مـن هُـنـا أُعـلـن إنـضـمـامـي لـلـمـؤتـمـر الـوطـنـي، وأسعى لمقابلة الـبـشـيـر، وأتحدى بلة الغايب.

نزولاً لرغبة العديد من الزملاء الذين أحبهم وأحترمهم
في هذا المنبر.

حا ازحلقك يا بلة الغايب.
بس اصبر...

يا معاويه بطل هظار و انضمه انضمامك احسن لك

عارف جنس الخرمجه الحاصله دي ونوع الحركه الشعبيه البتقول الرفيق موسي هلال

اخير المؤتمر الوطني!! صدقني علي الاقل بيلعب في المكشوف.

وبعدين قالوا لو عشقته اعشق قمر ولو سرقته اسرق جمل

البخلي الناس تقبل باتباع المؤتمر الوطني و ترفض الموءتمر الوطني شنو؟!

Quote: يا معاويه بطل هظار و انضمه انضمامك احسن لك عارف جنس الخرمجه الحاصله دي ونوع الحركه الشعبيه البتقول الرفيق موسي هلال اخير المؤتمر الوطني!! صدقني علي الاقل بيلعب في المكشوف. وبعدين قالوا لو عشقته اعشق قمر ولو سرقته اسرق جمل البخلي الناس تقبل باتباع المؤتمر الوطني و ترفض الموءتمر الوطني شنو؟!

ازيك يا عاصم فقيري
ياخ بركة الشفناك طيب ومتعافي
اها في الخبرية اقول ليك
عششاق المؤتمر الوطني في السر وبالغتغتة اكتر من ناس
ود الباوقة ذات نفسهم

المحترم معاوية المدير سلام

هل سرق أحدهم باسويردك ؟

.

ود المدير انت زول طيبان ، ديل قالو الجو جوه والبره بره وبعدين انت جايهم مدير يعني يشيلو لك البشير ،

يا تراجي وعاصم،

موسي هلآل رجل ليس لديه مبادئ، وربما يكون
مدفوع من قبل الحكومة لخلق زعزعة داخل صفوف
الحركة الشعبية.

موسي هلآل معانا، يعني مؤتمر وطني...

بلة بتاع العسل،
ما حا أخليك لو حشدت شواطينك كولها.

Quote: المحترم معاوية المدير سلام هل سرق أحدهم باسويردك ؟

لا،
دا أنا بكامل قواي العقلية ومهاراتي الفردية.

شكراً نعمات،
يباركولك جديد وِليداتك...

والله يا مدير انا خايف يكونو متابعين المنبر
فاذا كان ذلك كذلك فاكيد حايقولو
ما دايرنك
وتبقى سابقة اول زول يرفضو
المؤتمر الوطنى

Quote: ازيك يا عاصم فقيري ياخ بركة الشفناك طيب ومتعافي اها في الخبرية اقول ليك عششاق المؤتمر الوطني في السر وبالغتغتة اكتر من ناس ود الباوقة ذات نفسهم

يا ابو روضة ياخ ما تبارك لي،
أها كدا أنا لآيمك، ولآيم معاك
قريبي ود الباوقة كمان.

غتغتة شنوكمان؟، دا ما بوست وااااااضح...

Quote: Fouz Almansi · الأكثر تعليقا احلand#1740; خبر ..^_^ باين انو بعض المتداخلين ما كانو متابعين كأس العالم.

شكراً يا فوز علي المباركة،
إن شاء الله نجيك في السمح.

بلة الغايب قايل نفسو براهو الختري، سوف
أجعله عبرة للعابرين.

يعيش البشير...

سيدي الرئيس موسي هلآل خائن للوطن ومتمرد
رغم محاولته إنكار ذلك، عليه فالرجاء التعامل
مع موسي هلآل وأمثاله بالحسم والحسم الفوري.

سير يا بشير وعين المولى ترعاك،
ونحن معك...

Quote: ود المدير انت زول طيبان ، ديل قالو الجو جوه والبره بره وبعدين انت جايهم مدير يعني يشيلو لك البشير ،

يا بت المشرف سلآم.

أنا لا أبحث عن منصب إنما عرفت الحق وإتبعته،
الله يهديكم. حا ادعي ليكم...

