعدل البوست..
ارجو أن تلتزم الدقة فى النقد..

ليست تعميم وصفر كبير هو وصف محايد. فالصفر يعنى ان هنالك مواضيع جيدة ومواضيع غير جيدة
المواضيع غير الجيدة تلغى المواضيع الجيدة والحصيلة تصبح صفر كبير.

ود المكي سلامات
صراحة الايام دي كتير من البوستات تطمم البطن و تزهر أسوأ ما عندنا من عنصريه و قبليه.
لكن يظل المنبر منارة ينهل منها الكثيرين . و لا عزاء للفشله .

المنبر ده سوق
فيه الغث وفيه السمين
من اراد الغث يجده ومن اراد السمين يستزيد منه

الاخوان مجاهد ودكتور محمد الحسن, اتفق معكم تماما. وهدف هذا المنشور ان نقلل من الغث بقدر الامكان
نعلم اننا لن نستطيع ان نزيل كل الغث فبعص النفوس جبلت على هذا ولن تتغير بسهولة.

تحياتى

موضوع مشابه للاخ الامين محمد على

Quote: في الوقت الذي جرفت فيه سنوات الانقاذ العجاف البلد تجريفاً سياسيا شديد التاثير ،دفع ثمنها التماسك الاجتماعي وآل نسيجه الى تفكك شنيع.. بدل ان كانت الاحزاب والمنظمات المجتمعية المعافاة هي ملاذ الفرد.. تدحرجنا حتى اصبحت القبيلة هي الملاذ الاخير.... في اوقات كهذي ..كان ينبغي لهذا المنبر ان يضمد هاتيك الجراح ولكن للاسف وللاسف الشديد// تحول لمفرخة عنصرية لا تصدق !! الجميع يبغض الجميع المتعلمون والنخبة صاروا شديدي العنصرية /يرفع واحدهم صوته ويغذي انفعاله بخداع الذات ان قبيلته مستودع الصفات الكريمة والاخرين محض هراء.. بل وحتى صاروا يكرهون تاريخهم وخضارتهم والبعض يعيش في بلاد سحقت هذا الداء وتعافت مجتمعاتها ولكنه شديد النتانة العنصرية يا جماعة البلد دي والله ما ناقصة

الاحساس بأنجراف المنبر الى هاوية العنصرية والقبلية يدرى به الكثيرين
ولانو نحن سودانيين معروفين بالتسامح والاخلاق الحميدة والشهامة
والكرم والمروة وكثير من الصفات الطيبة فسينعدل الحال وتمر
سحابة الصيف.

المنبر لايخلو من جو الاحباط العام الذي يجتاحنا كسودانين .....نشعر بتدهور قيمتنا الانسانية وتدني مكانتا بين شعوب العالم ....تجد الناس تكتب بقرف واحباط
واضح ........ الهبوط اللفظي والخطابي هو هبوط اضطراري الي حين تلوح فسحة الامل التي لولاها لضاق العيش.....كن بخير فالناس بخير ...

عليك النظر إلى النصف الممتلئ من الكوب
تغنم

تحياتي، محبتي واحترامي

الاخوان محمد ابراهيم وبلة محمد الفاضل

شكرا على مروركم الجميل

الذين يكتبون ويسعرون نار القبلية والعنصرية صوتهم اعلى ومعروفين لكل اعضاء المنبر
و يمكن للجميع تجاهل مناشيرهم وعدم الرد عليها . الدعوة الثانية ان نزيد جرعات المواضيع التى
تدعو الى المحبة والالفة بين جميع طوائف المجتمع وقبائله متجاوزين لكل المرارت.

Quote: شوفوا الناس وصلوا وين ونحن لسة فى انا عربى وانا زنجى. وانا حر وانت ع ب د.

؟؟؟؟؟؟؟؟؟؟؟؟

Quote: Quote: ؟؟؟؟؟؟؟؟؟

ما عرفت يا الزنجى يا اخوى علامات الاستفهام دى تأييدا لما اقول او انتقاد.

Quote: الذين يكتبون ويسعرون نار القبلية والعنصرية صوتهم اعلى ومعروفين لكل اعضاء المنبر و يمكن للجميع تجاهل مناشيرهم وعدم الرد عليها . الدعوة الثانية ان نزيد جرعات المواضيع التى تدعو الى المحبة والالفة بين جميع طوائف المجتمع وقبائله متجاوزين لكل المرارت.

