السيول والفيضانات

السيول والفيضانات

غمرت السيول وساعدتها الأمطار وفاضت المجاري وامتلأت الساحات وصارت الشوارع والأزقة مجاري للمياه، باختصار صارت العاصمة المثلثة خلونا من حكاية القومية دي صارت مثل مدينة البندقية الطليانية، مع الفارق العظيم هذه المرة بين أحمد وحاج أحمد. هذا الحديث يعرفه وسمع به راعي الضان في أم طرقاً عراض لأنه يحمل سمارت موبايل زي بنات مامون حميدة. مش مامون حميدة الزول العارفنو داك أقصد مامون حميدة الجامعة.

هذه الرمية كما يقول استاذي البوني بمناسبة مفاجأة الأمطار التي أتت بالسيول للسيد الوالي وأركانحربه من وزراء ومعتمدين ومهندسين قال فيهم الوالي السابق مالم يقله الطيب مصطفى في باقان وعرمان. طبعاً الكل يلوم الوالي على شنو ماعارف؟ هل نقول إهمال لا أظن الوصف العلمي للإهمال ينطبق على الوالي وزمرته. كيف نلوم الوالي وعصبتة – لكن زيدوها الف- على مفاجأة الخريف وتوابعه من أمطار وسيول وهلم جرا ولا نلوم الشعب على مفاجأة عيد الفطر وحتى مفاجأة عيد الأضحية. هذا هو الكيل بمكايلين، فإذا كنا نلوم الوالي على مفاجأة الخريف بمشاكله له كل عام منذ تعيينه والياً فكيف لا نلوم الشعب الذي يصوم رمضان منذ بلوغه سن الرشد؟

لن نتحدث عن الأعوام القديمة ولكن نحصر حديثنا في العام 2013. لقد حدث نفس الشئ قبل 12 شهراً بالضبط ولا ننسى كيف طاف الوالي وحاشيته بالطوافة على رؤوس سكان شرق النيل وشاف العجب من كثرة المياه وغرق القرى والدساكر وكيف التحف الجميع السماء بعد أن توسدوا الليان! ولا ننسى كلمات السيد وزير شنو ماعارف الذي قال: لماذا يبني الناس بالجالوص ولا يبنون بالخرصانة المسلحة؟ نقول للسيد الوزير لقد بني سكان حي البستان في ام درمان كلهم بالخرصانة المسلحة طوابق عدة ولكن فشلوا في الوصول إلى مساكنهم لأن الشوارع التي تقع تحت إمرتكم لم تقوموا بتسويتها وهذه غلطة. لكن غلطتكم الثانية أنكم لم تأمروا سكان البستان أن يقوموا برصف شوارع حيهم بالأسفلت.. فلو اخطرتهم لوقفنا معك ولُمنا سكان حي البستان لعدم أداء واجبهم.

بعد أن طاف الوالي المناطق المتأثرة بالفيضانات والسيول ومياه الامطار العام السالف قال: لقد استعنا ببيت خبرة سويسري ليزبط الحكاية. لا تظلموا الوالي. فهو لم يقل أنهم أو الشركة الاستشارية السويسرية سيقومون بحفر المجاري ورصف الشوارع وردم الحفر والمناطق المنخفضة. وقد ظهر لنا تزبيط الحكاية في قصة شوية الملاليم الضربوها الجماعة تبع الوالي من غسان وأحمد ومهدي. مش الحكاية تزبيط .. خلاص يا ناس المحلات الغرقت من فضلكم شيلوا الصبر فسوف يقوم الوالي من الآن وحتى موسم الفيضانات القادم بتزبيط مجموعة أخرى بشوية ملاليم لا تقدم ولا تؤخر ولا تحفر مجرى موية ولا تردم حفرة. فما تشفقوا بس الصبر الجميل.

قامت وزيرة سويدية بشراء بنزين لسيارتها الخاصة بكرت الحكومة.. وأرجعت تاني يوم المبلغ للحكومة وكان لها عذر شرعي حيث لم يكن لديها مبلغ البنزين. ولكنها استقالت لانها استغلت منصبها واستخدمت أموال الشعب في غرض خاص. بالله ياجماعة الخير تأكدوا لنا المسلم منو؟ الحرمة السويدية ولا السيد والي الخرطوم وزمرته؟ يبدو أن الاوروباويين يعملون بالاسلام الذي قيل فيه الدين المعاملة ونحن في بلاد السودان نتعامل بشنو؟ بصراحة أنا ماعارف. العارف يورينا وله أجران.