ما فهمنا حاجة
هل بلة الغائب قال انو
ود المدير لا يمكن ينقلب و يصبح مؤتمر وطني
و انت عايز تثبت ليهو العكس و لا شنو ؟

اللهم كما تبين ود المدير في الاسبان والانجليز والبلجيك وغيرهم فبينه في المؤتمر الوطني وانصره على الدجال
اللهم امين

ود المدير سلامات
والله عندي سؤال مكسوف منه شوية
الأخو عجلاتي ؟
كان ماعندك هم في الشغلانية دي وطيب

اهو ده اللعب الصاح...
كده النتيجة مضمونة...
وقول لي فرج كده غيمت ليكم ا البخات...
عليك الله اشملن...
نتيجة معملية...
ود المدير عنصر مبارك بشغلب ايتها ريكة اقعد فيها...
بله الغائب..
ارزقي فالح،،،سيبو في حالو..

انت ناوي تغطس حجر المؤتمر الوطني , مش برضو كنت بتشجع البرازيل , دي خطه 4 -2-4 ال كان بقولو عليها وبعدين بله ده برضو 4-2-4 , صدق انا كنت مرشحه هولندا المانيا وندمت ندامه الكسعي وجرير ذاتو .

أشكر جميع الإخوة الذين حفزوني للإنضمام لحزب المؤتمر الوطني،
نسبةً لمقدراتي الفائقة، وأحي سيدي الرئيس، وأتوعد بلة بتاع العسل...

.

Quote: ود المدير سلامات والله عندي سؤال مكسوف منه شوية الأخو عجلاتي ؟ كان ماعندك هم في الشغلانية دي وطيب

لا،
لكن من اتبرا.
ايّ سؤال تاني ؟.

عليكم السلآم.
شكراً ورمضان كريم...

Quote: يا ابو روضة ياخ ما تبارك لي، أها كدا أنا لآيمك، ولآيم معاك قريبي ود الباوقة كمان. غتغتة شنوكمان؟، دا ما بوست وااااااضح..

ابارك ليك شنو يا ود المدير وانت بعد ما لبنت عايز تديها الطير
وشايفك حتى نكرت قرابة معاوية عبيد واستجرت بصناجة ود الباوقة ههههههههههههههههههه
غايتو البوست ده ما ياهو ولا انت ما ياكا
والباركو ليك وقالوا ليك ناس عاصم فقيري ديل زهجانيين ساكت من الانشقاقات وحوادث المرور
الجمل يا ود المدير
جمل طين واول ما تخلف كرجليلك وتتوهط بنفزر بيك دحين يا اخوي دير بالك
ابقى عشرة الراعي واعي المتلك مستحيل يبقى وليداً عاق

الختيتوها رقد يا ناس حزب المؤتمر الوطني. والله صحي.
ولا وآحد ما يجي يهنيني بهذه الخطوة الجريئة !!!،.
هسّع دا كان وآحد من المؤتمر إنضمّ للمعاضة كان الناس
جوهو زرافاتاً ووحدانا من كل فجٍ عميق.
الفيكم إتعرفت، ولن اتراجع عن موقفي.


سير، سير، يا بشير...

غايتو موسي هلال زعلك زعل شديد , نور تاور زعلانه بس ما وصلتها الميس وبعدين الاستعجال ما سمح = اصطف الجماعة بهناك ف خليك حريف وانتظر اني معك من المنتظرين

يازول كان داير تعرس ليك واحدة تانية عرس بسكات ساي


بعدين كدا الرئيس ما بسمعك

طلبك دا تمشي تقدمو في بوست صلاح غريبة

لفيت وجيت لفيت وجيت وثالث مره = لاك داير منصب وحاشاك حسب تاريخك لا داير تعرس مثني و..... لاك ميرود لاك ملدوغ تكون زعلان .؟~
ايام لها ايقاع 14 /7/1789 الثوره الفرنسيه - 30/ 6 /1989 الانقاذ 16 /7 /2014 دخول ود المدير المؤتمر الوطني

Quote: مع موسي هلآل

الحمد لله الـ مابِقا موسي مريخ
الـ بِلِدْ المِحَن لابداً يَلولي سُغارِن

يا جماعه هووي وكتين ود المدير أعلن ولاؤه أبشرو بالخير ..
خلو النضمي وجهزو حالكم ..
ود الباوقة أحسن بسراع يمشي يصفي أمورو أهو أنا قلت ليهو ..
مش بقولو اسأل مجرب ولا تسأل طبيب .

