أطرف ما كتب عن الجماعات الجديدة: جماعة (الزرقاوي و زرقان) لتأديب مستخدمي (الكريمات والدهان)###

كتبت تهاني عوض:

: جماعة (الزرقاوي و زرقان) لتأديب مستخدمي (الكريمات والدهان)
جماعات جديدة (لنج) للإيجار!!

اليومين ديل (السوق) مليان (جماعات) ارهابية (مصنوعة محلياً).. وبما إنو في حاجات (كتيرة) في البلد (دي) ما (مظبوطة) .. وما ماشة (صاح) .. بدأت تظهر (جماعات) عشان (تظبط) الحال (المايل) دا..


قبل يومين ظهرت جماعة (ابو حمزة السوداني لمحاربة الزندقة والالحاد) .. و(دقت) الصحفي / عثمان ميرغني (دق العيش) !! غايتو حسب (مؤشرات) الحال (الحرن) والمسائل الكل يوم (ماشة لوراء) اتوقع ظهور (جماعات) للايجار ..تعمل (عمايل) ما عملها ( نجار) في الخشب..

وعليه أتوقع ظهور (جماعة الهبروا ملوا) لمحاربة (الفساد) بعد أن تعتدي على (سارقي) المال (العام)..بالضرب المبرح.. واتوقع برضو (جماعة فك البورة) لضرب بنات (الأحفاد) وتزويجهن (بالغصب) من (المجاهدين) .. واتوقع برضو ظهور (جماعة) ..( صارم ابن ابي حازم) لضبط (الجودة) وتنظيم (الأسعار).. وتخفيض (تكاليف) السكن في بيوت (الايجار)..

وجماعة (يا فيها يا أطفيها) لتخفيض (اسعار الكهرباء) ، وجماعة (كاريوكا) لتنظيم أعمال (فن الدلوكة) .. وجماعة (الزرقاوي و زرقان) لتأديب مستخدمي (الكريمات والدهان) ، وجماعة (أبابيل) لتأديب المتغزلين في (اسرائيل) ، وجماعة أنصار (زيدان) لتأديب (الاخوان)، وجماعة (ود العباس) لمنع (دق الزار) في بيوت (النفاس) ،

وجماعة (أبو مِرين) لاجبار اصحاب (الكروش) على ممارسة (التمارين) ، وجماعة (إكسي) لفك الحصار عن (الجكسي) في محلية (واويسي)، وجماعة (يخسي) لضبط تصريحات أعضاء (البرلمان)،، وجماعة (الحيتان) للمطالبة (بتعويضات) متضرري السيول والفيضان) ، وجماعة (شحرور) لمنع ممارسة (الخفاض) و(الطهور)..

وجماعة (هوووي ها كفاك) لتأديب سفافي(التنباك) ، وجماعة(اخوات عزة) لقتال النساوين الما اتبرعن بالدهب لنصرة (غزة) ...وجماعة (عسعاس) لمنع (الاختلاط والخلِط) في (بيوت (الأعراس) ، وجماعة (شلولخ) لاعادة تجميل النساء (بالشلوخ) .. وجماعة (الزير) لصفع كل من يتطاول على (أي وزير) ،

وجماعة (تِنكش تِنكش.. إنت ليه يا وجيه لا بتشعر لا بتحس إلا لو جايو ليك حلاوة دربس)؟ وجماعة (وِلي يا وِلي .. أرحكاكا نلعب البليّ) ؟ وأنصار (كرومة وسرور) لإزالة (الدقون والكرور) ،،،وجماعة (تونا يا تونا) والله كرهتونا !!

تهاني عوض

لايك
"جماعة صباح الخير يا زهير"