شكراً عبد العظيم،
هذه هي الخلاصة،
وأن أصحاب المبادئ والناس الطيبين يكونوا أكثر إيجابية!

انا بقترح ان تكون هنالك مكتبات متخصصة فى هذا المنبر.

مكتبة للاطباء
مكتبة للمهندسين
مكتبة للاقتصاديين
مكتبة للادباء
مكتبة للفنانين
مكتبة للزراعيين
مكتبة للمطوريين والمبرمجين
.
.
.
مكتبة لكل فروح العلوم والمعارف الاخرى

ومكتبتين للعنصريين والقبليين
مكتبتين للمواضيع الهامشية

العنصرية والقبلية والشفونية مرض ويحتاج كل مريض من
هذه الامراض الى متنفس فليتنفسوا فى مكتباتهم الخاصة
والذى يشفى من هذا المرض العضال يمكنه ان يلتحق بأحد
مكاتب المعرفة والعلوم والثقافة

الاقتراح موجه الى صاحب المنبر

تحياتى

Quote: Azzam Hassan Farah Mohammad لو مرقو الجنوسودانيين من المَوقع.. ممكِن ينْضف وتبقى ريحتو كُويسة

كلام ينم عن عقلية مريضة وشخصية تعرضت لاضطهاد نفسي

Quote: الموقع يضم العلماء فى كل التخصاصات فهنالك اساتذة الجامعات...الاطباء..المهندسين علماء الاقتصاد..الادباء..الفنانين..رجالات الشرطة والجيش والعمال والمزارعين والفنيين. كل الوان الطيف فى هذا الموقع...لكن الحصيلة صفر كبير.

سلام يا عبد العظيم
تعليق على الإقتباس أعلاه
نعم الموقع يضم من ذكرت وأكثر لكن السؤال ما علاقة تخصّصات الأعضاء بـ (ونستهم) هنا, تعمّدت استخدام ونسة لأنّها اقرب للواقع, فا البورد ليس بوردا متخصّصا في أي شيئ بل هو عام كإسمه (المنبر العام)
و الناس ما بتنضم ليه حسب تخصصّاتها أو دراستها أو أي شيئ, الحاجة الوحيدة المطلوبة لتنضم لمنبر اسمه سودانيزاونلاين تكون من السودانيز وتكون اون لاين :), ودي زاتها - تكون سودانيز - مرّات بكري بفوّتها وجاب لينا مغاربة ومصريين و إماراتية - أوبسس الإماراتية طلعت ماسورة من هشام آدم . المهم المعنى أن الناس بتخلّي تخصّصاتها للمنابر و المواقع البتحتاجها زي المنابر المتخصّصة و المنتديات المهنية مثلا, وتجي داخله هنا بسودانيّتها فقط, فا الشي الشايفة دا هو ما أصبحنا عليه وما وصلت له الشخصية السودانية من سوء و سجم رماد و ذاتية
يعني في الواقع إذا في الخرطوم مرقن خرتمية مسيرة إحتجاج على مقتل المئات في غزّة ولا يوم الليلة فرد مسيرة ولا صلاة غائب إن شا الله على العشرة آلاف فقط - المعترف بيهن المشير - لم تتم, فدا واقعنا كدا ليه مستغرب أسافيرنا تكون افضل

الأخ عبدالعظيم مكي ... سلام:

Quote: الذين يكتبون ويسعرون نار القبلية والعنصرية صوتهم اعلى ومعروفين لكل اعضاء المنبر و يمكن للجميع تجاهل مناشيرهم وعدم الرد عليها . الدعوة الثانية ان نزيد جرعات المواضيع التى تدعو الى المحبة والالفة بين جميع طوائف المجتمع وقبائله متجاوزين لكل المرارت.