والله يا ود المدير
من ناس ابو روضة وعادل ديل
يحلك الحلا بلة

Quote: والله يا ود المدير من ناس ابو روضة وعادل ديل يحلك الحلا بلة

هههههههههههههههه،
بلة بتاع العسل ؟.
يا خالد بلة دا عامل فيها بتاع جن، وقال عندو مراح من الصنف
الطيار، ومراحين من الصنف السفلي، لكن أنا طلعت أشفت مِنو
وظهرت لي كرامات ما ليها حد، فأنا داخل معاهو في تحدي
وسأكون من المقربين وأجعله من المُبعدين.

يا اخ عادل دا بالغ. والله صحي...

Quote: والله يا مدير انا خايف يكونو متابعين المنبر فاذا كان ذلك كذلك فاكيد حايقولو ما دايرنك وتبقى سابقة اول زول يرفضو المؤتمر الوطنى

يا خالد يأخي هِي قولة ما دايرنك دي كيفنها ؟.
يأخي ولا وآحد بالغلت يجي يبارك مافي !،
أها، كيتاً ليهُن أصلي ما بغير موقفي.
لكن طلعو شفوت، عارفين مقدراتي الفنية عالية
وحا أختها لبلة بتاع العسل بالبيضة...

يا معاوية المدير..

كوله جايز..
بعد ما موسى هلال بقى الرفيق..
وبقى بطل ونصير للضعفاء...
وحيحل لينا كل مشاكل السودان..
الما بخليك تبقى مؤتمر وطنى شنو؟
هى الحركة الشعبية أخير منك فى شنو يعنى؟
اشمعنى هى تبقى مع موسى هلال...
وأت تبقى اهالى ساكت؟
لا والله..
سير سير ونشد من أزرك..
بس شوف لينا معاك وظيفة صغيرونه كدا ندفع بيها ايجار فى السودان..
ونرجع من الغربة وعذابها...

Quote: يا بني أركب معنا ، دي بركات الصيام ، والقيام ، أكيد ح تروح ، العُمرة ، عزالدين عباس الفحل ابوظبي

تركب الشوك.
أدينا قروشنا، وامش أُكل نارك
المولعا بهناك ديك...

.

صباح الخير يا ود المدير

شايف الكيزان طلعوا ناصحين شديد
شكلهم خايفين على بلة الغايب أكثر من خوفهم على الريس

لو انضميت للمؤتمر الوطني وبس كان جوك بالنحاس
مشكلتك عايز تغطس حجر بلة الغايب

أدب المدايح عرفناه
دة إسمو أدب شنو؟
وللا لسة ما سموهو؟؟؟
غايتو جنس أدب!!!!!!
أدب خستكة وفى رواية اخرى أدب استنكاح طالما فيها بلة الغايب حاضر...

هاك المنقول دا يا مدير
قولة كوز كفاية.. براها فيها مذلة
الكوز..اصلو فى المطبخ رفيقتو الحلة
الكوز لص.. ونصيبتو.. ما بتنقلَّ
وكت اجى ينهبك.. بنده.. يقول يا الله

يا مدير حتما ستكون من الأولين
وتكون أكثر المغربين
وأملس المنعمين
سيـأتيك الجن مره من كل حين
سيتلو عليك بعض من أمر
سيمضي معك أقل من شهر
ثم يرتعد منك في كل أمر
فيأتيك غندور يميس مثل الشطة حين يتخللها ليمون
لا يلبسك عباءة الصدق
فخز منه باليمين
مازلنا في زمن الكذابين
ستبدو أكثر وسامة
في هنداماً أنيق
وهمر عريض
سفناً في البحر العريض
لحظتها سنأتيك نحن المريدون
يأتيك أبو روضة يشتهي كيفما يكون
وأهل بكري وما يفعلون
سنصدقك ونقول والله العظيم
ستغدو أتبرا فانظروا كيف تكون
صدق البشير وقد كذب المنجمون
....................
بعضاً من مريد في زمن اليد سكين
فيه أنا آلة التكفير
فيه الأنا فاكهة القتل الرخيص
أعلن معي توبتي
سيمضي النهر دماًً
والسماء مجنون
كيف يغدو الحظ عريض
مشهد عبثي فيه العرائس تجول
..................

