عادل عبد العاطي .. نبي عديييل كدة !!

لا أخفي سراً أن قلت أنني كنت و لا زلت من المعجبين جداً بكتابات المبدع الأستاذ / محسن خالد الذي تعرفت إلى كتاباته عبر هذا الموقع ..
قرأت لمحسن الكثير و تابعت بشغف رواياته التي نشرها هنا و كتاباته عامة و مداخلاته ،
و كمجرد قارئ عادي أعجبت جداً بكتاباته ..

و قد وصلت إلى قناعة ذاتية مفادها أن محسن زول منجض شغلو صاح ..
زول عبقري في الكتابة ..
فصيح .. فصيح .. لديح ..
بأدب و بغير أدب إن شاء ...
و كنت ـ و لا زلت ـ أتوقع أن يكون لمحسن صيتا عاليا في مجاله ..
و لكن ..

و كأنما عين عنية أصابت محسناً ..
حين أنصرف الى عوالم يسبر أغوارها ..
و توغل فيها حتى و تاه و تاه ..
حتى خرج للناس هنا معلنا نفسه :
أنه .. النبي المعجنو ربو أو كما شطح ..

{ إنّني هِبَة البارئ، المهدي المنتظر،
المهدي أي التائب إلى ربّه، والنبي الطائر،
المؤيَّد بنار اليشب وبمذراة الحياة والطاقة،
وريث السيّد المسيح عليه السلام،
المأذون بإحياء الموتى والطيران
وفعل الخوارق، من سيؤمُّ المسلمين
في المسجد الأقصى.
ومَن أسماه السيِّد المسيح بـ(المُدَلَّل عند ربّه)
المعجّنو ربّو. }

و من عجائب ما لاقيت في هذا ( البورضي ) ..
بعض( الأزوال ) يشوف أخوهو و رفيقه ماشي على النار ..
يقوم يدفروا عليها و يزيدوا حطب و بنزين كمان ..
هؤلاء هم أصدقاء و معجبي محسن خالد ..
الذين زينوا له ما توهم ..
بل أن منهم من بايعه نبياً ..
و نصب نفسه صحابياً ..
و لربما توهم أنه بدعم محسن في وهمته تلك ..
لربما يكون من زمرة ..
( السابقون السابقون أولئك المقربون )

ده زول مضيع زمنو وزمن غيرو من الناس البتقرأ وتشارك معاه في هذه الخزعبلات ... جايب جداول وأرقام ما أنزل الله بها من سلطان قال عايز إحدد موعد يوم القيامة ...!!
بالله ده زول طبيعي ؟؟؟؟ مسكين ياخي الله يكون في عونو ..

مرحى للبورداب

بقى عندنا زملاء انبياء

قال ليك يا عصام انو واحد اسمو عبد الرسول يوم بالليل نائم في الحوش سمع حركة في الشارع اها قام يشوف الحاصل شنو
اتاري بنات الحلة كانن ملمومات في بيت واحدة منهن و ما حسن بالزمن الا لما أتأخر شديد قامن مرقن يدبن بالحيطان و الخوف
كاتلن اها لمن جو جمب بيت عمك عبد الرسول و هو حس بالحركة و مرق البنات من الخوف لأمن قعدن في الواطة قام عمك
قالهن: يا بنات ما تخافن انا عمكن عبد الرسول، قامن بنفس واحد كلهن قالن :عليه الصلاة و السلام

دكتور سيف .. بالغت ياخي .. خليها على الأقل بعد الفطور ..
دي بس ياها زاتا حقت ( إنهن يخرجن لملاقاة الحبييييييييب ) ..
أضحكك الله كثيرا في الزمن المعسم دة ..

ــ
ثم سلام شديد ليك و عبرك لعرفة و العيال ..