ولكن لنترك الوالي جانباً ونتحول إلى السيد خادم النيلين الجاريين.. هل سمعتم أن عمر بن الخطاب قال: لو عثرت بغلة في العراق لسأل الله عنها عمر. نعم سمعنا ذلك ولكننا لم نسمع أن عمر بن الخطاب قال لو غرقت الصالحة أو أمبده سيسأله الله عنها. ولهذا وعندما عثرت بغلة حماس في غزة سأل الله عنها عمر بن حسن. وعندما ماتت كاكا وكني وكنتوشة في كهوف وكراكير جبال النوبة لم يلتفت لموتهن عمر بن حسن لأن عمر بن الخطاب تحدث عن البغلة ولم يتحدث عن نساء العراق! بالذمة ما بنفع أكون من فقهاء التبرير؟ لماذا لم يحرِّك خادم النيلين الجاريين أصبعه السبابة ويسأل واليه صديق المتحللين: كيف تنهار جسور لم يمر عام على بنائها ولم تختبر من قبل هذه السيول؟ أليس هذا سبب كاف لخلع حكومة ولاية الخرطوم بكل عضويتها حتى المجلس التشريعي الذي يلاحق صبية الدرداقات ولا يهتم بأداء المهندسين والتنفيذيين التي تؤثر في حياة من انتخبوهم؟
من فضلك زر قناتي في اليوتيوب واشترك فيها
http://www.youtube.com/user/KabbashiSudan

كبـّاشي الصافي

(العوج راي والعديل راي)

cantona_1 ،
كبـّاشي الصافي
...

سلام ،
تعرف يا أخوي كباشي ،
في مثل أهلنا البقارة ،
بيقولوهوا ،
وهم سادة العارفين ،
ألمي حامي ولا لعب قعونج
الموية السخنة لاتصلح للضفادع لتلعب فيها ،
والمثل دا عرفتوا منك أنت ،
الكيل ببارود النقد اللاذع ،
وشقشقة العصافير ،
وقت الكوارث ،
لا يجدي بشي ،
والمطرة من الله ،
والسيول من الله ،
و الكوارث من الله ،
والإبتلاءات من الله ،
وأهلنا في السودان ،
أي زول بيقول ليك ،
الحمد لله ،
دحين يا أخوي ،
ما تجي أنت تنفخ في الكير ،
وقت الحارة ،
وتثبط الهمم ،
القصة ما ناقصة تنظير ،
الكل واقف وقفة الرجال ،
في در الكوارث ،
وما مقصرين ،
نحن شعب نتسلق السياسة ولا سياسة ،
ست الشاي المكافحة ،
ح تقول ليك ،
الناس ديل ،
عندهم مشكلة في المجاري ،
تسلم الغالي ،
،،،،،

...





عزالدين عباس الفحل
ابوظبي
...

شكراً الاخ عز الدين الفحل ولكن بصراحة ما فهمت كلامك ..ولا قصدك
من فضلك زر قناتي في اليوتيوب واشترك فيها
http://www.youtube.com/user/KabbashiSudan

كبـّاشي الصافي

(العوج راي والعديل راي)

سلامات كباشى الصافى .. كل سنة وانت طيب .. كارثة حقيقية أحلت ببلادنا واعتلاء أصاب أهلنا .. ولكن بكل المقاييس العالمية والإنسانية تعتبر فضيحة للحكومة المركزية وخاصة حكومة ولاية الخرطوم ويجب ان تستقيل .. الى الان لا توجد خطة واضحة لعمل شبكة مصارف تجمع كل هذه المياه الى البحر .. مشكلة حكوماتنا ما يقوموا بصيانة المصارف الا قبل شهر او شهرين من الخريف مما يدلل على الفساد والتجاوزات التى تحدث برصد ميزانيات ضخمة تنتفخ منها الجيوب .. وفى النهاية المتضرر هو المواطن ... فالمسألة محتاجة لثورة حقيقية والاستعانة بالدول التى نجحت فى شبكة المصارف والاستفادة من تجاربهم والا ستظل الاسطوانة مدورة كل سنة ...