سمح شخي الليلة جاء
رامي الشال الليلة جاء
باسط الخير الليلة جاء
بديك الهمر الليلة جاء
وشه قمره الليلة جاء
المنه بسمه الليلة جاء
محايتو ليمون الليلة جاء
كاشف الغمة الليلة جاء
سفير الآمة الليلة جاء
سائق البلي الليلة جاء
عسلوا ماليزي الليلة جاء

يا شيخ العرب انت قايل الانضمام دا هين كدي
والله لن تدخل المؤتمر الوطني حتي تجي البلد دي وتلبس الكاكي المبرقط
وتبقي دباب وتمشي الحرابة أهي لسع مدورة في الجنوب الجديد اهو تراك عافيتنا من حق الموس
وللإحتياطي كدا اعمل لك فديو وابصم فيهو بصلعتك دي واهتف بتشنج هي لله ...هي لله ... لا للسلطة ولا للجاهـ
رمضان دا كان صايموا معانا في سمايم اتبرا كان عزرناك
:
:
:
:
:
مع التحياتي لله الزاكيات

http://www.sudaneseonline.com/board/470/msg/1403202968.html

كدي اُخدولكُم جولة في الرآبط.
البوست طويل، والبال لآزم يكون طويل...

Quote: Haider Hassan · الأكثر تعليقا · Zagazig University ياوغد ، شاورت ود الزين وانا

اووووووه،
يا حبيب والله مشتاق ليك زي شوقي
لأتبرا. يا اخي لو عارف إنضمامي
دا بيجيبك كان إنضميت من زمان.
رمضان كريم، ومشتاقين. والله صحي.

ما شاورتكم لأني عارفكم بتغتسو حجري...

Quote: اللهم كما تبين ود المدير في الاسبان والانجليز والبلجيك وغيرهم فبينه في المؤتمر الوطني وانصره على الدجال اللهم امين

آممممممممين.

تعرف يا ود الفكي الدجال دا لو طعنتو شوكة أنا حأكون
بين نارين، ناس حا يكونوا غضبانين علي غضب شديد،
وديل السفاح وجماعتو، وناس حا يعتقدوا فيّ شديد، وديل
الناس الإكتشفو موهبتي. يا ود الفكي غايتو لو طعنتو شوكة
أنا ببني لي مسيد فيهو قُبة، وكان ما جيّت زُرت فوقي بسختك...

Quote: اهو ده اللعب الصاح... كده النتيجة مضمونة... وقول لي فرج كده غيمت ليكم ا البخات... عليك الله اشملن... نتيجة معملية... ود المدير عنصر مبارك بشغلب ايتها ريكة اقعد فيها... بله الغائب.. ارزقي فالح،،،سيبو في حالو..

ههههههههههههههه،

يا قريبي بلة العسل ما يسوى ايّ حاجة مع ود المدير. قال قول
العارفين، البرازيل شايلة الكأس، لآمِن إنكسرت شوكتا نكر وقال،
الصحفيين هُم القالوا كدا !!!. شُفت كيف ؟، مُصِر إنو بيعلم الغيب.
بلة العسل أحمق.
شايفك لآعب علي المضمون، ابشرك النتيجة
حا تكون 6/ 0، وأخوك حا يكون ليهو ظيّط اكبر
من بلة العسل...

يا مدير
ما بتدور لك حوار يملا لك الاباريق؟
انا برشح الخبير

Quote: انت ناوي تغطس حجر المؤتمر الوطني , مش برضو كنت بتشجع البرازيل , دي خطه 4 -2-4 ال كان بقولو عليها وبعدين بله ده برضو 4-2-4 , صدق انا كنت مرشحه هولندا المانيا وندمت ندامه الكسعي وجرير ذاتو .