أذكر مرة و نحن صغاراً في المرحلة الابتدائية ..
كنا نلعب في غياب الأهل في الحوش الوراني الموحش ..
و الحوش الوراني فيه ديوان الرجال و شجرة الجوافة الكبيرة ..
التي تشغل نصف مساحته و كنا نعتقد من كثافة أوراقها و تشابك فروعها أنها مسكنا ..
لجماعة ( بسم الله ) ..
عادل بحري إبن خالتنا تسلق الحائط إلى ( رأس البيت ) أو سقف البرندة و منه إلى شجرة
الجوافة .. و تعلق بفرع لين أخضر و أنطلق في حركة طرزانية صوب الواطة ..
و عادل بحري هذا هو ذاته الشهير بعادل محجوب الذي ( يقولون ) أنه رمى الرئيس البشير بجزمته ..
و هو عند مقابلتي له لمرات في زيارتي الأخيرة للسودان قال لي ما لا يقوله الناس عنه ..
عادل يومها حينما ( طرزن ) من الشجرة و أستوى على الأرض ..
كان يحمل فرعأ أخضر على هيئة سيف في يده و يربط دلقانا في رأسه ..
صاح و قال لنا ..
أنا المهدي المنتظر .. أنا النبي الخضر .. لازم تؤمنوا بيييييييي ( وجرها جرة طويلة خلاص ) ..
شقيقته و أخته التي تصغرنا جميعاً ـ الدكتورة حاليا ـ نهى ..
قالتها صراحة و حسمت موقفها تماماً ( و الله إنتا و لا نبي و لا حاجة ) ..
فحمَر لها عينيه .. لكنها لم تأبه به و لم تشتغل به الشغلة ..
و قالت مقولتها الخالدة ( بالله هو في نبي بقع ليهو من شدرة ) ..
فبهت النبي عادل بحري ..
أما شقيقه الأصغر ـ الباشمهندس حاليا ـ عائد فقد مثل لنا دور سيدنا بلال رضي الله عنه ..
و حينما تلقى محطتين بذاك الفرع في ظهره حتى يؤمن صاح قائلاً ( أحد .. أحد ) ..
أما أنا و بقية الأولاد و البنات فقد هربنا من أمام قريبنا المتمهدي و المتنبي و نحن نشاغله ..
بالقول ( الكضااب ما بريدو .. السكين تقطع أيدو ) ..
و هو يجري ورانا ليلحقنا بغير جدوى ..

Suliman Raffai · Los Angeles, California

بتخلوا قلة الأدب متين يا شيوعيين؟ نبي في عينك

ـــ

حكاية إني شيوعي دي مشيتها ليك بمناسبة رمضان و كدة ..

لكن ( نبي في عينك ) دي ما زيها زي ( يلعن دينك ) .. هسة ما جرحت ليك صيامك بالله؟؟
الغاصبك شنو و الرسل ليك ناداك منو ؟؟
( صوموا تصحوا )..

ههههههه
سليمان رفاي مرقك شايل ليك مطرقة و منجل عديل يا دهب

ههههههه
سليمان رفاي مرقك شايل ليك مطرقة و منجل عديل يا دهب

ـــ
الزول دة يا دكتور شكلو من النوع البيقرأ العنوان و يقوم جاري يجيب عكازو ..
لما يوم تعتر ليهو مداخلة تجيب كسافتو ..

كل مره اقول لي نفسي ... ياخي محسن دا اكيد بهظر لكين بس المره دي تقل الهظار و طول المده
لحدي اسه ما قادر اقتنع انو هو جادي في كلامو دا. و الله يكضب الشينة
لكين بي صراحة عجبني لي عادل عبدالعاطي اصلا اللقب دا كان ناقصو من زمان
مما يفتح الباب علي مصراعية للنقاش ... و بي نفس المعادلات الرياضية اسه بكري ابوبكر دا ما بكون (نوح)؟