الأخ آدم جمال بعد السلام
كتّر خيرك على المرور والمشاركة
ناس الولاية عارفين هم بسوا في شنو. لا يمكن ان تتكرر نفس المشكلة بعد مرور 12 شهر لولا انهم ضامنين أن لن يصيبهم أذى .. وعليه لن يتم حل هذه المشكلة لان حلها السنوي مصدر رزق لكثير من السابلة ولهذا لا يوجد من يود قطع تلك الارزاق لان له فيها جُعل. لك التحية.
من فضلك زر قناتي في اليوتيوب واشترك فيها
http://www.youtube.com/user/KabbashiSudan

كبـّاشي الصافي

(العوج راي والعديل راي)

cantona_1 ،
كبـّاشي الصافي
...

سلام ،
تعرف يا أخوي كباشي ،
الكلام واضح وببنط عريض ،
البتجي من الله ،
ما بنقول فيها شئ ،
غير الحمد لله ،
والشكر لله ،
أنا معك ،
المشلكة تصريف ومجاري ،
تسلم الغالي ،
،،،،،

...





عزالدين عباس الفحل
ابوظبي
...

آدم جمال أحمد ،

...

سلام ،
المعضلة هي المجاري ،
وحكاية المجاري المفتوحة دي ،
أنا ما شفتها إلا في السودان ،
الخليج إستعان بالسحرة ،
الصينيين ،
في إنشاء شبكة مجاري عالمية ،
المطرة تصب ثلاث ليالي ،
وفي برهة الشوارع والطرقات ،
تكون خالية من الرواكد ،
شوف مدينة جدة ،
السعودية ،
السيول الأمطار عملت فيها شنو ،
ضربت الأخضر واليابس ،
والوديان ،
وكسرت وهدمت ،
حتي الجسور لم تسلم ،
و السيارات طفحت،
تجري مع السيل الجارف ،
وما قالوا غير ،
الحمد لله ،
في سنة ما زلت أذكرها ،
في موسم الحج السيول ضربت ،
حتي وصلت صحن الحرم المكي ،
الكعبة المشرفة ،
لكن نحن المعارضة ،
لسانها طويل ،
غير إشانة السمعة ،
والبوغ اليابس المعكوف ،
و كأننا لسنا ،
من رحم السودان ،
تسلم الغالي ،
،،،،،

...





عزالدين عباس الفحل
ابوظبي
...

دي قسمتنا يا الكباشي - كجوا لينا شرك ام كيكي عديل كدا

الأخ الطيب شيقوق بعد السلام
كتّر خيرك على المرور والمشاركة
المشكلة معروفة والحلول موجودة وسهلة ومتوفرة ولكن هنالك من لا يريد الحل وهو يعرف أسبابه.
من فضلك زر قناتي في اليوتيوب واشترك فيها
http://www.youtube.com/user/KabbashiSudan

كبـّاشي الصافي

(العوج راي والعديل راي)

الأخ عز الدين الفحل بعد السلام
كتّر خيرك يا دوب فهمت كلامك.
بالله قود حملة في المنبر عشان الناس كلها تكتب كتابة واضحة زي حقتي واوضح زي كتابتك لأن النظر بقى فسل لك التحية
من فضلك زر قناتي في اليوتيوب واشترك فيها
http://www.youtube.com/user/KabbashiSudan

كبـّاشي الصافي

(العوج راي والعديل راي)

ول أبا كانتونا
تحياتي
( ناس البستان ديل مسحوا ليك شنبك ولا شنو؟ غايتوا أنا ما أديتك حاجة لا بوعدك).

الأخ/ عزالدين
تحياتي
المثل ( ألمي) ليس من نجر (أهلك) البقارة، وإنما هو من نجر أهلك ( أهل الدار).

Quote: والمطرة من الله ، والسيول من الله ، وأهلنا في السودان ، أي زول بيقول ليك ، الحمد لله ،

ونعما بالله، دا كله من شغل الله جل جلاله، فأين شغل الوالي؟
أقترح:
مقدمة:
بما أنه ربما ضارة نافعة، وأن هذه السيول قد ( نظفت) العاصمة وبعض المدن من كل مساكن الطين بجرفها للبحر (القنطور أصله تراب)
فالحمدلله على ما جاء من الله.
1 - على الدولة ممثلة في محلياتها مركزيا وإقليميا أن تمنع منعا باتا إنشاء أي بيت من الطين حول المدن، وتردم الحفر
والمراحيض البلدية وتمسح وتخطط هذه الأرض من جديد، تمهيدا لبيعها لمستثمرين. وأن يتم إستغلال هذه الإيرادات المتوقعة لبناء
مدن رأسيابحيث تصلح 300م2 لبناء عمارة تقطنها 30 أسرة من نوعية سكان أطراف المدن مع تأمين كل البنى التحتية للمدن الجديدة
مراعاة طبوغرافية الأرض والتنوع القبلى والجهوي والإثني وكل ما لا يمكن تجاهله من إعتبارات. وبهذه الكيفية الدولة تكسب والمواطن
يكسب و( الحرامي) يكسب، ويا دار ما دخلك شر.
2 - مشاركة المغتربين ( الغربيين) من أمثال (كانتونا) في عمليات التخطيط وتمويل بناء مثل هذه المدن وتسلم المستفيدين وكل
العمليات اللوجستية والمية تكضب الغطاس.
هذا والعفو العافية لو تلومنا ولا الرايش أصاب بالخطأ ... أي شخص أو جهة ما....