يا إخلاص عليك الله ما تلخبتي الكيمان، الكان متأكد
من فوز البرازيل دا بلة العسل. أنا كُنت مرشح إنجلترا
ومن إنجلترا دي كراماتي بدات تظهر.
بسختك تاني كان جبت لي سيرة البرازيل...

Quote: ابارك ليك شنو يا ود المدير وانت بعد ما لبنت عايز تديها الطير وشايفك حتى نكرت قرابة معاوية عبيد واستجرت بصناجة ود الباوقة ههههههههههههههههههه غايتو البوست ده ما ياهو ولا انت ما ياكا والباركو ليك وقالوا ليك ناس عاصم فقيري ديل زهجانيين ساكت من الانشقاقات وحوادث المرور الجمل يا ود المدير جمل طين واول ما تخلف كرجليلك وتتوهط بنفزر بيك دحين يا اخوي دير بالك ابقى عشرة الراعي واعي المتلك مستحيل يبقى وليداً عاق

يا ابو روضة يأخي أنا بين نارين، ود الباوقة قريبي وود الصايم
نسيبي!!!، شُفت الشقاوة . بعدين داير انكُرُن اللِتنين عشان كان
إنقلبت علي صفحة ايّ وآحد بيدوني علي راسي.
فقيري وتراجي فكو الزهجة فيني، غايتو جِنِس مِحن !!!...

Quote: يازول كان داير تعرس ليك واحدة تانية عرس بسكات ساي بعدين كدا الرئيس ما بسمعك طلبك دا تمشي تقدمو في بوست صلاح غريبة

حِمديتي السريع،
كيفك ؟.
حا نحوّل الطلب للخبير الإستراتيجي فوراً. شايفو أدوهو
التوكيل. طبعاً أنا علآقتي معاهو حديد، عشان كدا الوآسطة
في السِلِك، معليش الحكاية دي حا تأثر علي مرور طلباتكم.

أسمع، أنا لآمن ابقى علي العرس معناتا شتلتي قبضت...

Quote: Salah Ldris · كمبوني والله ياصاحبي حيرتنا ماعرفت ليك اول من اخر ولاراس خيت امشي فيهو تكتب لنفسك وترد لنفسك بس كلامك لغز يحير وغالبا الجانب التاني فاهم انت بتقول شنو والله جد حائر

صلآح يا صاحب،
سلآم ورمضان كريم.

عليك بالرآبط الفي رأس الصفحة دي، وركّز علي الناس
الإقترحوا علي الإنضمام للوطني، اللغز حا يتحلّ معاك،
وحا تلقاهم علي حق...

من أراد أن يعرف سبب تسميتي لبلة ببلة العسل
يراجع الدقيقة 42 من الفيديو عشان تشوفوا الناس
الحاكمين البلد، عشان تشوفو كبيرهم الذي يؤمن
إيمان قاطع بالسحر. تابعو عشان تشوفوا صاحبكم
قعد يلحوِس في العسل كيف !. بئس القائد وبئس
الرئيس، عليه لعنة الله.

Quote: الحمد لله الـ مابِقا موسي مريخ الـ بِلِدْ المِحَن لابداً يَلولي سُغارِن

إختلط الحابل بالنابل يا ابن عمي،
ما عادت فارقة هلآل مريخ أو حركة
شعبية ومؤتمر وهمي. المِحن تُولد
في بلدنا كل يوم...

ااود المدير اوعاك من بله الغايب ده ... يمين الجنا ده لو اتدرعك بمراحو ده الا يغتس حسك...

الزول ده ااود عمي اتلقاهو بالحوقلة ... وان بقيت داير تدرع الموتمر كمان خدلك قزازة واملاها موية ملح واتقرقر بيها ... واقنت بطول حسك لا لدنيا قد عملنا... واجغم من ط ف

Quote: يا جماعه هووي وكتين ود المدير أعلن ولاؤه أبشرو بالخير .. خلو النضمي وجهزو حالكم .. ود الباوقة أحسن بسراع يمشي يصفي أمورو أهو أنا قلت ليهو .. مش بقولو اسأل مجرب ولا تسأل طبيب .