المنبر ده ... هو أصدق عينة لسودانك .... كان كويس و كان كعب.
مسألة محاولة جو خيالي مثالي لبرج عاجي من المثقفين ... ده هروب من واقع سودان اليوم ...
إنت سوداني في أي بلد أو في أي مطار عندما يعرف محدثك أنك من السودان ... تفتكر حيتكلم معاك في آخر نظريات الفلسفة و إكتشافات الطب و السيارات الالهيبريد ... أم سيتحدث معك عن بلاويكم من الموت و الفقر و المرض و الحروب التي لا تنتهي؟
لا فرق في جنسية محدثك ... إن كان عربي أو أفريقي أو خواجة ....
ده واقعك و واقع سودانك بتاع اليوم .... FACE IT

Quote: FACE IT

You Have to Face It to Fix It

شكرا محمد سليمان

تحياتى محمد البشرى

Quote: دا واقعنا كدا ليه مستغرب أسافيرنا تكون افضل

يمكننا ان نحاول ان نغير الواقع ولو ما استطعنا يكون عندنا اجر المحاولة

عبد العظيم سلامات

ومرحب بك انت عضو جديد كما يبدو

المحزن انه النقادين دوما بيكونوا من الكسلانين.

يعني اغلب الاسماء الدختل و ايدتك هي من المقله بهذا المنبر.

طيب المانعكم منو تبثوا الحنان و لمحبه لتحاربوا هذا القبح؟!


ثانيا:

يا ملهم كردفان اليس اجحافا انه قائمتك تخلوا من اي سيده؟!

التحيه للاستاذه نور تاور و رفيقاتها القابضات علي جمر القضايا.

Quote: FACE IT

هذا هو المطلوب

لك التحية و الشكر يا باشمهندس.

الناس دايرة تعيش في خيال و تنسى الواقع.

بلاش صفوة بلاش بطيخ معاك . هي بلدنا دي كان فيها صفوة كان وصلت الحال ده.

نحن السودانيون فلاحنا في التنظير و الفصاحة , شعراء , كتاب , فنانين , عازفين , راقصين وراقصات , وهلمجرا

وعلى قول اخوانا التشاديين : سوداني ده كا لقيته ما ألا فنان ولا طباخ ..

Quote: بلاش صفوة بلاش بطيخ معاك

تحياتى ليك يا غالى ولى بطيخ بلدنا

Quote: طيب المانعكم منو تبثوا الحنان و لمحبه لتحاربوا هذا القبح؟!

ما فى اى مانع. معرفة مواطن القبح اولا ومن ثم المحاربة

تحاتى على مرورك الجميل

لو مرقو الجنوسودانيين من المَوقع.. ممكِن ينْضف وتبقى ريحتو كُويسة
....
دا كلام شنو دا ؟

ناموس إلهــي "نافذ".:-
مافي حياه بلا موت.. مافي خير بلا شر ..
مافي جنه بلا نار.. مافي صفوه بلا عامه و دهماء.. إلخ .

الحيّاه هي غياب الموت!
الخيّر هو غياب الشر!
الجنّه هي غياب النار!
الصفوه هي غياب للعامه والدهماء إلخ.

تأخذ واحد تجد الآخر معاهو علي طول.. كوجهِيّ عُمــله!!

كُل الشغلانه بمثابة: Two sides of the same coin

احمد ادم سلام

Quote: ناموس إلهــي "نافذ".:- مافي حياه بلا موت.. مافي خير بلا شر .. مافي جنه بلا نار.. مافي صفوه بلا عامه و دهماء.. إلخ . الحيّاه هي غياب الموت! الخيّر هو غياب الشر! الجنّه هي غياب النار! الصفوه هي غياب للعامه والدهماء إلخ. تأخذ واحد تجد الآخر معاهو علي طول.. كوجهِيّ عُمــله!! كُل الشغلانه بمثابة: Two sides of the same coin

كلام عالى شديد لكن مافى شوية شر يكون معاه كتير من الخير

العزيزة تراجى..

المسألة آراء شخصية وتقييم شخصى.
ملهم كردفان ما شايف الانتى شايفاه..
ولك التحية والشكر...

Quote: وعلى قول اخوانا التشاديين : سوداني ده كا لقيته ما ألا فنان ولا طباخ ..

كلام عالى شديد

Quote: عليك النظر إلى النصف الممتلئ من الكوب تغنم

فعلا علينا أن ننظر للجانب الجميل من المنبر..