حماد الطاهر عبدالله ،

...

سلام ،
حديثك نمط شخص واعي بالمعضلة ،
علي حكومة الوالي ،
الإستعانة ببيوت الخبرة الهندسية ،
في رصف خطوط المجاري ،
في إستشاريين أجانب سبقونا في المجال دا ،
وضع ميزانية متكاملة للمجاري فقط ،
ودا مشروع مش ساهل ،
من بني السدود الشوامخ ،
وإستنطق البترول من باطن الأرض ،
لا يخشي رصف شبكة ،
خطوط المجاري ،
يا جماعة الإنقاذ ،
هووووووي ،
العاصمة المثلثة عايزة ،
مجاري حديثة ،
تسلم الغالي ،
،،،،،

...





عزالدين عباس الفحل
ابوظبي
...

ول ابا حماد بعد السلام
كتّر خيرك على المرور والمشاركة
الجماعة الشايلين الكشف خاف ما وصلوك ؟ شيل الصبر ماشين عليك امكن الدر القدام بيتك لسع مجيقة؟
صدقني اليوم الحل موجود ... التمويل في حدود 6 مليار دولار اميركي موجود
الضمانات سهلة ومتيسرة لدي السودان
المطلوب: خرط كاملة لعماير من عدة طوابق مكتملة البنية التحتية ..
ستكون العماير جاهزة للسكن فيها خلال عام- عامين... تسليم مفتاح ...
لكن قل لي مع من نتحدث ؟ وكيف نصل لمن نود أن نتحدث معه؟
المقتولة ما بتسمع الصايحة.. الله غالب.
من فضلك زر قناتي في اليوتيوب واشترك فيها
http://www.youtube.com/user/KabbashiSudan

كبـّاشي الصافي

(العوج راي والعديل راي)

ود العم هاك دي:
اغنية السيل

ما شفتي السيل يا أم سماحه

انتشر غمر المساحة

الخرطوم كسر جماحة

النفق الجمبو ساحة

انقلب حوض للسباحة

******

سيل الوادي المنحدر

===

الليله السيل جاكُم حايم

المســـؤول تلقوهو نايم

لا بدل جات لا عمايـــم

الوطن شبعان هزائم

و الإغاثة بقـــت غنائــــم

********

سيل الوادي المنحدر

==

السيل العم التراسة

والسيول معروف مراسة

مافي تخطيط او دراسة

الـــمناصب بالوراثة

قفلو ابواب الفراسة

******

سيل الوادي المنحدر

******

يا عازل هوي انقرع

لجنة وانبثقت فرع

كل فرع اصبح فرع

الناس تنظر وتخترع

و فجأة جاكم منشرع

سيل الوادي المنحدر
ــــــــــــــــــــــ
الحليلة

تصويب
سماحه
الصواب
سماحة
ـــــــــــــــ
الحليلة

الحبيب الحليلة بعد السلام كل عام وانتم بخير والسنة الجاية المطر جاييكم ولكن بدون غرق
كتّر خيرك على المرور والمشاركة بالقصيدة العصماء
لو في فنان حريف الأغنية حتطلع التوب اوف البوب كما يقول العنقليز
زي ما بقول واحد من اعمامي .. لمن يفطر اول يوم في رمضان بشيل هم رمضان الجاي
هسه نحن الخريف دا عرفنا الفيهو .. خوفنا من الخريف 2015
وعمنا الخدر ما عاوز يتحلل من المديرية ماعارفين نعمل معاه شنو؟
من فضلك زر قناتي في اليوتيوب واشترك فيها
http://www.youtube.com/user/KabbashiSudan

كبـّاشي الصافي

(العوج راي والعديل راي)