والله ما قصرّت مع قريبي ود الباوقة يا ملك،
لكن خلي بالك هو ما عندو في عقيدة، وهذا
الذي سيورده موارد الهالكين...

ود المدير أخيرا هداك الله واتبعت صوت الحق

مرحبا بك تحت شجرة المؤتمر الوطنى الظليلة

يلا جهز نفسك علشان تحمل السلاح مجاهدا

لمدة 6 شهور على الأقل لو رحت فى حق الله

سيشكروك ويعملوا ليك عرس الشهيد المو خمج

ويزفونك لإحدى حور العين وإن عدت سالما نقنقوك

إذا إنت فى كل الأحوال كسبان وماك خسران

ابارك و أهنى أخى ود المدير و أثق فى قدراته التى ستعود

على السودان بالخير الوفير .سبر سير يا مدير !

Quote: يا معاوية المدير.. كوله جايز.. بعد ما موسى هلال بقى الرفيق.. وبقى بطل ونصير للضعفاء... وحيحل لينا كل مشاكل السودان.. الما بخليك تبقى مؤتمر وطنى شنو؟ هى الحركة الشعبية أخير منك فى شنو يعنى؟ اشمعنى هى تبقى مع موسى هلال... وأت تبقى اهالى ساكت؟ لا والله.. سير سير ونشد من أزرك.. بس شوف لينا معاك وظيفة صغيرونه كدا ندفع بيها ايجار فى السودان.. ونرجع من الغربة وعذابها...

يا نور عشان أنا عرفت من اين تؤكل الكتف الجماعة حسدوني،
ودايرين يخونوني كمان !. ناس موسى هلال ديل ينططو زي
كِـلآبـ السيجة زول بيقولهم عينكم في راسكم مافي، اوآت تجي
عندنا نحن المساكين ديل يجو ناطين.
اشكرك علي وقفتك العملآقة معي، وليك علي
وظيفتك جاهزة. يا زولة فترنا من الصقط دا...

يا ابو حسين، تضحك بلآهِن يعجبك خلآهِن يا قول أخونا
صديق مهدي الله يطرا بالخير.
ورطني وقعدت تضحك مُش!!!؟؟؟، غايتو إنتو يا ناس
الحكومة !!!...

Quote: صباح الخير يا ود المدير شايف الكيزان طلعوا ناصحين شديد شكلهم خايفين على بلة الغايب أكثر من خوفهم على الريس لو انضميت للمؤتمر الوطني وبس كان جوك بالنحاس مشكلتك عايز تغطس حجر بلة الغايب

جعفر محي الدين،
رمضان كريم. عطرّت ساحاتنا بمورك الجميل
يا زول يا سمح.

الكيزان عقيدتهم أرسخ من عواتي الجبال في بلة بتاع العسل،
وعلي رأسهم المشير البشير، ما شايفو قال لبلة أنزل لنا مائدة
من السماء !؟. يا اخي الحواريين قالوا لسيدنا عيسى هل يستطيع
ربك أن ينزل علينا مائدة من السماء ؟. لكن البشير ختاها ليهو ظط
كدا من مُنطلق إيمان لا يأتيه الباطل من ايّ إتجاه، إيمان كامل
شامل منقطع النظير.
يا جعفر كلو ولا بلة. شُفت نحن يحكمنا ويتحكم فينا ايّ نوع من
البشر ؟. قال تعالى، ولنبلونكم...

Quote: أدب المدايح عرفناه دة إسمو أدب شنو؟ وللا لسة ما سموهو؟؟؟ غايتو جنس أدب!!!!!! أدب خستكة وفى رواية اخرى أدب استنكاح طالما فيها بلة الغايب حاضر...

سلآمات يا منان،
ورمضان كريم.
أهلاً بيك في دارنا العامرة بالدجل والشعوزة.
بلة العسل غائب في عالم الجِن حاضر في عالم أصحاب العقول الضعيفة،
جسم البغال وأحلآم العصافير. 25 سنة من عمر السودان بين الحضور
والغياب، يبدو أنّ الأمر قلة ادب، ولا علآقة له بالأدآب...