تحياتي يا عصام و من خلالك للزملاء المتداخلين

Dahab Telbo · متابعة · ‏ناشط‏ في ‏حركة أحرار السودان‏

ياجماعة محسن خالد نبي ولكنه كاذب هذا ما اؤمن به
لكن خلي انحكي ليكم قصة كنا برالمة في النيلين وساكنين طيارات (بدون تسجيل)في داخلية الاسلاميه
كان ساكن معانا واحد من قرية الحديبه واسمو حامد وبناديهو بحامد كرزاي بقرى في الاسلاميه اها يوم كده
جانا ونحن خلاص بقيلنا على النوم قام قال لينا ياجماعة سمعتوا بنبي الله الخضر قلنا لي بالحيل
قال خلاص انا نبي الله الكرز غيتو جطنا كتيير في النهايه امن بي عباس وهو تلاتيني من معمرين الداخلية
وبايعو المهم نمنا والحكايه مشت امن من امن وكفر من كفر
فيوم كده جوعنا شدييد ومفلسين الغرفة كلها عدمانه الفكة المهم نمنا بي جوعنا
نص الليل جا شيخ محمد (كان شغال طلبه) لقانا نايمين وكان شايل معاهو كيك وبارد وبعد لقانا نمنا ماصحى الناس
ختاها ونام نص الليل نبي الله الكرز قام لقى الكيكه والبارد فصحى سعد (وكان رأس الكفر وكان بنادي بود الكنيسه )
ود الكنيسه قم حقو بعد ده تؤمن بي سعد قال في شنو؟
قام قال لي هسي جبريل جاني ونزل لي الكيكه والبارد البتشوفهن في الواطة ديل
فود الكنيسه ختفك ختف البارد والكيك وقال لي قول لجبريل ينزل ليك تاني

عصام دهب تحياتي ورمضان كريم

زمان الواحد كان يجي داخل المنبر شايل عكاز وعامل ساتر

هسه الواحد لازم يجي شايل مصحف وداخل بي البسلمة وطالع بي (يس)

Quote: نعم أنا نبي من الصالحين وكل من يستهزئ في هذا البوست ويلعب شيطان من المُنْظرين، هذا هو الفرق، واسمي الذي أسماني له ربي الرحمن هو يحيى، واسمي إلى أبي عمران هويحيى ابن زكريا ابن محمد ابن عاصم ابن الطيب ابن عِمران (الذي رأى ربه، والمعني برؤية الرحمن في سورتي النجم والتكوير وليس أي بشري آخر). بعدين أنت ومصطفى والخواض والشقليني ونور تاور وباقي هذه الشلة التي تلعب حين لم يتبق وقتٌ للعب، تعرفون تماماً أنني يحيى ابن زكريا وإنما تضللون غيركم، فأنتم هنا تؤدون أدواركم في حزب الشيطان، وأنا هنا أؤدي رسالتي في حزب الله. لا أعتقد بأنَّ البلد الأمين فيه من الأخيار الكثيرين فقد استولى عليه حزب الشيطان لأن الأقلام والأبواب التي تؤدي للكواكب الأخرى فيه وكذلك الصراط المستقيم... إلخ المهم سؤالي لكم هو، بعد يوم 5 -10- 1435هـ الموافق ليوم 1 -8- 2014م، الذي أعتقد أنَّه يوم ((الفجر)) والله أعلم بذلك! ما العمل بعدها لو كان الفجر فعلاً؟ الجري ما بحل! الطيران ما بحل! والقعاد مع عينين رأتا ربهما الرحمن العلي العظيم بالنسبة لشيطان أو مُنْظَر مستحيل. وأزيدكم من الزجاجة مصباح، من تزعمون كذباً وإفكاً أنه عادل عبد العاطي، هو نبي الله ورسوله إلياس ابن فاتح، أحد الأنبياء المتروك عليهم في الأخرين، وسيستيقظ، لو ليس اليوم فغداً. الرحمن أكبر والعزة لله جميعاً ولرسله والمؤمنين.

يحيى بن زكريا هو المهدي المنتظر، جدول قيام الساعة

Quote: عادل عبد العاطي .. نبي عديييل كدة !!

شفت يا مولانا مافي حاجة مرجعانا لوراء غير حسادتنا دي