فهو لا زال يمثل أكبر بوابة الكترونية للسودان ومرجع لا يستهان به لمن هو مهتم بالشأن السوداني

تحياتي لك الاخ عبدالعظيم

ياتراجى اسماءكن منحوته فى قلبى احتراما وموده ونور دى انا بحبها عديل كدى
كتاباتها الادبيه زى الفل وتفاعلها مع قضايا الوطن تاج فوق راسى ده
اماا انتى فأنسى بس كان مدحناكى حترشينا وكان خليناكى حترشينا
.....
لقيت حقاره لكن ياتراجى

نور رسلى لى تليفونك فى الخاص غشان نتونس ونسه دقاقه
.نووور..انا وانتى وبس

اصلو تراجى دى لو جرينا معاها ناعم برضنا قيامتنا قامت
.....
تراجى
والله بنقدر وبنثمن كل حرف تكتبوا اى انسانه بتحب البلد وناس البلد
وانتى مابتقصىى تب
تراجى ونور العين ......
التحيه عبركن لكل اللواتى صنعن منا رجالا باسقين
وعبركن كامل الموده والتقدير
لكل من عرفناهن عبر الانترنت
وحتى اللاتى لم يأتين الى الدنيا بعد

احترامى

علينا ان ننظر الى الجانب الممتلئ والجانب الفارغ من الكوب

تحياتى عبدالعزيز عيسى

Quote: ياتراجى اسماءكن منحوته فى قلبى احتراما وموده ونور دى انا بحبها عديل كدى كتاباتها الادبيه زى الفل وتفاعلها مع قضايا الوطن تاج فوق راسى ده اماا انتى فأنسى بس كان مدحناكى حترشينا وكان خليناكى حترشينا ..... لقيت حقاره لكن ياتراجى نور رسلى لى تليفونك فى الخاص غشان نتونس ونسه دقاقه .نووور..انا وانتى وبس اصلو تراجى دى لو جرينا معاها ناعم برضنا قيامتنا قامت ..... تراجى والله بنقدر وبنثمن كل حرف تكتبوا اى انسانه بتحب البلد وناس البلد وانتى مابتقصىى تب تراجى ونور العين ...... التحيه عبركن لكل اللواتى صنعن منا رجالا باسقين وعبركن كامل الموده والتقدير لكل من عرفناهن عبر الانترنت وحتى اللاتى لم يأتين الى الدنيا بعد احترامى

هسة يا تراجى لو المنشور دا مرق بى كلام ملهم كردفان لكفاه
تحياتى الى ملهم كردفان وتراجى ونور تاور وكل المتداخلين
ادام الله الحب بيننا

بالنسبه لعتاب تراجى انا قلت
....
مازال المنبر بخير بوجود بعض الركائز المحترمين
...
والتنوع له اساطينه الكثر
......
فبالنسبه للركائز واساطين التنوع اناعارف انهم اكثر الناس تفهما لمكانتهم
...
والاسماء كثيره

احترامى

Quote: هسة يا تراجى لو المنشور دا مرق بى كلام ملهم كردفان لكفاه

المنير طلع بى مكسب اكبر لانك انضميت ليهوياعبد العظيم مكى
وبدايتك ثره وتفاعلك مع الاخر فى منتهى الجمال هنيئا لنا بك ياوجيه

احترامى

الاستاذ عبدالعظيم مكى و ضويفه الكرام

لكم التحية الطيبة

و ارحب بك فى المنبر العام .. الف حبابك عشرة ..

قد حوصر الناس حصارا شديدا فى خندق القبيلة و الجهوية بسياسات نظام الانقاذ الخرقاء العنصرية القبيلة الجهوية

و اجبروا رغما عنهم الى القبيلة .. و لعل ذلك ظاهر و اضح و لا يحتاج الى دليل فى كل مناحىالخدمة المدنية و العسكرية

فالاقصاء الذى ظلت الانقاذ و العصبة الحاكمة تمارسه تجاه معظم اهل السودان قد ولد الغبن و الكراهية و بالتالى اجبرت الكثيرت

الى اتخاذ مواقف لا تتناسب او تتسق مع مكانتهم العليمة و الاجتماعية و المهنية .. و المنبر العام هو احسن حال من و اقع الحياة فى السودان ..

لنا ان نقول ان المنبر فيه الكثيرون الذين استطاعوا مقاومة هذا التيار القوى الذى تفتعله الانقاذ بتدبير لتفرق بين ابناء الوطن لتتحكم فيهم ..

يقينى ان المنبر و السودان لا زال بخير و ظللنا نعمل و سوف نواصل من اجل سودانى خالى من موبقات الانقاذ ..

تحياتى اخى الطيب

قد يتناسى الناس مرارت الاحتراب مهما كانت مؤلمة ولكن لن ينسو جرح الكلمة فجرح الكلمة امضى من جرح السيف