Quote: يا شيخ العرب انت قايل الانضمام دا هين كدي والله لن تدخل المؤتمر الوطني حتي تجي البلد دي وتلبس الكاكي المبرقط وتبقي دباب وتمشي الحرابة أهي لسع مدورة في الجنوب الجديد اهو تراك عافيتنا من حق الموس وللإحتياطي كدا اعمل لك فديو وابصم فيهو بصلعتك دي واهتف بتشنج هي لله ...هي لله ... لا للسلطة ولا للجاهـ رمضان دا كان صايموا معانا في سمايم اتبرا كان عزرناك

تكاكي جدادة يا الكُعوبية، اوّل إنت الكاكي لبِستو مسوى خِليقتك
دي؟. اريتني بسمايم اتبرا ورمضانا، الغربة هرتنا وناسكم
الما عندهم دم ديل مكنكشين.
أنا لايمك، نعمني جيت السودان وما سقتني وريتني محل
السيور. أوعك الناس ديل يغشوك يودوك الحرابة، عليكم
الله أنا ما غبيان، بوصي مِنو !!!؟؟؟...

Quote: Ahmed Mohammed يا معاوية الف الف مبروك بان اخترت الطريق الصحيح فالمواقف مسؤولية امام المولى عز وجل نسال الله ان يوقفك

سلآمات يا أحمد،
ورمضان كريم.

نسأل الله ببركة هذا الشهر الكريم أن يرينا وإياكم الحق حق ويرزقنا إتباعه،
ويرينا الباطل باطل ويجنبنا إياه. لن تجد إسمي يا أخي أحمد مسجل في
كشوفات حزب، فأنا لا أتبع لحزب ابداً. إستبشرت خير بجماعة الإنقاذ في
بداياتها، لكن لم يطول الوقت حتي ظهر حيادهم عن طريق الحق، ووالله
لو إتبعوا طريق الحق ما توانيت في إتباعهم، لكنهم أهل دنيا وترديدهم
ما لدنيا قد عملنا يوصمهم بالنفاق نسأل الله السلآمة.
تحياتي لك أخي أحمد...

Quote: Bomedian Mohamed · جامعة الخرطوم أفــــو شـــيخــنا ود الـمـدير .. حـرررم دي مـا تشــبهـك .. آخــر عـمـرك ، بـعـد الـفروســيه دي كـلـهـا ، والـرجـالـه دي كـلـهـا .. تنضـم لـي حـسين خـوجـلـي ، والـهـندي عـد الـطين ؟؟. حـرررم واحــد صــاحـبي ( عـجـلاتي ) مـاهو مـن اتبرا .. قـال الـهـندي عـد الطين عــندو شـنطـة مكياج .. الله وكـيلـك ، مـا ناقصــا عــلا حـفـرة الـدخــان ، وفـركـة الـقـرمـصـيص ؟؟!!. قـر قـر قـر قـر قـر قـر قـر يا قـول تبلـدينا ؟؟؟.

هههههههههههههههه،

يا بومدين كراع البقر جيابة، وعمك بلة العسل ناوي للهندي عز الدين
نية اب عفنة. الهندي ركّب عمّك ماسورة خمش الدعوة وعمل نايم
لكن بلة بتاع العسل قال ما بيخليهو. بلة العسل يدعي انّ دعوته هي
السبب في شهرة الهندي عز الدين ووصف الهندي بأنه زول مهذب
وهادئ ويتحبّ، علماً بأنّ سبب شهرة الهندي تطاوله علي
الناس وتخطيه لحدود الأدب في كثير من مقالآته.
اتبرا يا بومدين مدينة تشهد لو المدير،
شُفتلك مدينة كاملة بتشهد لزول !؟. كُنت قبل أن أغادر اتبرا
أعرف جميع أهلها، وجميع احياءها، وجميع شوارعها، لدرجة
انني كنت مع إبن عمي في محطة السكة حديد وكان في قطر
وزحمة كبييرة من المسافرين والمودعين، وكنا كلما مشينا خطوات
ناداني زول، معاوية المدير لدرجة ان إبن عمي قال لي، يا زول
إنت السيد علي وللآ شنو ؟. ناس وبلد أحببتهم وأحبوني وعرفتهم
وعرفوني، فهم يشهدون لي وكفى...

Quote: يا مدير ما بتدور لك حوار يملا لك الاباريق؟ انا برشح الخبير

بعد ذات الرُكبة الشافتا عيني،
خبيرك دا يملآ ليهو إبريقين علي اليمين يدق
الدلجة زي الماحصل شي.
شوف لي زول فرفارة، إنت قايل إسقاط الجماعة
ديل هيّن ؟...

Quote: هاك المنقول دا يا مدير قولة كوز كفاية.. براها فيها مذلة الكوز..اصلو فى المطبخ رفيقتو الحلة الكوز لص.. ونصيبتو.. ما بتنقلَّ وكت اجى ينهبك.. بنده.. يقول يا الله

ما شفت الرئيس دنقر ولِحس الحلة
يا ود الفكي ديل ناس كبيرهم ضلّ
آمن بالدجل ودرب الإله ليو خلا
وفي ساعة المِحن ينده يقول يا بلة
...

Quote: مازلنا في زمن الكذابين ستبدو أكثر وسامة في هنداماً أنيق وهمر عريض سفناً في البحر العريض لحظتها سنأتيك نحن المريدون يأتيك أبو روضة يشتهي كيفما يكون وأهل بكري وما يفعلون سنصدقك ونقول والله العظيم ستغدو أتبرا فانظروا كيف تكون صدق البشير وقد كذب المنجمون

يا ود البراري لا حاجة لي بكم وبجمعكم عندما أسلك
سبيل العارفين. أبحثو عن شخص غيري فإني عندها
لن أجد ما أحملكم عليه، لأنني سأصير متمسك بنهج
الجماعة وإلا فالضلال حليفي...

Quote: ااود المدير اوعاك من بله الغايب ده ... يمين الجنا ده لو اتدرعك بمراحو ده الا يغتس حسك... الزول ده ااود عمي اتلقاهو بالحوقلة ... وان بقيت داير تدرع الموتمر كمان خدلك قزازة واملاها موية ملح واتقرقر بيها ... واقنت بطول حسك لا لدنيا قد عملنا... واجغم من ط ف

سلآمات يا آآ ود اعمي.

السبب الخلآني إتجاسر علي بلة بتاع العسل رغم مراحو
تفوقي الواضح عليه في كأس العالم، ودي لا ينتطح فيها
عنزان.
إنتهى زمن موية المِلِح، علي اليمين في الزمن العلينا دا
تتغرغر ببحر المالح وتقعد تنبح زوووول يسعل فيك مافي.
الفهم بقى فهم ناس حميديد وجماعتو. إنت يا النوسي أخوي
من زمن عيييييييك قفا نبكي خلي بالك...

Quote: ود المدير أخيرا هداك الله واتبعت صوت الحق مرحبا بك تحت شجرة المؤتمر الوطنى الظليلة يلا جهز نفسك علشان تحمل السلاح مجاهدا لمدة 6 شهور على الأقل لو رحت فى حق الله سيشكروك ويعملوا ليك عرس الشهيد المو خمج ويزفونك لإحدى حور العين وإن عدت سالما نقنقوك إذا إنت فى كل الأحوال كسبان وماك خسران

يا جمال إنت زاتك زي السنوسي، من زمن عييييييييك
قفا نبكي. يا زول زمن الجهاد وعرس الشهيد دا زمن
راح ومضى وهي مرحلة أعقبتها مراحل كتيرة ومسيخة،
والحكاية طمبرت يعني صفرجت وإنتهت. الحكاية دي
من الصعب تاني تكون فيها، وأنا داخل عشان اطفيها
زادي وعتادي هو مقدراتي المهولة وكراماتي التي
ظهرت في كأس العالم. قبل الليلة قلت لناس ود الفكي
وحيدر الزين في بوست فتاة وادي السليكون أنا ظاهرة
جديرة بالدراسة، سخرو مني وها هي الأيام تثبت
ذلك.
مودتي...

Quote: ابارك و أهنى أخى ود المدير و أثق فى قدراته التى ستعود على السودان بالخير الوفير .سبر سير يا مدير !

يباركولك جديد الوِليدات يا نعمات.
الحمد لله الربنا هداك، واشكرك علي ثقتك في
مقدراتي اللنا اصلي عارفا عالية، وعالية جداً
كمان...